PREVIOUS
✖
எளிமையின் சிகரம்! | இரா.நல்லகண்ணு நூற்றாண்டு
December 26 , 2024
4 hrs 0 min
17
0
எளிமையின் சிகரம்! | இரா.நல்லகண்ணு நூற்றாண்டு
- இந்திய கம்யூனிஸ்ட் கட்சியின் மூத்த தலைவர், விடுதலைப் போராட்ட வீரர் தோழர் இரா.நல்லகண்ணுவின் நூற்றாண்டு இன்று தொடங்குகிறது. எவருக்கும் கிட்டாத அரிய வாய்ப்பாக இந்திய கம்யூனிஸ்ட் கட்சியின் தொடக்க நாளான 1925 டிசம்பர் 26தான் தோழர் இரா.நல்லகண்ணுவின் பிறந்தநாளாகும். கட்சி தோன்றிய நாளில் தோன்றிய ஒரே மனிதர் தோழர் இரா.நல்லகண்ணுதான்.
காந்தியத்திலிருந்து கம்யூனிஸத்துக்கு...
- தூத்துக்குடி மாவட்டம் திருவைகுண்டத்தில் இராமசாமி - கருப்பாயி தம்பதிக்கு மூன்றாவது மகனாகப் பிறந்தார் நல்லகண்ணு. பள்ளியில் படிக்கின்றபோதே, ‘என்று தணியுமிந்த சுதந்திர தாகம்? என்று மடியுமெங்கள் அடிமையின் மோகம்?’ என்ற மகாகவி பாரதியின் பாடல் வரிகளுக்கேற்ப தேச விடுதலையே தனது மூச்சென்றிருந்தார். தேசப்பிதா காந்தியின் எளிமை, நேர்மை ஆகியவை இவரை ஆட்கொண்டன.
- பொது வாழ்க்கைக்கு வந்த நாள் முதல் இன்றுவரை எளிமையின் சிகரமாய் - நேர்மையின் அடையாளமாய் தொடரும் இவரது வாழ்க்கை, ஆரம்பத்தில் காந்தியப் பாதையில் பயணித்தது. அதன்பின் இந்திய கம்யூனிஸ்ட் கட்சி நடத்திவந்த இயக்கங்களாலும், தோழர் ஜீவா பொதுக் கூட்டங்களில் ஆற்றிய உரைகளைக் கேட்டும் நல்லகண்ணுவின் கவனம் இந்திய கம்யூனிஸ்ட் கட்சியின்பால் திரும்பியது. அதனால் கல்லூரிப் படிப்பைக் கைவிட்டார். சின்னஞ்சிறு வயதில் செங்கொடியைக் கரங்களில் ஏந்தியவர், கடந்த எண்பது ஆண்டு காலமாகத் தனது லட்சியப் பயணத்தைத் தொய்வின்றித் தொடர்கிறார்.
கொள்கை உறுதி:
- கட்சி தடை செய்யப்பட்டபோது தலைமறைவு வாழ்க்கையில், காடுமேடுகளில் அலைந்து திரிந்த நிலையில் காவல் துறை இவரின் ரகசிய இடமறிந்து கைதுசெய்தது. காவல் அதிகாரி மற்ற தலைவர்களைப் பற்றி விசாரித்தபோது அதற்கு நல்லகண்ணு பதில் சொல்ல மறுத்தார். அதனால் அடித்து, உதைத்து, நையப்புடைத்து, தலைகீழாகத் தொங்கவிட்டு அடித்தும் வாய் திறக்கவே இல்லை. இனி என்ன செய்யலாம் என ஆழ்ந்து யோசித்த காவல் அதிகாரி, இவருடைய மீசை ரோமத்தை ஒவ்வொன்றாகப் பிடுங்கி மகிழ்ந்தார். இருப்பினும் நல்லகண்ணுவிடமிருந்து பதில் எதுவும் கிடைக்கவில்லை.
- காவல் துறையினர் ஜோடித்த பொய்யான நெல்லை சதி வழக்கில் ப.மாணிக்கம், கே.பாலதண்டாயுதம், வாத்தியார் ஜேக்கப் உள்ளிட்ட தலைவர்களோடு தோழர் நல்லகண்ணுவுக்கும் ஆயுள் தண்டனை வழங்கப்பட்டது. சிறையில் நடந்த அனைத்துக் கொடுமைகளையும் நெஞ்சுரத்தோடு அவர் எதிர்கொண்டார்.
அனைவருக்குமானவர்...
- கட்சியில் உறுப்பினராகத் தொடங்கி, விவசாயத் தொழிலாளர் சங்கத்தின் மாநிலப் பொதுச் செயலாளராக நீண்ட காலமும்; கட்சியின் மாநிலச் செயலாளராக நான்கு முறை தேர்வு செய்யப்பட்டு 12 ஆண்டுகளும்; கட்சியின் தேசிய நிர்வாகக் குழு உறுப்பினராகவும், தேசிய கட்டுப்பாட்டுக் குழுத் (ஒழுங்கு நடவடிக்கைக் குழு) தலைவராகவும் பணியாற்றிய அனுபவம் மிக்கவர்.
- தொடக்கக் காலம் முதல் கற்றறிதல் என்பது நல்லகண்ணுவுக்குக் கைவந்த கலை. படிப்பது மட்டுமின்றி தான் படித்து ருசித்ததை மற்றவர்களுடன் பகிர்ந்து கொள்வது அவரது பழக்கமாகும். நூலாசிரியர்களை, கட்டுரையாளர்களை ஊக்குவிக்கும் விதமாக அவர்களுக்குக் கடிதம் எழுதுவது, தொலைபேசி வாயிலாகத் தொடர்புகொண்டு பாராட்டுவது அவருடைய சிறந்த பண்புகளில் ஒன்று.
- எளிமையாகத் தன் வாழ்க்கையை அமைத்துக்கொண்டது மட்டுமல்ல, எம்மக்களும் அவருடன் நெருக்கமாகப் பேசவும், பழகவும் தடையில்லா வாய்ப்புகளையும் வழங்கக்கூடியவர். கட்சியின் கொள்கையில் உறுதிகொண்டவர் என்றாலும், அனைத்துக் கட்சித் தலைவர்களோடும் நன்கு பழகும் நற்பண்பு அவரிடத்தில் உண்டு. கட்சியில் உள்ள இளைஞர்களை ஊக்கப்படுத்தி உற்சாகப்படுத்துவது மட்டுமின்றி, அவரவர் திறமைக்குத் தக்கபடி பொறுப்பளித்துப் பணியாற்ற வைப்பார்.
- தன்னை நாடி வந்த நிதிகள் எதையும் இவர் தனதாக்கிக் கொண்டதில்லை. சான்றாக, தமிழ்நாடு அரசின் சார்பில் அம்பேத்கர் விருது வழங்கப்பட்டபோது கொடுக்கப்பட்ட நிதியைக் கட்சியின் வளர்ச்சிக்கும், சங்க வளர்ச்சிக்கும் வழங்கினார். 2022இல் தமிழ்நாடு அரசு ‘தகைசால் தமிழர் விருது’ வழங்கியபோது, தனக்கு அளிக்கப்பட்ட 10 லட்சம் ரூபாயுடன் மேலும் ரூ.5,000சேர்த்து, ரூ.10,05,000ஐ முதல்வர் மு.க.ஸ்டாலினிடம் கரோனா நிதியாகத் திரும்ப அளித்தார்.
- இவரது எண்பதாம் ஆண்டில் விழா எடுத்தபோது கட்சி இவருக்கு ஒரு கோடி ரூபாய் நிதி அளித்தது. அதனை அதே மேடையில் கட்சிக்கு நிதியாக வழங்கினார். இவருக்கெனச் சொந்தமாக வாகன வசதி கிடையாது என்பதறிந்து, அடையாறு மாணவர் நகலக உரிமையாளர் ஆனாரூனா கார் ஒன்றைப் பரிசளித்தார். அதன் சாவியைக் கலைஞர் மு.கருணாநிதி வழங்கினார். நல்லகண்ணு அந்த ஊர்தியையும் கட்சிக்கே அளித்தார்.
நல்லதையே செய்தவர்:
- இவரது தியாகத்தைப் பலரும் பல கோணங்களில் பாராட்டி மகிழ்ந்தது உண்டு. திமுக தலைவர் கருணாநிதி தோழர் நல்லகண்ணுவின் எண்பதாம் ஆண்டு விழாவில் பேசியபோது, “இன்றைக்கு நான் ஒரு உண்மையைச் சொல்கிறேன், எனது இரண்டு கண்களில் ஒன்று பழுதாகிவிட்டது, ஒரு கண் பார்வைதான் உண்டு, மற்றொரு கண் நல்லகண்ணு” என்றும்; “என்னைவிட இரண்டு வயது இளையவர் என்றாலும், தியாகத்தால் என்னைவிட மூத்தவர்” என்றும் பெருமிதம் பொங்கக் கூறினார்.
- பாஜக அணியில் திமுக இருந்தபோது திருச்சியில் பத்திரிகையாளர்கள் சந்திப்பில் நிருபர்கள் கருணாநிதியிடம், “நீங்கள் பாஜக அணியில் இருந்து விலகி வர வேண்டுமெனத் தொடர்ந்து நல்லகண்ணு பேசிவருகிறார், அது குறித்து உங்கள் பதில் என்ன?” என்று வினவியபோது, கருணாநிதி சற்றும் தயக்கமின்றி, “நல்லகண்ணு எப்போதும் நல்லதைத்தான் சொல்வார்” என்றார்.
- தன் வாழ்நாள் முழுவதும் ஏழை, எளிய மக்களுக்காக, உழைக்கும் மக்களுக்காகத் தன் வாழ்வை அர்ப்பணித்துக்கொண்டவர். தியாகத்தால் புடம்போட்ட தங்கமென ஜொலித்துக்கொண்டுள்ளார். கட்சித் தலைவராக மட்டுமின்றி, நல்ல வாசிப்பாளராக மட்டுமின்றி, சட்டமேதை டாக்டர் அம்பேத்கர் குறித்தும், விவசாயிகளின் விடிவெள்ளியாகத் திகழ்ந்த விடுதலைப் போராட்ட வீரர் தோழர் பி.சீனிவாச ராவ் வாழ்க்கை வரலாறு, கவிஞர் தமிழ்ஒளி குறித்த வரலாறு, விவசாயிகள் சங்க வரலாறு, விவசாயத் தொழிலாளர் சங்க வரலாறு எனப் பல்வேறு நூல்களை எழுதியுள்ளார். அநீதிகள் எங்கே நடைபெற்றாலும், அதனைக் கண்டு பொங்கி எழும் தோழராகத் திகழ்கிறார்.
- மணல் கொள்ளையை எதிர்த்து உயர் நீதிமன்ற மதுரைக் கிளையில் வழக்குத் தொடுத்து, தானே நீதிமன்றம் சென்று வாதாடி வெற்றியும் கண்டவர். பொதுவாழ்வு என்பது பொழுதுபோக்கல்ல, எளிமையும், நேர்மையும், அர்ப்பணிப்பும், தியாகமும் நிறைந்ததாகும் என்பதை வாழ்ந்து காட்டி வருகிறார். சொல்லுக்கும் செயலுக்கும் வேறுபாடு இன்றித் தன் வாழ்வை அர்ப்பணித்துக்கொண்ட எளிமையின் சிகரமாக, தொடர்ந்து வழிகாட்ட வேண்டும்.
நன்றி: இந்து தமிழ் திசை (26 – 12 – 2024)
Leave a Reply
Your Comment is awaiting moderation.