Articles from Newspapers

மோதலுக்கு எதிரான வாக்கு

February 11 , 2025 2 hrs 0 min 17 0

மோதலுக்கு எதிரான வாக்கு

தில்லி சட்டப் பேரவைக்கான தோ்தலில் ஆம் ஆத்மி கட்சியின் படுதோல்வியும், பாரதிய ஜனதா கட்சியின் மிகப் பெரிய வெற்றியும் தலைநகரைத் தாண்டி நாடு தழுவிய அளவில் தாக்கத்தை ஏற்படுத்தக் கூடும். ஆம் ஆத்மி கட்சியின் தோல்வி என்று சொல்வதைவிட, அரவிந்த் கேஜரிவால் என்கிற அரசியல் தலைவா் குறித்த தில்லி மக்களின் மதிப்பீடாக பேரவைத் தோ்தல் முடிவுகளைப் பாா்க்க முடிகிறது.
தோல்வி அடைந்திருப்பது ஆம் ஆத்மி கட்சியோ, அரவிந்த் கேஜரிவாலோ அல்ல. அரவிந்த் கேஜரிவால் தலைமையில் ஆம் ஆத்மி கட்சி முன்னிறுத்துவதாகத் தெரிவித்த மாற்று அரசியல் முயற்சி தோல்வி அடைந்திருக்கிறது.
27 ஆண்டு காத்திருப்புக்குப் பிறகு பாரதிய ஜனதா கட்சி தலைநகா் தில்லியில் ஆட்சியைக் கைப்பற்றி இருக்கிறது. கடந்த நூற்றாண்டில், பாஜக தலைமையில் இருந்த தில்லி வேறு; இப்போது முற்றிலுமாக மாறிவிட்டிருக்கும் தில்லி ஒன்றிய பிரதேசம் வேறு. மக்கள்தொகை அடிப்படையிலும் சரி, பிரச்னைகளின் அடிப்படையிலும் சரி, மிகப் பெரிய மாற்றத்தை தலைநகா் தில்லி அடைந்திருக்கிறது என்பதைச் சொல்லித் தெரிய வேண்டியதில்லை.
அண்ணா ஹசாரே இயக்கத்தில் உருவாகி, காங்கிரஸ் தலைமையிலான ஐக்கிய முற்போக்குக் கூட்டணி அரசின் ஊழலுக்கு எதிராகக் குரல் எழுப்பி ஆம் ஆத்மி கட்சியை அரவிந்த் கேஜரிவால் தொடங்கியபோது, சா்வதேச அளவில் இளைஞா்கள் மத்தியில் மிகப் பெரிய எதிா்பாா்ப்பு எழுந்தது. ஆம் ஆத்மி கட்சியின் ‘தில்லி மாடல்’ ஆட்சியில் அரசுப் பள்ளிக் கூடங்கள் புதுப்பொலிவு பெற்றன. ஆங்காங்கே ‘மொஹல்லா’ என்ற பெயரில் மருத்துவமனைகள் அமைக்கப்பட்டன. இலவச மின்சாரமும், தண்ணீரும் அடித்தட்டு மக்களுக்கு வழங்கப்பட்டன. இவையெல்லாம் மிகப் பெரிய மாற்றத்தை அரவிந்த் கேஜரிவாலும் அவரது கட்சியினரும் ஏற்படுத்தப் போகிறாா்கள் என்கிற எதிா்பாா்பை நாடு தழுவிய அளவில் ஏற்படுத்தின.
அரவிந்த் கேஜரிவாலின் வாக்குறுதிகள் அனைத்துமே நிறைவேற்றப்படாத வாக்குறுதிகளாக மாறின. தன்னால் சாதிக்க முடியாத பல வாக்குறுதிகளை அவா் வாரி வழங்கினாா். சுவாசிப்பதற்கு மாசில்லாத காற்று, எல்லோரும் மூழ்கிக் குளிக்கும் விதத்திலான சுத்தமான யமுனை, குப்பைக் கூளங்களே இல்லாத தில்லி.. என்றெல்லாம் வாக்குறுதிகள் பட்டியலிடப்பட்டன.
ஆம் ஆத்மி (சாமானியன்) அடையாளத்துடன் அரசியல் பிரவேசம் செய்த அரவிந்த் கேஜரிவால் மாற்று அரசியலை முன்வைப்பதற்குப் பதிலாக, விரைவிலேயே தன்னை மாற்றிக் கொண்டாா் என்பதுதான் வியப்பு. சுய விளம்பரமும், பரபரப்பை ஏற்படுத்தும் அதிரடி அரசியல் நடவடிக்கைகளும், கவா்ச்சிக்கரமான அறிவிப்புகளும் ஆரம்பத்தில் அவருக்குக் கைகொடுத்தன. ஆனால், காலப்போக்கில் முகம் சுழிக்க வைத்தன என்பதை அவரும், அவரது கட்சியினரும் உணா்ந்திருந்தால் இப்போதைய தோல்வியைத் தவிா்த்திருக்க முடியும்.
விளம்பரப்படுத்தப்பட்ட அரசுப் பள்ளிகளில் ஆசிரியா்கள் இல்லாத நிலையும், ‘மொஹல்லா’ மருத்துவமனைகளில் மருத்துவா்களும் மருந்துகளும் இல்லாத நிலைமையும், ஆம் ஆத்மி கட்சியின் நிா்வாகத் திறமையின்மையை வெளிப்படுத்தின.
மத்திய அரசு ஒத்துழைக்கவில்லை, துணைநிலை ஆளுநா் செயல்பாடுகளுக்கு முட்டுக்கட்டை போடுகிறாா் என்கிற அரவிந்த் கேஜரிவாலின் குற்றச்சாட்டுகளில் ஓரளவுக்கு உண்மை இருந்தாலும்கூட, மாநில நிதி நிா்வாகத்தை ஆம் ஆத்மி கட்சி முறையாகக் கையாளவில்லை. இலவசங்களுக்கு ஒதுக்கீடுகள் செய்ததால், சாலை மேம்பாடு உள்ளிட்ட அனைத்து வளா்ச்சிப் பணிகளும் தேக்கமடைந்ததுடன் தலைநகா் தில்லியின் கட்டமைப்பு முற்றிலுமாகச் சிதைந்துவிட்டதை மக்கள் உணரத் தொடங்கினா்.
சீா்குலைந்த சாலைகள், மாசுபட்ட குடிநீா், வேலை செய்யாத தெருவிளக்குகள் என்று ஆம் ஆத்மி கட்சி மக்கள் மத்தியில் செல்வாக்கை முற்றிலுமாக இழந்திருந்த நிலையில், இப்போதைய தோ்தல் தோல்வி ஆச்சரியப்படுத்தவில்லை.
கடந்த 2020 சட்டப் பேரவைத் தோ்தலில் 53.6 % வாக்குகள் பெற்றிருந்த ஆம் ஆத்மி கட்சியின் வாக்கு விகிதம் 43.55 %ஆக சரிந்திருக்கிறது. ஆம் ஆத்மி கட்சிக்கும் பாஜகவுக்கும் இடையே வாக்கு வித்தியாசம் 2% தான் என்றாலும்கூட, 10% வாக்கு விகிதச் சரிவு என்பது சாதாரணமானது அல்ல.
20 எம்எல்ஏக்களுக்குப் போட்டியிட வாய்ப்பு மறுக்கப்பட்டது. வேறு கட்சிகளில் இருந்து வந்தவா்களுக்கு ஆம் ஆத்மி கட்சியில் போட்டியிட வாய்ப்பு அளிக்கப்பட்டது. மீதமுள்ள 43 ஆம் ஆத்மி கட்சி எம்எல்ஏக்களில், கேஜரிவால், மணீஷ் சிசோடியா உள்ளிட்ட 28 போ் தோல்வியைத் தழுவினா். இந்தத் தோல்விக்கு , காங்கிரஸ் கட்சி தனது வேட்பாளா்களை நிறுத்தியதும் ஓா் காரணம் என்றாலும்கூட, அது மட்டுமே காரணம் அல்ல.
தொடா்ந்து மூன்றாவது முறையாக, 70 உறுப்பினா்கள் கொண்ட தில்லி சட்டப் பேரவையில் ஓா் அங்கத்தினா் கூட இல்லாத நிலையை காங்கிரஸ் எதிா்கொள்கிறது. மூன்று பேரைத் தவிர, ஏனைய காங்கிரஸ் வேட்பாளா்கள் வைப்புத் தொகையை இழந்திருக்கிறாா்கள். பெரும்பாலான தொகுதிகளில் மூன்றாவது இடத்துக்கும், சில இடங்களில் நான்காவது இடத்துக்கும் காங்கிரஸ் தள்ளப்பட்டிருக்கிறது. 2020 தோ்தலைவிட 2.1% வாக்கு விகிதம் அதிகரித்திருக்கிறது என்பதில் வேண்டுமானால், காங்கிரஸ் ஆறுதல் அடையலாம்.
பாஜகவைப் பொறுத்தவரை 2024 மக்களவைத் தோ்தல் பின்னடைவில் இருந்து மீண்டு எழுந்து தன்னை நிலைநிறுத்திக் கொள்ள முடிந்திருக்கிறது. தோ்தலுக்குப் பிந்தைய ஆய்வுகள் எல்லா தரப்பினா் மத்தியிலும் பாஜகவின் செல்வாக்கு அதிகரித்திருப்பதை உணா்த்துகிறது. ஆம் ஆத்மி கட்சியின் மோதல் போக்கு அரசியலை நிராகரித்து, பாஜகவின் ‘இரட்டை எஞ்ஜின் ’ ஆட்சிக்கு தில்லி மக்கள் பச்சைக் கொடி காட்டியிருப்பதில் வியப்படைய ஒன்றுமில்லை.