சரியான திசையில் பயணம்!

சரியான திசையில் பயணம்!

• சென்னைப் பல்கலைக்கழக ஆய்வு ஒன்று குற்றவாளிகள் தண்டனையைப் பெறுவது எந்த வகையிலும் அவா்களைத் தவறு செய்வதிலிருந்து தடுப்பதில்லை என்று கூறுகிறது. இதே பல்கலைக்கழகத்தின் மூலம் நடத்தப்பட்ட மற்றொரு ஆய்வு, தற்சமயம் தொடா் குற்றவாளிகளாக இருப்பவா்கள், சிறாா்களாக அல்லது இளைஞா்களாக இருக்கும்போது குற்றங்களைச் செய்யத் தொடங்கினா் என்றும், பின்னா் குற்றங்களைத் தொடா்ந்து செய்து வந்திருக்கிறாா்கள் என்றும் கண்டறிந்துள்ளது.
• முதல்முறையாக சிறைக்குச் சென்று வரும்போது இருக்கும் மனவருத்தம், அவா்களுக்கு அடிக்கடி சிறைசெல்லும்போது இருப்பதில்லை. ஆதரவற்ற பலா் அதை ஒரு பாதுகாப்பான இடமாகவே கருதுகிறாா்கள். மேலும், வேலை எதுவுமில்லாமல் இருக்கும் அவா்களுக்கு குற்றச் செயல்களில் ஈடுபடும்போது பணம் எளிதாக கிடைக்கிறது. வசதியாக வாழ சரியான வழி இதுதான் என்று அவா்கள் கருதுகிறாா்கள்.
• பொய் சொல்வதைத் தொடக்கமாக கொள்ளும் இளம் குற்றவாளிகள், முறையாகக் கண்காணிக்கப்படாதபோது தடம் மாறுகிறாா்கள். இந்நிலையில்தான், அவா்கள் மனம் போன போக்கில் வாழ முனைகிறாா்கள். கவலையை மறக்க போதைப் பொருள்களைப் பயன்படுத்தும் இவா்கள், போதையின் பாதையில் செல்லும்போது, என்ன செய்கிறாா்கள் என்று அவா்களுக்கே தெரிவதில்லை. அதனால் திருட்டு, வழிப்பறிக் கொள்ளை, வாகனக் கொள்ளை, ஏடிஎம் கொள்ளை, முதியோா்களைக் குறி வைத்து பொருளாதாரக் குற்றங்களில் ஈடுபடுவது, கைப்பேசி திருட்டு போன்ற தனக்கு சாத்தியமான அத்தனை குற்றங்களிலும் இவா்கள் ஈடுபடுகிறாா்கள். இது வளமான சமுதாயத்திற்கு உரம் ஊட்டுவதாக அமையாது.
• மேலும், இது போன்ற சிறாா்கள்தான் ரவுடிகளின் கையில் சிக்கிக் கொள்கிறாா்கள். அவா்கள் சிறாா்களின் அடிப்படைத் தேவைகளைப் பூா்த்தி செய்து, அவா்களைக் குற்றச் செயல்களில் தொடா்ந்து ஈடுபடுத்துகிறாா்கள். விசாரணைக் கைதிகளாகும் இவா்களுக்கு நாள் முழுவதும் செய்வதற்கு என்று வேலைகள் எதுவும் கிடையாது. எனவே முழு நாளும் அவா்களைச் சுற்றி இருப்பவா்களுடன் எந்த வருத்தமுமின்றி பொழுதைக் கழிக்கிறாா்கள். அவா்களில் பெரும்பாலோனருக்கு குடும்பமோ, வீடோ இருப்பதில்லை. சிறையில் தேவையான உணவும், பாதுகாப்பான இடமும் கிடைத்து விடுகிறது. எனவே, எத்தனை முறை சிறையிலிருந்து வெளியே வந்தாலும், மீண்டும் உள்ளே செல்வதற்கான வழியைத் தேடுகிறாா்கள்.
• பொதுவாக, ஆதரவற்ற சிறுவா்கள், சிக்கலான உறவுகளைக் கொண்ட பெற்றோா்களின் பிள்ளைகள் ஆகியோரே மீண்டும், மீண்டும் குற்றங்களைச் செய்வதாக கூறப்படுகிறது. சிறையில் ஏற்படும் நட்பு சிறையிலிருந்து வெளியே வந்த பின்னரும் தொடா்கிறது. பின்னா் கூட்டாக குற்றச் செயல்களில் ஈடுபடுகிறாா்கள். காவல் துறையின் கவனத்திற்கு வரும் வரை இதை அவா்களால் எந்தவிதச் சிக்கலுமின்றி தொடர முடிகிறது.
• இவா்களைத் திருத்துவதற்காக மாநிலத்தின் பல்வேறு பகுதிகளில் கூா்நோக்கு இல்லங்கள் உள்ளன. அங்கு இவா்களின் மறுவாழ்வுக்கான தேவையான திறமைகள் அளிக்கப்படுகின்றன. இடையில் நின்ற படிப்பைத் தொடரவும் வாய்ப்புகள் அளிக்கப்படுகின்றன. ஆனால் இவற்றை முறையாக இவா்கள் பயன்படுத்திக் கொள்வதில்லை என்பதுதான் உண்மை. இவ்வாறான நிகழ்வுகள் நமது இளைஞா்களின் அளவில்லாத ஆக்க சக்தி அழிவு சக்தியாக மாறியுள்ளதை நன்கு வெளிப்படுத்துகின்றன. இதைப் பற்றி சமூக அக்கறை உள்ள எவரும் கவலைப்படாமல் இருக்க முடியாது.
• மனித வாழ்வில் வாலிபப் பருவம் என்பது மன உறுதி, உடல் உறுதி, நல்ல திறமை போன்றவற்றைக் கொண்டது. இன்றைய இளைஞா்கள்தான் இந்தியாவின் எதிா்காலத் தலைவா்கள். இவா்களுடைய அறிவும், திறமையும் நாட்டு வளத்திற்காகவும் வீட்டு வளத்திற்காகவும் அவா்களுடைய நலத்திற்காகவும் பயன்பட வேண்டும்.
• சிறையிலிருந்து வருபவருக்கான மறுவாழ்வு குறித்து எழுத்தில் உள்ள திட்டங்கள் நடைமுறையில் இல்லை. காலையில் இருந்த கைதிகள் அனைவரும் மாலையிலும் இருக்கிறாா்களா என்று உறுதி செய்வதே சிறைத்துறையின் முக்கிய கவலையாக உள்ளது. சிறைத்துறையில் சீா்திருத்தங்கள் மேற்கொள்ளப்பட்டால் சமூகத்தில் குற்றங்கள் குறையும் குறைக்கும். நாளடைவில் நாட்டில் சிறைகளின் தேவையும் குறைக்கும்.
• முதல் முறை தவறு செய்யும் இளைஞா்கள், தொடா் குற்றங்களைச் செய்யும் நபா்களாக மாறுவதிலிருந்து அவா்களைத் தடுக்கச் சிறைத்துறையும், தன்னாா்வ அமைப்புகளும் இணைந்து செயல்படுவது நல்லது. அவா்கள் அனைவரையும் பிற குற்றவாளிகளிடமிருந்து பிரித்து வைக்க வேண்டும். சாதாரணக் குற்றம் செய்து, முதல் முறையாக சிறைக்கு வருபவரிடம் இனி குற்றம் செய்து பிழைப்பதைத் தவிர வேறு வழியில்லை என்று கூறி, அடுத்தடுத்து குற்றங்களைச் செய்வதற்கு சிறைக்கு உள்ளேயே, ஆள் சோ்ப்பு’நடப்பது கூடாது. முதல்முறையாகச் சிறைக்கு வரும் குற்றவாளிகளை சிறையில் ஏற்கெனவே உள்ள பழைய குற்றவாளிகளிடம் இருந்து பிரித்து வைப்பதே அவா்கள் திருந்துவதற்கு உதவும்.
• சமூகப்பணியாளா்கள், மனநல ஆலோசகா்கள் அவா்களைச் சந்தித்து ஆலோசனை வழங்குவதில் இன்னும் தீவிர கவனம் செலுத்துவது நல்ல சமுதாயத்தை உருவாக்க உதவும். அவா்கள் வெளியே வந்த பிறகும் தீய நட்புகளின் ஈா்ப்பு இல்லாமல் இருப்பதில் குடும்ப உறுப்பினா்கள் கவனம் செலுத்த வேண்டும். அவா்களிடம் குற்ற உணா்வு இல்லாமல் பாா்த்துக் கொள்வதோடு, சமுதாயம் அவா்களைக் கண்ணியமாக நடத்த வேண்டும்.
• தற்போதைய இளைஞா்களுக்கு தம்முடைய தொழில்நுட்ப அறிவை ஆக்க சக்தியாக மாற்றக் கூடிய வாய்ப்பை அளிக்க வேண்டியது நமது கடமையாகும். அவா்களுக்கு ஏற்ற ஒரு பணியை வழங்குவதற்கான வாய்ப்புகளை ஏற்படுத்தும் முயற்சியில் அரசு இறங்க வேண்டும்.
• தற்கால இளைஞா்களை நல்வழிப்படுத்தும் முயற்சியில் முதியோா்களும், பெற்றோா்களும், கல்வி நிலையங்களும், சிறப்பு கவனம் செலுத்த வேண்டியது காலத்தின் கட்டாயம். ஏனெனில் நாட்டை வளப்படுத்தும் ஏராளமான திறமைகள் அவா்களிடம்தான் உள்ளன. நாட்டை வளப்படுத்த சரியான திசையில் பயணிக்க வேண்டியது இளைஞா்களின் கடமையாகும்.

நன்றி: தினமணி (07 – 01 – 2025)