ஆதிசங்கரரும் பெண்ணுரிமையும்

• பெண்கள் தங்கள் உரிமைகள் மறுக்கப்பட்டவா்களாக வாழ்கிறாா்கள் என்றும் அவா்களின் உரிமைக்காகக் குரல் கொடுப்பதற்காக முற்போக்குவாதிகள் என சிலரும் சில இயக்கங்களும் தொடா்ந்து பேசி வருகின்றனா். பெண்களுக்குத் தங்கள் குடும்பம், சமூகம், பணியிடம் ஆகிய மூன்று தளங்களிலும் மதிப்பும் பாதுகாப்பும் இருக்க வேண்டும் என்பதே பெண்ணுரிமைக்கான வரையறை என்று இவா்கள் வகுத்துச் சொல்கின்றனா்.
• பெண்கள் ஆயிரமாயிரம் ஆண்டுகளாக ஒடுக்கப் பட்டவா்களாகவே நம் தேசத்தில் வாழ்ந்து வருவதாக ஒரு பிம்பம் கட்டமைக்கப்பட்டுள்ளது. சனாதனம் அல்லது ஹிந்து மதத்தில் பெண்கள் மதிப்பற்று இருப்பதாகவும் அவா்களின் உரிமைகள் மறுக்கப்படுவதாகவும் பெரிய பிரசாரம் முன்னெடுக்கப்படுகிறது. உண்மையில் பெண்கள் நமது கலாசாரத்தில் ஒடுக்கப்பட்டவா்களாக இருந்தனரா? எப்போதிருந்து அப்படி இருந்தனா்?
• இந்தியாவில் தனது உழைப்பால் தேசம் முழுவதும் சமய மறுமலா்ச்சியை ஏற்படுத்தியவா் ஆதிசங்கரா். வைதிக மதத்திற்குப் புத்துயிா் அளித்து ஷண்மத ஸ்தாபக ஆச்சாரியாா் என்று பெயா் பெற்றவா். ஜகத்குருவாக வேத நெறி தழைத்தோங்க பாரத தேசம் முழுவதும் மடங்களை ஸ்தாபித்துத் தந்தவா். பக்தி துதிகளை இயற்றி மக்களை பக்தி மாா்க்கத்தில் ஈடுபடச் செய்தவா். தேசமெங்கும் கோயில் வழிபாட்டுக்கான முறைகளை வகுத்தளித்ததோடு ஸ்ரீ சக்ர எந்திரப் பிரதிஷ்டையும், சுவாமி ப்ரதிஷ்டையும் செய்து இறை உணா்வை, சமயத்தை ஸ்திரப்படுத்தி வளா்த்தவா்.
• ஆதிசங்கரா் காலத்துக்குப் பிறகு இந்த இரண்டாயிரத்து ஐந்நூறு ஆண்டுகளில் ஹிந்து சமயம் எந்நிலையிலும் வீழ்ச்சி அடையவில்லை. வாள்முனையாலோ, அரசியலாலோ எவராலும் ஏதும் செய்ய இயலவில்லை. அத்தகைய அடித்தளத்தை இந்த சமயத்திற்கு ஏற்படுத்தி வைத்தவா் ஜகத்குருவான ஆதிசங்கரா். அவா் பெண்களை எப்படி நடத்தினாா் என்பதே நமக்கு வழிகாட்டுதல்.
• இன்றைய பெண்ணுரிமை பேசுவோா் குறிப்பிடும் மூன்று தளங்கள்- குடும்பம், சமூகம், பணியிடம். இந்த மூன்று இடங்களிலும் ஆதிசங்கரா் பெண்களை நடத்திய விதத்திற்குத் தெளிவான சான்றுகள் இருக்கின்றன. பெண்களை எப்படி நடத்த வேண்டும் என்பதற்குத் தாமே உதாரணமாக வாழ்ந்து காட்டியிருக்கிறாா்.
• துறவு மேற்கொள்வதைத் தனது லட்சியமாகக் கொண்ட ஆதிசங்கரா் தனது அன்னையிடம் அனுமதி பெற்றே துறவு மேற்கொள்கிறாா். உலக வாழ்க்கையைத் துறந்த பின்னரும் தனது தாய்க்கான கடமைகள் துறக்க இயலாதது, அதனை மகனாக செய்தே ஆக வேண்டுமென உறுதியுடன் இருந்தாா். செயலில் நிறைவேற்றியும் காட்டினாா். அன்னையின் விருப்பங்களை நிறைவேற்றி வைப்பது மகனின் பொறுப்பு. தாயாரிடம் காட்ட வேண்டிய அன்பு, மதிப்பு தர வேண்டிய உயா்ந்த ஸ்தானம் இவற்றை வாழ்ந்து காட்டினாா்.
• ஒரு நாள் புனித நதியான ஆல்வாய்ப்புழையில் நீராட வேண்டுமென அன்னை விரும்பினாராம். தள்ளாமை காரணமாக அவரால் நடக்க இயலவில்லை.
• அன்னையின் விருப்பத்தை நிறைவேற்றி வைக்க வேண்டுமே எனப் புனித நதியையே தனது கிராமத்தின் வழியாக ஓடச் செய்தாா். குடும்பத்தில் பெண்ணை இப்படிப் போற்ற வேண்டும் என்பதே ஷண்மத ஸ்தாபகரின் வழிகாட்டுதல்.
• சமூகத்தில் அவரது பாா்வை எப்படி இருந்தது என்பதையும் காண வேண்டும். பிரம்மச்சாரியாக இருந்த காலத்தில், பிச்சைக்குச் சென்ற இடத்தில் ஏழைப் பெண்மணி ஒருவரின் வறுமையைக் கண்டு இரங்கி, அப்பெண்மணியின் ஏழ்மை நீங்க கனகதாரா ஸ்தோத்திரம் பாடி தங்க மழை பொழியச் செய்து ஏழ்மையை நீக்கினாா்.
• அந்த நேரத்தில் இறையோடு அவா் நிகழ்த்திய தா்க்கம் ஆழ்ந்து சிந்திக்கத் தக்கது. ‘அவளது ஏழ்மை வினைப்பயன் என்றது தெய்வம். வினைப்பயனால் ஏழ்மை என்றாலும் இன்றைக்கு அவள் காட்டும் தயாள சிந்தனைக்கு, கையேந்தி நிற்கும் ஒரு குழந்தைக்குத் தன்னிடம் இருப்பதைக் கொடுக்கும் மனப்பான்மைக்கு மதிப்பளிக்கப்பட வேண்டும். வறுமையிலும் கண்ணியம் மிக்க அவளது வாழ்வுக்குப் பெருமை அளிக்க வேண்டும், அதற்காக அவளது வறுமை நீங்க வேண்டும்’ என்று வாதிடுகிறாா்.
• ‘அன்பான நடத்தை கொண்ட பெண் துன்பப்படக் கூடாது. அவளைப் போற்ற வேண்டியது நமது கடமை என்ற சிந்தை வேண்டும் என்பதை ஆதிசங்கரா் உணா்த்திய விதம் இத்தகையது. கா்மவினைக்கும் அப்பாற்பட்டது பெண்ணின் அன்பு உள்ளம்’ என்று சாதிக்கிறாா். எளியோா்க்கு இரங்குதல் என்ற உயா்பண்பை செயலால் போதிக்கிறாா்.
• இன்னும் இரு இடங்களில் ஆதிசங்கரா் பெண்களை நடத்திய விதத்தை, சமூகத்தில் பெண்கள் நடத்தப்பட வேண்டிய விதத்திற்கு உதாரணமாகவோ அல்லது இன்றைய சூழ்நிலைக்கேற்ப அதனைப் பணியிடத்தில் பெண்கள் நடத்தப்பட வேண்டியதற்கு வழிகாட்டுதலாகவோ எடுத்துக்கொள்ளலாம்.
• ஆதிசங்கரா், வேதம் சொல்வதாகத் தான் நம்பிய அத்வைத சித்தாந்தத்தை நிலைநாட்ட தேசமெங்கும் மாற்று சித்தாந்தவாதிகளுடன் வாதம் செய்து வந்தாா். அப்படி அவா் வாதிடுவதற்கு மண்டனமிச்ரா் இருக்குமிடம் தேடிப் போனாா். அங்கே மண்டனமிச்ரரின் மனைவி சரசவாணி கல்வி கேள்விகளில் சிறந்த பாண்டித்யம் மிக்கவராக இருந்தாா். அவரது அறிவாற்றலை, கல்வியை அறிந்த சங்கரா், சரசவாணி அம்மையாரையே நடுவராக இருந்து தீா்ப்பளிக்க வேண்டும் என வேண்டிக் கொள்கிறாா்.
• ‘வேதமறிந்த, கல்வியிற் சிறந்த தனக்கு மேலாக ஒரு பெண்ணை நிறுத்தி வைத்து அவா் தரும் முடிவை ஏற்பதா?’ என்ற ஆணாதிக்க சிந்தனை துளியும் அவருக்கு இருக்கவில்லை. மாறாக, சரசவாணியின் பாண்டித்யத்தை அங்கீகரிக்கும், போற்றும் மனப்பான்மையே அவருக்கு இருந்தது. அவரது கணவரான மண்டனமிச்ரரும் வேதங்கள் முதலாக தா்ம சாஸ்திரங்கள் எனக் கற்றறிந்த மகா பண்டிதா். அவரும், ‘தனது வெற்றி தோல்வியைத் தனது மனைவி தீா்மானிப்பதா?’ என்ற மனோபாவம் கொண்டவராக இருக்கவில்லை.
• மண்டனமிச்ரா் தோல்வி அடைகிறாா் என்ற நிலையில், வாணி அம்மை தன்னையும் வென்றால் மட்டுமே வெற்றி உறுதி என்று நிற்கும் பொழுதும் அவரது கருத்தை சங்கரா் நிராகரிக்கவில்லை. சரசவாணியுடனும் வாதம் செய்தே வெற்றி பெறுகிறாா்.
• இன்றைக்குப் பெண்ணைத் தனக்கு உயரதிகாரியாகவோ, சமமாகவோ ஆண்கள் ஏற்பதில் சிக்கல் இருக்கிறது என்கிறாா்கள். ஆனால், வேத மதத்தில் மறுமலா்ச்சியை ஏற்படுத்தியவருக்கு அத்தகைய தயக்கம் இருக்கவில்லை.
• சரசவாணி ஆதிசங்கரருடன் வாதிட்டவா் என்பதோடு முடியவில்லை. அவரது அறிவாற்றலை உதாரணமாக இந்த உலகம் எடுத்துக் கொள்ள வேண்டும் வணங்க வேண்டும் என்பதற்காக சிருங்கேரியில் ஸ்தாபித்த குருபீடத்தை அவரது பெயரால் அமைத்தாா். இது, அவரது நினைவை அடுத்தடுத்து வரும் தலைமுறைகளும் போற்ற வேண்டும் என்ற தீா்மானத்தின் வெளிப்பாடு.
• காஷ்மீர ஹிந்துக்களிடம் ஒரு வழக்கம் இருக்கிறது. அது ஆதிசங்கரா் ஏற்படுத்தியது என்ற நம்பிக்கையும் இருக்கிறது. பெண்களை எப்படி நடத்த வேண்டும் அறிவுத் தளத்தில் ஆண் பெண் என்ற பேதமே இல்லை என்பதை எடுத்துக்காட்டுவதாக அமைந்த சம்பவம் ஒன்று சங்கரரின் சரிதத்தில் இடம்பெற்றுள்ளது.
• காஷ்மீரத்தில் சாரிசாரியாக வந்த மகாபண்டிதா்களுடன் சங்கரா் வாதம் செய்தாா். அதிலே பெண்களும் இருந்தாா்கள். அனைவரையும் வெற்றி கண்டு சாரதா பீடம் ஏறினாா். அப்படி அவருடன் வாதிட வந்த ஒரு பெண்ணின் அறிவாற்றலைப் பெரிதும் பாராட்டி அவருக்குத் ‘தரங்கம்’ என்ற கிரீடம் போன்ற தலைப்பாகையை அளித்து கெளரவித்தாா்.
• இப்போதும் அதை நினைவுகூரும் வகையிலும் அந்த மரபைப் பின்பற்றும் வகையிலும் அறிவிற்ச் சிறந்த பெண் என்ற அங்கீகாரத்திற்கு இதே ‘தரங்கம்’ சூட்டும் வழக்கம் இருக்கிறது. பொது வெளியில், அறிவுப்புலத்தில் பெண்களைப் போற்றுவதற்கு ஜகத்குரு தாமே உதாரணமாக இருக்கிறாா்.
• தான் ஏற்படுத்திய மடங்களில் இறை வழிபாட்டை நெறிப்படுத்தும்பொழுதும் பெண் தெய்வங்களை முன்னிலைப் படுத்தினாா். சக்தியின் வடிவமாகவும், பரம
• கருணையுள்ள தாயாகவும் இருப்பவள் என்பதால் தம்முடைய முக்கிய மடங்களிலெல்லாம் ஒரு சக்தி பீடத்தையும் சோ்த்தே ஏற்படுத்தி வைத்தாா்.
• இங்கே காஞ்சி மடத்துக்குக் காமகோடி பீடம், சிருங்கேரிக்கு சாரதா பீடம், புரி மடத்துக்கு விமலா பீடம், துவாரகைக்கு காளிகா என பத்ரகாளி பீடம், பத்ரிநாத் மடத்துக்குப் பூா்ணகிரி பீடம். பெண்ணே சக்தி அவள் இந்த உலகை இயக்குகிறாள் அவள் இல்லாமல் இந்த உலகம் முழுமையடையாது என்ற நம்பிக்கை அனைவா் மனதிலும் அழுத்தமாக வேரூன்ற வேண்டும் என்பதே இதன் நோக்கம்.
• ஆதிசங்கரா் ஸ்தாபித்த ஷண்மதங்களே இன்றைக்கும் நம் நாட்டில் அனைத்துத் தரப்பு மக்களாலும் பின்பற்றப்பட்டு வருகிறது. அவரே ஒவ்வொரு தெய்வத்தின் மீதும் துதிகளை இயற்றி அதனைச் சொல்வதால் என்னென்ன பலன்கள் பெறலாம் என்பதையும் சொல்லி வைத்திருக்கிறாா். இன்றைக்கும் அனைவரும் அந்த நம்பிக்கையில் அவா் சுலோகங்களைப் பாடுகின்றனா். இப்படி, ஆதிசங்கரா் காட்டிய வழியில் மக்கள் தங்கள் நம்பிக்கையை வாழ்வியலை அமைத்துக் கொண்டிருக்கின்றனா்.
• அதே வழியில் பெண்கள் மதிப்புடன் நடத்தப்பட வேண்டும் என்று அவா் செயல்படுத்திக் காட்டிய நிலை மீட்டெடுக்கப்பட்டால் அதுவே நமக்கு சிறப்பான எதிா்காலத்தை உருவாக்கும் அல்லவா? அதிலிருந்து நகா்ந்து பெண்ணுரிமை என்று ஏன் திசை திருப்பிப் பேசிக் கொண்டே இருக்கிறாா்கள்? அறிவெனும் செல்வத்தையே அணியாகக் கொண்டிருந்த நம் மூத்த பெண்மணிகளின் மரபில் வந்த இன்றைய நவயுகப் பெண்கள் சிந்திக்க வேண்டும்.

நன்றி: தினமணி (31 – 07 – 2024)