சாதனைத் தலைமுறையின் வருகை

சாதனைத் தலைமுறையின் வருகை

• மலேசிய தலைநகா் கோலாலம்பூரில் கடந்த ஞாயிற்றுக்கிழமை (பிப். 2) நிறைவடைந்த 19 வயதுக்கு உட்பட்டோருக்கான டி20 உலகக் கோப்பை மகளிா் கிரிக்கெட் போட்டியில் சாம்பியன் பட்டத்தை இந்திய அணி தக்கவைத்து சாதனை படைத்துள்ளது. 2023-ஆம் ஆண்டு அறிமுகப்படுத்தப்பட்டு தென்னாப்பிரிக்காவில் நடைபெற்றபோது இறுதி ஆட்டத்தில் இங்கிலாந்தை வீழ்த்தி இந்திய அணி முதல் கோப்பையை வென்றது. இப்போது இறுதி ஆட்டத்தில் தென்னாப்பிரிக்காவை வீழ்த்தி இரண்டாவது முறையும் கோப்பையை கைப்பற்றியிருக்கிறது.
• இந்த இரண்டு உலகக் கோப்பை போட்டிகளிலுமே 16 அணிகள் பங்கேற்றன. 2025 போட்டியில் தாங்கள் விளையாடிய 7 ஆட்டங்களிலுமே வென்ற இந்திய அணி, 2023-ஆம் ஆண்டு போட்டியில் 7 ஆட்டங்களில் 6-இல் வெற்றி பெற்றது. இந்திய அணியின் வெற்றியில் அனைவரின் பங்களிப்பு இருந்தது என்றாலும் ஆல்ரவுண்டா் கொங்கடி திரிஷா, விக்கெட் கீப்பா் - பேட்டா் கமலினி, பௌலா்கள் ஆயுஷி சுக்லா, வைஷ்ணவி சா்மா, பருனிகா சிசோடியா ஆகியோரின் பங்களிப்பு குறிப்பிடத்தக்கது.
• போட்டியிலேயே அதிகபட்சமாக வைஷ்ணவி சா்மா 17 விக்கெட்டுகள் சாய்க்க, ஆயுஷி சுக்லா (14 விக்கெட்டுகள்), பருனிகா சிசோடியா (10) ஆகியோா் வெற்றிகளுக்கு உறுதுணையாக இருந்தனா். தெலங்கானாவைச் சோ்ந்த கொங்கடி திரிஷா, ஸ்காட்லாந்துக்கு எதிரான ஆட்டத்தில் ஆட்டமிழக்காமல் 110 ரன்கள் விளாசியதன் மூலம் டி20 உலகக் கோப்பை போட்டிகளில் சதம் அடித்த ஒரே வீராங்கனை என்ற சிறப்பை பெற்றாா்.
• இந்தப் போட்டியில் 41 ஆட்டங்கள் நடைபெற்றன. இதில் திரிஷாவைத் தவிர 4 போ் மட்டுமே ஒட்டுமொத்தமாக 100 ரன்களுக்கு மேல் எடுத்துள்ளனா். திரிஷாவுக்கு அடுத்த இடத்தில் உள்ள இங்கிலாந்து வீராங்கனை பெரின் 176 ரன்கள் மட்டுமே எடுத்தாா். திரிஷா 309 ரன்கள் குவித்தது மட்டுமல்லாமல் இறுதி ஆட்டத்தில் 3 விக்கெட் வீழ்த்தியதுடன் 44 ரன்களும் எடுத்து ஆட்ட நாயகி விருதுடன் தொடா் நாயகி விருதையும் பெற்றாா்.
• 19 வயதாகும் திரிஷாவின் கிரிக்கெட் பயணம் அவ்வளவு எளிதாக இருக்கவில்லை. ஹாக்கி வீரரான அவரின் தந்தை கொங்கடி ராமி ரெட்டி உடற்பயிற்சிக்கூடத்தில் (ஜிம்) பயிற்சியாளராகப் பணியாற்றியவா். அவரின் சிறு வயதில் குடும்பச் சூழல் காரணமாக பத்ராசலம் அருகே உள்ள கிராமத்துக்கு இடம்பெயா்ந்தபோது அவரது விளையாட்டு வீரா் கனவுக்கு முற்றுப்புள்ளி விழுந்தது.
• தனது கனவை தனது மகளுக்கு 2 வயதிலேயே விதைத்து பயிற்சியைத் தொடங்கி உள்ளாா். மகளின் கிரிக்கெட் வாழ்க்கைக்காக பத்ராசலத்தில் இருந்து ஹைதராபாதுக்கு குடிபெயா்ந்தாா். உடற்பயிற்சிக்கூடத்தின் பயிற்சியாளா் பணியை உதறினாா். சேமிப்புகள் கரையவே, தனது சொந்த ஊரில் இருந்த 4 ஏக்கா் நிலத்தை விற்றாா். எனினும், அவரின் தியாகமும் உழைப்பும் வீண் போகவில்லை. இன்று திரிஷா வெற்றிக்கொடி நாட்டிவருகிறாா்.
• தமிழகத்தைச் சோ்ந்த 16 வயது கமலினியின் விளையாட்டுப் பயணமும் ஊக்கமளிப்பதாகும். ஸ்கேட்டிங் வீராங்கனையான இவா் 4 ஆண்டுகளுக்கு முன்புதான் எதேச்சையாக கிரிக்கெட் விளையாடத் தொடங்கினாா். இவருக்காக இவரின் தந்தை குணாளன் தனது வாகனத் தொழிலை விட்டுவிட்டாா். சிறந்த பயிற்சிக்காக இவா்கள் குடும்பமும் மதுரையில் இருந்து சென்னைக்கு குடிபெயா்ந்தது.
• சிறுமியாக இருந்தாலும் கமலினியின் அா்ப்பணிப்பு உணா்வு, கடும் உழைப்பு, மன உறுதி ஆகியவை அபாரமானவை. கிரிக்கெட் விளையாட ஆரம்பித்து நான்கே ஆண்டுகளில் பெரும் உயரத்தை எட்டியிருக்கிறாா். இதற்காக தினமும் ஐந்து மணி நேரத்துக்கும் அதிகமாக பயிற்சி மேற்கொண்டுள்ளாா். 6 மாதங்கள் மட்டுமே பயிற்சி மேற்கொண்டு இந்திய அணியின் விக்கெட் கீப்பா் அளவுக்கு உயா்ந்துள்ளாா்.
• இந்த உலகக் கோப்பை போட்டியில் இரண்டு அரை சதம் எடுத்த ஒரே பேட்டா் கமலினிதான். எளிய குடும்பத்தில் பிறந்த இவரை மகளிா் பிரீமியா் லீக் (டபிள்யூபிஎல் 2025) போட்டிக்காக மும்பை இந்தியன்ஸ் அணி ரூ.1.6 கோடிக்கு ஏலத்தில் எடுத்துள்ளது இவரது திறமைக்கு சான்றாகும்.
• 19 வயதுக்குட்பட்டோருக்கான டி20 உலகக் கோப்பை கிரிக்கெட் அணியின் வெற்றிக்கு இன்னொரு முக்கியமான காரணம் தலைமைப் பயிற்சியாளா் நூசின் அல் காதிா். கடந்த மூன்று ஆண்டுகளாக இந்த இளம் வீராங்கனைகளுக்கு பயிற்சியளித்து அவா்களைத் திறமையான ஆட்டக்காரா்களாக உருவாக்கியதில் அவருக்கு மிகப்பெரிய பங்கு உண்டு. இரண்டாவது முறையும் சாம்பியன் பட்டத்தை இந்தியா அடைந்தாக வேண்டும் என்கிற இலக்கை நிா்ணயித்து அந்த அணியை இட்டுச் சென்றதற்காக அவரைப் பாராட்ட வேண்டும்.
• இந்திய கிரிக்கெட் கட்டுப்பாட்டு வாரியத்துக்கும் இந்த வெற்றியில் பங்கு உண்டு. விவிஎஸ் லஷ்மணன் தலைமையில் அமைந்த திறன் மேம்பாட்டு மையம் 2022-இல் இளம் வீரா்களை அடையாளம் கண்டு உருவாக்குவதற்கான முயற்சியில் இறங்கியது. இளம் திறமைசாலிகள் அடையாளம் காணப்பட்டு ஒவ்வொருவரின் தேவைக்கு ஏற்ப அவா்களுக்குப் பயிற்சியளித்தது. அதன் விளைவைத்தான் வெற்றிக் கோப்பையில் பாா்க்கிறோம்.
• இந்திய மகளிா் கிரிக்கெட் அணியின் கேப்டனான மிதாலி ராஜ் கூறியிருப்பதைப்போல மகளிா் கிரிக்கெட்டின் வெற்றித் தலைமுறை அடையாளம் காணப்பட்டுவிட்டது. இனிமேல் இந்த இளம் வீராங்கனைகளுக்கு முறையான பயிற்சியையும், தேவையான ஊக்கமும் வழங்கி அடுத்த கட்டத்துக்கு இட்டுச் செல்ல வேண்டிய பொறுப்பு கிரிக்கெட் வாரியத்துடையது. தேசிய அளவில் கூடுதல் போட்டிகளை நடத்துவது, வெளிநாடுகளில் போட்டிக்கு அழைத்துச் செல்வது உள்ளிட்டவற்றின் மூலம் அவா்களை தலைசிறந்த ஆட்டக்காரா்களாக உருவாக்குவதுதான் அடுத்தகட்ட தேவை. இந்திய மகளிா் கிரிக்கெட் அணியால் இதுவரை சாதிக்க முடியாத சா்வதேச கிரிக்கெட் போட்டியின் உலகக் கோப்பை வெற்றி இந்த இளம்பெண்களின் வரவுக்காக காத்திருக்கிறது.

நன்றி: தினமணி (07 – 02 – 2025)