விளிம்புநிலை மக்களின் கனவு நாயகன்!

விளிம்புநிலை மக்களின் கனவு நாயகன்!

• அண்ணல் அம்பேத்கா் ஒரு சில ஜாதிகளுக்கு மட்டும்தான் தலைவரா? ஜாதிகள் கடந்த, மதங்கள் கடந்த, மாசற்ற, மனிதநேயத்திற்கான தலைவராகவே அவா் கருதப்பட வேண்டும்.
• உலகிலேயே அதிக சிலைகள் வைக்கப்பட்டிருப்பது கௌதம புத்தருக்குத்தான் என்றால், இந்தியாவில் அதிக சிலைகளைக் கொண்ட ஆளுமை அண்ணல் டாக்டா் அம்பேத்கா். ஒடுக்கப்பட்ட மக்களின், விளிம்புநிலை மக்களின் வாழ்வு மலர, ஜாதியச் சாயங்களால் தங்கள் வாழ்வு இருள் மண்டிக் கிடந்த துயரத்தில் இருந்து மீண்டு எழுவதற்கு, அண்ணல் டாக்டா் அம்பேத்கா் வெளிச்சம் தந்தாா் என்றால், அதில் இருவேறு கருத்துகள் இருக்க முடியாது.
• மகாத்மாகாந்தி, ஜவஹா்லால் நேரு, நேதாஜி சுபாஷ் சந்திரபோஸ் போன்ற தலைவா்களின் படங்களை வீட்டிலே வைத்தால், அவா்களை யாரும் அடையாளப்படுத்துவதில்லை. ஆனால், அண்ணல் டாக்டா் அம்பேத்கா் படத்தை வீட்டில் வைத்திருந்தால் அவா்களை அடையாளப்படுத்துகிற ஒரு நிலையைப் பாா்க்கிறோம். அப்படியானால், அண்ணல் அம்பேத்கா் ஒரு சில ஜாதிகளுக்கு மட்டும்தான் தலைவரா?
• ஜாதிகள் கடந்த, மதங்கள் கடந்த, மாசற்ற, மனிதநேயத்திற்கான தலைவராகவே அவா் கருதப்பட வேண்டும். வா்க்கப் போராட்டத்தில், ஜாதிய ஏற்றத்தாழ்வுகளால் அவா் இந்த தேசத்தில் அடையாளப்பட்டிருப்பது மிகப் பெரிய சோகம்.
• விளிம்பு நிலை மக்களின் கனவு நாயகன், தாழ்த்தப்பட்ட மக்களின் உயா்வுக்கு தன்னைஅா்ப்பணித்த உன்னதத்தின் மறு வடிவம் என்பதான அவரைப் பற்றிய வரையறை என்பது, ஒரு குறுகிய வட்டத்துக்குள் நாம் அம்பேத்கரை அடைப்பது போல் ஆகிவிடும். சட்டத்திற்கு எழுத்து வடிவம் தந்தவா் என்பதும், அந்த குறுகிய வட்டத்துக்குள்ளே அடங்கி விடும்.
• அரசியல், இலக்கியம், தத்துவம், இதிகாசம், வரலாறு, மதம், சட்டம், பொருளாதாரம் என அறிவுசாா்ந்த துறைகளில், வாசிப்பும், அறிதலும் கொண்ட பன்முகத்தன்மையின் கூா்மையான வடிவம்தான் அம்பேத்கா். ஆகவேதான், அம்பேத்கரின் முனைவா் பட்ட ஆய்வு ரூபாய் குறித்தது என்பதும், ரிசா்வ் வங்கியை உருவாக்குவதில் முக்கியமான பங்கு அவருடையது என்பதும் அவருடைய கனமான பின்புலமாகும்.
• பிரிட்டிஷ் இந்தியாவில் மான்டேகு செம்ஸ்போா்டு அரசியல் சீா்திருத்தம் நடைமுறைப்படுத்தப்படுவது தொடா்பாக, நியமிக்கப்பட்ட சௌத் பெரோ குழுவிடம் 1919- இல் தாழ்த்தப்பட்டோா் நிலைமைகளையும், உரிமைகளையும் குறித்து, அம்பேத்கா் சாட்சியம் அளித்த நிகழ்வுதான் அவரது தீவிரமான பொதுவாழ்வின் தொடக்கமாக அமைந்து இருந்தது. இந்த நிகழ்வு நடந்து 10 ஆண்டுகளுக்குப் பின்னரே, பெரியாரின் சுயமரியாதை ஏடுகளான ‘ரிவோல்ட்’, ‘குடியரசு’ ஏடுகளில் அம்பேத்கரைப் பற்றிய பதிவுகள் வரத் தொடங்கின.
• அம்பேத்கரின் அறிவும், ஆற்றலும், அவருக்கு மட்டுமே என்று அவா் பயன்படுத்தி இருப்பாரேயானால், இந்தியாவின் முதல் செல்வந்தராகக் கூட அவா் உயா்ந்திருக்கக் கூடும். ஆனால், தனக்கு மாத்திரம் என்கிற சிந்தனை அவருடையது அல்ல. தன்னுடைய சிந்தனையையும், நேரத்தையும், திறமையையும், கல்வியையும், சமூக மேம்பாட்டுக்காக அவா் பயன்படுத்தியதால்தான், உயா்ந்த மனிதராக நம் நெஞ்சில் அவா் நிலைத்து நிற்கிறாா். பஞ்சமா்கள், கடையா்கள், இழிபிறப்புகள் என்கிற கொடுமைகள் தடுக்கப்பட வேண்டும் என்று விரும்பினாா். அதற்காகவே, தன் வாழ்வின் இறுதி மூச்சு வரை போராடினாா்.
• அம்பேத்கரின் தொடா் போராட்டம், அறிவுசாா்ந்த செயல்பாடுகள்தான். இன்று கோடிக்கணக்கான ஒடுக்கப்பட்டவா்களை அச்செயல்பாடுகளே உயா்த்தி இருக்கிறது. ஏனென்றால், அரசியல் கொடுமையைவிட, சமூகக் கொடுமை பயங்கரமானது. எனவே, சமூகத்தை எதிா்த்து நிற்கும் சீா்திருத்தவாதி, அரசாங்கத்தை எதிா்த்து நிற்கும் அரசியல்வாதியை விட தீரம் மிகுந்தவன் என்கிற கருத்து, அம்பேத்கரின் அடி ஆழத்தில் இருந்து எழுந்ததாகும்.
• ஒடுக்கப்பட்டவா்கள் விடுதலை பெறுவதற்கு கல்வி, அரசியல், அதிகாரத்தைக் கைப்பற்றுதல், சமவாய்ப்புகளை உருவாக்குதல் என்கிற எண்ணம் அவருக்கு இருந்தது. ஏறத்தாழ 40 ஆண்டுகால எழுத்துப் பணியையும், சொற்பொழிவுப் பணியையும் மேற்கொண்ட அவரைப்போல வாழ்க்கையில் பல்வேறு பரிமாணங்கள் பெற்றவா்கள் மிகக் குறைவு.
• ஆராய்ச்சி அறிஞராக, கல்லூரிப் பேராசிரியராக, கல்வியாளராக, வழக்குரைஞராக, பரோடா சமஸ்தான ராணுவத்தில் லெப்டினண்டாக, வைஸ்ராயியின் நிா்வாகக் கவுன்சில் உறுப்பினராக, சுதந்திர இந்தியாவின் சட்ட அமைச்சராக, பிரசுரங்களை வெளியிடுபவராக, பத்திரிகையாளராக, கிளா்ச்சியாளராக, பேச்சுவாா்த்தைகளில் ஈடுபடுபவராக, அரசியல் சட்டத்தை வரைபவராக, புத்தரின் சீடராக, தாழ்த்தப்பட்ட மக்களின் ஒப்பற்ற தலைவராக என்று இன்னும் சொல்லிக் கொண்டே போகலாம்.
• அவரது மேடை என்பது தீண்டாமை எதிா்ப்புக்கானதாய் இருந்தது. இதில் அனைத்து ஜாதியினரும், மனிதத்துவம் பெற்று சகோதரத்துவத்துடன் வாழ வேண்டும் என்பதற்காக அவரது களம் தொடா்ந்து சுழன்று கொண்டே இருந்தது. வயது வந்த அனைவருக்கும் வாக்குரிமை என்பதை வலியுறுத்தி வந்தவா்களில் முதன்மையானவா் அம்பேத்கா். இக்கோரிக்கை முதல் வட்டமேசை மாநாட்டில் ஏற்றுக் கொள்ளாத போது, அதன் மாற்றாக தாழ்த்தப்பட்டோருக்கு தனி வாக்காளா் தொகுதி என்னும் கோரிக்கையை முன் வைத்தாா்,
• சுரண்டலும், வறுமையும், ஏற்றத்தாழ்வும் பொருளாதாரக் காரணங்களால் மட்டும் ஏற்படவில்லை என்பதை தீா்க்கமாகப் பதிவு செய்தாா். வழக்கமான கருத்துகளில் இருந்து மாறுபட்டாா். பொருளாதாரம் என்பது அடித்தளம். அரசியல், பண்பாடு முதலியன அந்த அடித்தளத்தில் நிா்ணயிக்கப்பட்ட மேலடுக்கு என்ற அதன் விளக்கத்தை தலைகீழாகப் புரட்டிப் போட்டாா்.
• சமூகத்தில் நிலவும் பல்வேறு பிற்போக்குத்தனத்திற்கு பெண்களின் நிலைமையும் அவா்களை அடிமைப்படுத்துவதும்தான் என்பதை உணா்ந்து, பெண்களுக்கு சொத்துரிமை உள்ளிட்ட முக்கிய அம்சங்களை அரசியல்சாசனத்தில் இடம் பெறச் செய்தாா். இந்த அரசியலமைப்பானது குடிமக்களின் உரிமைகளுக்கு பலவகைகளிலும் பாதுகாப்பை வழங்கியதோடு மாத்திரமல்லாமல், இது மிகச்சிறந்த சமூக ஆவணமாகவும் வரலாற்று ஆசிரியா்களால் போற்றப்படுகிறது. இந்த மசோதா நிறைவேறாமல் போகவே, அம்பேத்கா் தனது பதவியை தூக்கி எறியவும் தயங்கவில்லை.
• ஜனநாயகம் என்ற அம்சத்தின் மீது ஆழமான நம்பிக்கை கொண்டிருப்பது என்பது அரசியலில் மட்டும் ஜனநாயகம் இருந்தால் போதாது, சமூக ஜனநாயகம் முக்கியமானது என்பதை அவா் உணா்ந்திருந்தாா். அதற்காக ‘எல்லா மனிதா்களையும் சமமாக மதியுங்கள். அதற்காக எல்லா மனிதா்களுக்கும் சமமான வாயப்புகளை வழங்குங்கள். எனவே, ஒரு முடிவுக்கு வாருங்கள். எனக்கு மேலே ஒருவரும் இல்லை, எனக்கு கீழே ஒருவரும் இல்லை என்பதை மனித விழுமியமாக மாற்றுங்கள்’ என்பதே அம்பேத்கா் அனைவருக்கும் சொன்ன பாடமாகும்.
• வரலாறு குறித்த புதிய பாா்வைகளை உருவாக்குவதில், காரல்மாா்க்ஸுக்கும், அம்பேத்கருக்கும் உள்ள ஒற்றுமை ஒன்று உண்டு. மனிதகுல வரலாற்றை வா்க்கப் போராட்டங்களின் வரலாறாக வாசித்து, மக்கள் மன்றத்துக்கு தந்தவா் காரல்மாா்க்ஸ். இந்தியாவின் வரலாறு என்பது சாதி என்ற காரணிகள் கொண்டுதான் ஒவ்வொரு கட்டத்திலும் தீா்மானிக்கப்பட்டிருப்பது என்பதை விரிவாக ஆராய்ந்தாா் அம்பேத்கா். இவற்றில் மறக்க முடியாத ஒரு தருணம் உண்டு.
• இந்திய சுதந்திரத்திற்குப் பிறகு சென்னை உயா்நீதிமன்றம் சட்டத்திற்கான முதல் திருப்பத்தை வழங்கித் தந்து, பிற்படுத்தப்பட்டோா் என்பதற்கான வரையறைகளை வழங்கியதன் மூலம், பிற்பட்டோா் சமுதாய மக்களின் நெஞ்சில் நிரந்தரமாக வாழ்கிறாா் அம்பேத்கா். ‘கற்பி, போராடு, ஒன்றுசோ்’ என்ற அம்பேத்கரின் முழக்கம், அவா் கல்வியின் மீது கொண்டிருந்த ஈடுபாட்டை வெளிப்படுத்தும் ஈரமான ஒரு மழைக்கால நினைவுகளாகும். ‘எவனொருவன் தன் உரிமைகளை எப்போதும் தற்காத்துக் கொள்ள தயாராக இருக்கிறானோ, யாா் ஒருவன் பொது விமா்சனத்திற்கு அச்சப்படாமல் இருக்கிறானோ, அடுத்தவன் கைப்பாவையாக மாறாமல் போதிய சிந்தனையும், சுயமரியாதையும் பெற்று இருக்கிறானோ, அவனே சுதந்திரமான மனிதன்’ என்பாா் அம்பேத்கா்.
• ஒடுக்கப்பட்ட சமுதாயத்தில் இருந்து, இச்சமூகத்தில் தொடா்ந்து துரத்தப்பட்ட அம்பேத்கரின் துயரமிகு பயணம், வாா்த்தைகளால் விவரிக்க முடியாதது. அவை கண்ணீரால் எழுதப்பட வேண்டிய ஒன்றாகும். ரத்தமும், சதையுமான உணா்வுகளால் அவை பதிவு செய்யப்பட வேண்டியவையாகும். மகாராஷ்டிராவில் வாழ்ந்த ஜோதிபா புலே, தாழ்த்தப்பட்டவா்களுக்காக கல்வி நிறுவனங்கள் தொடங்கிய நிகழ்வும், பாகுபாடற்ற அவா் பாா்வையும் அம்பேத்கருக்கு கிடைக்காமல் போயிருந்தால், ஒரு சமூக மாற்றத்திற்கான விதை விழாமலேயே போய் இருந்திருக்கக் கூடும்.
• ஆனால், சமூகம் புறக்கணித்தாலும், ஜாதிக் கொடுமைகளால் அவா் புறக்கணிக்கப்பட்டாலும் தொடா்ந்து அவா் கொண்ட தீா்க்கமிகுந்த இலட்சியப் பயணத்தின் விதையாய் விழுந்தாா், மரமாய் எழுந்தாா். இந்திய வரலாற்றின் பழமை பக்கங்களைக் கிழித்தெறிந்தாா். தானே ஒரு முன்னுதாரணமாகத் திகழ்ந்தாா். ஆகவேதான், ஓா் உண்மையை யாராலும் தோற்கடிக்க முடியவில்லை.
• இந்நிலையில், நாடாளுமன்றத்தில் உள்துறை அமைச்சா் அமித்ஷாவின் பேச்சின் மூலமாகவா அவா் தோற்கடிக்கப்பட்டு விடுவாா்? உயா் பதவியில் இருப்பவா்கள் மகத்தான ஆளுமைகளை, அவா்களின் தியாகங்களை ஒருபோதும் உரசிப் பாா்க்கக் கூடாது. எவராலும் தோற்கடிக்கப்பட முடியாத ஆளுமையாக இன்னும் அம்பேத்கா் இருப்பது பெருமைக்குரிய நிகழ்வாகும்.

நன்றி: தினமணி (01 – 01 – 2025)