சீனர்களின் தந்திரம்!

• பூடானுக்கும் சீனாவுக்கும் இடையே எல்லை பிரச்னை தொடர்பாக புரிந்துணர்வு ஒப்பந்தம் செய்யப் பட்டிருப்பது அதிர்ச்சியளிக்கிறது.
• இரு நாடுகளுக்கும் இடையே பேச்சுவார்த்தை நடப்பது புதிதல்ல என்றாலும் இந்திய - சீன எல்லையில் பதற்றம் நிலவும் வேளையில் சீனாவுடன் பூடான் புரிந்துணர்வு ஒப்பந்தம் ஏற்படுத்திக் கொண்டிருப்பது எதிர்பாராதது.

பூடான் சீனா இடையேயான எல்லை பிரச்னை

• 1959-இல் சீனா திபெத்தை ஆக்கிரமித்தபோது, ஆயிரக்கணக்கான திபெத்தியர்கள் பூடான் வழியாக இந்தியாவில் தஞ்சமடைந்தனர். அப்போது முதல், சீன ஆக்கிரமிப்புக்கு பயந்து இந்தியாவுடன் நெருக்கமான உறவை உறுதிப்படுத்திக்கொண்டது பூடான்.
• ஐ.நா. பாதுகாப்பு சபை உறுப்பினர் பதவிக்கு பரிந்துரைக்க சீனா முன்வந்தபோதுகூட அதை பொருட்படுத்தாத நாடு பூடான்.
• எல்லா நிலையிலும் இந்தியாவின் மிக நெருக்கமான கூட்டாளியாகத் தொடர்ந்து வரும் பூடான், சீனாவுடன் ஏற்படுத்திக் கொண்டிருக்கும் திடீர் நெருக்கம், நமக்கு தர்மசங்கடத்தை ஏற்படுத்தியிருப்பதை மறைப்பதற்கில்லை.
• மூன்று கட்ட தீர்வின் மூலம் பூடானுக்கும் சீனாவுக்கும் இடையேயான பிரச்னைக்குத் தீர்வு காண்பது என்கிற புரிந்துணர்வு ஒப்பந்தம் ஒன்றை பூடான் ஏற்படுத்திக் கொண்டிருக்கிறது.
• பூடானுக்கும் சீனாவுக்கும் இடையேயான எல்லைப் பேச்சுவார்த்தையை இந்திய - சீன எல்லை பிரச்னை போன்று இந்திய வெளிவிவகாரத் துறை அமைச்சக செய்தித் தொடர்பாளர் கூறியிருப்பது வியப்பளிக்கிறது. இந்தியாவுக்கும் சீனாவுக்கும் இடையேயான பிரச்னை மேற்கு, வடக்கு, கிழக்கு என்று 3,488 கி.மீ. நீளமுள்ள எல்லைத் தொடர்பானது. பூடான் - சீனா எல்லை அப்படிப்பட்டதல்ல.
• இவை இரண்டையும் இணைத்துப் பேசுவது அமைச்சக செய்தித் தொடர்பாளரின் புரிதலின்மையல்லாமல் வேறென்ன?
• எல்லை பிரச்னை தொடர்பான பூடான் - சீனா பேச்சுவார்த்தை புதிதொன்றும் அல்ல. 1984 முதல் இரண்டு நாடுகளும் எந்தவித முடிவையும் எட்டாமல் பலமுறை பேச்சுவார்த்தை நடத்தியிருக்கின்றன. இப்போது வெளியிடப்பட்டிருக்கும் மூன்று கட்டத் தீர்வும்கூட ஏப்ரல் மாதமே இருதரப்பாலும் விவாதிக்கப்பட்டதாக பூடான் - சீனா கூட்டறிக்கை தெரிவிக்கிறது.
• பேச்சுவார்த்தையில் ஏற்பட்டிருக்கும் தேக்கத்தை அகற்றுவதுதான் மூன்று கட்டத் திட்டம் என்று சீன ஊடகங்கள் தெரிவித்தாலும்கூட, பேச்சுவார்த்தையில் முன்னேற்றம் ஏற்பட்டிருப்பதைக் காணமுடிகிறது.
• சீனாவின் வெளியுறவுத் துறை துணை அமைச்சர் வூ ஜியாங்கோ கூறியிருப்பதுபோல எல்லையை வரையறுப்பதற்கும், இருநாடுகளுக்கும் இடையில் ராஜாங்க உறவை ஏற்படுத்திக் கொள்வதற்கும் புரிந்துணர்வு ஒப்பந்தம் வழிகோலக்கூடும் என்பதை மறுப்பதற்கில்லை.
• காணொளி பேச்சுவார்த்தையில் ஏற்பட்டிருக்கும் ஒப்பந்தம் குறித்து பூடான் வெளியுறவு அமைச்சகம் செய்தி அறிக்கை வெளியிட்டிருக்கிறதே தவிர, வேறு விவரம் எதையும் குறிப்பிடவில்லை.
• இரு நாட்டு உறவை வலுப்படுத்துவதும், சீனாவுடனான புரிந்துணர்வு ஒப்பந்தத்தை நடைமுறைப்படுத்துவதும் பேச்சுவார்த்தை மூலம் சாத்தியப்பட்டிருப்பதாக பூடான் வெளியுறவு அமைச்சகம் தெரிவித்திருக்கிறது.
• 1984 முதல் இதுவரை 20-க்கும் மேற்பட்ட பேச்சுவார்த்தைகளை பூடானும் சீனாவும் நடத்தியிருக்கின்றன. டோக்காலாம் சமவெளியில் 2017-இல் நடந்த இந்திய - சீன மோதலைத் தொடர்ந்து பேச்சுவார்த்தை முடங்கியது.
• அதற்கு இந்தியாவின் அழுத்தம்தான் காரணம் என்று சீனா கருதுவதிலும் நியாயம் இருக்கிறது. பூடானுடன் எல்லை பிரச்னையைத் தீர்த்துக்கொள்வது மட்டுமல்ல சீனாவின் நோக்கம். டோக்காலாமைக் கைப்பற்றுவதுதான் அதன் அடிப்படைக் குறிக்கோள்.
• இதற்கு முன்னால் நடந்த பேச்சுவார்த்தைகளில் வடக்கேயுள்ள பசங்லுங், ஜகார்லுங் பள்ளத்தாக்குகளும் மேற்கேயுள்ள டோக்காலாமும் முக்கியமாக இடம்பெற்றன.
• வடக்கேயுள்ள பள்ளத்தாக்குகளின் மீதான தனது உரிமைகோரலை விட்டுக்கொடுத்து டோக்காலாமின் முழுமையான கட்டுப்பாடு தனக்குக் கிடைக்கும்படியான ஒரு தீர்வை முந்தைய பேச்சுவார்த்தைகளில் சீனா முன்வைத்தது.
• கடந்த ஆண்டு டக்டெங்கை சீனா திடீரென்று உரிமை கோரியது. அதன்மூலம் பூடானை எப்படியாவது மீண்டும் பேச்சுவார்த்தைக்கு இழுக்க வேண்டும் என்பதுதான் சீனாவின் நோக்கம்.
• பூடானின் டோக்காலாம் சமவெளி என்பது இந்திய - சீன எல்லையை ஒட்டியிருக்கும் முச்சந்தி. 2017 மோதலுக்குப் பிறகு, டோக்காலாம் சமவெளியின் பெரும்பாலான பகுதிகளையும் தனது கட்டுப்பாட்டுக்குள் சீனா கொண்டு வந்துவிட்டது. அந்தப் பகுதிகளில் ராணுவக் கட்டமைப்பு வசதிகளையும் அதிகரித்திருக்கிறது.
• இந்தியாவின் ஆட்சேபத்துக்குரிய டோக்காலாம் முச்சந்தியின் பகுதியைத் தவிர பூடானுடனான ஏனைய எல்லைப் பகுதிகளில் எந்தவித எதிர்ப்பும் இல்லாமல் சீனா ஊடுருவியிருக்கிறது.
• தெற்குப் பகுதியில் இந்திய எல்லைக்குள் நுழைய விடாமல் இந்திய ராணுவம் தடுப்பதுபோல, சீன ராணுவத்தை நேரடியாக எதிர்க்கவோ இந்திய ராணுவத்தின் உதவியுடன் ஊடுருவலைத் தடுக்கவோ பூடான் முயற்சிக்கவில்லை.
• பூடானுடனான எல்லை பிரச்னைக்குத் தீர்வு கண்டு சுமுகமான உறவை உறுதிப்படுத்துவதன் மூலம் டோக்காலாமைத் தனது கட்டுப்பாட்டிற்குள் கொண்டுவரும் முயற்சியில் இறங்கியிருக்கிறது சீனா.
• அதன் மூலம் இந்தியா தலையிடுவதையும் தடுக்க முடியும். உளவியல் ரீதியாக இந்தியாவை பலவீனப்படுத்த நினைக்கும் சீனாவின் ராஜதந்திர முயற்சியை புத்திசாலித்தனமாக எதிர்கொள்வதில்தான் இந்தியாவின் வெற்றி அடங்கியிருக்கிறது.
• இந்திய - பூடான் உறவு தளர்ந்துவிடக் கூடாது.

நன்றி: தினமணி  (21 - 10 - 2021)