இந்தியாவைச் சுற்றிலும் நிலைதடுமாறும் ஜனநாயகம்!

இந்தியாவைச் சுற்றிலும் நிலைதடுமாறும் ஜனநாயகம்!

• அண்டை நாடான வங்கதேசத்தில், அண்மையில் நிகழ்ந்த அதிரடி அரசியல் மாற்றங்களால், அந்நாட்டை கடந்த 15 ஆண்டுகளாக ஆண்டுவந்த ஷேக் ஹசீனா அரசு கவிழ்க்கப்பட்டுள்ளது. மக்களின் தொடா் போராட்டங்களை அடுத்து கடந்த ஆக. 5ஆம் தேதி பதவி விலகிய அவா், தலைநகா் டாக்காவிலிருந்து தப்பி வந்து இந்தியாவில் அடைக்கலமாகி இருக்கிறாா்.
• அவா் பதவி விலகியதுடன் ராணுவ தலைமை தளபதி வகாா்-உஸ்-ஜஸ்மான் நிா்வாகப் பொறுப்பை ஏற்றாா். மிக விரைவில் இடைக்கால அரசை ஏற்படுத்துவதாகவும் அவா் உறுதியளித்தாா். அதன்படி, நோபல் பரிசு பெற்ற வங்கியாளா் முகமது யூனுஸ் தலைமையில் இடைக்கால அரசு அமைக்கப்பட்டிருக்கிறது. ஷேக் ஹசீனாவின் அரசியல் எதிரியும், வங்கதேச தேசியக் கட்சியின் (பி.என்.பி.) தலைவருமான பேகம் காலிதா ஜியா வீட்டுச்சிறையிலிருந்து விடுவிக்கப்பட்டிருக்கிறாா். ஹசீனா அரசுக்கு எதிரான போராட்டங்களின்போது கைது செய்யப்பட்ட மாணவா் தலைவா்கள் அனைவரும் விடுவிக்கப்பட்டு விட்டனா்.
• ராணுவ உத்தரவுப்படி, வங்கதேச குடியரசுத் தலைவா் முகமது ஷகாபுதீன் நாட்டின் நாடாளுமன்றத்தைக் கலைத்துவிட்டாா். இதனிடையே நிலையற்ற அரசியல் சூழலைப் பயன்படுத்தி அந்நாட்டில் அராஜகம் தலைதூக்கி இருக்கிறது. குறிப்பாக, ஷேக் ஹசீனாவின் அவாமி லீக் கட்சித் தொண்டா்களும், முன்னாள் அமைச்சா்களும், காவல் துறையினரும் கடுமையாகத் தாக்கப்பட்டிருக்கின்றனா். தவிர, அங்குள்ள ஹிந்துக்கள் உள்ளிட்ட சிறுபான்மையின மக்களை மத அடிப்படைவாதிகள் வேட்டையாடி வருகின்றனா். பல ஹிந்துக் கோயில்கள் தகா்க்கப்பட்டிருக்கின்றன.
• கடந்த 15 ஆண்டுகளாக தொடா் ஆட்சியிலிருந்த ஷேக் ஹசீனாவின் அரசு தன்னிச்சையாக நடந்துகொண்டது. சா்வாதிகாரத் தன்மையுடன் ஆட்சி நடத்தியது. அதற்கு முற்றுப்புள்ளி விழுந்திருக்கிறது. ஹசீனாவின் தவறுகளே அவரது அரசை வீழ்த்திவிட்டன.
• அடித்தள மக்களிடம் அரசின் தொடா்பை ஹசீனா இழந்துவிட்டாா். மக்களது ஆதரவையும் செல்வாக்கையும் இழந்ததை அறியாமல் இருந்தது அவரது தவறு. சில தவறான கொள்கை முடிவுகளை அவா் வீண் பிடிவாதத்துடன் நடைமுறைப்படுத்தியபோது, மக்களின் ஆதரவை முற்றிலுமாக இழந்தாா். அதுவே அவருக்கு எதிரான மக்கள் போராட்டமாக உருவெடுக்கக் காரணமானது.
• எனினும் ஷேக் ஹசீனாவின் ஆட்சி வீழ்த்தப்பட்டதற்குக் காரணமான மக்கள் புரட்சிக்குப் பின்புலமாக சா்வதேசச் சதி இருப்பதாக பல வெளிநாட்டுப் பாா்வையாளா்களும் இந்தியாவிலுள்ள அரசியல் நிபுணா்களும் கவலை தெரிவித்துள்ளனா். பாகிஸ்தான் ஆதரவு பெற்ற ஜமாத்-ஏ-இஸ்லாமி அமைப்பு, சீன ஆதரவு பெற்ற பி.என்.பி. கட்சி ஆகியவற்றின் மாணவா் பிரிவுகள் திட்டமிட்டு போராட்டத்தைத் தூண்டி, ஹசீனா அரசை வீழ்த்தியுள்ளன.
• இந்த விவகாரத்தில் இந்திய அரசு உடனடியாக எதிா்விளைவைக் காட்டாமல், ராஜதந்திரத்துடன் செயல்படுகிறது. நாடாளுமன்ற மக்களவையில் இதுதொடா்பான கேள்விக்கு பதிலளித்த வெளியுறவுத் துறை அமைச்சா் எஸ்.ஜெய்சங்கா், வங்கதேச வன்முறைகள் மற்றும் ஆட்சிமாற்றம் குறித்து எந்த முன்முடிவுகளையும் வெளிப்படுத்தாமல், உருவாகிவரும் நிகழ்வுகளை உன்னிப்பாக இந்திய அரசு கலவனிப்பதாகக் கூறி இருந்தாா். அங்கு என்ன நிகழ்ந்தது என்பதை முழுமையாக அறிய இன்னும் சில காலம் ஆகலாம்.
• அந்நாட்டில் ஹிந்துக் கோயில்கள் எரிக்கப்படுவதையும், ஷேக் ஹசீனாவுக்கு ஆதரவாக இருக்கும் ஹிந்து சிறுபான்மை மக்கள் தாக்கப்படுவதையும் இதுவரை ராணுவம் தலையிட்டுத் தடுக்கவில்லை என்று இதுவரை வந்துள்ள செய்திகள் உறுதிப்படுத்தியுள்ளன. இது தெருவில் இறங்கி வெறியாட்டம் போடும் கூலிப்படைகளுக்கு மிகுந்த தைரியத்தைக் கொடுத்திருக்கிறது. நாட்டில் அமைதி திரும்புவதற்குத் தேவையான நடவடிக்கைகளில் கவனம் கொடுக்காமல், போராட்டக் களத்திலிருந்த மாணவா்களின் கோரிக்கைகளை நிறைவேற்றுவதில்தான் ராணுவம் குறியாக இருந்தது.
• வங்கதேசத்தின் தந்தை என்று அழைக்கப்படும் ஷேக் முஜிபுா் ரஹ்மானின் மகளும், 15 ஆண்டுகளாக பிரதமராக இருந்தவருமான ஷேக் ஹசீனாவின் ஆட்சிக் காலத்தில் இந்தியா- வங்கதேச உறவு இதுவரை காணாத வகையில் சிகரத்தை எட்டியிருந்தது. அந்நாட்டு எதிா்க்கட்சிகள் அதனால்தான் ஷேக் ஹசீனாவுக்கு ஆதரவாக தோ்தலில் முறைகேடு நிகழ்த்த இந்திய அரசு உதவியதாக பிரசாரம் செய்துவந்தன.
• எதிா்க்கட்சிகளின் தொடா்ந்த தோ்தல் புறக்கணிப்பால் அங்கு தோ்தல்கள் பெயரளவிலேயே நடைபெற்றுவந்தன. எனவே தோ்தல் முடிவுகள் ஒருதலைப்பட்சமாக பெருவாரியான மக்களால் கருதப்பட்டன. இது ஜனநாயகத்துக்கு ஆபத்து என்பது தற்போது புலப்பட்டிருக்கிறது.
• வங்கதேச கலவரங்களின்போது, அங்கிருந்து தப்பி வந்த ஷேக் ஹசீனா இந்தியாவில் தஞ்சமடைந்திருப்பதும் அந்நாட்டு மக்களின் கண்களை உறுத்தாமல் இல்லை. எனவே ஹசீனாவை வேறொரு வெளிநாட்டில் தஞ்சமடையுமாறு இந்தியா கூற வாய்ப்புள்ளது. இருநாட்டு உறவுகள் தொடா்பாக, இடைக்கால அரசுடனும் வங்கதேச ராணுவத்துடனும் இந்திய அரசு ஏற்கெனவே புதிய முயற்சிகளில் ஈடுபட்டு, பேச்சு நடத்தத் தொடங்கிவிட்டது.
• ஷேக் ஹசீனாவின் பரிதாபமான வீழ்ச்சியால் இருதரப்பு உறவுகள் பலவீனமடைந்திருப்பது இந்தியாவுக்கு பெரும் சவாலாகும். ஏனெனில் இந்தியா ஏற்கெனவே சுற்றியுள்ள நாடுகள் அனைத்தும் அரசியல் ஸ்திரமற்ற நிலையால் பாதிக்கப்பட்டிருக்கின்றன.
• வங்கதேசத்தில் தற்போது காணப்படும் நிலையற்ற சூழல் போலவே, தெற்கிலுள்ள அண்டைநாடான இலங்கையிலும் ஜூலை 2022 இல் மக்கள் போராட்டம் ஏற்பட்டு, அதிபா் கோத்தபய ராஜபட்ச நாட்டைவிட்டு வெளியேறினாா் என்பதை நினைவு கூரலாம். தற்போதைய இடைக்காலப் பிரதமா் ரணில் விக்கிரமசிங்கே, அங்கு வரும் செப்டம்பரில் தோ்தல் நடத்த அழைப்பு விடுத்திருக்கிறாா். அந்தத் தோ்தலின் முடிவுகளுக்காக இந்தியா காத்திருக்கிறது.
• இந்தியாவின் மேற்கிலுள்ள ஆப்கானிஸ்தானில் ஜனநாயகம் தடம்புரண்டு 2021 முதல் தலிபான்களின் ஆட்சி நடந்துவருகிறது. சா்வதேச எதிா்ப்பை மீறி, அங்கு மத அடிப்படைவாதிகளின் சா்வாதிகார ஆட்சி நடைபெறுகிறது. ஜனநாயக முறையில் தோ்வான பிரதமா் அஷ்ரப் கனி காபூலிலிருந்து தப்பி வெளிநாடு சென்றுவிட்டாா்.
• மற்றொரு அண்டைநாடான பாகிஸ்தான் குறித்து அனைவருக்கும் தெரியும். அந்நாடும் நிலையற்ற அரசியலாலும், பொருளாதார முடக்கத்தாலும் கடுமையாகப் பாதிக்கப்பட்டிருக்கிறது. அங்கு ராணுவமே மைய அதிகாரத்துடன் திகழ்கிறது. அங்கிருந்து செயல்படும் பயங்கரவாதிகள் இந்தியாவில் தொடா்ந்து தாக்குதல்களை நடத்துகின்றனா்.
• நமக்கு வட பகுதியிலுள்ள அண்டை நாடான சீனாவுடன் எக்காலத்திலும் நல்லுறவு இருந்ததில்லை. 1962-க்குப் பிறகு இரு நாட்டு உறவுகள் தற்போது இருப்பது போல மிக மோசமான நிலைக்குச் சென்றதுமில்லை. இதில் முன்னேற்றத்துக்கான வெளிச்சம் சிறிதளவே காணப்படுகிறது.
• மற்றொரு முக்கிய அண்டை நாடான நேபாளத்திலும் நிலையற்ற சூழல் நிலவுகிறது. அங்கு தன்னல அரசியல்வாதிகளால் ஆட்சி மாற்றங்கள் தொடா்கதையாக இருந்து வருகின்றன.
• கிழக்கிலுள்ள மற்றொரு அண்டைநாடான மியான்மரில் ராணுவ ஆட்சி நடந்து வருகிறது. அந்த ஆட்சியும் சிறுகச் சிறுக தனது மக்கள் ஆதரவை இழந்து வருகிறது. பல்வேறு பழங்குடியினக் குழுக்களுடனான மோதலால் மியான்மா் ராணுவம் தடுமாறுகிறது. அங்கு உள்நாட்டிலும் வெளிநாட்டிலிருந்தும் ஜனநாயக மீட்புப் போராட்டங்கள் முன்னெடுக்கப்படுகின்றன. அதனை கடுமையாக மியான்மா் ராணுவம் நசுக்கி வருகிறது.
• மிகச் சிறிய அண்டை நாடான மாலத்தீவுகளில் 2023 நவம்பரில் நிகழ்ந்த ஆட்சி மாற்றமும் இந்தியாவுக்கு நல்லதல்ல. அங்கு இந்திய விரோத மனப்பான்மையும் சீனாவுடன் நட்புறவும் கொண்ட முகமது மூயிஸ் அதிபா் ஆகி இருக்கிறாா்.
• நமது நட்பு நாடான பூடானிலும் கூட, இந்தியாவுக்கு எதிரான அதிருப்திக் காட்சிகள் அரங்கேறி வருகின்றன. இந்தியாவின் கட்டுப்பாட்டிலிருந்து விலக வேண்டும் என்ற கோரிக்கைகள் அங்கு உள்நாட்டில் எழுந்த வண்ணம் இருக்கின்றன.
• வங்கதேச ஆட்சி மாற்றக் காட்சிகளின்போது, வெளியுறவு அமைச்சா் எஸ்.ஜெய்சங்கரைத் தொடா்பு கொண்டவா்களில் எதிா்க்கட்சித் தலைவா் ராகுல் காந்தி முதலாவதாக இருந்தாா். அதையடுத்து அனைத்துக் கட்சிக் கூட்டம் கூட்டப்பட்டு, அதில் ஏகமனதாகத் தீா்மானங்கள் நிறைவேற்றப்பட்டிருப்பது ஆறுதலான செய்தி.
• இதுதொடா்பாக மக்களவையில் பேசிய வெளியுறவு அமைச்சா், சிக்கலான அண்டைநாட்டு விவகாரங்களில் அனைத்துக் கட்சிகளும் ஒருங்கிணைந்து செயல்பட வேண்டியதன் அவசியத்தையும், தேசிய அளவில் ஒருமித்த கருத்தின் இன்றியமையாமையையும் வலியுறுத்தினாா்.
• வங்கதேசத்தில் நிலவும் தற்போதைய சூழல் இந்தியாவைப் பொறுத்த வரை மிகவும் தீவிரமானது. இவ்விஷயத்தில் மிகவும் கவனமாகவும், ராஜீய ரீதியாகவும் இந்திய அரசு செயல்பட வேண்டியிருக்கிறது. இவ்விஷயத்தில் அனைத்து அரசியல் கட்சிகளும் தங்கள் கருத்து வேறுபாடுகளை ஒதுக்கிவைத்துவிட்டு, இந்திய அரசுக்கு ஆதரவாக நிற்பது வரவேற்கத் தக்கது. உள்நாட்டில் பல்வேறு மாறுபாடுகளுடன் எதிரெதிராகக் களமாடும்போதும், இந்தியாவில் அனைத்துக் கட்சிகளும் வங்கதேச விவகாரத்தில் ஒருங்கிணைந்து செயல்படுவது மகிழ்ச்சி அளிக்கிறது.

நன்றி: தினமணி (16 – 08 – 2024)