சமூகநீதியின் முன்னோடி பாரதி

• மகாகவி பாரதி தனது 26-ஆவது வயதில் 1908 செப்டம்பா் முற்பகுதியில் ஆங்கிலேயா்களின் கண்களில் இருந்து தப்புவதற்காக புதுச்சேரி சென்றவா், பத்திரிகைத் தொழிலோடு சமூக பிரச்னைகளையும் கையிலெடுத்தார். அப்போது அவரது சொந்த ஜாதியாரே அவரை இத்தகைய நடவடிக்கைகள் காரணமாக ஜாதி பிரஷ்டம் செய்தார்கள் என்பது வரலாறு.
• புதுவையில் வசித்தபோது மகான் அரவிந்தரோடு நெருங்கிய தொடா்பு கொண்டிருந்தார் பாரதியார். சுவாமி விவேகானந்தரை நேரில் தரிசிக்கும் நற்பேறு பாரதி பெற்றாரில்லை என்றாலும், அவரது சமூக சீா்திருத்த கொள்கைகள் மீது கொள்ளை பிரியம் கொண்டிருந்தார். சுவாமி விவேகானந்தா் கூறிய, ‘ஜாதி ஏற்பாடு வேதாந்த மதத்திற்கு விரோதமானது; ஜாதி என்பது ஒரு வழக்கமே தவிர வேறில்லை. சமயத்துறையில் ஜாதி என்பது கிடையாது. ஆதலால், மதத்தைக் குறை சொல்லி பயனில்லை. மக்களைத் தான் குற்றம் சொல்ல வேண்டும்’ என்கிற கூற்றைப் பின்பற்றியவா் பாரதி.”
• ‘புதிய இந்தியாவைப் படைப்போம்’ என்ற நூலில் சுவாமி விவேகானந்தா் உபதேசித்த ‘மன்னுயிரைத் தன்னுயிர் போல் நினைத்து அன்பு செய்யுங்கள். எல்லோருமே பிரம்மம் என்று சொல்லப்படும் அந்த எல்லையற்ற பரம்பொருளின் பல பாகங்களே என்பதை உணா்ந்து கொள்ளுங்கள்’ என்பதற்கு ஏற்ற விளக்கமாக வாழ்ந்தவா் மகாகவி.
• புதுவையில் தீண்டாமை தொடா்பான தனது பணிகளை சுவாமி விவேகானந்தரின் அருள்மொழிகளோடு இணைத்து நினைவுகூா்ந்து சுதேசமித்திரன் நாளிதழில் 9 ஜுன் 1920-இல் பாரதியார் இப்படி எழுதினார் - ‘எந்த ஜாதியாக இருந்தாலும் சரி, அவனை மாம்ஸ பட்சணத்தை நிறுத்தும்படி செய்து அவனுக்கொரு பூணூல் போட்டு, காயத்திரி மந்திரம் கற்பித்து கொடுத்துவிட வேண்டும். பிறகு அவன் பிராமணனாகவே கருதப்பட வேண்டும். இதுதான் விவேகானந்தா் சொல்லிய உபாயம். இது நல்ல உபாயமும் கூட’.
• புதுச்சேரியில் பாரதியார் வசித்தபோது அவரோடு நெருக்கமாக இருந்தவா்களில் மகான் அரவிந்தா், வ.வே.சு ஐயா், குவளைக் கண்ணன், கனகலிங்கம் உள்ளிட்டோர் முக்கியமானவா்கள். அரவிந்தரோ ஞானமாா்க்கத்தில் தன்னைத் தோய்த்து கொண்டு வாழ்ந்த ஞானி. வ.வே.சு ஐயரோ தமிழ், ஆங்கிலம் பிரெஞ்சு, ஹிந்தி, சம்ஸ்கிருதம், லத்தீன், கிரேக்கம், வேதம், உபநிடம் அனைத்தும் அறிந்த அறிஞா். குவளைக் கண்ணன் என்ற கிருஷ்ணமாச்சாரியோ, பாரதியின் கண்ணன் போன்ற சேவகன். இவா்களில் கனகலிங்கத்தைத் தவிர மற்ற அனைவரும் பிராமணா்கள்; ஆனால் யாரிடத்தும் ஜாதி அபிமானமோ, துவேஷமோ இருந்ததில்லை.
• 1917-இல் பாரதியார்“நியாயம் செலுத்த வேண்டியது நம்முடைய முதற்கடமை’ என்றதொரு கட்டுரையை வெளியிட்டார். அதில் ‘அவா்களையெல்லாம் ஒன்று திரட்டு, உடனே விபூதி நாமத்தைப் பூசு, பள்ளிக்கூடம் வைத்துக் கொடு, கிணறு வெட்டிக் கொடு, சமத்துவம் கொண்டாடு, நான் நெடுங்காலமாக சொல்லி வருகிறேன் அவா்களையெல்லாம் ஒன்று சோ்த்து ஹிந்து தா்மத்தை நிலைக்கச் செய்யுங்கள். நம்முடைய பலத்தை சிதற விடாதேயுங்கள்.
• மடாதிபதிகளே, நாட்டுக்கோட்டை செட்டிமார்களே, இந்த விஷயத்தில் நீங்கள் பணத்தை வாரி செலவிடுங்கள். இது நல்ல பயன்தரக்கூடிய கைங்கரியம். தெய்வத்தின் கருணைக்குப் பாத்திரமாகும் கைங்கரியம். நமக்கு மண் உழுது, நெல் அறுத்துக் கொடுக்கிற ஜாதியாரை நாம் நோ்மையாய் நடத்த வேண்டாமா’ என்று எழுதினார்.
• பாரதியைத் தனது குருவாகக் கொண்டாடிய கனகலிங்கம் ‘என் குருநாதா்’ என்று ஒரு நூல் எழுதியுள்ளார். அதில் மிக முக்கியமான இரண்டு நிகழ்ச்சிகளைப் படிப்பவா் கண்முன்னே கொண்டு வந்து நிறுத்துகிறார் -
• ‘எனக்கு பாரதியார் வீட்டிற்கு போவதும் அவருடன் காலை சிற்றுண்டி உண்பதும் வழக்கமாகிப் போயின. பாரதியின் வாக்குகளான ‘ஏறு போல நட’, ‘குன்றென நிமிர்ந்து நில்’, ‘கோல் கை கொண்டு வாழ்’ போன்ற கருத்துகள் எனக்கு மந்திரச் சொற்களாயின. இதனால் இவரிடம் உபதேசம் பெற விரும்பினேன்.
• ஒரு நாள் நான் அவரை வணங்கிய போது அவா், எனக்கு உபநயனம் செய்து வைக்க இருப்பதாகச் சொன்னார். ‘உனக்கு நாளை உபயநயனம் செய்ய நிச்சயித்திருக்கிறது. அதிகாலையில் எழுந்து நீராடி சுத்தமான உடையுடன் இங்கு வந்து சேரவேண்டும். சட்டையொன்றும் போட்டுக் கொள்ள வேண்டாம்’”என்றார்.
• மறுதினம் காலை பாரதியார் வீட்டிற்குச் சென்றேன். உள்ளே போய் நான் பார்க்கையில், அங்கு பாரதியாரின் நண்பா்கள் காணப்பட்டார்கள். அவா்களிடையே அறிஞா் வ.வே.சு. ஐயா் கம்பீரமாக வீற்றிருந்தார். ஸ்ரீநிவாஸசாரியார், நாகசாமி ஐயா், குவளைக்கண்ணன், கோவிந்தராஜுலு நாயுடு முதலானோர் அமா்ந்திருந்தனா். நான் எல்லோரையும் நமஸ்கரித்தேன். எல்லோரும் என்னை உற்றுநோக்கி நமஸ்கரித்து ‘வந்தே மாதரம்’ சொல்லி வாழ்த்தினார்கள்.
• பாரதி சுறுசுறுப்பாக கூடத்திற்கும், சமையல்கட்டிற்கும் நடந்த வண்ணம் இருந்தார். ‘நாழிகையாகிறது நடக்கட்டும்’ என கணீரேன்று ஒலித்தது ஸ்ரீ. வ.வே.சு ஐயா் குரல். ‘இதோ வந்துட்டேன்’ என்று எதிரொலித்தது பாரதியாரின் வெண்கல மணிக்குரல். உடனே பாரதியார் பிரசன்னமாகிவிட்டார்.
• குங்குமத் திலகமும் நெற்றியுமாக கூடத்தில் லட்சுமி, சரஸ்வதி, கிருஷ்ணன் படங்கள் புஷ்பங்களால் அலங்கரிக்கப்பட்டிருந்தன. கிருஷ்ணா் படத்திற்குக் கீழே வளைவான பிச்சுவா கத்தியொன்று இருந்தது. அதற்கும் குங்குமப் பொட்டு வைத்த பாரதியார் சற்று நேரம் தேவி பாராசக்தியை தியானித்துப் பாடினார்.
• என்னை கிழக்கு முகமாய் உட்கார சொன்னார். தனது வீர விழியால் பார்த்து விட்டு குருநாதா் தன் திருக்கரத்தால் என் நெற்றியிலும் புயத்திலும், மார்பிலும் திருநீற்றுக்காப்பு இட்டார். பிறகு என்னை மண்டியிட்டு உட்காரச்சொன்னார். கையில் பூணூலை எடுத்துக்கொண்டு சூரியவழிபாடு செய்து வெகுநேரம் ஜபம் செய்து முடித்ததும் எனக்கு பூணூலை அணிவித்தார். உடனே நான் சாஷ்டாங்கமாக விழுந்து குருநாதரின் பாதத்தை தொட்டு நமஸ்கரித்தேன்.
• குருநாதா் என்னை ஆசிர்வதித்து,“‘இன்று முதல் நீ பிராமணன்’ என்று உரத்த குரலில் கோஷித்தார். ‘இனி யாராகிலும் என்ன ஜாதி என்று கேட்டால் நான் பிராமணன் என்று தைரியமாக சொல்லு’ என்று கட்டளையிட்டார்.
• இந்த நிகழ்ச்சி வெளியில் பரவியது. வெளியே பலரும் தங்களுக்குள் பேசிகொண்டார்களே தவிர என் குருநாதரைக் கேட்க யாருக்கும் துணிவு வரவில்லை. இதை அறிந்த என்னுடன் வேலை பார்க்கும் நாகலிங்கம் ‘எனக்கும் பாரதியாரிடம் சிபாரிசு செய்து பூணூல் அணிவிக்க ஏற்பாடு செய்யுங்கள்’ என்றார்.
• நான் அவரை பாரதியாரிடம் அழைத்துச் சென்றேன். அவரது விருப்பத்தையும் சொன்னேன். உடனே பாரதி ‘நீா் சைவமா, அசைவமா’ என்று கேட்டார். பூசாரி ‘நான் சைவன்’ என்றார். உடனே அவரது தோளில் கைபோட்டு கடற்கரைக் கோயிலுக்குச் சென்று ‘தேச முத்துமாரியம்மா’ பாடலை கட்டினார். பிறகு என்னை சந்தித்த நாகலிங்கம், ‘எனக்குக் காயத்திரி மந்திரம் உபதேசித்து வேத சடங்குகளை செய்து உபநயனம் செய்துவித்தார்’ என்றார்.
• நான் நாள் தவறாமல் என் குருநாதா் வீட்டிற்கு போய் வருவதை வழக்கமாக கொண்டிருந்தேன். 1914-ஆம் ஆண்டு நடைபெற்ற முதல் உலகயுத்ததிற்கு கட்டாய ராணுவ சேவை செய்ய புதுவையில் இருந்து ஐந்து பிரெஞ்சு இந்திய வாலிபா்கள் அனுப்பப்பட்டனா். அதில் ஒருவா் என் குருநாதருக்கு பிரெஞ்சு தேசிய கீதங்களைக் கற்றுக்கொடுத்த அந்துவேன் அா்லோக். இந்த ஐவருக்கும், குருநாதா் வீட்டில் விருந்து நடைபெற்றது.
• செல்லம்மாள் டம்ளரில் தண்ணீா் கொண்டு வைத்து விட்டு, இலை போட்டு அந்த ஐந்து ஹரிஜன வாலிபா்களுக்கும் உணவு பறிமாறினார். என் குருநாதா் எங்கள் அறுவா்க்கும் இடையில் அமா்ந்து சாப்பிட்டார். சாப்பிட்டு முடிந்ததும் அந்துவேண் அா்லோக், தான் சாப்பிட்ட இலையைக் கையில் எடுத்தார். உடனே குருநாதா்“‘யாரும் இலையைத் தொடவேண்டாம்’ என்று சொல்லி ‘செல்லம்மா’ என்று கூப்பிட்டு ‘இலைகளை எடு’ என்றார். அம்மையார் எந்தவித வெறுப்பும் இல்லாமல் அப்படியே செய்தார்.
• இப்போது நாம் சிந்திக்க வேண்டும். சுமார் 125 ஆண்டுகட்கு முன்னா் பிராமணா் ஒருவா் ஜாதி வித்தியாசம் பாராமல் பழகிய நாட்டில் இப்போது நடப்பதென்ன? எளிய மக்கள் வாழும் இடங்களில் உள்ள மேல்நிலை குடிநீா்த் தொட்டிகளில் மனிதக் கழிவுகளை கலப்பதும், பள்ளிகளில் தத்தம் சமூகத்தை அடையாளப்படுத்த மாணவா்கள் கைகளில் வண்ணக் கயிறுகளைக் கட்டிக் கொண்டு வருவதும், ஜாதி வெறுப்பினால் ஒருவனையொருவா் தாக்கிக் கொள்ளவதும் நாளிதழ்கள் வெளியிடும் செய்திகள். இதுபோன்ற இழிசெயல்களில் ஈடுபடுபவா்கள் பிராமணா்கள் அல்ல என்பதை யாரும் குறிப்பிடுவதில்லை.
• ஆயிரம் ஆண்டுகட்கு முன்பே ஸ்ரீ இராமானுஜா் நந்தனார் குலத்தவரை மேலே உயா்த்தும் பொருட்டு வேதமந்திரங்கள் கற்பித்து திருக்குலத்தார் என பெயரிட்டு வாழ்த்தினார் என்பது கடந்த கால வரலாற்று செய்தி. இந்த நூற்றாண்டின் தொடக்கத்தில் விடுதலை வீரா் சாவா்க்கரும், தாழ்த்தப்பட்டவா்களுக்கு பூணூல் அணிவித்து மகிழ்ந்தார் என்பதையும் இங்கே குறிப்பிட வேண்டும்.
• பாரதியார் செய்த ஹரிஜன மக்களின் முன்னேற்றப்பணி, இந்தியாவில் காந்தியடிகள் தொடங்கிய ஹரிஜன சேவா பணிக்கு முந்தையது என்பதை கவனத்தில் கொள்ள வேண்டும்.

நன்றி: தினமணி (30 – 11 – 2023)