Articles from Newspapers

மழையும் மாறிவரும் தட்ப வெப்பநிலையும்!

December 14 , 2024 5 hrs 0 min 32 0

மழையும் மாறிவரும் தட்ப வெப்பநிலையும்!

ஒரே நதிதான், எல்லாக் காலத்திலும் ஓடிக் கொண்டே இருக்கிறது. ஆனால், அதில் ஓடும் தண்ணீா்தான் ஒவ்வொரு காலத்திலும் வெவ்வேறாக இருக்கிறது. ஏனென்றால், தண்ணீா் ஒவ்வொரு பருவகாலத்திலும் அதற்கான வேகத்தோடு பெருகி ஓடுகிறது. இப்படிக் காலம் காலமாகத் தொடா்ந்து நடைபெற்றுக் கொண்டுதான் இருக்கிறது.
இருப்பினும் நதிநீா்ப் பிரச்னைகள் இன்னும் இருந்து கொண்டுதான் இருக்கின்றன. அவ்வழக்குகள் நீதிமன்றத்தில் நிலுவையில் இருக்கின்றன. நீதிமன்றம் அதற்குத் தீா்வு தந்தாலும், அந்தத் தீா்வைப் பின்பற்ற சம்பந்தப்பட்ட மாநில அரசுகள் மறுத்து விடுகின்றன. வீணாகப் போகிற மழைநீா் வெள்ளமெனப் பாய்ந்தோடுவதைப் பாா்த்தும் தண்ணீரின் அருமை தெரிந்த மக்கள் எல்லாவற்றையும் சகித்துக் கொண்டு வாழ பழகிக் கொண்டிருக்கிறாா்கள்.
தற்போது ஃபென்ஜால் புயலில் சிக்கித் தவித்தது தமிழகம். கடலூா், விழுப்புரம், திருவண்ணாமலை, சேலம், கிருஷ்ணகிரி வரைக்குமான அதன் பயணம் சென்னையையும் ஓா் உலுக்கு உலுக்கி விட்டுப் போயிருக்கிறது. விழுப்புரம் மற்றும் கடலூா் நகரங்களில் தென்பெண்ணை ஆற்றின் வெள்ளநீா் புகுந்ததால், குடியிருப்புப் பகுதிகள் முழுவதும் வெள்ளக்காடாகக் காட்சியளிக்கின்றன.
வரலாறு காணாத மழை குறித்து வானிலை ஆய்வு மையம் எச்சரித்த போதும், முன் நடவடிக்கைகள் எடுப்பதில் தவறி விட்டது, தமிழக அரசு. தலைநகரம் சென்னையில் பல்வேறு பகுதிகள் வெள்ளக்காடாகக் காட்சியளித்தன. மின்தடையாலும், தண்ணீா் தேங்கி வழிந்தோடுவதற்கான வழி இன்றி தண்ணீா் அங்கும் இங்கும் அலைமோதியதாலும் சென்னை மக்கள் தத்தளித்துக் கொண்டிருந்தாா்கள்.
கிழக்கு கடற்கரைச்சாலை, மாமல்லபுரம் பகுதிகளில் சூறாவளிக் காற்று வீசி நம்மை உலுக்கி விட்டுத்தான் சென்றது. கனமழை பெய்தபோதும், எந்தத் தேசிய பேரிடா் மீட்புக்குழுவோ, அரசு அதிகாரியோ அங்கு வரவில்லை. நிவாரண உதவிகள் அளிக்கப்படவில்லை. மீனவா்கள் ஒரு வாரமாக மீன்பிடிக்கச் செல்லவில்லை. ‘எங்கள் வாழ்வாதாரம் பாதித்துள்ளது’ என்று மாமல்லபுரத்தைச் சோ்ந்த மீனவா் ஒருவா் குற்றம் சாட்டினாா். ‘பதினைந்து நாட்கள் கூட மழை பெய்திருக்கிறது. ஆனால், இப்படி நடந்ததில்லை’ என்று திருவண்ணாமலை மண் சரிவு குறித்து மக்கள் பதற்றப்படுகிறாா்கள். மண் சரிவில் சிக்கி ஏழு போ் மாண்டு போனாா்கள்.
மாமருந்தாகக் கிடைக்கும் மழையையும், வசந்தகாலத்தையும் அனுபவிப்பதற்கும் நாம் தயாராக இல்லை. நீா்வழிப் பாதைகளில் வீடுகளைக் கட்டி ஆக்கிரமித்துக் கொண்டு விட்டோம். தண்ணீா் தன் இடத்தைத் தேடி அலைகிறது.
கடல் அல்லது பெரிய நீா்ப்பரப்பு கொண்ட பகுதிகளில்தான் புயல் உருவாகிறது. கடல் மட்டத்தில் உள்ள நீா் ஆவியாகி மேலெழும்பும் போது குறிப்பிட்ட உயரத்தை அடைந்தவுடன் சின்ன மேகமாக உருவாகும். தொடா்ந்து நீா் ஆவியாகி மேலே செல்லும்போது, சிறிய மேகம் பெரிய மேகமாக மாறுகிறது. குறிப்பிட்ட அளவை அடைந்த உடன் அவை சுழல ஆரம்பிக்கும். பின்னா் அது குறைந்த காற்றழுத்த தாழ்வுப்பகுதி, காற்றழுத்த தாழ்வு மண்டலம், ஆழ்ந்த காற்றழுத்த தாழ்வுமண்டலம், தீவிரப் புயல் எனப் பல்வேறு நிலைகளை அடைகிறது. பூமத்திய ரேகைக்கு கீழே உருவாகும் புயல்கள், கடிகாரத் திசையிலும், பூமத்திய ரேகைக்கு மேலே உருவாகும் புயல்கள் கடிகார எதிா்த்திசையிலும் சுழலும்.
பூமத்திய ரேகைக்கு கீழே உருவாகும் புயல்கள், கடிகாரத் திசையிலும், பூமத்திய ரேகைக்கு மேலே உருவாகும் புயல்கள் கடிகார எதிா்த்திசையிலும் சுழலும். புயலுக்கான உணவே நீா்தான். எனவே எங்கெல்லாம் நீா் ஆவியாகி மேலே வருகிறதோ, அந்தப் பகுதியை நோக்கி புயல் நகர ஆரம்பிக்கும். பொதுவாக நிலப்பரப்புக்கு அருகில் உள்ள பகுதிகளில்தான் வெப்பம் அதிகமாக இருக்கும். அதனால்தான் எல்லாப் புயல்களும் கரையை நோக்கியே வருகின்றன. நிலத்தில் இருந்து செல்லும் வெப்பம் வட காற்றாக இருப்பதால், பூமியில் இருக்கும் வெப்பம் புயலோடு சேரும் போது அது மேலே இருக்கும் மேகங்களை கீழ் நோக்கி இழுக்கும். அதனால் மழை பொழிகிறது.
கடலில் எப்போதும் வெப்பநிலை வேறுபாடு இருந்து கொண்டே இருக்கும். கடலில் இருந்து மேலே செல்லும் நீராவி அந்த மேகக் கூட்டங்களுக்குக் கிடைத்துக் கொண்டே இருக்க வேண்டும். அது கிடைக்கக் கூடிய இடத்தை நோக்கி மேகங்களும் நகா்ந்து கொண்டே இருக்கும். போதுமான அளவு வெப்பம் கிடைக்காத பட்சத்தில் வலுவடைந்து விடும். இப்படியாகப் புயலுக்கு ஒரு நீண்ட விளக்கத்தை வழங்கினாலும், புயலின் உருவாக்கத்தை நாம் தடுத்து விட முடியாது. ஆனால், நிலப்பரப்பில் பெய்யும் தண்ணீரை வெளியேற்றுவதும், போதுமான அவசியமான ஏற்பாடுகளைச் செய்ய வேண்டியதும் ஓா் அரசினுடைய தாா்மீகக் கடமையாகும். அதைச் செய்யத் தவறுகிற போது அரசின் மீது இயல்பாகவே மக்களுக்குக் கோபம் கொதித்தெழுகிறது.
காலநிலை மாற்றம் உலகளாவிய சவாலாக இருக்கிறது. ஐக்கிய நாடு சபையின் சமீபத்திய அறிக்கை, நூற்றாண்டின் இறுதியில் சராசரி புவி வெப்பநிலை 6 டிகிரி செல்சியஸ் அதிகரிக்கும் என்று கணித்துள்ளது. காலநிலை மாற்றம், சுற்றுச்சூழல் மற்றும் சுற்றுச்சூழல் அமைப்பில் எதிா்மறையான விளைவுகளை ஏற்படுத்தும். இந்த மாற்றங்கள் இயற்கையான காரணங்களான எரிமலை வெடிப்பு, வெள்ளம், காட்டுத்தீ போன்றவற்றால் ஏற்படுகிறது. புவி வெப்பமடைதலே இதற்கு மூலகாரணமாகும்.
பருவநிலை மாற்றத்தின் தற்போதைய நிலைமை இதே முறையில் தொடா்ந்தால், அது பூமியில் உள்ள அனைத்து வகையான உயிரினங்களையும் பாதிக்கும். பூமியின் வெப்பநிலை உயரும். பருவமழை முறை மாறும். கடல் மட்டம் உயரும், புயல்கள், எரிமலை வெடிப்புகள் மற்றும் இயற்கைச் சீற்றங்கள் அடிக்கடி ஏற்படும்.
காலநிலை மாற்றத்திற்கு மிக முக்கியமான காரணங்களில் ஒன்று, வாகனங்களின் அதிகப்படியான பயன்பாடு ஆகும். மாசுபாட்டின் பங்களிப்பு 260 டன்களுக்கும் அதிகமான காா்பன் டை ஆக்ஸைடும் காரணமாகும். எந்த ஒரு நாட்டில் காா்பன் வெளியேற்றம் 15 சதவீதத்துக்கும் அதிகமாக உள்ளதோ, அந்த நாட்டின் வெப்பநிலை ஒவ்வோா் ஆண்டும் 10 சதவீதமாக உயா்கிறது. இதன் விளைவாக கடல்மட்டம் ஒவ்வோா் ஆண்டும் 0.17 மீட்டா் உயா்ந்து வருகிறது.
உள்கட்டமைப்பு வசதிகளை மேம்படுத்த நிறைய நிலங்கள் தேவைப்படுகின்றன. இந்த நோக்கத்திற்காகக் காடுகள் அழிக்கப்படுகின்றன. இதனால் அடிக்கடி வெள்ளப்பெருக்கு அதிகரித்து, காலநிலை மாறுபாடுடையதாக மாறுகிறது. வளரும் பயிா்களுக்கு முக்கிய நீராதாரம் மழை. வானிலையில் மாறுபாடுகள் அடைவதால், குறிப்பிட்ட வானிலைக்கு ஏற்ற பயிா்களை வளா்க்கும்முறையிலான விவசாயத்திற்குப் பெரும் நெருக்கடிகளை இந்தக் காலநிலை மாற்றம் ஏற்படுத்துகிறது.
தமிழகத்தில் ஜூன் முதல் அக்டோபா் மாதம் வரை வர வேண்டிய தென்மேற்கு பருவமழையும், நவம்பா் முதல் பிப்ரவரி வரை வர வேண்டிய வடமேற்கு பருவமழையும், சில மாதங்களுக்கு முன்னும் பின்னுமாக மாறி பருவநிலை மாற்றம் தொடா்கிறது.
காலநிலை மாற்றம் என்பது பூமியின் நீண்ட காலத்தில் ஏற்படுத்தும் சீதோஷ்ண மாற்றமாகும். பூமியின் சராசரி வெப்பநிலை 17 டிகிரி செல்சியஸ் ஆகும். மனிதா்கள் பயன்படுத்தும் வாகனங்கள் மற்றும் தொழிற்சாலைகளில் இருந்து வெளியேற்றப்படும் கரியமில வாயு அதிகரிப்பதன் காரணமாக பூமியின் வெப்பநிலை அதிகரிக்கிறது.
இதன் காரணமாக முன்னெப்போதும் இல்லாத அதிகமான வானிலை மாற்றங்களும், துருவப்பகுதிகளில் உள்ள பனிப்பாறைகள் உருகி அதன் காரணமாக கடலின் நீா் மட்டமும் உயா்ந்து வருகிறது. கடல்நீா் மட்டம் உயா்வின் காரணமாக, மூழ்கிப் போன தனுஷ்கோடி நகரத்தைப் போல எதிா்காலத்தில் அந்தமான், நிகோபாா் தீவுகளும் கடலுக்குள் மூழ்கிப் போகும் என்று வல்லுநா்கள் எச்சரிக்கின்றனா்.
மழலைப் பருவம், இளமைப் பருவம், முதுமைப் பருவம் இவை மாறிய பின் மீள்வதில்லை. கோடைக்காலம், மழைக்காலம், பனிக்காலம் போன்றவை மீண்டும் வரும். காலத்தையும், பருவத்தையும் ஒன்று மற்றொன்றுக்காகப் பயன்படுத்தப்படுவதும் உண்டு. தற்போது பருவகாலம் என்பது உறுதியிட்டு உரைக்க முடியாத நிலைக்கு புவி வெப்பமயமாதல் தள்ளியிருக்கிறது.
7ஆயிரம் கிலோ மீட்டருக்கு மேலாக கடற்கரையோரமாகவே எல்லைகளைக் கொண்டுள்ளதால், கடல்மட்டம் உயா்ந்தால் வெள்ளப் பாதிப்பு ஏற்படும் பெரும் அபாயத்தை இந்தியா சந்திக்க நேரிடும். மேலும் இந்தியப் பெருங்கடல் உலக சராசரியை விட வேகமாக வெப்பமடைந்து வருகிறது. கொச்சி, கொல்கத்தா, சென்னை, சூரத், விசாகப்பட்டினம் மற்றும் மும்பை ஆகிய துறைமுக நகரங்களில் சுமாா் 28.6 மில்லியன் மக்கள் கடலோர வெள்ளத்தால் பாதிக்கப்படுவாா்கள். இயற்கை தன்னை தகவமைத்துக் கொள்ளும் சக்தியை இழந்துவிட்டதையே இந்தப் பருவகால மாற்றங்கள் காட்டுகின்றன.
பின்பனிக்காலம், இளவேனிற் காலம், முதுவேனிற் காலம், காா்காலம், இலையுதிா்காலம், முன்பனிக்காலம் என ஆறு பருவகாலங்களில் வாழ்ந்து கொண்டிருக்கின்ற நாம், இப்போது தட்பவெப்பநிலையில் மாற்றம் அடைவதற்கான சூழலை நோக்கி நகா்கிறோம். இயற்கையோடு மனிதன் ஒன்றிணைந்து செயல்பட வேண்டும். காலநிலை மாற்றத்தைத் தடுப்பதற்கு இதைத் தவிர வேறு தீா்வு இல்லை.