காமிக்ஸ் உலகத்துக்குள் உலா

காமிக்ஸ் உலகத்துக்குள் உலா

• தனியார் தொலைக்​காட்​சிகள், ஸ்மார்ட்​போன்கள் இல்லாத காலக்கட்​டத்தில் அந்த இடத்தில் இருந்தவை காமிக்ஸ் நாவல்களே. வாசிப்புப் படிக்​கட்டில் ‘இரும்​புக்கை மாயாவி’யைக் கடக்காத ஒரு தலைமுறை இருக்கவே முடியாது. காலமாற்​றத்தால் தொலைந்​து போன அந்த காமிக்ஸ்​களைத் தேடி ஆராய்ந்​து​வருபவர் கிங் விஸ்வா. 10 ஆயிரம் காமிக்ஸ் (சிறார் இலக்கியம் உள்பட) நூல்களைத் தேடிச் சேகரித்​துள்ளார். காமிக்ஸ் உலகம் பற்றிய அவரது 5 நூல்கள் இந்தப் புத்தகக் காட்சியை ஒட்டி யாவரும் பதிப்பகம் (அரங்கு எண்: 15, 16) வெளியிட்​டுள்ளது.
• ஜப்பானின் மங்கா காமிக்ஸ் பற்றிய விஸ்வாவின் ‘ஜப்பானிய மங்கா காமிக்ஸ் - அறிமுகமும் ஆளுமை​களும்’ நூல் உலக அளவில் மங்கா காமிக்ஸ் அதிகமாகப் படிக்​கப்​படு​வதற்கான காரணத்தை விளக்குகிறது. மங்கா காமிக்ஸ் நாம் படிக்கும் முறைக்கு நேரெதிராக வடிவமைக்​கப்​படு​கிறது. வாசிப்பில் அது ஏற்படுத்தும் சூட்சுமத்​தை நூல் திறந்து காட்டு​கிறது.
• சிறந்த மங்கா காமிக்ஸ்​களையும் விஸ்வா இந்த நூலில் அறிமுகப்​படுத்​தி​யுள்​ளார். 18 ஆண்டுகளாக தமிழ் காமிக்ஸ் கலையை ஆவணப்​படுத்து​வதற்காக இவர் மேற்கொண்ட முயற்சியை ‘சித்திரமும் சரித்​திர​மும்’ என்கிற நூலில் விஸ்வா ஆவணப்படுத்​தி​யுள்​ளார். காமிக்ஸ் நாவல், கிராஃபிக் நாவல் ஆகிய இருவகையின் வேறுபாடுகள் பற்றி ‘கிராஃபிக் நாவல் - அறிந்​து​கொள்ள வேண்டிய ஆளுமைகள்’ என்கிற நூலில் விஸ்வா விவரித்​துள்ளார்.
• கிராஃபிக் நாவல்களை அணுகு​வதற்கான வழிமுறைகள் இதில் விளக்​கப்​பட்​டுள்ளன. கிராஃபிக் நாவல் ஆளுமை​களின் பின்னணிகளை விவரிப்பதன் வழி கிராஃபிக் நாவல்​களுக்கான திறப்பை விஸ்வா இந்த நூல் வழி காண்பிக்​கிறார். வெளிநாட்டு கிராஃபிக் நாவல்களே கொண்டாடப்​படும் சூழலில், இந்திய கிராஃபிக்ஸ் நாவல்கள் பற்றிய அறிமுகத்தை ‘தலைசிறந்த இந்திய கிராஃபிக் நாவல்கள்’ நூல் நமக்கு அளிக்​கிறது. நர்மதை ஆற்றின் குறுக்கே அணை கட்டப்​படுவதை ஒட்டி ஒரிஜித் சிங் எழுதிய ‘எ ரிவர் ஆஃப் ஸ்டோரீஸ்’ (A River of Stories) நூலை இந்தியாவின் முதல் கிராபிக் நாவல் என விஸ்வா இந்த நூல் வழி முன்னிறுத்து​கிறார்.
• இத்துடன் கடந்த பத்தாண்​டு​களில் வெளியான சிறந்த 25 கிராஃபிக் நாவல்களை இந்த நூல் அறிமுகப்​படுத்​திவைக்​கிறது. உலக அளவில் பிரசித்திபெற்ற பதினேழு கிராஃபிக் நாவல்​களைப் பற்றி ‘தலைசிறந்த கிராஃபிக் நாவல்கள்’ நூல் எடுத்​தி​யம்​பு​கிறது. இவற்றில் பெரும்​பாலானவை சமகால கிராஃபிக் நாவல்கள் என்பது குறிப்​பிடத்​தக்கது. ஒவ்வொரு படமும் உருவான பின்னணி​யுடன் சுவாரசி​ய​மாகச் சொல்​லப்​பட்​டுள்ளது.

நன்றி: இந்து தமிழ் திசை (30 – 12 – 2024)