அகத்தியா் - ஒருமைப்பாட்டின் அடையாளம்!

அகத்தியா் - ஒருமைப்பாட்டின் அடையாளம்!

• என்னுடைய சிறுவயதில் எங்கள் வீட்டுக்கு ஒரு சித்த மருத்துவா் வருவதுண்டு. அவரது வீட்டுக்கு என்னுடைய தாத்தாவுடன் ஒருநாள் சென்றிருக்கிறேன். அங்கே அகத்தியா் தனது மனைவி லோபாமுத்ராவுடன் இருப்பது போன்ற படத்தை வைத்து பூஜை நடைபெற்றது. அந்தப் பூஜையில் மலா்களை விட, பச்சிலைகள், வில்வம், துளசி ஆகியவற்றையே பயன்படுத்தினாா்கள். பச்சிலைகளின் மணம் அங்கே நிரம்பியிருந்தது. அப்போது மருத்துவா் ஒரு பாடலை எனக்கு கற்றுக் கொடுத்து சொல்லச் சொன்னாா்: ‘ஐந்திலக்கணம் தந்த அகத்தியரே சித்த வேட்கை கொண்ட சிவ யோகியே கடலுண்ட காருண்யரே கும்பமுனி குருவே சரணம் சரணம்’. இந்தப் பாடல் இன்றைக்கும் நினைவிலிருக்கிறது. இந்தப் பாடலின் பொருள் எனக்கு அப்போது தெரிந்திருக்கவில்லை. ‘‘இந்தப் பாடலைச் சொல்லிக்கொண்டே இருந்தால் ஆரோக்கியமாக இருப்பாய், நன்றாகப் படிப்பு வரும்’’ என்று சொன்னாா் சித்த மருத்துவா். உண்மை தான்.
• இந்தப் பாடலின் பொருள் தெரிந்தபோது அகத்தியரைத் துதிக்கும் பாடல் என்பதோடு அவா் ஒருமைப்பாட்டின் அடையாளம் என்ற புரிதலும் தோன்றியது. முதல் இரண்டு அடிகளால் தமிழுக்கு இலக்கணம் தந்தவா் சிவயோகியான சித்தா் என்று தமிழோடு அடையாளப் படுத்தப்படுகிறாா். அடுத்த இரண்டு அடிகளும் கடலைக் குடித்தவா், குடத்தில் பிறந்தவா் என வடமொழி சொல்லும் புராணங்களோடு தொடா்புப் படுத்தப்படுகிறாா். ஆக, பாரத தேசத்தை இணைக்கும் நம்பிக்கைகளுள் அகத்தியரின் வரலாறு முக்கியமானது.
• தமிழா்கள் கொண்டாடும் அகத்தியா், முதல் தமிழ்ச் சங்கத்தின் தலைவரான சிவபெருமானிடம் தமிழ் பயின்று தமிழ் இலக்கணம் தந்தவா். தமிழரின் அறிவுப் பொக்கிஷமான சித்த மருத்துவத்தைத் தந்தவரும் அவரே. அவா் இயற்றியதாக பதினான்கு நூல்கள் இருக்கின்றன. நூற்றுக்கும் மேற்பட்ட நூல்கள் அவா் பெயரால் தமிழில் கிடைக்கின்றன. அவற்றை அவரே இயற்றியிருப்பதாகவும், அவருக்குக் காணிகையாக்கும்படி பல அறிஞா்களும் எழுதி சமா்ப்பித்ததாகவும் இருவேறு நம்பிக்கைகள் உள்ளன. சித்த மருத்துவத்தில் அகத்தியா் தந்த அளப்பரிய பங்களிப்பு காரணமாகவே, பின்னா் வந்த அறிஞா்கள் தங்கள் ஆராய்ச்சியை அவருக்கு சமா்ப்பித்துள்ளனா்.
• அகத்தியா் நூல்கள் அனைத்தும் மருத்துவ அறிவியல் தொடா்பானவை. உடலியல் சாா்ந்த நூல்கள் மட்டுமின்றி, மனநோய்கள் மற்றும் அதற்கான மருத்துவம் பற்றி விளக்கும் நூல்களும் அகத்தியா் இயற்றியதாகக் கிடைக்கின்றன. ‘அகத்திய சம்ஹிதை’ என்னும் வடமொழி வைத்திய நூல் ஒன்றும் இருக்கிறது. அதுவும் அகத்தியா் இயற்றியதே. இதனால் மருத்துவம் சாா்ந்த ஆராய்ச்சியும் அவரது கண்டுபிடிப்புகளும் தமிழில் மட்டுமல்ல, சம்ஸ்க்ருதத்திலும் பதிவு செய்யப்பட்டிருக்கின்றன என்ற உண்மை புலப்படுகிறது. சித்தா்கள் பற்றிய பெருமிதம் தமிழ் மண்ணுக்கும் மக்களுக்கும் எந்நாளும் உண்டு.
• மெய்யுணா்வு, மெய்யியல் என தன்னையறிதல் பற்றிய ஞானம் கொண்டவா்கள் சித்தா்கள். அவா்களால் அனல் மேல் இருக்க முடியும், புனல் மேல் நடக்க முடியும், கூடு விட்டுக்கூடு பாய்வது என ஓா் உடலில் இருந்து இன்னொரு உடலுக்கு உயிரைச் செலுத்த முடியும் என மக்கள் மனங்களில் நம்பிக்கை இன்றைக்கும் இருக்கிறது. விஞ்ஞானத்தைத் தாண்டியதே மெய்ஞானம் என்ற புரிதல் தமிழா்களிடம் ஆழமாக இருப்பதற்கு சித்தா்களே முழுமுதல் காரணம். அத்தகைய சித்தா்களில் முதன்மையானவராக இருப்பவரும் அகத்தியரே. அகத்தியா் மலை, அகத்தியா் அருவி, அகத்தியா் கோயில், அகஸ்தீஸ்வரா் என இறைவனின் திருநாமம் என்று தமிழரின் ஆன்மிகத் தேடலின் பொருளாக இருப்பவரும் அகத்தியா்.
• தமிழ் மொழியோடு அகத்தியருக்கான தொடா்பும் பிரிக்கவியலாதது. அகத்தியம் தமிழின் முதல் இலக்கண நூல். அகத்தியரின் மாணவரான தொல்காப்பியா் இயற்றிய தொல்காப்பியம் இன்றைக்குத் தமிழின் பழம்பெரும் இலக்கண நூலாக விளங்குகிறது. தொல்காப்பியரோடு சோ்த்து அகத்தியருக்கு 12 மாணாக்கா்கள் இருந்ததாகவும் அவா்களுள் பெண்பால் புலவரான காக்கைப் பாடினியும் இருந்தாா் என்று புறப்பொருள் வெண்பாமாலை என்ற இலக்கண நூல் சொல்கிறது. அகத்தியரின் 12 சீடா்களும் செய்த நூலே பன்னிருபடலம் என்றும் அதில் குறிப்பிடப்பட்டுள்ளது. தொல்காப்பியன், அதங்கோட்டாசான், துராலிங்கன், செம்பூட்சேய், வையாபிகன், வாய்ப்பியன், பனம்பாரன், கழாரம்பன், அவிநயன், காக்கைபாடினி, நற்றத்தன், வாமணன் ஆகிய பன்னிருவா் அகத்தியரின் மாணாக்கா்கள் என்று பேரகத்தியத்திரட்டு என்னும் நூல் கூறுகிறது.
• தமிழகத்துக்கு காவிரி கிடைத்த வரலாற்றிலும் அகத்தியா் இடம்பெற்றிருக்கிறாா். தமிழ் மொழியில், சமயத்தில், ஞானத்தில் அகத்தியா் இப்படி இடம்பெற்றிருக்கிறாா் என்றால் சம்ஸ்க்ருதத்தில் அகஸ்தியா் என இவா் போற்றப்பட்டு வருகிறாா். வால்மீகி ராமாயணத்தில் அகஸ்தியா் ராமருக்குப் போரில் வெற்றி பெற சூரியனை வழிபடுமாறு கூறி, ‘ஆதித்ய ஹ்ருதயம்’ என்ற ஸ்லோகத்தை வழங்கியதாக இருக்கிறது. மந்திரபலம் கொண்ட ஆயுதங்களை ராமருக்கு வழங்கியதாகவும் வருகிறது. கம்பரின் ராமாயணத்திலும் அகத்தியா் போற்றப்படுகிறாா். ‘நீண்ட தமிழால் உலகை நேமியின் அளந்தான்’” (36) என்று கூறுகிறாா். ராமா் அகத்தியரின் பாதம் பணிந்து வணங்கினாா் என்று சொல்லுமிடத்து அகத்தியரின் பெருமைகளை சொல்ல வந்த கம்பா் அவரை, பெருமாள் தனது பாதங்களால் மூவுலகையும் அளந்ததைப் போல அகத்தியா் தமிழால் இந்த உலகத்தை அளந்தவா் என்று புகழ்கிறாா்.
• ராமாயணத்தைத் தாண்டி ரிக் வேதத்தில் அகத்தியரின் 26 ரிக்குகள் இடம்பெற்றுள்ளன. வேதம் தந்த ரிஷிகளுள் ஒருவராக அகஸ்தியா் இருக்கிறாா். அதோடு, அவா் வசிஷ்டரின் சகோதரரும் ஆவாா். சப்தரிஷிகள் என்றும் சப்தரிஷி மண்டலம் என்றும் கேள்விப்படாதவா்கள் இருக்க முடியாது. சப்தரிஷிகளுள் அகஸ்தியரும் ஒருவா். அகஸ்தியா் பற்றிய புராணச் செய்திகள் ஏராளம். அவா் கற்புக்கரசி என்று போற்றப்படும் லோபாமுத்ராவை மணந்தவா். அகஸ்தியரின் பொருட்டு லோபாமுத்ரா தனது கற்புத் திறத்தால் சூரியனை உதிக்காமல் நிறுத்தினாா் என்ற கதை, இன்றைக்கும் கிராமப்புறங்கள் வரை அனைவரும் அறிந்ததே.
• தமிழகத்தில் சித்தா் என்று போற்றப்பட்டால், பாரதத்தில் அவா் ரிஷி என அறியப்படுகிறாா். மருத்துவத்துறையில் அவா் பாரதம் முழுவதும் மருத்துவத்தைத் கண்டறிந்து தந்தவா் என்று ஒரே விதத்தில் போற்றப்படுகிறாா். புராணக் கதைகளில் சிவனோடும், ராமரோடும் தொடா்பு கொண்டவராக வருகிறாா். அதனைத் தமிழ் இலக்கியங்களும் வழிமொழிகின்றன. வடதிசையில் இருந்து தென்திசை வந்து இங்கேயே தங்கி விட்டவா் என்பதையும் வடமொழி, தமிழ் இரண்டும் ஒப்புக் கொள்கின்றன. ஆக, பாரத தேசத்தில் மொழி வேறுபாடுகள் இல்லாமல் அனைவரும் ஒன்றுபட்டு வாழ்ந்தனா் என்பதற்கு அகஸ்தியா் உதாரணமாக இருக்கிறாா். பாரதம், அதன் கலாசாரம், நம்பிக்கை இவற்றால் ஒன்றுபட்டே இருந்தது என்பதை இவரது வரலாறு மெய்ப்பிக்கிறது.
• தமிழுக்குப் பெருமை சோ்ப்பதாக நினைத்துக் கொண்டு அகத்தியரும், அகஸ்தியரும் வெவ்வேறானவா்கள் என்று கூறுவது அறியாமையின் வெளிப்பாடு. அகத்தியரின் வரலாறு லோபாமுத்ராவே அவரது மனைவி என்று தெளிவாகச் சுட்டுகிறது. கடலுக்குள் ஒளிந்து கொண்ட தாரகன் என்ற அரக்கனை வதம் செய்வதற்காக இந்திரன் முயன்றபோது அகத்தியா் இந்திரனின் வேண்டுகோளை ஏற்று கடல் நீா் முழுவதையும் குடித்து விடுகிறாா். இதனால் வெளிப்பட்ட தாருகன் முதலான அரக்கா்களை இந்திரன் அழிக்கிறான். பின்னா் மீண்டும் அகத்தியா், தான் குடித்த கடல்நீரை வெளியே விட்டு கடலை நிலைப்படுத்துகிறாா் என்று வடமொழிப் புராணம் கூறுகிறது.
• கம்பரும் இந்த நிகழ்வைப் பதிவு செய்கிறாா். ‘கடலெல்லாம் உண்டு, அவா்கள் பின்னா் உமிழ்க என்றலும் உமிழ்ந்தான்’ என்று அகத்தியா் கடல்நீா் முழுவதையும் குடித்த நிகழ்வைச் சொல்கிறாா். கம்பரைக் காட்டிலும் தமிழுக்கு சிறந்த பங்களிப்பைச் செய்தவா்கள் யாருண்டு? அவரது சொல் நமக்கு ஆதாரம் ஆகும். ஆக , அகத்தியா் இந்த தேசம் முழுவதற்கும் பொதுவானவா்.
• வடமொழியும் தமிழும் ஒன்றுக்கொன்று விரோதம் கொண்டவை; தென்னாடும் வடநாடும் வேறுபட்டவை என்பன போல வைக்கப்படும் கருத்துகள் அா்த்தமற்றவை. இரண்டும் நமக்குச் சொந்தமானவையே என்பது அகத்தியா் வரலாற்றால் நாம் உணர வேண்டியதாகும். தமிழுக்கு உயிா் தந்த அகத்தியா் இந்த மண்ணின் தேசிய சிந்தனைக்கும் உயிரூட்டுகிறாா்.
• தொன்மையும் மேன்மையும் கொண்ட தமிழ்மொழி பாதுகாக்கப்பட வேண்டும்; மேன்மேலும் வளர வேண்டும் என்று தமிழா்கள் விரும்பினால் நமது மொழியின் வரலாற்றை அதனை நிலைநிறுத்தியிருக்கும் மகான்களின் ஒப்பற்ற பணிகளை தெரிந்து வைத்துக் கொள்ள வேண்டும்.
• உணா்ச்சிவயப்படுதல் மட்டுமே மொழியைக் காத்துவிடாது. மொழி வாழும் காலம் வரையே அந்த இனமும் வாழும். ஆகவே தமிழ் மொழியை நாம் முழுமையாகப் பிழையறக் கற்க வேண்டும். நமது மொழியில் நிரம்பிக் கிடக்கும் முன்னோா்களின் அறிவியல் அறிவினைப் பாதுகாக்க வேண்டும். அதனை உலகுக்கு எடுத்துச் சொல்ல வேண்டும். அதற்குக் காழ்ப்புணா்வற்ற விசாலமான பாா்வை வேண்டும். நம் முன்னோா்கள் கொண்டிருந்த பரந்த மனப்பான்மையை, மொழியறிவை மெய்யுணா்வை நோக்கி நகா்வதே அதற்கான சிறந்த ஒரே வழி.

நன்றி: தினமணி (28 – 01 – 2025)