PREVIOUS
✖
இலங்கைத் தேர்தல் தமிழர்கள் உணர்த்தியிருப்பது என்ன?
November 25 , 2024
6 hrs 0 min
5
0
- 2024 நவம்பர் நாடாளுமன்றத் தேர்தலில் தேசிய மக்கள் சக்திக்கு (என்பிபி) கிடைத்த மகத்தான வெற்றி, அரசியல் அவதானிகளை வியப்பில் ஆழ்த்தியிருக்கிறது. சிங்களவர்களைப் பெரும்பான்மையாகக் கொண்ட தேசிய மக்கள் சக்தியானது, தமிழ்த் தேசியவாத அரசியலின் கோட்டையாக விளங்கிய யாழ்ப்பாண மாவட்டம் உள்பட வடக்கு, கிழக்கு மாகாணங்களில் உள்ள மாவட்டங்களில் பெரும்பாலான இடங்களை முதல் தடவையாகக் கைப்பற்றியிருக்கிறது.
- இலங்கையின் தேர்தல் வரலாற்றில் முதல் தடவையாக வடக்கில் இருந்து தெற்கு வரையும், கிழக்கில் இருந்து மேற்கு வரையும் இன, மத வேறுபாடுகளைக் கடந்து வாக்காளர்களின் அமோக ஆதரவைத் தேசிய மக்கள் சக்தி பெற்றிருக்கிறது. இதை எப்படிப் பகுப்பாய்வது?
வியப்பை ஏற்படுத்திய தேர்தல்:
- தேசிய மக்கள் சக்திக்குக் கிடைத்த மகத்தான ஆதரவு தேசிய ஒருமைப்பாட்டை நோக்கிய வழக்கத்தை மீறிய குறிப்பிடத்தக்க நகர்வு என்றும், வரலாற்றுரீதியாக மத்திய ஆட்சிமுறை மீது வெறுப்புக் கொண்டிருந்த பிராந்தியங்கள்கூட, அதிபர் அநுர குமார திசாநாயக்கவின் தலைமைத்துவத்தில் நம்பிக்கையை வெளிப்படுத்தியிருக்கின்றன என்றும் சில அரசியல் அவதானிகள் கூறியிருக்கிறார்கள்.
- “பாரம்பரியமான பிளவுகளைக் கடந்து தேசிய நோக்கு ஒன்றை வளர்ப்பதில் தேசிய மக்கள் சக்தி வெற்றி கண்டிருக்கிறது; பிரதான அரசியல் கட்சிகளின் தேர்தல் பிரச்சாரங்களில் சிறுபான்மைச் சமூகங்களை அழுத்தும் முக்கியமான பிரச்சினைகளுக்கு முக்கியத்துவம் கொடுக்கப்படவில்லை என்றபோதிலும், வடக்கு, கிழக்கிலும் நாட்டின் ஏனைய பாகங்களிலும் தேர்தல் முடிவுகள் ஒரே மாதிரியாக அமைந்திருப்பது தேசிய அரசியல் நீரோட்டத்தில் இணைந்துகொள்வதில் அந்த மக்கள் அக்கறை காட்டத் தொடங்கிவிட்டார்கள் என்பதன் வெளிப்பாடு” என்று அந்த அவதானிகள் கூறுகிறார்கள்.
- அதேவேளை, தேசிய மக்கள் சக்தியின் தலைமைத்துவக் கட்சியான ஜனதா விமுக்தி பெரமுனவின் (ஜே.வி.பி.) தலைவர்கள் குறிப்பாக, அதன் பொதுச் செயலாளர் ரில்வின் சில்வா போன்றவர்கள் சிறுபான்மைச் சமூகங்கள் இனவாத அரசியலை நிராகரித்திருக்கின்றன என்று கூறுகிறார்கள்.
என்ன காரணம்?
- வழமைக்கு மாறான முறையில், இந்தத் தடவை அதிபர் தேர்தலிலும் நாடாளுமன்றத் தேர்தலிலும் தென்னிலங்கையில் தேசியவாதப் பிரச்சாரங்களுக்கு இடமிருக்கவில்லை. ராஜபக்சக்களின் தலைமையில் சிங்கள பௌத்தத் தேசியவாத அரசியலை முன்னெடுத்த சக்திகள் படுமோசமாகப் பலவீனமடைந்திருந்திருப்பதும் பிரதான அரசியல் கட்சிகள் சிறுபான்மைச் சமூகங்களின் வாக்குகளைப் பெறுவதற்காக நேசக்கரம் நீட்டியதும் அதற்குப் பிரதான காரணங்களாகும். இதுவரை வடக்கு, கிழக்கில் தமிழ் மக்களைப் பிரதிநிதித்துவப்படுத்திவந்த தமிழ்த் தேசியவாத அரசியல் கட்சிகள் நாடாளுமன்றத் தேர்தலில் மோசமான பின்னடைவைச் சந்தித்திருக்கின்றன.
- கடந்த நாடாளுமன்றத்தில் கொண்டிருந்ததையும்விட இந்தத் தடவை இரண்டு இடங்களைக் கூடுதலாகப் பெற்றிருப்பது குறித்து இலங்கை தமிழரசுக் கட்சி பெருமைப்படுவதற்கு எதுவுமில்லை. ஐந்து மாவட்டங்களில் தேசிய மக்கள் சக்தி அதிகமான இடங்களைக் கைப்பற்றியதன் பின்னணியிலேயே, தமிழ் மக்கள் மத்தியில் அந்தக் கட்சியின் தற்போதைய நிலையை நோக்க வேண்டும்.
- தமிழ்க் கட்சிகளின் இத்தகைய பின்னடைவுக்கு மத்தியில், தென்னிலங்கையில் சிங்கள பௌத்த கடும்போக்குத் தேசியவாதிகள் என்று அடையாளம் காணப்பட்ட பல அரசியல்வாதிகள் இந்தத் தடவை வெற்றிபெறவில்லை. இதையடுத்து, தெற்கில் சிங்கள பௌத்த தேசியவாதமும் வடக்கில் தமிழ்த் தேசியவாதமும் தோற்கடிக்கப்பட்டுவிட்டதாகச் சில விமர்சகர்கள் கூறுகிறார்கள்.
தமிழர்களின் அதிருப்தி:
- குறிப்பிட்ட சில சிங்கள கடும்போக்கு தேசியவாதிகளின் தேர்தல் தோல்வியைச் சிங்கள பௌத்தத் தேசியவாதத்தின் தோல்வி என்று எவ்வாறு வியாக்கியானம் செய்ய முடியாதோ, அதேபோன்றே தமிழ்த் தேசியவாதக் கட்சிகளுக்கு வடக்கு, கிழக்கில் ஏற்பட்ட கடுமையான பின்னடைவை வைத்து, தமிழ் மக்கள் தமிழ்த் தேசியவாதத்தை நிராகரித்திருப்பதாகச் சொல்லிவிட முடியாது.
- தமிழ் மக்கள் தேசியவாதச் சிந்தனைகளின் அடிப்படையிலான தங்களின் நியாயபூர்வ அரசியல் விருப்பங்களில் அக்கறை காட்டாமல், தேசிய இனப்பிரச்சினை தொடர்பில் தேசிய மக்கள் சக்தியின் நிலைப்பாட்டை ஏற்றுக்கொண்டு தேர்தலில் ஆதரவை வழங்கினார்கள் என்று கூற முடியாது. உள்நாட்டுப் போரின் முடிவுக்குப் பின்னரான கடந்த 15 வருடங்களாகத் தங்களைப் பிரதிநிதித்துவம் செய்துவந்த தமிழ்க் கட்சிகள் / அவற்றின் தலைவர்கள் மீதான வெறுப்பையே வடக்கு, கிழக்கு தமிழ் மக்கள் வாக்களிப்பின் மூலம் வெளிக்காட்டியிருக்கிறார்கள்.
- வெறுமனே கடந்த காலப் போராட்டங்களை மட்டும் நினைவுபடுத்திக்கொண்டு உணர்ச்சிவசமான தமிழ்த் தேசியவாத முழக்கங்களைப் பயன்படுத்தி எந்தப் பயனையும் தராத அரசியல் அணுகுமுறைகளைக் கடைப்பிடித்துவந்த தமிழ் அரசியல் தலைவர்கள், இனிமேலும் தங்களுக்குச் சரியான பாதையைக் காட்டுவார்கள் என்று தமிழ் மக்கள் நம்பவில்லை. அத்துடன் முன்னெப்போதும் இல்லாத அளவுக்குத் தமிழ் அரசியல் சக்திகள் ஒருங்கிணைந்து செயல்பட வேண்டிய ஒரு காலக்கட்டத்தில் தமிழ் அரசியல் சமுதாயம் சிதறுபட்டு நிற்பதனால், தமிழ் மக்கள் சீற்றமடைந்திருக்கிறார்கள்.
- தங்கள் மத்தியில் தமிழ்க் கட்சிகளுக்கு மாற்றாக நடைமுறைச் சாத்தியமானதும் விவேகமானதுமான அரசியல் பாதையில் தங்களை வழிநடத்தக்கூடிய ஓர் அரசியல் சக்தி இல்லை என்பதனால் வேறு வழியின்றி தமிழ் மக்கள் தேசிய மக்கள் சக்தியின் பக்கம் திரும்பினார்கள். அதிபர் தேர்தலில் அநுர குமார திசாநாயக்காவைப் பெருமளவில் ஆதரிக்காத தமிழ் மக்கள், அவரின் வெற்றிக்குப் பிறகு தேசிய மக்கள் சக்திக்கு வாக்களிப்பதில் நாட்டம் காட்டக்கூடிய ஒரு சூழ்நிலை உருவானது.
புதிய அரசின் பொறுப்புகள்:
- இது இவ்வாறிருக்க, இனவாத அரசியலும் மதத் தீவிரவாதமும் மீண்டும் தலையெடுப்பதற்கு ஒருபோதும் அனுமதிக்கப் போவதில்லை என்று புதிய நாடாளுமன்றத்தின் முதலாவது கூட்டத்தில் தனது அரசாங்கத்தின் கொள்கை விளக்கவுரையை நிகழ்த்திய அதிபர் திசாநாயக்க கூறியிருப்பது கவனம் ஈர்க்கிறது.
- இன, மத வேறுபாடுகளைக் கடந்து மக்கள் தனது அரசாங்கத்துக்கு வழங்கியிருக்கும் மகத்தான ஆதரவு இனவாதம் மீண்டும் தலையெடுக்காமல் இருக்கக்கூடிய சூழ்நிலையை உருவாக்க உதவும் என்று அதிபர் நம்புகிறார் என்றால், அதே இனவாதம் தோற்றுவித்த பிரச்சினைகளுக்குக் காலம் தாழ்த்தாமல் தீர்வுகளைக் காண்பதும் அவசியம். சிறுபான்மைச் சமூகங்களின் நியாயமான அரசியல் விருப்பங்களையும் மனக்குறைகளையும் மதிக்காத தென்னிலங்கை அரசியல் கலாசாரத்தை மாற்றியமைக்க வேண்டியது, அதிபர் தனது குறிக்கோளை அடைவதற்கான முதல் தேவை.
- தேசிய இனப்பிரச்சினைக்கு அரசியல் தீர்வைக் காண்பதற்கு இதுவரையில் முன்னெடுக்கப்பட்ட சகல முயற்சிகளையும் எதிர்த்த கசப்பான கடந்த காலத்தில் இருந்து விடுபடுவதற்கான தெளிவான அறிகுறிகளை தேசிய மக்கள் சக்தி - குறிப்பாக ஜே.வி.பி. இதுவரையில் காண்பிக்கவில்லை. அண்மைக்காலத்தில் அரசமைப்புச் சட்டத்தின் 13ஆவது திருத்தம் தொடர்பில் தோன்றிய சர்ச்சைகளின்போது தேசிய மக்கள் சக்தி வெளிப்படுத்திய நிலைப்பாடுகள் இதற்குச் சான்றுகளாகும்.
- முன்னைய அதிபர்களில் எந்த ஒருவருக்குமே வழங்கியிராத பெரும்பான்மையை திசாநாயக்கவுக்கு மக்கள் வழங்கியிருக்கிறார்கள். சட்டத்தில் திருத்தங்களைச் செய்தோ அல்லது புதிய அரசமைப்பை அறிமுகம்செய்தோ இனப்பிரச்சினை விவகாரத்தில் தீர்வுகளைக் காண்பதற்கு எந்தத் தடையும் அவருக்கும் அரசாங்கத்துக்கும் கிடையாது. அரசியல் துணிவாற்றல் மட்டும்தான் அதற்குத் தேவை.
- அதிகாரப் பரவலாக்கல், சிறுபான்மைச் சமூகங்களின் நியாயமான அரசியல் விருப்பங்கள் போன்றவை சார்ந்து ஆழக்காலூன்றிய எதிர்மறையான நிலைப்பாடுகளைக் கொண்ட பெரும்பான்மையினரின் நம்பிக்கையை அதிபர் வென்றெடுத்திருக்கிறார். எனவே, இனப்பிரச்சினைக்கு அரசியல் இணக்கத் தீர்வொன்றைக் காண்பதற்கான சாதகமான சூழ்நிலையைத் தென்னிலங்கையில் உருவாக்குவதற்கு அதிபர் தன்னை அர்ப்பணித்துக்கொள்ள வேண்டும். அதற்கான அரசியல் தகுதி அவருக்கு முழுமையாக இருக்கிறது.
- முன்னைய சிங்களத் தலைவர்களைப் போன்று சிங்களக் கடும்போக்கு தேசியவாத சக்திகளின், மகாசங்கத்தின் பிரிவுகளின் நிர்ப்பந்தங்களுக்கு அடிபணிந்தால் வரலாறு வழங்கிய அரிய வாய்ப்புக்களைத் தவறவிட்ட தலைவர்களின் பட்டியலில் அதிபர் திசாநாயக்கவும் சேர்ந்து கொள்வார் என்பது நிச்சயம்.
நன்றி: இந்து தமிழ் திசை (25 – 11 – 2024)
Leave a Reply
Your Comment is awaiting moderation.