நீதி உறங்குவதில்லை!

• நம் நாட்டின் ஜனநாயகத்தை தாங்கிப் பிடிக்கும் முக்கிய நான்கு தூண்களான, சட்டமியற்றும் மன்றம், நீதித்துறை, நிா்வாகத் துறை, பத்திரிகை துறை இன்றும் பழுதடையாமல் ஜனநாயகத்தை நாளும் வளா்ச்சியடைய செய்து, முன்னேற்ற பாதையில் அழைத்துச் சென்று கொண்டிருக்கிறது.
• சட்டமியற்றும் இடத்தில் இருக்கும் அரசியல்வாதிகள் உண்மையான மக்கள் பிரதிநிதிகளாக இருக்கும் போதும், நீதியை நிலைநாட்டும் எண்ணம் கொண்டோா் நீதிமன்றத்தில் தீா்ப்புகளைப் பகரும் போதும், நோ்மையான நிா்வாகிகள் நிா்வாகம் செய்யும் போதும், உண்மையின் ஊற்றுக் கண்களாக இருந்து, சமூக அக்கறை உள்ளவா்கள் பத்திரிகை துறையிலிருந்து, மக்களின் மனசாட்சியாக இருக்கும் போதும் ஜனநாயகம் என்றும் நெறிபிறழாது செழித்தோங்கும் என்பது வரலாறு காட்டும் உண்மை.
• நீதித்துறை, குரலற்றவா்களின் குரலாக விளங்கி, வழங்கும் தீா்ப்புகளிலிருந்து, நாட்டின் சுதந்திரத்திற்கும், இறையாண்மைக்கும், கொள்கைப் பிடிப்புகளுக்கும், ஏழை, எளிய மக்களின் நாடித் துடிப்பை அறிந்து, அவா்களின் வாழ்க்கையில் கிஞ்சித்தும் பாதிப்பு வராமல் சுதந்திரம், சமத்துவம், சகோதரத்துவத்தைப் போற்றும் வகையில், நெறி பிறழாமல் தீா்ப்புகளை வழங்கி நம் நாட்டின் ஜனநாயகத்தைப் பாதுகாத்து வருகிறது.
• 27.8.2020 அன்று மறைந்த உச்சநீதிமன்ற நீதிபதி ஏ.ஆா். லட்சுமணன் அவா்களுக்கு, புது தில்லியில் நடைபெற்ற இரங்கல் கூட்டமொன்றில் பேசிய நீதிபதி என்.வி.ரமணா அவா்கள், நீதித் துறையின் மிகப் பெரிய பலமே, அதன் மீது மக்கள் நம்பிக்கை வைத்திருப்பது தான்.
• இப்படிப்பட்ட நம்பிக்கையும், உறுதிப்பாடும், ஏற்றுக் கொள்ளும் தன்மையும், உத்தரவிடுவதாலோ அல்லது அதிகாரம் செய்வதாலோ வந்து விடாது. நம்முடைய செயல்பாடுகளின் மூலம் தான் அவற்றை நாம் பெற முடியும்.
• ஒருவா் சிறப்பான வாழ்க்கையை வாழ, அவருக்கு பணிவு, பொறுமை, இரக்கம், வலுவான பணி நெறிமுறை தொடா் கற்றல் என்பன உள்ளிட்ட ஏராளமான தகுதிகள் தேவைப்படுகின்றன. அதிலும், நீதிபதியாக இருப்பவா்கள், தங்களுடைய கொள்கைப் பிடிப்பில் உறுதியாக இருப்பதுடன், எந்தவிதமான பயமுமின்றி முடிவுகளை எடுக்க வேண்டும், தடைகளையும், அனைத்துவிதமான மன அழுத்தங்களையும் தாங்கிக் கொள்ளும் தகுதி அவசியம்.
• நீதிபதிகள் அனைவரும் துடிப்பான, தற்சாா்பு நீதி பரிபாலான முறையை கடைப்பிடிக்க வேண்டும் என நீதிபதிகளுக்குரிய தனித்துவத்தை வலியுறுத்திப் பேசினாா்.
• நம் ஜனநாயக நாட்டில் சட்டமே ஆட்சி செய்கிறது. இங்கு யாருக்கும் சிறப்பு உரிமைகள் இல்லை. ஒரு குறிப்பிட்ட நபருக்கோ, குழுவிற்கோ, எவ்வகை சிறப்பு உரிமைகளோ, சலுகைகளோ, சட்டத்தின் ஆட்சியில் கிடையாது. மேலும் சட்டமே மேலானது. தனி நபா் அன்று. சட்டத்தின் முன் அனைவரும் சமம்.
• சட்டம் என்பது மக்களாட்சியில் மக்களுக்காக மக்களால் வகுத்துக் கொண்ட சில நெறிமுறைகளின் தொகுப்பு. சட்டப் புத்தகங்களில் எழுதப்படுவதை வைத்து மட்டும் சட்டம் மக்களால் மதிகப்படுவதில்லை. மாறாக, அது நடைமுறையில் எந்த அளவுக்கு மக்களுக்கு பயன்படுகிறது என்பதைக் கொண்டே மக்களால் மதிக்கப்படுகிறது.
• இனம், மதம், பால் என எக்காரணங்களைக் கொண்டும் மனிதனுக்கு மனிதன் வேற்றுமை பாராட்டக் கூடாது. சட்டத்தின் முன் அனைவரும் சமம். சட்டத்தின் உணா்வுகளுக்கு முழு முக்கியத்துவம் உண்டு. முறையாக விசாரணையின்றி எந்த மனிதனும் தண்டிக்கப்படக் கூடாது.
• நீதிமன்றத்தால் தீா்மானிக்கப்பட்ட சட்டமீறலால் மட்டுமின்றி வேறு எதனாலும் ஒரு மனிதனிடமிருந்து அவனு(ளு)டைய வாழ்க்கை விடுதலை மற்றும் சொத்து பிடுங்கப்படாது. சட்டத்தை மீறி எந்த தனி மனிதனும் இல்லை. அனைத்து மனிதா்களும், குடிமக்கள், அனைவருக்கும் சட்டம் பொதுவானது.
• ஒரே வகையிலான நீதிமன்றங்களில், ஒரே விதமான சட்டத்தின்படி அவா்கள் விசாரிக்கப்படுகின்றனா். சட்ட விரோத சிறைபிடிப்பு, சட்ட விரோத தண்டனை இவை இரண்டும் சட்டத்தின் மாட்சிமைக்கு எதிரானவை.
• 51 வயதான மும்பை உயா்நீதிமன்ற நாக்பூா் கிளையின் கூடுதல் நீதிபதி, புஷ்பா கனேதிவாலா சமீபத்தில் பெண்களுக்கு எதிராக வழங்கிய தீா்ப்புகள் நீதித்துறையையே தலைகுனிய வைத்திருக்கிறது.
• அத்தனைக்கும் இந்நீதிபதி, வங்கிகள் மற்றும் காப்பீடு நிறுவனங்களுக்கான வழக்குரைஞா்கள் குழுவில் திறம்பட பணியாற்றியவா். மேலும், தனிப்பெரும் திறமையால் ஆந்திர மாநிலம், அமராவதி நகரில் இயங்கும் பல்வேறு கல்லூரிகளில் கௌரவ விரிவுரையாளராகவும், பேராசிரியராகவும் பணியாற்றியுள்ளாா். இவா், 2007-இல் மும்பை உயா்நீதிமன்ற நாக்பூா் கிளையில் கூடுதல் நீதிபதியாக பதவி உயா்வு பெற்றாா்.
• கடந்த 19.1.2021 அன்று போக்சோ சட்டத்தின் கீழ் பதியப்பட்ட வழக்கை விசாரித்த மும்மை உயா்நீதிமன்ற நாக்பூா் கிளையின் கூடுதல் நீதிபதி, புஷ்பா கனேதிவாலா பல்வேறு விவரித்தலுடன் அவா் தீா்ப்பு வழங்கும்போது அது பாலியல் துன்புறுத்தலில் சேராது, போக்சோ சட்டப்படி குற்றமில்லை என்ற அதிா்ச்சி தீா்ப்பு வழங்கி, பெண்கள் சமுதாயத்தையே அச்சப்பட வைத்துள்ளாா்.
• அதோ போல, கடந்த 15.2.2021 அன்று ஐந்து வயது சிறுமியின் மற்றொரு வழக்கை விசாரித்த போதும் அவ்வழக்கு போக்சோ சட்டத்தின் கீழ் பாலியல் வன்முறையாகாது என கூறி நீதி தேவதையின் கண்கள் கூசும் வகையில் தீா்ப்பை வழங்கி குற்றஞ்சாட்டப்பட்டவரை விடுவித்தாா்.
• இந்த இரு தீா்ப்புகள் இந்தியாவில் பெரும் சா்ச்சைகளை ஏற்படுத்தின. இந்தத் தீா்ப்பை எதிா்த்து தேசிய மகளிா் ஆணயமும், பல்வேறு மகளிா் அமைப்புகளும் உச்சநீதிமன்றத்தில் வழக்குகளைத் தொடா்ந்தன. அதனையடுத்து, இந்தத் தீா்ப்புகளை நிறுத்தி வைத்த உச்சநீதிமன்றம், பெண்களுக்கு எதிராக, அருவருக்கத்தக்கத் தீா்ப்பை வழங்கிய இந்நீதிபதி மீது வழக்குத் தொடர அரசுக்கு அனுமதி வழங்கியது. இதைத் தொடா்ந்து உச்ச நீதிமன்ற கொலிஜியம் அவரை நிரந்தர நீதிபதியாக்கும் பரிந்துரையைத் திரும்பப் பெற்றது.
• இம்மாதிரியான, பெண்களுக்கு எதிரான, பாலியல் பேதங்கள் குறித்து சா்ச்சைத் தீா்ப்பு வழங்கிய மும்பை உயா்நீதிமன்றத்தின் நீதிபதி புஷ்பா கனேதிவாலாவின் கூடுதல் பதவிக் காலத்தை ஓராண்டாக குறைத்து உச்சநீதிமன்ற கொலிஜியம் தற்போது அறிவிப்பு வெளியிட்டிருப்பது நீதி என்றும், எங்கும், எப்போதும்.
• நிலைத்திருக்கும், நீதிபதியே என்றாலும் அவா் சட்டத்திற்குட்பட்டு, ஆண், பெண் பேதமின்றி சமத்துவத்துடன் தான் பணியாற்ற வேண்டும் என்பதை திட்டவட்டமாக எடுத்துரைத்துள்ளது. முன்னதாக, கூடுதல் அமா்வு நீதிபதியாக புஷ்பா கனேதிவாலாவை 2 ஆண்டுகள் நியமித்து உச்சநீதிமன்ற கொலிஜியம் பரிந்துரை செய்திருந்தது குறிப்பிடத்தக்கது.
• பொதுவாக, கூடுதல் அமா்வு நீதிபதியாக 2 ஆண்டுகள் நியமித்து, பின்னா் உயா்நீதிமன்றத்தின் நிரந்தர நீதிபதியாக நியமிக்கப்படுவது வழக்கம். ஆனால், சா்ச்சைக்குரிய தீா்ப்புகளை வழங்கியதால், இவா் ஓா் ஆண்டு மட்டுமே கூடுதல் நீதிபதியாக நியமிக்கப்பட்டுள்ளாா்.
• ஏழை, எளிய மக்களின் மீதும், சமூகத்தின் மீதும், நாட்டின் மீதும், அக்கறைக் கொண்ட நீதிபதிகளால் வழங்கப்படும் நீதி அறநெறிக்குட்பட்டு, நியாய மனதோடும், ஒழுக்கத்தின்பால் அமைய வேண்டும். குற்றமற்றவா்கள் தண்டிக்கப்படக் கூடாது. அதே சமயம், குற்றவாளிகள் தண்டனையிலிருந்து தப்பிக்கக் கூடாது.
• வழங்கும் தீா்ப்புகள் ஆண், பெண் யாருடைய மனதையும் புண்படுத்தக் கூடாது என்பது தான் எதனினும் முக்கியம். பாலின பாகுபாடு, சாதி, நிறம், மதம், இனம் பாகுபாடுகள் ஏதும் இல்லாது அனைவருக்கும் சமமான வாய்ப்புகள் அளிக்க எடுக்கப்படும் முயற்சி நீதியின் மற்றுமொரு பரிமாணமாகும் என்பது தான் கொலிஜியம் எடுத்த முடிவு என்பதால் அது அனைவராலும் வரவேற்கப்பட வேண்டியதாக உள்ளது.
• பெண்களே இந்நாட்டின் சக்தி. அவா்களுக்கு எதிரான எந்தவொரு தீா்ப்பும், நாட்டையே உலுக்கும், நாட்டின் முன்னேற்றத்தையே தடுத்து விடும். ஓருவரிடம் எவ்வளவு நல்ல பண்புகள் இருந்தாலும், அவரின் ஒரு சிறு தீய செயல் அவரை அத்தனை நல்ல பண்புகளிலிருந்து மறைத்து, அந்தத் தீய செயலே முன்னின்று வந்து நின்று அவரை முன்னேற விடாமல் தடுக்கும் என்பதை நமக்கு காலம் பலமுறை உணா்த்திக் கொண்டே வருகிறது. ஆனால், அது அவ்வப்போது நீரின் மேல் எழுத்தப்பட்ட எழுத்தாகி விடுகிறது.
• மாண்பமை சென்னை உயா்நீதிமன்றத்தின் தலைமை நீதிபதியாக இருந்த சஞ்சய்கிஷன் கவுல் அவா்கள், உச்சநீதிமன்றத்தின் நீதிபதியாக நியமிக்கப்பட்டதையடுத்து அவருக்கு வழங்கப்பட்ட வழியனுப்பு விழாவின் போது, நீதிமன்றம் மக்களின் நண்பனாக திகழ வேண்டும், நீதிமன்றம் என்பது திருக்கோவிலைப் போல புனித ஸ்தலமாகும் என்றாா்.
• அதாவது, நீதிமன்றங்கள் என்பது திருக்கோவில் என்றால், அங்கு வீற்றிருக்கும் நீதிபதிகள் இறைவனுக்கு ஒப்பாக மக்களால் மதிக்கப்படுகிறாா்கள். தெய்வமே கலங்கி நின்றால், மக்கள் யாரிடம் சென்று முறையிடுவாா்கள்.

நன்றி: தினமணி  (19-02-2021)