ஆனந்தரங்கப்பிள்ளை நாட்குறிப்பில்... 279 ஆண்டுகளுக்கு முந்தைய புதுச்சேரி புயல்!

ஆனந்தரங்கப்பிள்ளை நாட்குறிப்பில்... 279 ஆண்டுகளுக்கு முந்தைய புதுச்சேரி புயல்!

• புயல், புதுச்சேரிக்குப் புதிதல்ல. கடந்த காலங்களில் தானே, வர்தா, கஜா எனப் பல புயல்களைச் சந்தித்துள்ளது புதுச்சேரி. குறிப்பாக, 1916 நவம்பரில் வீசிய புயற்காற்று குறித்து பாரதி எழுதிய ‘புயற்காற்று’, ‘பிழைத்த தென்னந்தோப்பு’, ‘மழை’ ஆகிய கவிதைகள் குறிப்பிடத்தகுந்தவை. மேலும், 279 ஆண்டு​களுக்கு முன்பு வீசிய புயற்​காற்று புதுச்​சேரியைப் புரட்டிப் போட்டிருக்கிறது.
• இது பற்றித் தனது நாட்குறிப்​பில், பத்திரி​கை​யாளர் போன்று வர்ணனை​யுடன் பதிவு செய்திருக்​கிறார் ஆனந்தரங்​கப்​பிள்ளை: “1745 நவம்பர் 4 அற்பிசி 21 வியாழக்​கிழமை, அஸ்தமித்​தவுடனே துவக்கி, பெருங்​காற்​றடித்தது. அந்தக் காற்று வியாழக்​கிழமை நாள் ராத்திரி முப்பது நாழிகையும் அடித்தது. ஆனால், இந்தக் காற்றினுடைய பிரதாபம் இன்னமட்​டென்று ஒருவிதமாய்ச் சொல்லக்​கூ​டாது.
• அதெப்படி யென்றால், இந்த முப்பது நாழிகைக்​குள்ளே பட்டணத்திலே ஒரு மரமாகிலும் தப்பவி​டாமல் ஊரிலே உண்டான மரங்களெல்லாம் படுகாடாய் விழுந்​து​போனதும், சிறிது மரங்களை முறித்துப் போட்டதும், அதுவுமல்​லாமல் பட்டணத்​துக்​குள்ளே தோட்டந் துரவுகள், தென்னை மரம், மா மரங்கள் எப்பேர்ப்பட்ட மரமும் ஒன்றாகிலும் தப்பாமல் படுகாடாய் விழுந்து போச்சுது. அதினாலே வெகுபேர் கெட்டுப்​போ​னார்கள்.
• இதல்லாமல் உப்பாற்றிலே அவரவருக்கு மனைவிட்டு, அவரவர்கள் கல்வீடும் கூரைவீடுமாய் அவரவர் சக்திக்கான சரமாய்க் கட்டிக்​கொண்டு குடியிருந்​தார்கள். அப்படி​யிருக்கச்சே இந்தப் பெருங்​காற்றிலே மேல்வெள்ளம் வந்து உப்பாற்றுத் தண்ணீர் வெளியே போகத்​தக்​க​தாய்க் கட்டி​யிருந்த மதகு மூடியிருக்​கச்சே அந்த மதகைப் பிடுங்​கிக்​கொண்டு அந்த வெள்ளம் ஓடிட்று.
• அந்த வெள்ளத்திலே வீடுகள் வந்து விழுந்து உப்பாற்றிலே கட்டி​யிருந்த வீடுகள் பேரிலே ஒருமுழ வெள்ளம் வந்து விழுந்து அங்கே கட்டி​யிருந்த மூன்று தெருவும் படுகாடாய் விழுந்​து போய் வீடுகள் வெள்ளத்திலே முழுகிப்போய் அந்த வெள்ளத்திலே வீடுகளை அடித்துப் போனதும், மாடுகள் கன்றுகள் செத்ததும், மனுஷர் செத்ததும் இப்படியாக வெகு சேதப்​பட்டு அந்த வெள்ளம் இப்படி பட்டணத்து மேலே திரும்​பினபடி​யினாலே பள்ளத்துத் தெருக்​களி​லேயெல்லாம் அரை மட்டும் தண்ணியும் பெருந்துடை மட்டும் தண்ணியும் நின்றபடி​யினாலே பள்ளத்​தாக்கிலே யிருந்த வீடுகளெல்லாம் அநேகமாய் விழுந்து போச்சுது.
• இதல்லாமல் இந்தக் காற்றிலே காக்காய், குருவிகள், பின்னை​யுமிருக்​கப்பட்ட தோட்டந் துரவுகள் சகலமும் அடியோடே விழுந்து போய்விட்டது. வீடு வாசல்​களும் அநேகஞ் சேதம். இதல்லாமல் அவரவரது வெளியிலே​யிருக்​கப்பட்ட ஆடுமாடுகள் ஒன்றாகிலும் தப்பிப்​பிழைப்பதற் கிடமில்​லாமல் தரந்தரமாய் உளைந்து போச்சுது.‌
• அந்தச் செத்த ஆடுகளைப் பட்டணத்​துக்​குள்ளே அவரவர் வாங்கி வந்து வீடுகளிலே காயப்​போட்ட படியினாலே அதுகள் காய்கிறதுக்கு இடமில்​லாமல் மழையிலே நனைந்து பட்டணமெல்லாம் தெருவுக்குத் தெரு பிண நாற்றமாய் இரண்டு மூன்று நாள் மட்டுக்கும் வீதியிலே புறப்​படக்​கூ​டாமல் இப்படி அவஸ்தைப்​பட்டுப் போச்சுது.
• ஆனால், திருவுள எத்தனத்தாலே பொழுது விடிந்​தவுடனே காற்றும் மழையும் நின்று​போனபடி​யினாலே ஒரு சாமத்​துக்​குள்ளே எல்லா தண்ணீரும் வாங்கிப்போய் அவரவர் வீடு வாசலும் தப்பித்​ததல்​லாமல் மறுநாளைக்கும் அப்படிக் காற்று அடித்​ததால் பட்டணத்திலே ஒரு வீடாகிலும் தப்ப ​மாட்​டாது... சுவாமி ​காத்​தார்​.”

நன்றி: இந்து தமிழ் திசை (05 – 12 – 2024)