கட்டுப்பாடின்றிப் பரவும் ‘வீடியோ கேம்’ நஞ்சு

கட்டுப்பாடின்றிப் பரவும் ‘வீடியோ கேம்’ நஞ்சு

• பள்ளியின் பொதுத் தேர்வுகளும் கல்லூரிகளின் செமஸ்டர் தேர்வுகளும் நெருங்கிவருகின்றன. கைபேசிகளைத் திறன்பேசிகள் (Smartphones) ஆக மாற்றிய பிறகு தெரிந்தோ தெரியாமலோ, இணையக் கல்வி என்கிற பெயரில் தொடக்கப்பள்ளிக் குழந்தைக்குக்கூடத் திறன்பேசிப் பயன்பாட்டைப் பழக்கப்படுத்திவிட்டோம். ‘திறன்பேசி கலாச்சாரம்’ என்றே தனியாகக் குறிப்பிடப்படும் அளவுக்கு இன்று எத்தகைய கயிறும் இல்லாமல் சங்கிலியும் இல்லாமல் குழந்தைகளைச் சிறைப்படுத்திவிட்டோம்.
• திறன்​பேசிகளின் காரணமாக, நம்மால் கற்பனைகூடச் செய்து பார்க்க முடியாத விஷயங்கள் நஞ்சாகக் கலந்து ஒவ்வொரு குடும்பத்​தையும் பாதித்​துக்​கொண்​டிருக்​கின்றன. மிக குறிப்பாக, ‘வீடியோ கேம்ஸ்’ என்றழைக்​கப்​படு​கின்ற கொடூரமான வலைப்​பின்னலுக்குள் சிக்கிக்​கொள்​கின்ற குழந்தைகளை மீட்பது மிக அவசியம். இவ்விஷ​யத்தில் உடனடியாக நாம் ஏதாவது செய்ய​வில்லை என்றால், ஒரு சந்ததியை மனநோயாளிகளாக அதிவேகமாக மாற்றிக் கொண்டிருக்​கிறோம் என்பது கல்வி​யாளர்​களின் இன்றைய மிகப்​பெரிய கவலை.

வெளியில் தெரியாத கவர்ச்சி உலகம்:

• எவ்வளவு தடைகள் விதிக்​கப்​பட்​டாலும், அவற்றையெல்லாம் தாண்டி வகுப்​பறைக்குத் திறன்​பேசிகளை எடுத்து​வந்து சாகசம் என்கிற பெயரில் தேவை இல்லாத காணொளி​களைப் பதிவுசெய்து இன்ஸ்​டா​விலும் ஃபேஸ்​புக்​கிலும் வெளியிட்டுத் தமது திறமையைக் காட்டிக்​கொள்ளும் குழந்தைகள் இன்று அதிகம். ஆயிரக்​கணக்கான ரூபாய் செலவு செய்து பெற்றோர்கள் திறன்​பேசிகளை வாங்கிக் கொடுக்க​வில்லை என்றால் வாழ்க்கையை முடித்​துக்​கொள்வோம் என்று மிரட்டு​கின்ற குழந்தை​களையும் இன்றைக்குப் பார்க்க முடிகிறது.
• வெளியில் தெரியாத ஒரு கொடிய நஞ்சு போல, வீடியோ கேம்ஸ் கலாச்​சாரம் குழந்தை கள் நடுவே இன்று பரவிக்​கொண்​டிருக்​கிறது. சைபர் உலகைப் பொறுத்​தவரையில் வீடியோ கேம்ஸ் என்பது இந்தியாவில் ஒரு பில்லியன் டாலர்கள் கொட்டு​கின்ற பிரம்​மாண்ட வர்த்​தகம்.
• 2028ஆம் ஆண்டு இரண்டு பில்லியன் டாலர்களாக இது உயர்த்​தப்பட வேண்டும் என்று அவர்கள் இலக்கு நிர்ண​யித்துத் திட்ட​மிட்டுச் செயல்​படு​கிறார்கள். ‘லூடோ கிங்’, ‘ரோப்​லாக்ஸ்’, ‘ஹாட் வீல்ஸ்’ என்று அடுத்​தடுத்து வீடியோ கேம்கள் சந்தையில் இறக்கப்​படு​கின்றன. ஒருமுறை ஆடிப் பழகிவிட்டால் ஒருபோதும் அந்தக் குழந்​தையால் நிறுத்​த​ முடியாத அளவுக்குப் போதை தருகின்ற அம்சங்களை இவை உள்ளடக்கி​யுள்ளன.

விளையாட்டா, விபரீதமா?

• 18 மணி நேரம் வீடியோ கேம் விளையாடுவது என்பது இன்றைக்குப் பல குடும்​பங்​களில் பழகிப்​போய்​விட்ட ஒரு விஷ(ய)மாக மாறிக்​கொண்​டிருக்​கிறது என்பது அச்சம் தரும் சூழல். குறிப்பாக, பெற்றோர் இருவருமே பணிக்குச் சென்று​விடு​கின்ற குடும்​பங்​களில் குழந்தைகள் ஏதாவது ஒரு காரணத்தைச் சொல்லிப் பள்ளிக்கு விடுப்பு எடுத்து வீட்டில் தங்கி மணிக்​கணக்கில் இந்த வீடியோ கேம் கலாச்சாரத்துக்குள் நுழைந்​து​விடு​கிறார்கள். இவை ஒருவர் ஆடும் விளையாட்டுக்கள் அல்ல.
• இந்த சைபர் உலகில் உங்களோடு வீடியோ கேம் விளையாடுபவர் வேறு ஊரில் இருக்​கலாம், வேறு நாட்டில் இருக்​கலாம், வேறு கண்டத்​தில்கூட இருக்​கலாம். அவரை நீங்கள் நேரில் பார்க்க வேண்டிய​தில்லை அவர் சத்தம் போடாமல் உங்களோடு மணிக்​கணக்கில் விளையாடிக்​கொண்டே இருப்​பார். அவர் ஒரு ரோபாட் ஆகவும் இருக்​கலாம்; செயற்கை நுண்ணறிவு உருவாக்கிக் கொடுத்த போலி ஐடியாகவும் இருக்​கலாம்!

பரவும் வெறுப்பு​ணர்வு:

• இந்த வீடியோ கேம்கள் ஒவ்வொன்றும் பல வகையான வன்முறைகளை உள்ளடக்கிய கதைப் போக்கு​களைக் கொண்டுள்ளன. மலைவாழ் மக்கள் விபரீத வில்லன்​களாக​வும், அறிவார்த்தமான பெண் குழந்தைகள் சமூகத்​திடம் இருந்து விரட்​டப்பட வேண்டிய​வர்​களாக​வும், விதவிதமான துப்பாக்​கி​களைக் கையிலேந்திக் கொலை செய்வது அன்றாட வாழ்வின் சகஜமான வேலையாகவும் சித்திரிக்​கப்​படும் வீடியோ கேம்கள் குழந்தை​களால் அதிகம் போற்றப்​படு​கின்றன என்பதுதான் மிகவும் அச்சமூட்டும் தகவல்.
• சமீபத்தில் மதுரையில் தொடர்ந்து 48 மணி நேரம் வீடியோ கேம்ஸ் விளையாடியதன் மூலம் சிறுநீர் கழிக்​காமல். சிறுநீர்ப்பை ஏறக்குறைய வெடிக்கும் நிலையில் ஒரு ஏழாம் வகுப்புச் சிறுவன் அவசர அறுவை சிகிச்​சைக்குக் கொண்டு​வரப்​பட்டதை மருத்​துவர்கள் பார்த்துத் துடித்துப் போன சம்பவம், இத்தகைய கொடுமைக்கு ஓர் உதாரணம்.

எப்படி மீட்கப் போகிறோம்?

• சில ஆண்டு​களுக்கு முன், கை நரம்பை அறுத்​துக்​கொண்டு தற்கொலை செய்து​கொள்வதை வெற்றி என்று அறிவித்த ‘புளூ வேல்’ வீடியோ கேம்ஸை இந்தியாவில் தடைசெய்யப் பெரிய அளவில் போராடினோம். ஆன்லைனில் ரம்மி விளையாட்டைத் தடை செய்வதா, வேண்டாமா என்று மிகப்​பெரிய விவாதத்​துக்குப் பிறகு சட்டமன்றம் கூடி அதற்குத் தடைச் சட்டம் இயற்றியது.
• அதுபோல் இப்போது செயல்பட வேண்டி இருக்​கிறது. வீடியோ கேம்ஸ் விளையாடும் குழந்தைகள் எதிர்​கொள்ளும் பின்விளைவுகள் மிகக் கொடூர​மானவை. கற்றல் செயல்​பாடு​களில் இருந்து இவர்கள் முற்றி​லுமாக விலகிக்​கொள்​கிறார்கள்; வீட்டுப் பாடங்கள் எழுது​வதையோ தேர்வு​களையோ இவர்கள் பொருட்​படுத்து​வ​தில்லை; பாடப் புத்தகங்​களைப் புரட்டுவதே இல்லை.
• பள்ளிச் சூழலில் இருந்து விலகிக்​கொள்ளும் இவர்கள் மெல்ல மெல்லத் தங்கள் குடும்பம், சமூகம் யாவற்றி​லிருந்தும் விலகிக்​கொள்​கிறார்கள்; உறக்கமின்மை என்கிற கொடிய நோயில் இவர்கள் சிக்கிக்​கொள்​கிறார்கள். வீடியோ கேம் போதை அதிகரிக்​கும்போது அன்றாட வாழ்வின் உணவருந்​துதல், தண்ணீர் குடித்தல் போன்ற​வற்​றைக்கூடத் தவிர்க்கும் மனநிலை ஏற்படு​கிறது.
• ‘சைபர் புல்லி​யிங்’ என்று அழைக்​கப்​படும் இன்னொரு கொடுமை உண்டு. எங்கோ இருக்கும் யாரோ ஒருவர் உங்கள் வீட்டுக் குழந்தையை வீடியோ கேம்ஸ் மூலம் தன்னுடைய கட்டுப்​பாட்டில் வைத்திருப்​பார். இது போன்ற கொடுமை இன்று பல குடும்பங்களில் நிலவு​கிறது.

என்ன செய்ய வேண்டும்?

• இந்த விவகாரத்தில் பெற்றோர் தலையீடு மிகமிக முக்கியம். இது போன்ற மாயவலைகளில் தங்கள் குழந்தைகள் சிக்கிக்​கொண்டு இருக்​கிறார்களா என்பதை முதலில் கண்டறிவது அவசியம். பிறகு அவர்களுக்குக் கண்டிப்பாக மனநல சிகிச்சை தேவைப்​படு​கிறது; வெளியில் சொன்னால் சிக்கல் ஆகிவிடும் என்று கருதும் பல பெற்றோர் உளவியல் சிகிச்​சைகளுக்குக் குழந்தைகளை அழைத்துச் செல்வ​தில்லை. ஆனால் நடத்தை மனநல சிகிச்சை என்பதே உடனடித் தேவை.
• இது போன்ற குழந்தை​களிடம் இருந்து வீடியோ கேம்ஸ்களை சட்டென்று முழுமை​யாகப் பிடுங்கி​விடுவது அவர்களின் சிக்கல்களை மேலும் அதிகமாக்​கலாம்; சில நேரம் விபரீத முடிவுகளை நோக்கி அவர்களைத் தூண்டு​கின்ற சூழல்களை ஏற்படுத்​தலாம். புகைபிடிக்கும் பழக்கம் உள்ளவர்கள், குடிபோதைக்கு அடிமை​யானவர்கள் போன்றோர் மீட்கப்​படும்போது தரப்படுகிற மனநலத் திறன் அணுகுமுறையான சி.பி.டி. வகை சிகிச்​சைகள் (Cognitive Behavioural Therapy - CBT) அவசியம். பள்ளி, கல்லூரி​களில் வீடியோ கேம் கலாச்​சா​ரத்தின் கொடுமைகள் குறித்து அரசு உடனடியாக விழிப்பு​ணர்வுக் கருத்​தரங்​குகளை நடத்த வேண்டியதும் அவசியம். எதிர்​காலத்தைக் கட்டமைக்​கப்​போகும் இளைய சமுதா​யத்​தினரைப் பாதுகாக்க இன்றே செயல்படத் தொடங்​குவோம்​!

நன்றி: இந்து தமிழ் திசை (12 – 02 – 2025)