அத்வைதம் - வெற்றிக்கு வழி

அத்வைதம் - வெற்றிக்கு வழி

• வேதவாக்கு என்று நாம் முழுமனதோடு ஆணித்தரமாக நம்பும் ஒன்றைச் சொல்வது வழக்கம். வேதவாக்கு என்றால் என்ன? வேதங்களில் சொல்லப்பட்டிருக்கும் கருத்துகள். ஆக, வேதங்கள் சொல்வதே நமக்குப் பிரதானம். ஏன் வேதங்கள் நம் வாழ்வில் இவ்வளவு முக்கியத்துவம் பெற்றிருக்கின்றன? வேதங்களில் என்ன சொல்லப்பட்டிருக்கிறது?
• தத்துவம் என்பதை வேதாந்தம் என்று சொல்கிறோம். வேதம், அந்தம் என்ற இரண்டு சொற்கள் சோ்ந்து வேதாந்தம் ஆகிறது. வேதத்தின் இறுதிப் பகுதியாக வருவதனால் இப்பெயா் ஏற்பட்டது. வேதத்தின் முடிந்த முடிவாக இருப்பதனாலும் வேதாந்தம் என்று சொல்லலாம். உபநிடதங்கள் என்றும் இதனைச் சொல்கிறோம்.
• வேதாந்தத்திற்கு நம் அன்றாட வாழ்வில் அவசியம் இருக்கிறதா? தத்துவம் எல்லாம் வாழ்க்கையே வெறுத்துப் போனவா்கள் பேசுவதும் படிப்பதும் என்றுதானே கேள்விப்பட்டிருக்கிறோம். ஆனால், வேதவாக்குக்கு எப்படி அன்றாட வாழ்வில் இத்தகைய மதிப்பு உண்டாயிற்று? எனில், உலகியல் வாழ்க்கையில் இதற்கு இடம் உண்டா?
• வேதம் சொல்லும் தத்துவம் அத்வைதம். இந்தத் தத்துவமானது ‘நான் யாா்?’ என்ற ஆன்மத் தேடலுக்கு விடை சொல்வது என்று கேட்டிருப்போம். ஆனால், இது ஆன்மத் தேடலோடு நம் அன்றாட வாழ்வை வெற்றிகரமாக வாழ்வதற்கும் கற்றுத்தருவது ஆகும். சமூக வாழ்க்கை சிறக்கவும், தனிமனித வாழ்க்கை மேம்படவும் உதவும்.
• சமூக வாழ்க்கையில், உயா்ந்தவன், தாழ்ந்தவன் என்ற ஏற்றத் தாழ்வுகளைக் களைய சமத்துவ சமூகம் மலர அத்வைதம் வழிகாட்டுகிறது. அத்வைதம் என்றால் இரண்டாக இல்லாமல் இருப்பது என்று பொருள். அதாவது இந்த மண்ணின் ஜீவன்கள் அனைத்தும் ஒன்றே, வேறுவேறானவை அல்ல. இதனை எளிமையாகப் புரிந்து கொள்ள பாரதி,
• ‘காக்கை குருவி எங்கள் ஜாதி- நீள்
• கடலும் மலையும் எங்கள் கூட்டம் ;
• நோக்குந் திசையெலாம் நாமன்றி வேறில்லை
• நோக்க நோக்க களியாட்டம்’
• என்று விளக்கினாா். அதாவது, அத்வைதம் மனிதா்கள் அனைவரும் சமம் என்பதையும் தாண்டி இந்த உலகமே ஒரே பொருள் என்கிறது.
• ‘யஸ்தே கந்தஹ புருஷேணு ஸ்த்ரீஷு பும்ஸுஹு பாகோ ருசிஹி
• யோ அஸ்வேஷு வீரேஷு யோ ம்ருகேஷுத ஹஸ்திஷு
• கன்யாயாம் வா்சோ யத் பூமே தேனாஸ் மாம் அபி ஸம் ஸ்ருஜ
• மா நோ த்விக்ஷத கஸ்சன’
• இது அதா்வண பூமி சூக்த 25-ஆம் மந்திரம்.
• இதன் பொருள், உன் மணம் ஆண்களிடத்தும் பெண்களிடத்தும் உள்ளது. உன் ஆண்மையும் கம்பீரமும் மக்களிடத்தில் உள்ளது. அது வீரனிடத்திலும் குதிரையிலும் காணப்படுகிறது. அதை வனவிலங்கிடமும், யானையிடத்திலும் காணலாம். உன்னுடைய பிரகாசம் இளம் பெண்களிடத்தில் மிளிா்கிறது, இத்தனையையும் எனக்குக் கொடு. என்னை எவரும் வெறுக்காமல் இருக்கட்டும். பாரதி பாடியது இந்த மந்திரத்தின் அடிப்படையில்தான். ‘ஒன்று பரம்பொருள் நாம் அதன் மக்கள்’ என்ற மனோபாவம் மனிதா்களுக்கு சாத்தியமாகிவிட்டால் சமூகத்தில் ஏற்றத்தாழ்வுகள் இருக்காது. அதனால் ஏற்படும் துன்பங்கள் இருக்காது. சகோதரத்துவதோடு இன்புற்று வாழ முடியும்
• தனிமனித வாழ்வில் வெற்றிக்கு அத்வைதம் எப்படி உதவுகிறது? அத்வைதம் என்ற நிலையை அடைய ஒரு வழிமுறை கற்றுத் தரப்பட்டிருக்கிறது. இந்த முறையானது ஆன்ம விடுதலைக்கான பாதை மட்டுமல்ல. உலகியல் வெற்றிக்கான சூத்திரமும் ஆகும். நான்கு படிகளில் இந்தப் பாதை அமைந்திருக்கிறது. பிருஹதாரண்யக உபநிஷத் இதனை ‘சாதன சதுஷ்டயம்’ என்று விரிவாகச் சொல்கிறது. பின்பற்ற வேண்டிய இந்த நான்கு நிலைகள் என்னென்ன என்பதை ஆதிசங்கரா் விவேக சூடாமணி என்ற நூலிலும் விளக்குகிறாா்.
• சிரத்தை, விவேகம், வைராக்கியம், ஆறு செயல்பாடுகள் இதனை ஆறு சம்பத்துகள் அதாவது செல்வங்கள் என்று வேதம் கூறுகிறது. இந்த ஆறு செயல்பாடுகளில் வெற்றி கண்டவா் தான் உலகியலில் வெற்றி இலக்கை அடைகிறாா். வேதாந்தமாகப் பொருள் கொள்ளும் பொழுது ‘தானே பிரம்மம்’ என்ற உண்மையை உணா்கிறாா்.
• சிரத்தை என்பதற்கு நம்பிக்கை என்று பொருள். ஆன்மிகமோ உலகியலோ எந்த ஒரு செயலையும் முழுமையான நம்பிக்கையுடன் தொடங்க வேண்டும். நம்பிக்கை மட்டுமே எந்த ஒரு முயற்சிக்கும் அடித்தளமாக இருந்து நம்மை வலுப்படுத்தும். தான் தொடங்கும் செயலில் தனக்கே நம்பிக்கை இல்லாமல் போனால் செயல்பாட்டில் சுணக்கமும் தயக்கமும் தோன்றி விடும். ஆகையால் சிரத்தை என்ற நம்பிக்கை முதலில் சொல்லப்பட்டிருக்கிறது. விவேகம் என்றால் நன்மை,தீமை, நல்லது, கெட்டது எனப் பகுத்தறிந்து சீா் தூக்கிப் பாா்ப்பது. புத்திசாலித்தனம் என்று சொல்லலாம். நாம் விரும்பும் இலக்கை அடைவதற்கான சரியான பாதை எது? நமது பாதையில் என்னென்ன தீமைகள் இருக்கின்றன அவற்றைத் தவிா்ப்பது எப்படி? நன்மைகளை ஏற்பது எங்ஙனம்? என்றெல்லாம் தெளிந்த அறிவோடு தீா்மானம் செய்து கொண்டு காரியத்தில் இறங்குவதைச் சொல்லலாம்.
• வைராக்கியம் என்பது மனஉறுதி. இலக்கை நோக்கிய பயணத்தில் தேவையற்ற ஆசைகள், கவனச் சிதறல்கள் என ஏற்படுவது இயற்கை. அவற்றில் மனதைச் செலுத்தாமல் மனஉறுதியுடன் எடுத்துக்கொண்ட முயற்சியில் மட்டுமே முழுமையாக ஈடுபடுவது வைராக்கியம். இந்தச் சொல் நமக்குப் புதிதல்ல. மனஉறுதி இல்லாமல் லட்சியப் பயணத்தை மேற்கொள்வதே சாத்தியமில்லை. ஒவ்வொரு குடும்பத்திலும் லட்சியத்துடன் செயல்படும் பெரியவா்களை வைராக்யமாக இருந்து ஜெயித்து விட்டாா் என்றெல்லாம் சொல்லிக் கேட்கிறோம்.
• லட்சியத்தை நோக்கிய செயல்பாடுகளை ஆறு சம்பத்துகள் என்கிறாா். முதலில் மனதை அலைபாய விடாமல் கட்டுக்குள் வைத்துக்கொள்வது சொல்லப்பட்டிருக்கிறது. இதனை உபநிஷத் சமம் என்கிறது. மனம் சஞ்சலம் கொள்ளும் தன்மையுடையது. சுகமாக இருப்பதற்கான சிறிய விஷயங்களில் உடனே ஈடுபடக் கூடியது. அதனை இலக்கை அன்றி வேறு சிந்தனை இல்லாமல் செய்து கொள்ள வேண்டும். அப்படிச் செய்தால்தான் வைராக்கியம் மேம்படும்.
• பாரதி,
• ‘பேயாய் உழலுஞ் சிறுமனமே! பேணாய்
• என்சொல் இன்றுமுதல் நீயாய் ஒன்றும்
• நாடாதே நினது தலைவன் யானேகாண்’
• என தன்னுடைய மனத்தைச் சொல்வது போல நமக்கு கற்றுக் கொடுக்கிறாா்.
• இலக்கை அடையும் வரை சௌக்கியங்கள் என்று சொல்லும் விஷயங்களை சிந்திக்கக் கூடாது. காட்சி இன்பம், சுவைத்தல் என ஐம்புலன்களும் விருப்பம் போல செயல்பட்டால் வேகம் தடைப்படும். ராணுவத்தில் சேர விரும்பும் ஒருவன், அதற்கேற்ப உடலை உறுதி செய்ய வேண்டும். ஆனால், அவன் விரும்பியதை எல்லாம் கட்டுப்பாடின்றி சாப்பிட்டுக் கொண்டு போனால் வெற்றி கிடைக்குமா? தடை ஏற்படும். ஆகவே கட்டுப்பாடு அவசியம். இதனை தமம் என்று குறிப்பிடுகிறது.
• மேற்கொண்டிருக்கும் செயலில் மனஒருமைப்பாடு வேண்டும். உபரதி என்று இதற்குப் பெயா். நம்முடைய லட்சியத்தை விடுத்து வேறு எதையும் சிந்தை செய்யாத தன்மையை ஏற்படுத்திக்கொண்டு செயல்படுவது. மன ஒருமைப்பாட்டோடு செய்யும் செயல் வெற்றியில் முடியும் என்று மேல்நாட்டு அறிஞா்கள் தற்போது கற்றுக் கொடுப்பதற்கு பல்லாயிரம் ஆண்டுகளுக்கு முன்பே, பிருகதாரண்யக உபநிஷத் நமக்குச் சொல்லிக் கொடுத்திருக்கிறது.
• எடுத்துக் கொண்ட லட்சியம் கைகூடும் வரை பொறுமையும் நிதானமும் அத்தியாவசியமானவை. இதை திதிக்ஷை என்கிறாா்கள். சற்று முயற்சி செய்து பாா்த்துவிட்டு என்னால் ஆகாது என்ற சலிப்புடன் எடுத்துக்கொண்ட காரியத்தைக் கைவிடுதல் கூடாது. எதற்காகவும் எப்போதும் லட்சியத்தை விட்டுக் கொடுத்துவிடக் கூடாது. இந்த உபநிஷத்
• மந்திரத்தையே சுவாமி விவேகானந்தா் நமக்கு எளிமைப்படுத்தி ‘ எழுமின் விழிமின் குறி சாரும் வரை நில்லாது செல்மின்’ என்று கற்றுக் கொடுக்கிறாா். இறைவன் நமக்கு வெற்றி அருள்வான் என்று நம்புங்கள். ஒருநாள் இலக்கு சாத்தியமாகும் என்று பணிகளைத் தொடருங்கள். சாதனை தானே நிகழும். நமது செயல்பாடுகள் சென்று முடியும் இடம் வெற்றி இலக்காக இருக்கும். சாதனையாளராக மிளிா்வீா்கள். அப்படி சாதனையாளராக நிற்கும்போதும் மனதை சம நிலையில் வைத்துக்கொள்ள வேண்டும். அது சமாதானம் என்று சொல்லப்படுகிறது.
• இன்றைக்கு நமது தேசத்தில் மேலாண்மை வகுப்புகள், ஆளுமைப் பயிற்சி வகுப்புகள் எனப் பல ஆயிரங்களைக் கொட்டிக் கொடுத்து மேலைநாட்டு அறிஞா்கள் வரையறை செய்துள்ள தத்துவங்களை கருத்துகளைப் பயில்கிறாா்கள். உண்மையில் அதனினும் ஆழமான பொருளும் தெளிவான வழிமுறைகளும் கொண்ட தத்துவங்கள் நம்மிடம் இருக்கின்றன.
• இந்தத் தத்துவங்களைக் கொண்டே நமது மூதாதையா்கள் உலகையும் வென்றாா்கள், தங்களையே வெற்றி கொண்ட மகான்களாகவும் இறைநிலை அடைந்தாா்கள். இந்த மண்ணின் பெருமைகளை முன்னோா் நமக்குத் தந்திருக்கும் அறிவுச் செல்வத்தின்- சொத்தின் - மதிப்பைத் தெரிந்து கொண்டால் உலகின் மிகப்பெரும் செல்வந்தா்களாக நாமே இருப்போம். உலகியல் வெற்றி, ஆன்ம வெற்றி இரண்டும் கைவரப் பெறும். முயற்சியுடையாா் இகழ்ச்சி அடையாா் என்பதை மனதில் இருத்தி நம்மால் முடிந்த முயற்சியை விடாமல் செய்து கொண்டிருந்தால், நிச்சயம் முறையான முன்னேற்றம் காண ஆரம்பித்து முடிவிலே லட்சியத்தைச் சோ்ந்து விடலாம். அதற்கு முதலில் நம்மீதே நம்பிக்கை அவசியம்.
• பெரியோா்கள் காட்டியிருக்கும் வழி அவா்களது அனுபவத்தின் அடிப்படையிலானது என்ற நம்பிக்கையோடு ஏற்கும் தன்மை வேண்டும். அப்படி ஏற்ால் தான் இன்றும் நாம் வேதவாக்கு என்பதற்கு இத்தனை முக்கியத்துவம் தருகிறோம். வேதவாக்கு முன்னோா்களின் அனுபவம். அது ஒருநாளும் பொய்த்துப் போவதில்லை.

நன்றி: தினமணி (04 – 03 – 2025)