PREVIOUS
✖
எம்.டி.வாசுதேவன் நாயர்: சங்கடங்களை மீட்டிய கலைஞன்
December 28 , 2024
2 hrs 0 min
25
0
எம்.டி.வாசுதேவன் நாயர்: சங்கடங்களை மீட்டிய கலைஞன்
- மலையாள எழுத்தாளர் எம்.டி.வாசுதேவன் நாயர் காலமாகிவிட்டார். எம்டிக்கு முன்னும் பின்னும்கூட எம்டி அளவுக்குக் கொண்டாடப்பட்ட முழுமையான எழுத்தாளர்கள் மலையாளத்தில் இல்லை. வைக்கம் முகம்மது பஷீரைச் சொன்னாலும் அவருக்கு ஒரு சினிமா முகம் கிடையாது; வேறு எந்த எழுத்தாளருக்குமே இந்த முகம் இல்லை. பத்மராஜன் போன்ற சில எழுத்தாளர்கள் சினிமாவில் இயங்கியிருக்கிறார்கள்.
- ஆனால், எம்டி அளவுக்கு சினிமாவின் சூத்திரம் அறிந்தவர்கள் இல்லை. எழுதத் தொடங்கிய 50களிலிருந்து இந்த இரண்டாயிரத்தின் தொடக்கம் வரை சினிமாவிலும் இலக்கியத்திலும் கோலோச்சிய தனித்துவமான ஆளுமை எம்டி. இந்த நூற்றாண்டின் மாற்றங்களுக்குத் தாக்குப்பிடிக்க முடியாத கடந்த காலக் கற்பிதங்களைத் தரவாட்டை முன்னிறுத்திச் சொல்வது எம்டி கதையின் பொது இயல்பு.
- எம்டியின் தொடக்கக் காலக் கதைகளில் இந்த அம்சத்தைப் பார்க்க முடியும். சிறுகதைகள் வழியாகத் தன் கதைகளுக்கான மொழியையும் உலகத்தையும் பழக்கிப் பதப்படுத்திக்கொண்டார் அவர். தனது முதல் நாவலை வந்தடைவதற்கான நடைப்பயிற்சியாகத் தனது சிறுகதைகளைப் பயன்படுத்திக்கொண்டார். சிறுகதைகளின் தொடர்ச்சியாக ‘நாலுகெட்டு’ நாவலை அவர் எழுதினார். வடக்கேபாட்டுத் தரவாட்டின் கதை இது.
- எம்டியின் தெக்கேபாட்டுத் தரவாட்டின் கதையும் இதனூடே வழிந்து இந்த நாவலுக்குள் ஓடுகிறது. ஒரு காலக் கட்டத்தில் தரவாடு இருந்த இருப்பும் புதிய சமூக மாற்றத்தால் அது வீழ்ந்த நிலையும் இந்த நாவலில் சொல்லப்பட்டிருக்கும். இதற்கிடையில் அலைக்கழியும் அந்தத் தரவாட்டின் சந்ததிகளின் பாட்டையும் எம்டி இதில் சொல்லியிருப்பார்.
- தரவாடு என்கிற வெற்றுப் பெருமிதம் மனிதர்களின் மனத்தை ஆட்கொண்டு அவர்களது வாழ்க்கையைப் படுத்தும் பாட்டை உணர்வுபூர்வமாகச் சொன்ன நாவல் இது. இந்தத் தன்மைக்காக இந்த நாவல் இந்திய அளவில் முக்கியத்துவம் மிக்க நாவலாகவும் வாசிக்கப்படுகிறது. எம்டியின் கதைகளில் வெளிப்படும் கேரளியத்தன்மை விசேஷம் மிக்கது.
- மகாபாரதக் கதையில் சரியான இடம் அளிக்கப்படாத பீமனை எம்டி அழைத்துத் தன் கதையின் நாயகனாக்கிய நாவல்தான் ‘ரெண்டாம்மூழம்’. மகாபாரதத்தின் தெய்விகத் தன்மையைக் களைந்தது இந்த நாவலின் எடுத்துச் சொல்லக்கூடிய சீர் பணி. பீமனும் தன் தெய்விகத்தன்மையைக் களைந்து ஒரு சாதாரண மனிதனாகவே இந்த நாவலுக்குள் இறங்குகிறான். இது எம்டி என்னும் படைப்பாளனால் சாத்தியமாகிறது. ஏற்கெனவே நமது பண்பாட்டின் ஓர் அம்சமாக உள்ள காவியத்தை இன்றைய காலக்கட்ட வாழ்க்கையுடன் மோதச் செய்திருப்பார் எம்டி. வள்ளுவ நாடன் வட்டார மொழிக்காகக் கொண்டாடவும் விமர்சிக்கவும் பட்டவர் எம்டி.
- நாயர் தரவாடும் வள்ளுவன் நாடன் மொழியும் இல்லையென்றால் எம்டி இல்லை என்ற கிண்டல் கூற்றையும் எம்டி தன் ‘மஞ்சு’ என்கிற உரைநடைக் கவிதையால் மாற்றியிருப்பார். இமயமலைப் பகுதியில் நடக்கும் ஓர் அழகானகாதல், கவித்துவம் மிக்க விவரிப்பு மொழியில் இந்த நாவலில் சொல்லப்பட்டிருக்கும்.
- தலைவனுக்காகத் தலைவி காத்திருப்பது என்கிற தமிழ்ச் செவ்வியல் தன்மையுடன் இந்த நாவலை ஒப்பிட்டுப் பார்க்கலாம். வருவான் என்கிற எந்த நிச்சயமும் இல்லாமல் ஒரு தலைவியின் காத்திருப்பு இந்த நாவலில் சொல்லப்பட்டிருக்கும். அவளது காத்திருப்பு உணர்வு இந்த நாவலின் அஃறிணைகளுக்கு மேலேயும் உயர்திணைகளுக்கு மேலேயும் ஒரு மேகத்தைப் போலப் பறந்து செல்லும். செடி, கொடிகள், மரங்கள், மலைகள், படகோட்டி எல்லோரும் நாவலில் காத்திருக்கிறார்கள், மனிதர்கள் மரணத்துக்காகக் காத்திருப்பதுபோல.
- எம்டி எழுத்தாளராகவும் இயக்குநராகவும் மலையாளத்தில் வெற்றிபெற்ற ஓர் ஆளுமை. அவர் எழுதி இயக்கிய ‘நிர்மால்யம்’ இந்திய சினிமாக்களில் முக்கியமான ஒன்றாகவும் முன்னிறுத்தப்படுகிறது. ஒரு கோயில் சாமியாடியின் வறிய நிலையின் வழி இந்த நூற்றாண்டின் பிரச்சினையை இதில் சித்தரித்திருப்பார். பி.ஜே.ஆண்டனி சாமியாடியாக நடித்த இந்தப் படம் பல விருதுகளைப் பெற்றது. புதுமைப்பித்தனின் ‘பொன்னகரம்’ கதையைப் போன்ற முடிவைக் கொண்டது இது. சாமியாடி சம்பாதிக்க முடியாத நிலையில், சாமியாடியின் அரிவாளை மகன் விற்கத் துணிகிறான். வறிய நிலையிலும் சாமியாடிக்கு அது தர்மமாகப் படவில்லை.
- கடந்த காலத்தின் அறம், நிகழ்காலத்தின் பச்சையான யதார்த்தத்தின் முன்னால் கையறு நிலையில் நிற்பதை எம்டி இதன் வழி சொல்லியிருப்பார். கமல்ஹாசன் கதாநாயகனாக அறிமுகமான சேது மாதவனின் ‘கன்னியாகுமரி’ எம்டியின் கதைதான். அரபு நாடுகளுக்கு வேலைக்குப் போகும் முதல் தலைமுறை மலையாளிகள் பற்றிய ‘வில்காணுண்டு ஸ்வப்னங்கள்’ எம்டியின் ‘நாலுகெட்’டைப் போன்றது. வீழ்ச்சி அடைந்த தரவாட்டைக் கைப்பற்றும் ‘நாலுகெட்’டின் அப்புண்ணியைப் போல் இந்த சினிமாவின் நாயகன் அந்த உணர்ச்சியால் நிரப்பப்பட்டவனாக இருக்கிறான். இந்த உணர்ச்சி அவனை எல்லா அறத்தையும் மீறச் செய்கிறது.
- தரவாட்டைக் கைப்பற்றும் அளவுக்குச் செல்வத்தையும் சேர்த்துவிடுகிறான். ஆனால், வாழ்க்கை அவன் கையைவிட்டுப் போய்விடுகிறது. கற்பிதப் பெருமையால் சிதையும் தனிமனித வாழ்க்கையை எம்டி இதில் சித்தரித்திருப்பார். இயக்குநர் ஐ.வி.சசிக்காக அவர் எழுதிய ‘ஆள் கூட்டத்தில் தனியே’ ஒரு நாவலைப் போன்றது. மம்மூட்டி, மோகன்லால் ஆகிய இரு பெரும் நடிகர்கள் நடித்த இந்தப் படம், குடும்பத்திற்காக மனிதர்கள் தொலைக்கும் சுயத்தைப் பேசுகிறது. தன் மீதான வெறுப்பை சீமாவின் கதாபாத்திரம் கடக்கும் விதம் இந்தத் திரைக்கதையில் ஏற்றுக்கொள்ளும் விதத்தில் சித்தரிக்கப்பட்டிருக்கும்.
- சிபிமலயிலின் ‘சதயம்’ எம்டியின் திரைக்கதைதான். குழந்தைகளைக் கொடூரமாகக் கொன்ற ஒரு கதாபாத்திரத்தில் மோகன்லால் நடித்திருப்பார். அந்தக் கதாபாத்திர உருவாக்கம், தூக்குக்காகக் காத்திருக்கும் அந்தக் கொலைகாரன் மீது இரக்கத்தை வரவழைக்கும். ஹரிகுமார் இயக்கத்தில் வந்த ‘சுக்ருத’த்தில் உயிருடன் இருக்கும்போது மரணத்துடன் இருக்கும் ஒருவனைப் பற்றி எம்டி எழுதியிருப்பார். பேராசிரியர் இறந்துவிட்டார் என்று அஞ்சலிக் குறிப்பு எழுதப்பட்டுவிடும். ஆனால், பேராசிரியரான மம்மூட்டி திரும்ப வந்துவிடுகிறார். மேஜையில் உள்ள அஞ்சலிக் குறிப்பையும் பார்த்துவிடுகிறார். மரணத்தை அவரது உடல் வென்றுவிடுகிறது. உயிர் பிழைத்துவிடுகிறார்.
- ஆனால், மனத்தால் வெல்ல முடியவில்லை. மீண்டும் மரணத்தை நோக்கிச் சென்றுவிடுகிறார். இருப்புக்கும் இல்லாமைக்குமான மனப் போராட்டம் இந்தப் படத்தில் உணர்ச்சிகரமாகச் சித்தரிக்கப்பட்டிருக்கும். தெலுங்கு நாவலை அடிப்படையாகக் கொண்டு எம்டி இயக்கிய ‘ஒரு செறு புஞ்சிரி’ மென்மையான படம். வயதான தம்பதியரின் அழகான காதலை பரபரப்பான இளம் தலைமுறை வாழ்க்கைக்கு இடையில் ஒரு முரணாகக் காண்பிக்கும் படம் அது.
- எம்டி நாவலிலும் சினிமாவிலும் நாயகர்களை உருவாக்கவில்லை. உணர்ச்சிமிக்க மனிதர்களையே உருவாக்கினார். அதனால், அவரது நாவல்கள் திரும்பத் திரும்ப வாசிக்கப்படவும், அவரது படங்கள் திரும்பத் திரும்பப் பார்க்கப்படவும் செய்கின்றன. வாழ்க்கையைக் குறித்த நம் கற்பனைகளும் அது எதிர்கொள்ளும் குரூரமான யதார்த்தமும்தான் எம்டி கதைகளிலும் நாவலிலும் முன்வைத்த கருப்பொருள். இந்த மோதலால் உருவாகும் சங்கடங்களை மீட்டிய கலைஞன் என எம்டியைச் சொல்லலாம்.
நன்றி: இந்து தமிழ் திசை (28 – 12 – 2024)
Leave a Reply
Your Comment is awaiting moderation.