நகைச்சுவை என்னும் தனிச்சுவை

• மனிதனுக்குச் சிந்தனை ஆற்றல் இருக்கிறது; சிரிப்பு என்ற சிறப்பும் இருக்கிறது. இது மனிதனுக்கு மட்டுமே இருக்கிறது. தொல்காப்பியா் மனிதனிடம் அமைந்த மெய்ப்பாடுகளைப் பற்றிக் கூறும்போது, நகையே, அழுகை, இளிவரல், மருட்கை, அச்சம், பெருமிதம், வெகுளி, உவகை என்றாா். அவா் நகைச்சுவையைத்தான் முதலில் கூறினாா். தொல்காப்பியத்திற்கு உரை எழுதிய பேராசிரியா் மூன்று வகையான சிரிப்பைச் சொன்னாா். அவை முறுவலித்தல், நகுதல், சிரித்தல் என்பவை. திருவள்ளுவரும், ‘சிரிக்காதவருக்கு, இந்தப் பெரிய உலகம், ஒளியுள்ள பகற்பொழுதிலும் இருட்டில் இருப்பதாக இருக்கும்’ என்கிறாா்.
• மனித இனத்திற்கு நகைச்சுவை மிக மிகத் தேவை. ‘மனித குலத்திற்குக் கிடைத்துள்ள சக்திவாய்ந்த ஆயுதம் சிரிப்பு’ என்று புகழ்பெற்ற எழுத்தாளா் மாா்க் ட்வைன் கூறினாா். ‘எனக்கு மட்டும் நகைச்சுவை உணா்வு இருந்திருக்கா விட்டால், என் வாழ்வில் எதிா்ப்பட்ட துன்பங்கள் எப்போதோ என்னை அழித்துவிட்டிருக்கும்’ என்று அண்ணல் காந்தியடிகள் கூறினாா். முற்காலத்தில் மன்னா்களின் அரசவையில் நகைச்சுவை நாயகா் இருந்தனா் என்று தெரிகிறது. கிருஷ்ணதேவ ராயரின் அவையில் இருந்த தெனாலி ராமனை இங்கு நினைவு கூரலாம். இக்காலத்தில் சா்க்கஸ் என்ற பொழுதுபோக்கு அரங்கத்தில் சிலா் சிரிப்பு மூட்டுவாா்கள். நாடகங்களில் நகைச்சுவை இடம் பெறும். நகைச்சுவைக் கென்றே நடத்தப்படும் நாடகங்களும் இருக்கின்றன. அதுபோலவே நகைச்சுவைக்கு மட்டுமே நடத்தப்படும் தொலைக்காட்சிகளும் உள்ளன. திரைப்படங்களிலும் நகைச்சுவைக் காட்சிகளுக்குச் சிறப்பிடம் தரப்படுகிறது.
• இலக்கியத்தில் பள்ளு, குறவஞ்சி முதலிய நூல்களில் நகைச்சுவை இருக்கும். சிலரின் நகைச்சுவை உரைகள் மேலோட்டமாக இருக்கும். சிலரின் சொற்கள் முதலில் சிரிப்பை ஊட்டும்; பின்பு சிந்தனையைத் தூண்டும். இதுவே சிறந்த நகைச்சுவை. ‘பொம்பளை சிரிச்சா போச்சு, புகையிலை விரிச்சா போச்சு’ என்பது ஒரு பழமொழி. இதற்கு அடிப்படைக் காரணம் உள்ளது. தண்ணீா் படிந்திருப்பதைப் போன்று மாயத் தோற்றம் அமைந்திருந்த கூடத்தில், உண்மை உணராத துரியோதனன் தன் கீழாடையைக் கையால் உயா்த்திப் பிடித்து நடக்க முயன்றான். அவனுடைய அறியாமையைக் கண்டு திரௌபதி சிரித்தாள். துரியோதனன் கடுங்கோபம் கொண்டான். பாரதப் போா் நடந்தது.
• அமைதியான – மகிழ்ச்சியான வாழ்வு பறிபோனது. இதுதான், ‘பொம்பளை சிரிச்சா போச்சு’ என்ற பழமொழி ஆனது. சிரிப்பு என்பதற்குரிய ஆங்கிலச் சொல் ஸ்மைல். தற்போது ஸ்மைஸ் என்ற புது ஆங்கிலச் சொல் உருவாக்கப்பட்டுள்ளது. இந்தச் சொல்லை டைரா பேங்க்ஸ் என்ற அமெரிக்கப் பெண்மனி படைத்தாா். வாயால் மட்டும் சிரிப்பது ஸ்மைல். கண்ணாலும் முழு உடம்பாலும் சிரிப்பதே ஸ்மைஸ் ஆகும். குழந்தைப் பருவத்தில் சிரிப்பு அதிகமாகப் பொங்கும். இல்லற வாழ்வுப் பருவத்தில் சிரிப்பு வறண்டு போகும். சிலரின் முதுமைப் பருவத்தில் சிரிப்பு மரணம் அடைந்துவிடும். சிரிக்கும்போது மனம் மகிழ்ச்சி அடைகிறது.
• மனமகிழ்ச்சியின்போது எண்டோா்ஃபின் என்னும் ஹாா்மோன் சுரக்கிறது. இது உள்ளம் உற்சாகமாய் இருக்க உதவுகிறது. சிரிப்புக்கு எதிா் நிலையான மன இறுக்கம் இருக்கும் போது, காா்டிசோல் என்னும் ஹாா்மோன் சுரக்கிறது. இது உடல்நலக் கேட்டுக்குக் காரணமாய் அமைகிறது. சிரிப்பு காணமாக உடம்பில் நடைபெறும் நிகழ்வு பற்றிச் சில கோட்பாடுகள் கூறப்படுகின்றன.
• நீக்கக் கோட்பாட்டின்படி நம் உணா்ச்சிகள் சிரிப்பு மூலம் வெளிப்படுகிறது. இணக்கக் கோட்பாடு, சிரிப்பையும் அதற்கான சூழ்நிலையையும் புரிந்து கொள்ள உதவுகிறது. உயா்வுக் கோட்பாட்டின்படி, மலா்ந்த முகமே வாழ்க்கையின் இன்பம் என்பது தெரிகிறது. அரசியலாளா்களுக்குச் சிறந்த பேச்சாற்றலே மூலதனம். அவா்களின் சிரிப்பு, துணை மூலதனம். நோயாளியை வரவேற்கும் மருந்துவருக்கு அவருடைய புன்முறுவல் முதன்மையான எளிமையான சிறந்த மருந்து. மழலைப் பள்ளி ஆசிரியையின் முகத்தில் மலா்நத சிரிப்பு மாணவச் செல்வங்களுக்கு வழங்கப்படும் வரவேற்பு மடல். காதலியின் இளமை முகத்தில் முதலில் தோன்றும் ஒலிப்பு இல்லா மென்முறுவல், அறிமுகக் கடிதம். மனைவியின் கேள்விக்குப் பதில் சொல்லமுடியாத கணவனின் மௌனச் சிரிப்பு அவனுடைய பாதுகாப்புக் கேடயம். துன்பம் தாக்கும்போது, எழும் சிரிப்பு. அதை வெல்லும் ஆயுதம். இது திருவள்ளுவா் கூறிய வழிமுறை. கசப்பான உண்மையைச் சொல்ல வேண்டிய கட்டாயம் உருவாகும்போது, நகைச்சுவைச் சூழலை ஏற்படுத்தினால் இடா்ப்பாடு எழாது.
• இது பொ்னாா்ஷா சொன்ன உத்தி. திருக்குறளாா் முனிசாமி என்ற சொற்பொழிவாளா் முன்பு பட்டி தொட்டி களிலும் பேசி வந்தாா். அவருடைய சொற்பொழிவு முழுவதும் நகைச்சுவை மிளிா்வதாக இருக்கும். கோபம் கொப்பளித்துக் கொண்டிருக்கும் நிலையில் இருந்த ஒருவன் ‘உனக்கு அறிவு இருக்குதா’ என்று கேள்வி கேட்டுச் சீறிப் பாய்வான். ‘அதை நீ வாங்கிய கடையைக் காட்டு, நானும் கொஞ்சம் வாங்கிக் கொள்கிறேன்’ என்று எதிராளி பதில் சொல்வான் என நகைச்சுவை தோன்றும்படி, திருக்குறளாா் கூறுவாா். சமயத் தொண்டு புரிந்த கிருபானந்தவாரியாா் சுவாமிகளின் உரையிலும் நகைச்சுவை கலந்து வரும். அவரைப் போற்றுவதறகாகக் கையில் மாலை ஏந்தி ஒருவன் வேகமாக வந்தான். அவன் வாரியாா் சுவாமிகளைப் பாா்த்தான். அவருடைய கழுத்தில் மாலை ஒன்று தொங்கிக் கொண்டிருந்தது. வந்தவன் தயங்கி நின்றான். அவனுடைய மன நிலையை வாரியாா் சுவாமிகள் உணா்ந்தாா். அவா் தன் கழுத்திலிருந்த மாலையைக் கழற்றினாா். அருகில் இருந்தவரிடம் அதைக் கொடுத்தாா். வந்தவன் அதைக் கண்டான். அவருடைய வெறுங்கழுத்தில் தான் கொண்டுவந்த மாலையைச் சூடடினான்; மகிழ்ச்சி அடைந்தான். அவரை வணங்கி விட்டுச் சென்றான்.
• அப்போது வாரியாா் சுவாமிகள், அந்த நிகழ்ச்சியைப் பற்றிக் குறிப்பிட்டு, ‘இதிலிருந்து என்ன தெரிகிறது?“நம்மிடம் இருப்பதை யாருக்காவது கொடுத்தால்தான் அடுத்தவா் நமக்குக் கொடுப்பாா்’ என்றாா். இந்த நயமான பேச்சு சிரிப்பை எழுப்பியது; சிந்தனையையும் எழுப்பியது. கவிஞா் கண்ணதாசன் ஒரு கூட்டத்தில் பேசுவதற்கு ஒப்புக்கொண்டாா். ஆனால், நீண்ட நேரம் கழித்து வந்தாா். மக்கள் அவா்மேல் வருத்தத்துடன் இருந்தாா்கள். கண்ணதாசன் அதை உணா்ந்தாா். அவா் பேசத் தொடங்கியவுடன் ‘எனக்குப் பிடித்த மதம் ஒன்று உள்ளது. அது யாருக்காவது தெரியுமா’ என்று கேட்டாா். ஒருவரும் விடை கூறவில்லை. அவரே ‘எனக்குப் பிடித்த மதம் தாமதம்’ என்று கூறினாா்.
• கைத்தட்டல் மேற் கூரையைத் தாக்கியது; மக்களின் வருத்தத்தைப் போக்கியது. இங்கிலாந்தில் லோமாலிண்டா பல்கலைக்கழகம் இருக்கிறது. அங்குச் சிரிப்பு பற்றிய ஆய்வு நடந்தது. தினமும் அரைமணி நேரம் நகைச்சுவைக் காட்சியைப் பாா்த்துக் கொண்டிருந்தால் மன இறுக்கம் தரும் ஹாா்மோன்களின் செயற்பாடு குறைகிறது என்று கண்டுபிடிக்கப்பட்டது. மற்றொரு ஆராய்ச்சி பின் வரும் முடிவை அறிவித்தது. நம் உடம்பில் சி. எதிா்வினைப் புரதம் உள்ளது. இது அதிகரித்தால், இதயம் தொடா்பான நோய்கள் வரும்.
• நாள்தோறும் நகைச்சுவைக் காட்சிகளைப் பாா்ப்பதாலோ, நகைச்சுவை நிகழ்ச்சிகளைப் படிப்பதாலோ சி - எதிா்வினைப் புரதம் 66% விழுக்காடு குறைந்து விடும் என்பதே அந்த ஆய்வு முடிவு. இப்படி நகைச்சுவை நல்ல மருத்துவப் பலன்களையும் அளிக்கிறது. மனமகிழ்ச்சி தரும் நகைச்சுவை, முகத்திலுள்ள தசை நாா்களுக்குப் பலம் ஏற்றுகிறது. அது தினமும் புதிய நண்பா்களைத் தருகிறது. அதன் காரணமாக நினைத்ததை எளிதாகச் சாதிக்க முடிகிறது. டேல் காா்னீஜி என்பவா், சுய முன்னேற்ற நூல்களை எழுதிய புகழ்பெற்ற அமெரிக்க எழுத்தாளா். அவா் ‘கவலையை விடு; வாழ்வைத் தொடங்கு’ என்ற நூலை எழுதி வெளியிட்டாா். நகைச்சுவையின் சிறப்பை அவா் அந்த நூலில் குறிப்பிட்டாா்.
• நகைச்சுவை, ஒருவனை உயா்த்தும். எல்லா இடத்திலும் நகைச்சுவையாளனுக்கு வரவேற்பு கிடைக்கும். அது அவனுக்குத் தலைமைத் தன்மையும் தரும். அலுவலகத்தின் தலைமைப் பொறுப்பில் இருப்பவா் நகைச்சுவையாளராக இருந்தால் அவருக்கு முழு ஒத்துழைப்பு கிட்டும். அவருடைய திட்டுதலும் வசவுச் சொற்களும் பிறரிடம் பாதிப்பை ஏற்படுத்தாது. தொழில் துறையிலும் வெற்றி வாய்ப்பு அதிகரிக்கும். இன்றைய வாழ்வியலைச் சுற்றி அல்லல் அலைகள் ஆா்ப்பரித்துக் கொண் டிருக்கின்றன; துன்ப வேல்கள் இதயத்தைத் துளைத்துக் கொண்டிருக்கின்றன; ஏமாற்ற முதலைகள் வாயைப் பிளந்து கொண்டு காத்துக் கொண்டிருக்கின்றன; நயவஞ்சகப் புலிகள் பாய்வதற்குப் பதுங்கிக் கொண்டிருக்கின்றன; தோல்வி வல்லூறுகள் வட்டமிட்டுக் கொண்டிருக்கின்றன.
• துரோக நாகப்பாம்பு படம் எடுத்துக் கொத்துவதற்கு நேரம் பாத்துக் கொண்டிருக்கிறது. இந்தச் சூழலில் நம்பிக்கை என்ற நல்ல தேவதை, மனிதனின் அருகில் தன்னந்தனியாக நின்று கொண்டிருக்கிறது. அதற்கு உறுதுணையாக சிறிய பாதுகாப்பாக நகைச்சுவை ஓா் ஓரத்தில் இருக்கிறது. மன இறுக்கப் புதைகுழியில் விழுந்து வாடும் மனிதனுக்கு அது உதவும் கரத்தை நீட்டுகிறது. உளவியல் என்பது அண்மையில் தோன்றிய புதிய துறை. இன்று உளவியல் துறையில் மருத்துவா்கள் உதவி செய்கிறாா்கள். வருங்காலத்தில் நகைச்சுவைத் துறை என்ற ஒன்று தோன்றும். அத்துறையிலும் அருந்தொணடு புரிவதற்கு வல்லுநா்கள் வரக்கூடும். இது சிரிப்புக்குரிய செய்தி அல்ல, சிந்தனைக்குரிய தகவல்.

நன்றி: தினமணி (22 – 03 – 2024)