குவாண்டம் ஆண்டின் மகத்துவம்!

குவாண்டம் ஆண்டின் மகத்துவம்!

• ஐக்கிய நாடுகள் அவை, 2025ஆம் ஆண்டை சர்வதேச குவாண்டம் அறிவியல் - தொழில்நுட்ப ஆண்டாக அறிவித்துள்ளது. 2024 ஜூன் மாதம் 7ஆம் தேதி இதற்கான அறிவிப்பு வெளியிடப்பட்டது. 2025 குவாண்டம் ஆண்டாகத் தேர்ந்தெடுக்கப்பட்டது ஏன்?

குவாண்டம் அறிவியல் என்றால்...

• கு​வாண்டம் அறிவியலைப் புரிந்​து​கொள்வது எளிது. இந்தப் பிரபஞ்சம் இரண்டு வகையான பொருள்​களால் ஆனது. அதில் ஒருவகையான பொருள் உலகம். மிகப் பிரம்​மாண்​ட​மானது. நம் கண்ணுக்குத் தெரியும் அனைத்துப் பொருள்​களும்தான் அந்த உலகின் அங்கங்கள். இந்தப் பிரபஞ்​சத்தில் உள்ள நட்சத்​திரங்கள், சூரிய மண்டலத்தைப் போலவே அந்த நட்சத்​திரங்​களைச் சுற்றிவரும் கோள்கள் - இப்படிக் கண்ணுக்குத் தெரிந்த பெரிய உலகம் பற்றிய அறிவியல் ஆய்வு என்பது ஒருவகை.
• அதேவேளை, வெறும் கண்களால் பார்க்க முடியாத பொருள்கள் இந்தப் பிரபஞ்​சத்தில் உள்ளன. அவை அணுக்​களுக்கு உள்ளே உள்ளன. ஒவ்வொரு பொருளும் அணுக்​களால் ஆனது. அணுக்கள் ஒன்றுகூடி மூலக்​கூறுகள் ஆகின்றன. மூலக்​கூறுகள் ஒன்றுகூடி வேதிப்​பொருள்கள் ஆகின்றன. இவற்றின் கலவைகளாக உலோகங்கள், நாம் பயன்படுத்தும் - பார்க்கும் பொருள்கள், நம்முடைய உடல் உள்பட அனைத்தும் உள்ளன.

அணுவுக்கு உள்ளே என்ன இருக்​கிறது?

• எலெக்ட்​ரான், புரோட்​டான், நியூட்ரான் என்னும் துகள்​களும், அவற்றுக்குள் நுண்துகள்​களும் உள்ளன. இந்த உலகத்​தைத்தான் வெறும் கண்களால் காண முடியாது. அவற்றைப் பார்ப்​ப​தற்​கென்று ‘நானோ’ தொலைநோக்​கிகள் பயன்படுத்​தப்​படு​கின்றன. இந்த நுண் உலகைக் குறித்த அறிவியல்தான் குவாண்டம் அறிவியல்.

குவாண்டம் அறிவியல் ஆண்டு:

• குவாண்டம் கோட்பாடு என்கிற ஒரு முக்கிய அறிவியல் கோட்பாடு 1925இல் முன்வைக்​கப்​பட்டது. அதனை முன்வைத்​தவர்கள் எர்வின் ஷ்ரோடிங்கர், மேக்ஸ் பார்ன், சத்யேந்​திரநாத் போஸ், பாஸ்கல் ஜோர்டான், வெர்னர் ஹேய்சன்​பார்க் ஆகியோர். குவாண்டம் கோட்பாடு முன்வைக்​கப்பட்ட நூறாவது ஆண்டை 2025ஆம் ஆண்டு குறிக்​கிறது. எனவே, இந்த ஆண்டை குவாண்டம் அறிவியல் - தொழில்​நுட்ப ஆண்டாக ஐ.நா. அவை அறிவித்தது.

நமக்கு எப்படிப் பயன்படு​கிறது? 

• குவாண்டம் அறிவியல் / தொழில்​நுட்பம் இன்றைக்குப் பல பயன்பாடு​களைக் கொண்டுள்ளது. நம்முடைய கைபேசிகள், திறன்​பேசிகளில் அன்றாடம் நாம் எதிர்​கொள்​கின்ற வலைப்​பின்னல் உள்ளிட்ட இணையத்தின் செயல்​பாடுகள் ‘குவாண்டம் கீ விநியோகம்’ (Quantum Key Distribution) என்று அழைக்​கப்​படும் முறைப்​படிதான் செயல்​படுத்​தப்​படு​கின்றன.
• எதிர்​காலத்தில் குவாண்டம் கணினிகள் அறிமுகமாக உள்ளன. குவாண்டம் குறியாக்கம், ஹேக் செய்யக் கடினமாக இருக்​கின்ற, பாதுகாப்பான தகவல் தொடர்பு அலைவரிசைகளை உருவாக்க இவை பயன்படும். இன்றைக்குக் காலநிலை மாற்றத்தின் பாதிப்புகள் தீவிரமடைந்து வருவதை நாம் அறிவோம். ஓர் இடத்தில் உருவாகக்​கூடிய புயல் அல்லது நிலநடுக்​கத்தை முன்அறி​விப்​ப​தற்கான உள்ளீடுகளை ‘குவாண்டம் கம்ப்​யூட்​டிங்’ முறைப்படி அறியலாம்.
• குவாண்டம் தொழில்​நுட்பம் மூலம்தான் ஓர் இடத்துக்குச் சென்றடைவதற்​காகத் திறன்​பேசியில் இருக்கும் ஜிபிஎஸ் இடங்காட்​டிகள் வேலைசெய்​கின்றன. இதைத் தவிர, மருத்​துவத் துறையில் நோய் கண்டறியும் கருவி​களுக்கு உள்ளேயும் ராணுவத் தளவாடங்​களிலும் குவாண்டம் தொழில்​நுட்பம் பயன்பாட்டில் உள்ளது. ‘பிக் டேட்டா’ என்று அழைக்​கப்​படும் பெரும்​தரவுக் காலக்​கட்​டத்தில் நாம் வாழ்ந்​து​வரு​கிறோம். இந்தக் காலக்​கட்​டத்தில் மனிதர்​களின் ஒவ்வொரு செயல்​பாட்​டிலும் குவாண்டம் இயந்திர​வியலின் பயன்பாடு எதிர்​காலத்தில் இருக்கும் என்று எதிர்​பார்க்​கப்​படு​கிறது.

மக்கள் விழிப்பு​ணர்வு:

• 2025ஆம் ஆண்டை நான்கு வகையாகக் கொண்டாட வேண்டும் என்று ஐ.நா. அவை அறிவித்​துள்ளது. குவாண்டம் கோட்பாட்டை முன்வைத்த வரலாற்றின் முக்கிய அறிவிய​லா​ளர்களை அடுத்த சந்ததி, கல்லூரி மாணவர்கள், மக்களுக்கு அறிமுகப்​படுத்தி அவர்களைக் கொண்டாட வேண்டும் என்கிறது ஐ.நா. அவை. குவாண்டம் அறிவியலின் முக்கி​யத்துவம், அதன் பயன்பாடுகள் பற்றிய விழிப்பு​ணர்வை அதிகரிக்க வேண்டும். குவாண்டம் கல்வி, வாய்ப்புகளை அனைவரும் அணுகும் வகையில் அனைத்து நாடுகளும் உறுதிப்​படுத்த வேண்டும்.
• உலகெங்​கிலும் உள்ள மக்கள் குவாண்டம் தொழில்​நுட்​பங்கள் மூலம் பயனடையக்​கூடிய வகையில் அனைவருக்கும் அந்த அறிவியல் கொண்டுசேர்க்​கப்பட வேண்டும். தொழில்​நுட்பம், பண்பாடு, இயற்கை உலகைப் பற்றிய நம் புரிதலில் குவாண்டம் அறிவியலின் தாக்கங்​களைத் தனியாக வரிசைப்​படுத்திக் கொண்டாட வேண்டும்.
• அடிப்படை அறிவியல், நம்முடைய அறிவியல் கல்வியில் குவாண்டம் இயந்திர​வியல் சார்ந்த திறன்களை வலுப்​படுத்த வேண்டும். நிலையான வளர்ச்​சிக்கு குவாண்டம் அறிவியலின் முக்கி​யத்துவம் குறித்த உலகளாவிய விழிப்பு​ணர்வை ஏற்படுத்தும் நிகழ்ச்​சிகள் நடத்தப்பட வேண்டும். பிக் டேட்டா போன்ற​வற்றைப் பாதுகாப்பாக எப்படிப் பயன்படுத்துவது என்பது குறித்த விழிப்பு​ணர்வைப் பள்ளி​களிலும் கல்லூரி​களிலும் வழங்க வேண்டும். இப்படிப் பல்வேறு வகைகளில் இந்த ஆண்டைக் கொண்டாட வேண்டும் என்று ஐ.நா. அவை அறிவித்​திருக்​கிறது.
• அதே வேளையில், குவாண்டம் இயந்திர​வியல் முன்னேற்​றங்கள் குறித்துப் போட்டிகள் நடத்தி, ஆய்வுக் கட்டுரைகள் சமர்ப்​பித்து, அறிவியல் மாதிரிகள் தயாரித்து, புதிய கண்டு​பிடிப்புகளை அறிமுகம் செய்து, இந்தத் துறையை நாம் கொண்டாட வேண்டும். டிஜிட்டல் உள்கட்​டமைப்பு, சைபர் பாதுகாப்பு, இணைய மோசடிகள் குறித்தும் அதிகமாக விழிப்பு​ணர்வு ஏற்படுத்​தப்பட வேண்டும் என்று கூறும் ஐ.நா. அவை, குவாண்டம் அறிவியல் தொழில்​நுட்ப ஆண்டின் ஒரு பகுதியாக இணையப் பாதுகாப்பு ஆண்டாகவும் அறிவித்​துள்ளது.
• ஐ.நா.வின் துணை அமைப்பான யுனெஸ்கோ, ‘அமெரிக்கன் ஃபிசிகல் சொசைட்டி’, ஜெர்மனியின் ‘குவாண்டம் ஃபிசிக்ஸ் சொசைட்டி’ ஆகியவை உலகெங்​கிலும் உள்ள அறிவியல் அமைப்பு​களோடு இணைந்து உலகளாவிய ஒருங்​கிணைப்பு - வழிநடத்தும் குழு ஒன்றை ஏற்படுத்தி உள்ளன. இந்தியா உள்பட அனைத்து நாடுகளிலும் உள்ள குவாண்டம் அறிவியல் துறை சார்ந்த வல்லுநர்கள் இந்தக் குழுக்​களில் இடம்பெற்றுள்​ளார்கள். இந்த மிகப் பெரிய அறிவியல் தருணத்தை அறிவியலர்​களுடன் இணைந்து சமூகமும் கொண்டாடுவது அடுத்து​வரும் தலைமுறைக்கு ஓர் பெரும் அடிக்​கல்லாக அமையும்!

நன்றி: இந்து தமிழ் திசை (03 – 01 – 2025)