கடற்கரைகளில் திணிக்கப்படும் நீலப் பொருளாதாரம்!

கடற்கரைகளில் திணிக்கப்படும் நீலப் பொருளாதாரம்!

• உலக வங்கியின் நிதியுதவியுடன், ‘ரூ.1,675 கோடி செலவில் அடுத்த ஐந்து ஆண்டுகளில், ‘தமிழக நெய்தல் மீட்சி இயக்கம் (Tamil Nadu Coastal Restoration Mission)’ செயல்படுத்தப்படும்’ என்று 2023இல் அறிவிக்கப்பட்டது. இந்தத் திட்டமானது கடலோர உயிர்ப் பன்மை மேம்பாடு, சூழலியல் பாதுகாப்பு, வாழ்க்கைத்தர மேம்பாடு, ஞெகிழிப் பயன்பாட்டைக் குறைத்தல் ஆகியவற்றை உள்ளடக்கியது.
• கடந்த 2021 முதல் நெய்தல் மீட்சி இயக்கம், காலநிலை இயக்கம், பசுமை இயக்கம், சதுப்புநில இயக்கம் என மொத்தமாக நான்கு இயக்கங்​களைத் தமிழ்நாடு அரசு தொடங்​கி​யுள்ளது. இவற்றை நிர்வகிக்க ‘தமிழ்நாடு பசுமைக் காலநிலை நிறுவனம்’ (Tamil Nadu Green Climate Company) என்கிற நிறுவனத்​தையும் உருவாக்கி​யுள்ளது.
• இதுவரை இரண்டு காலநிலை மாநாடு​களைத் தமிழக அரசு நடத்தி​யுள்ளது. குறிப்பாக, தமிழக நிலப்​பரப்பில் 33% பகுதியைக் காடுகள்​/மரங்கள் சூழ்ந்த பகுதியாக மாற்று​வதைக் காலநிலை மாற்ற இலக்கு​களாகக் கொண்டுள்ளது. அதேவேளை​யில், நெய்தல் மீட்சி இயக்கம், கடலோர மக்கள் கடல் சார் சூழலியல் மீட்சி எனக் கூறிக்​கொண்​டாலும், அதன் நோக்கம் நீலப் பொருளா​தா​ரத்தையே முன்னிலைப்​படுத்து​கிறது. இதன் எதிர்மறை விளைவு​களைப் பற்றி விவாதிப்பது அவசிய​மாகிறது.

பின்னணி என்ன?

• நீலப் பொருளா​தாரம் என்பது கடலைப் பகுதி​வாரி​யாகப் பிரித்துச் சுற்றுலா, கடல் மீன்பிடித்தல் போன்ற​வற்றைக் கடலிலும் கடலோரப் பகுதி​களிலும் தீவிரப்​படுத்தும் கொள்கை. இது காலநிலை மாற்றம், சூழலியல் சிதைவு, மாசுபாடு ஆகிய மூன்றையும் சரிசெய்ய நீடித்த வகையில் கடலோர வளங்களைப் பயன்படுத்த உதவும் என்று அரசு சார்பில் கூறப்​படு​கிறது. இது 2012இல் நடந்த மூன்றாவது புவி உச்சி மாநாட்டில் (Third Earth Summit Conference - Rio+20) கவனம்​பெற்றது.
• சொல்லப்​போ​னால், 1992இல் நடந்த இரண்டாவது புவி உச்சி மாநாட்​டிலேயே இதற்கான முன்னெடுப்பு ‘ஒருங்​கிணைந்த கடலோர மண்டல மேலாண்மை’ (ICZM - Integrated Coastal Zone Management) எனத் தொடங்​கப்​பட்டது. இந்தச் சூழலில், 2004இல் மத்திய அரசின் வனம் - சுற்றுச்​சூழல் அமைச்​சகம், கடலோர ஒழுங்​குமுறை மண்டல அறிவிப்​பாணை, 1991 (coastal Regulation zone -CRZ)-ஐ குறித்து மீளாய்வு செய்ய விஞ்ஞானி எம்.எஸ்​.சு​வாமி​நாதன் தலைமையில் குழு அமைத்தது. இந்தக் குழு சமர்ப்​பித்த அறிக்கை​யின்படி, 1991இலிருந்து 2004 வரை நடைபெற்ற சட்டவி​தி​மீறல்​களைப் பற்றியோ, அறிவிப்​பாணையை எவ்வாறு வலுப்​படுத்​தலாம் என்பது குறித்தோ குறிப்​பி​டாமல், புதிய கடலோர மேலாண்மை (ஒழுங்​கு​முறைக்கு மாற்றாக) சட்டத்தைக் கொண்டுவர வேண்டும் எனக் குறிப்​பிட்டது.
• இது கடலோர ஒழுங்​குமுறை மண்டல மேலாண்மைத் திட்டத்தை முன்னிலைப்​படுத்தி அமைந்​திருந்தது. இதற்கு மீனவர்கள் / மீனவர் அமைப்புகள் மத்தியில் கடும் எதிர்ப்பு எழுந்தது. மே 2008இல் இந்த அறிக்கை அடிப்​படை​யில், அதுவரை நடைமுறையில் இருந்த, கடலோர ஒழுங்​குமுறை மண்டல அறிவிப்​பாணை-1991க்கு மாற்றாக, கடலோர மண்டல மேலாண்மை அறிவிப்பாணை வரைவு (Draft Coastal Management Zone Notification) 2007ஐ மத்திய அரசு வெளியிட்டது. இதற்கும் மீனவ மக்கள் மத்தியில் எதிர்ப்பு எழவே, அரசு பின்வாங்​கியது.
• எனினும், 2010இல் உலக வங்கி நிதியுதவி​யுடன் ICZMP (Integrated Coastal zone Management Plan) என்கிற திட்டத்தை மத்திய அரசு நடைமுறைப்​படுத்​தியது. இந்தத் திட்டம் குஜராத், ஒடிஷா, மேற்கு வங்கம் ஆகிய மூன்று மாநிலங்​களில் முன்னோட்டமாக நடைமுறைப்​படுத்​தப்​பட்டது. மேலும், நீலக்கொடி கடற்கரைகளை உருவாக்கக் கடற்கரைச் சுற்றுச்​சூழல் - அழகியல் மேம்பாட்டுத் திட்டமும் (BEAMS) ஏழு மாநிலங்​களில் செயல்​படுத்​தப்​பட்டது. கடற்கரைச் சூழலியல் சிதைவுக்கு அதிக அளவில் வித்திடு​வ​தாகவே இத்திட்டம் அமைந்தது.
• எனினும், இதன் தொடர்ச்​சியாக ரூ.1,557 கோடி மதிப்பில் என்கோர் (ENCORE [(Enhancing Coastal and Ocean Resource Efficiency]) என்கிற இரண்டாம் கட்டத் திட்டத்​தையும் மத்திய அரசு செயல்​படுத்​தியது இந்நிலை​யில், 2022இன் தலைமைக் கணக்குத் தணிக்கை​யாளரின் (CAG) ஆய்வறிக்கை, “ஒருங்​கிணைந்த கடலோர மண்டல மேலாண்மைத் திட்டம் வெற்றிகரமாக நடைமுறைப்​படுத்​தப்​பட்​ட​தாகக் கூறப்​பட்​டாலும், மத்திய அளவிலும், மாநில அளவிலும் செயல்​படுத்​தப்பட்ட திட்டங்​களில் குறைபாடுகள் இருந்தன.
• கடற்கரையில் மாசைக் குறைக்கும் திட்டங்கள் செயல்​படுத்​தப்​ப​டாமல் இந்தத் திட்டத்தின் நோக்கமே சிதைக்​கப்​பட்டது” எனச் சுட்டிக்​காட்​டி​யுள்ளது. என்கோர் திட்டம் தமிழகம் உள்பட 9 கடலோர மாநிலங்கள், 4 மத்திய ஆட்சிப் பகுதிகளில், 2020 முதல் செயல்​படுத்​தப்​பட்டது.
• தமிழகத்தில் சுமார் ரூ.336 கோடி மதிப்பில் செயல்​படுத்​தப்​பட்டது. ஐசிஇசட்​எம்பி, என்கோர் திட்டங்​களின் தொடர்ச்​சி​யாகவே, நீலப் பொருளா​தா​ரத்தை மையப்​படுத்தி, நெய்தல் மீட்சி இயக்கம் கொண்டு​வரப்​பட்​டுள்ளது. மேலும், தமிழகச் சுற்றுச்​சூழல்​-​காலநிலை மாற்றத்​துக்கான துறை உலக வங்கி​யிடம் நிதி கோரியிருப்பது இதுவே முதன்​முறை​யாகும்.
• இந்தத் திட்டத்தின் கீழ் ரூ.90 கோடி மதிப்​பில், தஞ்சாவூர் மாவட்டம் மனோராவில் சர்வதேச ஆவுளியா (Dugong) பாதுகாப்பகம் அமைக்​கப்​பட​வுள்ள​தாக​வும்; இது அரசுப் பகுதி, பகுதி அளவிலான அரசுப் பகுதி, தனியார் என மூன்று பகுதி​களாகப் பிரிக்கப்பட்டு சுற்றுலா​வுக்கான கட்டிடங்கள் கட்டப்பட உள்ளன என்றும் கூறப்​படு​கிறது.
• இதேவேளை​யில், தமிழகக் காலநிலை இரண்டாவது மாநாட்டில் கரிம உமிழ்வைக் குறைப்பது தொடர்பான அறிக்கையில் ‘தமிழகத்தின் கரிம உமிழ்வைக் குறைப்​பதில் கடல் காற்றாலைகள் முக்கி​யத்துவம் கொண்டவை’ என்று தமிழக அரசு குறிப்​பிட்​டுள்ளது. இந்தக் கடல் காற்றாலைகள் அமையவிருக்கும் எல்லை என்பது தஞ்சாவூர், புதுக்​கோட்டை கடற்பகு​தியில் 449.34 சதுர கி.மீ. பரப்பளவில் தமிழக அரசால் ஆவுளியா பாதுகாப்​பகமாக அறிவிக்​கப்​பட்​டுள்ள பகுதிக்கு நெருக்கமாக அமைகிறது.
• தமிழகத்தில் உள்ள 10 கடற்கரைகளை ரூ.100 கோடி மதிப்பில் நீலக்​கொடிக் கடற்கரைகளாக அங்கீ​காரம் பெறத் திட்ட​மிட்​டுள்ள​தாகவும் தமிழக அரசு அறிவித்தது. நீலக்​கொடிக் கடற்கரைகள் என்பவை சர்வதேசச் சுற்றுலாப் பயணிகளுக்​காகச் சுத்தமான கடற்கரை, கேளிக்கை வசதிகள் ஆகியவற்றைக் கொண்டதாக உருவாக்​கப்​படு​கின்றன.
• நாகப்​பட்​டினம் மாவட்​டத்தின் காமேஸ்வரம் கடற்கரை​யில், செயல்​படுத்​தப்​பட​வுள்ள இத்திட்​டத்தின் எல்லை, மீனவ மக்களின் படகு நிறுத்தும் இடத்துக்கு வெகு அருகில் அமைந்​துள்ளது. இந்தத் திட்டம் செயல்​படுத்​தப்​பட்​டால், இக்கி​ராமத்தின் பொருளாதார நிலை உயரும் எனவும், மீனவர்​களின் மாற்று வாழ்வா​தா​ரத்​துக்கு உதவும் எனவும் அரசு முன்வைக்​கிறது. ஆனால், இந்தத் திட்டத்தின் அறிக்கை, திட்டம் செயல்​படுத்​தப்பட்ட பிறகு மொத்தமாக 31 பேருக்கு மட்டுமே வேலைவாய்ப்பு கிடைக்கும் எனக் கூறுகிறது. இப்பகுதி ஆமை முட்டை​யிடும் இடமாகவும் தமிழக அரசால் அரசாணை வெளியிடப்​பட்​டுள்ளது.
• நீலக்கொடி திட்டம் இப்பகு​தியில் நடைமுறைப்படுத்​தப்​பட்​டால், மீனவ மக்கள் சுதந்​திர​மாகச் சென்றுவந்த கடற்கரைகள் வேலியிடப்​படும். மீனவ மக்கள் மீன்பிடிச் செயல்​பாடு​களில் ஈடுபட முடியாது; கடற்கரை என்னும் நிலம் சார்ந்த அவர்களுடைய உரிமைகள் பறிபோகும். கடற்கரைகளுக்குக் கட்டணம் விதித்து, வேலியிட்டு, சர்வதேசப் பயணிகளின் கேளிக்கைப் பூங்காவாக வணிகமய​மாக்குவதே நீலக்கொடிக் கடற்கரைத் திட்டம். இப்படியாக நெய்தல் மீட்சி இயக்கம் கடல்சார் சூழலியலையும் வணிகமய​மாக்கு​கிறது.

மறுக்​கப்​படும் சமூக நீதி:

• நெய்தல் மீட்சி இயக்கம், கடலையும் கடல் சார் சூழலியல் அமைவையும் கரிமச் சந்தையாக வணிகமய​மாக்கு​வதை​யும், சுற்றுலாவைத் தீவிரப்​படுத்து​வதையும் முதன்​மை​யாகக் கொண்டுள்ளதே தவிர, அடிப்படை நோக்கமான, சூழலியல் மீட்சி (resilience), நீடித்த வகையில் கடலோர வளங்களைப் பயன்படுத்துவது என்பதற்கே எதிரானதாக அமைந்​துள்ளது.
• காலநிலைக்குத் தகுந்த கடற்கரைக் கிராமங்கள் உருவாக்​கப்​படும் எனக் கூறப்​பட்​டுள்ள திட்டமும் முத்துப்​பேட்டை, கோடியக்கரை, பிச்சாவரம், பழவேற்காடு போன்ற சூழலியல் முக்கி​யத்துவம் வாய்ந்த பகுதி​களில் அமைவது மக்களை அப்பு​றப்​படுத்தும் திட்டமாக அமைந்​து​விடுமோ என்கிற அச்சத்தை ஏற்படுத்​தி​யிருக்​கிறது. அரசு இந்தப் பிரச்​சினைகளை நன்கு பரிசீலித்து, சூழலியல் பாதுகாப்பு, மக்கள் நலன் ஆகியவற்றை மதிப்​பிட்டுத் தகுந்த முடிவை எடுக்க வேண்டும்!

நன்றி: இந்து தமிழ் திசை (30 – 01 – 2025)