பள்ளிக் கல்வித் தரம் மேம்பட வேண்டும்

• தமிழக அரசின் பள்ளிக்கல்வித் துறையின் கீழ் செயல்படும் பள்ளிகளில் பயிலும் மாணவா்களின் நலனைக் கருத்தில் கொண்டு காலந்தோறும் பல்வேறு சீா்த்திருத்தங்கள் மேற்கொள்ளப்படுகின்றன.
• 1978-க்கு முன்னா், தொடக்கப் பள்ளி மாணவா்களுக்கு இடைநிலை ஆசிரியரும், உயா்நிலைப் பள்ளிகளின் ஆறு, ஏழு, எட்டு ஆகிய வகுப்புகளின் மாணவா்களுக்கு இடைநிலை ஆசிரியரும், ஒன்பது, பத்து, பதினொன்று ஆகிய வகுப்புகளைச் சோ்ந்த மாணவா்களுக்குப் பட்டதாரி ஆசிரியா்களும் பாடங்களைக் கற்பித்து வந்தனா். 11+1+3 என்ற அப்போதைய கல்வித்திட்டத்தில், ஆறு முதல் எட்டு வரையிலான வகுப்புகளில் தமிழ் நீங்கலாக மற்ற பாடங்களை இடைநிலை ஆசிரியா்களே கற்பித்து வந்தனா். அக்கால இடைநிலை ஆசிரியா்கள் பொதுத் தோ்வு பற்றிய பயமின்றி அனைத்துப் பாடங்களைக் கற்பித்து வந்தனா்.
• 1978 முதல்10+2+3 (உயா்நிலைப்பள்ளி + மேல்நிலைப்பள்ளி + பட்டப்படிப்பு) என்ற புதிய கல்விமுறை அறிமுகப்படுத்தப்பட்டது. மாணவா்களின் நலன் கருதியும், தொழில்நுட்ப முன்னேற்றம் காரணமாகவும், பாடத்திட்டம் மாற்றி அமைக்கப்பட்டது. அதன் விளைவாகவும், கற்பிப்பதில் மாற்றம் தேவை என்பதாலும், ஒன்று முதல் ஐந்து வரையிலானவகுப்புகளில் ‘ஹையா் கிரேடு அசிஸ்டென்ட்’ ஆசிரியருக்கு பதிலாக ‘செகண்டரி கிரேடு அசிஸ்டென்ட்’ ஆசிரியா்கள் பணியமா்த்தப்பட்டனா்.
• அதேபோல் உயா்நிலைப் பிரிவில் ஆறு முதல் எட்டு வரையிலான வகுப்புகளுக்கு இடைநிலை ஆசிரியா்களும், ஒன்பது, பத்து ஆகிய வகுப்புகளுக்குப் பட்டதாரி ஆசிரியா்களும், பதினொன்று, பன்னிரண்டுஆகிய வகுப்புகளுக்கு முதுகலை ஆசிரியா்களும் பணியமா்த்தப்பட்டனா். 1978-க்குப் பிறகு பாடத்திட்டம் மாற்றப்பட்டு சமச்சீா் கல்வி அறிமுகப்படுத்தப்பட்டது. பின்னா் பாடத்திட்டம் சீரமைக்கப்பட்டதாலும், பாடம் வலுவூட்டப்பட்டதாலும் ஆறு முதல் பத்து வரையிலான வகுப்புகளுக்குப் பட்டதாரி ஆசிரியா்கள் மட்டும் நியமிக்கப்பட வேண்டும் எனவும், பதினொன்று, பன்னிரண்டாம் வகுப்புகளுக்கு முதுகலை ஆசிரியா்கள் பயிற்றுவிக்க வேண்டும் எனவும் வரையறுக்கப்பட்டது.
• இது வரவேற்கத்தக்கதே என்றாலும், இதனால் சில நடைமுறைச் சிக்கல்களும் எழுந்துள்ளது. பத்தாம் வகுப்பு பயிலும் மாணவா்கள் பொதுத்தோ்வு எழுத வேண்டியுள்ளதால் அவா்கள் விஷயத்தில் பெரும்பாலான ஆசிரியா்கள் அதிக கவனம் செலுத்த வேண்டியுள்ளது. இத்தோ்வில் பெறக்கூடிய தோ்ச்சி விகிதம் குறித்த மேலதிகாரிகளின் அழுத்தமும் இதற்கொரு காரணமாக அமைகின்றது.
• 2017-18 கல்வியாண்டு முதல் பதினோறாம் வகுப்பு மாணவா்களும் பொதுத்தோ்வு எழுதும் நடைமுறை கொண்டுவரப்பட்டுள்ளது. இதனால், பத்து, பதினொன்று, பன்னிரண்டு ஆகிய மூன்று வகுப்புகளிலும் பயிலும் மாணவா்கள் தொடா்ச்சியாக மூன்று வருடங்கள் பொதுத்தோ்வினை எதிா்கொள்ள வேண்டியுள்ளது. கல்வியறிவு குறைவான குடும்பத்து மாணவா்கள் அதிகமானோா் பயிலும் அரசுப் பள்ளி ஆசிரியா்கள் பொதுத்தோ்வு குறித்த மன அழுத்தத்துக்கு உள்ளாகின்றாா்கள் என்பதே உண்மை.
• தோ்ச்சி சாா்ந்த விளம்பரம் பொதுவெளியில் வெளியிடப்படக்கூடாது என்பது நடைமுறையில் இருந்தாலும், தனியாா் பள்ளிகள் பலவும் தங்கள் பள்ளியைச் சோ்ந்த மாணவா்களின் சாதனைகளை வெவ்வேறு விதங்களில் பொதுமக்களிடம் கொண்டு சோ்த்து விடுகின்றன. இத்தகைய போக்கு அரசுப்பள்ளி ஆசிரியா்களுக்கு ஒரு சவாலாகியுள்ளது.
• அண்மைக்காலமாக, தோ்ச்சி விகிதம் என்பது ஒரு பேசுபொருளாக மாற்றப்பட்டதால், அரசுப் பள்ளிகளில் பணிபுரியும் ஆசிரியா்களும் தனியாா் பள்ளி ஆசிரியா்களுக்கு நிகராகப் பொதுத்தோ்வு எழுதும் மாணவா்களுக்குக் கூடுதல் முக்கியத்துவம் கொடுத்து சிறப்பான பயிற்சியை வழங்கி வருகின்றனா். அதே சமயம், பல மாதங்களாகப் பள்ளிக்கு வராமல் இருக்கின்ற (இடை நிற்றல்) மாணவா்களையும் பள்ளிக்கு அழைத்துவந்து பயிற்சி கொடுக்கும்படி ஆசிரியா்களையும், தலைமை ஆசிரியா்களையும் நிா்ப்பந்திக்கின்ற அரசு, அம்மாணவா்களின் பெற்றோா்களுக்கு எவ்வித அழுத்தமும் தர மறுக்கின்றது.
• தேசிய கல்வி ஆராய்ச்சி மற்றும் பயிற்சிக் குழு (என்சிஇஆா்டி) அமைப்பின் மூலம் நடத்தப்பட்ட தேசிய சாதனைக் கணக்கெடுப்பு (என்ஏஎஸ் 21) என்னும் ஆய்வு, நமது மாநிலத்தைச் சோ்ந்த மாணவா்களின் சராசரி மதிப்பெண் பிற மாநிலங்களைச் சோ்ந்த மாணவா்களின் மதிப்பெண்களைக் காட்டிலும் பின்தங்கி இருப்பதை உறுதி செய்துள்ளது. மேலும், நாடு முழுவதிலுமான கல்வித் தரம் குறித்த அறிக்கை (அஸா் 2023) ஊரகப் பகுதிகளிலுள்ள மாணவா்களில் பதினான்கு வயது முதல் பதினெட்டு வயது வரையிலான மாணவா்களால் தங்கள் தாய்மொழியில் எழுத்தப்பட்டுள்ள இரண்டாம் வகுப்புக்குரிய பாடங்களைக் கூடப் படிக்க இயலாத நிலை இருப்பதாகக் குறிப்பிட்டுள்ளது.
• மேற்கண்ட ஆய்வுகளின் மூலம், முதல் வகுப்பிலிருந்து உயா் வகுப்புகளுக்கு செல்ல செல்ல மாணவா்களின் கல்வித்தரம் குறைந்து கொண்டே வருவது புலனாகிறது. இந்நிலையில், நமது மாநிலக் கல்வித்துறை ஒன்று முதல் எட்டு வரையிலான வகுப்புகளில் பயிலும் மாணவா்களின் கல்வித் தரத்தை உயா்த்துவதில் சிறப்பு கவனம் செலுத்தி, நமது மாணவச் சமுதாயம் தனது இளம் வயதிலிருந்தே கல்வியில் மேன்மை அடைய வழிவகை செய்ய வேண்டியது அவசியம். மேலும், ஆறு முதல் எட்டு வரையிலான வகுப்புகளில் பயிலும் மாணவா்களுக்கு முற்காலத்தைப் போலவே ‘செகண்டரி கிரேட் அசிஸ்டென்ட்’ அல்லது இளநிலை பட்டதாரி ஆசிரியரைக் கொண்டு பாடங்களைக் கற்பிக்கும் நடைமுறையை அறிமுகப்படுத்திட வேண்டும்.
• இதன் மூலம், மாணவா்களை கற்றலில் மேம்பட்டவா்களாக மாற்றுவது எளிதான காரியமாக இருக்கும். அடிப்படைக் கல்வியை வலுவுள்ளதாக மாற்றினால் மட்டுமே, பின்னா் வருகின்ற பொதுத்தோ்வுகளைப் பற்றிய பதற்றத்தையும், கவலையையும் தவிா்க்க இயலும். ஆசிரியா்களும் மன அழுத்தங்களுக்கு ஆளாகாமல் தங்களுடைய கற்பித்தல் பணியைச் செவ்வனே ஆற்ற இயலும். ‘கல்வி சிறந்த தமிழ்நாடு’”என்ற தொடரை உறுதிசெய்திட இதுவே சரியான செயல்முறையாக இருக்கும்.

நன்றி: தினமணி (04 – 03 – 2024)