சடலத்தோடு புதைக்கப்பட்ட உண்மைகள் - ருடால்ஃப் ஹெஸ்

சடலத்தோடு புதைக்கப்பட்ட உண்மைகள் - ருடால்ஃப் ஹெஸ்

• ஹாமில்டனும் கிர்க் பட்றிக்கும் ஹெஸ் அனுமதிக்கப்பட்டிருந்த மருத்துவமனைக்குச் சென்று அவரைச் சந்தித்துப் பேசினார்கள். அந்த ஜெர்மானியர் ஹெஸ்தான் என்று மேலிடத்துக்குத் தகவல் கொடுத்தார் கிர்க் பட்றிக்.
• கிர்க் பட்றிக்கும் ருடால்ஃப் ஹெஸ்ஸும் அடுத்தடுத்துச் சந்தித்துப் பேசினர். “போரினால் என்ன லாபம் சொல்லுங்கள்? பல்லாயிரக்கணக்கான உயிர்கள் பலியாவதையும், எளிதில் சீரமைக்கப்பட முடியாத அழிவுகளையும் தவிர்த்து வேறென்ன காணப்போகிறோம்? நான் இங்கே வந்திருப்பது ஹிட்லருக்குத் தெரியாது. தன்னிச்சையாகத்தான் வந்தேன். போரில் வெல்வதென்பது உங்களுக்குச் சாத்தியமே இல்லையென்ற நிலையில், சமாதானமாகப் போவதுதான் புத்திசாலித்தனமென்று அறிவுறுத்த வந்தேன். தவிர, ஹிட்லருக்கும் எனக்குமான நட்பு மிக நெருக்கமானது. ஏறக்குறைய பதினெட்டு ஆண்டுகளாக அவரோடு பழக்கம். அவருக்கு உண்மையில் இங்கிலாந்து மீது எவ்விதத் தப்பான எண்ணமுமில்லை.
• பலரும் நினைப்பதைப் போல உலகம் அனைத்தையும் ஜெர்மனுக்குக் கீழ் கொண்டுவர வேண்டுமென்கிற எண்ணமெல்லாம் எங்களுக்கில்லை. எங்கள் ஆர்வமனைத்தும் ஜெர்மன் மற்றும் ஐரோப்பாவின் நலன்களன்றி வேறு கனவுகளில்லை. குறிப்பாக, நாளை பிரிட்டிஷ் முடியாட்சிக்கு வீழ்ச்சியெனில் முதலில் வருந்துவது அவராகத்தானிருக்கும்” என்றவர், இதோடு நிறுத்தி இருந்தால் பரவாயில்லை.
• “இந்த விஷயத்தில் சுமுகமான தீர்வு கிடைக்க வேண்டுமெனில், ஒரு புதிய அரசாங்கமும் தலைவர்களும் வேண்டும். உங்களின் இப்போதையை அரசாங்கம் கூடாது. சர்ச்சிலும் அவரது நண்பர்களும் 1936லிருந்தே ஜெர்மனுக்கும் இங்கிலாந்துக்கும் இடையேயுள்ள அவ்வளவு சிக்கல்களுக்கும் காரணமாக இருப்பவர்கள். யுத்தத் தீர்வை முன்வைத்துக் காய் நகர்த்தியவர்கள். அவர்களுடன் பேச்சுவார்த்தை நடத்த நண்பர் ஹிட்லர் ஒருபோதும் சம்மதிக்க மாட்டார்” என்று சொன்னவர், அதோடும் விடவில்லை.

ஹெஸ்ஸின் எதிர்பார்ப்பு:

• தமது தகுதியின் அடிப்படையில் சில மரியாதைகளை எதிர்பார்க்கத் தொடங்கினார் ஹெஸ். கிர்க் பட்றிக் ஓர் அதிகாரி என்பதைத் தவிர வேறு தகுதிகளில்லாதவர். மாறாக, தான் ஜெர்மன் அதிபருக்கு நண்பர் மட்டுமல்ல, அரசாங்கத்தில் மூன்றாவது இடம் வகிப்பவன். அதற்குரிய மரியாதையை ஆங்கிலேயர்கள் கொடுக்கவில்லை.
• தனது தகுதிக்கு பிரிட்டன் மன்னரைச் சந்திக்க ஏற்பாடு செய்திருக்க வேண்டும். சாத்தியமில்லையெனில் குறைந்த பட்சம் ஓர் அமைச்சரையாவது கண்ணில் காட்டியிருக்கலாம். மாறாகக் கண்டவர்களையும் தன்னிடம் அனுப்பி வைத்து முட்டாள்தனமான கேள்விகளுக்குப் பதில் சொல்ல வேண்டுமென்று நினைக்கிறார்கள். இப்படி யோசித்துப் பார்க்கவும் எரிச்சலுற்றார் ஹெஸ்.
• அந்த எரிச்சலில் தனக்கு மொழிபெயர்ப்பாளர்கள் வேண்டுமென்றார். சட்ட ஆலோசகர்கள் உதவியும், காரியதரிசிகளின் சேவையும் தனக்குத் தேவைப்படுவதால் அதற்கு ஏற்பாடு செய்யுங்களென்று அதிகாரமாகக் கேட்டார். மேலிடத்தில் பேசுகிறேன் என்று கிர்க் பட்றிக் விடைபெற்றார்.
• அதற்குச் சில நாள்கள் கழித்து ஜெர்மன் ரேடியோவில் வந்த ஒரு முக்கிய அறிவிப்பு ஜெர்மானியர்களைத் திகைப்பில் ஆழ்த்தியது. ‘தேசிய சோஷலிஸ்டு கட்சி அதிகாரப்பூர்வமாக வெளியிடும் செய்தி. நண்பர் ருடால்ஃப் ஹெஸ் கடந்த சில வருடங்களாகவே இனம் காணவியலாத நோயொன்றினால் பாதிக்கப்பட்டிருந்தார். எனவே, அவர் வானில் பறப்பது முறைப்படி தடை செய்யப்பட்டிருந்தது. இத்தடையை மீறிய வகையில் ஒரு யுத்த விமானத்தைக் கையகப்படுத்தியுள்ளதாக அறிகிறோம்.
• ருடால்ஃப் ஹெஸ், ஆக்ஸ்பூர்க் யுத்த விமானதளத்திலிருந்து மே மாதம் பத்தாம் தேதி சனிக்கிழமையன்று புறப்பட்டுப் போனவர் திரும்பவில்லை. போனவர் ஒரு கடிதத்தை விட்டுச் சென்றிருக்கிறார். அக்கடிதத்திலிருந்து அவர் மனநிலை பாதிக்கப்பட்டிருக்கிறார் என்பது உறுதிப்படுகிறது.’ - தமது நெருங்கிய நண்பர் ஹெஸ்ஸின் திடீர்ப் பயணத்தை உலகுக்கு ஹிட்லர் இப்படித்தான் அறிவித்திருந்தார். ஆனால், இங்கிலாந்து அரசாங்கமும் ஜெர்மன் அரசாங்கமும் ஹெஸ் உடல்நிலை குறித்த அறிக்கையில் முரண்பட்டிருந்தன.

மாறுபட்ட முடிவுகள்:

• அமெரிக்க அதிபர் ரூஸ்வெல்ட்டிற்கு, பிரிட்டிஷ் பிரதமர் சர்ச்சில் 1941ஆம் ஆண்டு மே 17ஆம் தேதி அனுப்பிய தந்தியில், ருடால்ஃப் ஹெஸ்ஸிடம் நடத்திய விசாரணை குறித்த முழு விவரங்களையும் தெரிவித்திருந்தார். அதில், ஹெஸ் நல்ல ஆரோக்கியத்துடன் இருந்ததாகவும் மனநிலை பாதிக்கப்பட்டதன் அறிகுறி அவரிடம் சுத்தமாக இல்லையென்றும் தெரிவித்திருந்தார்.
• இதற்கிடையில், ஹெஸ்ஸை ஒரு மாளிகையில் சிறை வைத்தார்கள். ஹெஸ்ஸுடன் பேச்சு நடத்த சர்ச்சிலுக்கு உடன்பாடில்லை. தாம் இணங்கினால் சர்ச்சில், ஜெர்மனுடன் சமாதானம் பேச, குறுக்கு வழியில் இறங்கினாரென அரசியல் விமர்சகர்கள் எழுதுவார்களென்று தவிர்த்தார். ஹெஸ்ஸை அடுத்தடுத்த அமைச்சர்கள் சந்திக்கின்றனர். ஆனால், இந்தச் சந்திப்பு படு ரகசியமாக வைக்கப்படுகிறது.
• ஹிட்லரின் நண்பரும் ரெய்ஷ் அரசாங்கத்தின் தலைவர்களுள் மூன்றாவது இடத்தை வகித்திருந்தவருமான ஹெஸ், பிரிட்டனுக்குள் பிரவேசித்து, நான்கு மாதங்கள் கழிந்திருந்தன. இருபத்து நான்கு மணிநேரமும் மனநல மருத்துவர்களின் கண்காணிப்பின்கீழ் வைக்கப்பட்டார். தனது பயணம் தான் எதிர்பார்த்த பலனைத் தரவில்லை என்பதில் ஹெஸ்ஸுக்கு மிகவும் வருத்தம். இந்த வருத்தத்துடன் பிரிட்டிஷ் அரசாங்கம் நடத்திய விதமும் அவரை எரிச்சல் கொள்ளச் செய்தது. தமது கோபத்தைச் சந்தர்ப்பம் வாய்க்கிற போதெல்லாம் வெளிப்படுத்தினார்.

சர்ச்சிலின் சந்தேகம்:

• பிரிட்டிஷ் யூதர்கள், அவரைக் கொல்லத் திட்டமிட்டிருக்கிறார்கள் என்று கூறி, வழங்கப்பட்ட உணவையும் பானங்களையும்கூடப் பிடிவாதமாக மறுத்தார். தமது நாட்டு எல்லைக்குள் ஹெஸ் திடீரென்று பிரவேசித்தது குறித்துப் பலரும் சந்தேகித்தது போலவே, இங்கிலாந்து பிரதமர் சர்ச்சிலுக்கும் சந்தேகம் இருந்தது. இந்தச் சமாதான யோசனை, ஹெஸ்ஸின் சொந்த யோசனையா அல்லது ஹிட்லரின் யோசனையின் பேரில் நமது எல்லைக்குள் பிரவேசித்துவிட்டு இவர் நாடகமாடுகிறாரா என்கிற சந்தேகம் இருந்தது.
• அதனால், ஹெஸ்ஸிடம் தெளிவாகச் சொல்லி விட்டார்கள். “இதுவரை உங்களோடு நடத்தியதெல்லாம் நாடகம். நீங்கள் சொன்னதை எல்லாம் நம்பி, உங்களோடு பேச்சுவார்த்தையெல்லாம் நடத்த முடியாது. எங்களைப் பொறுத்தவரை நீங்கள் ஒரு யுத்தக் கைதி, அவ்வளவு தான்.”
• இப்படியொரு முடிவைத் தனது திட்டம் சந்திக்குமென்பதை ஹெஸ் எதிர்பார்க்கவில்லை. இதனால், அவரது மனநிலையில் மாற்றம் நிகழ்கிறது. அவரைப் பரிசோதித்த மருத்துவர்கள் அவர் மன உளைச்சலில் இருப்பதை உறுதிசெய்கிறார்கள். தற்கொலைக்கு ஒருமுறை ஹெஸ் முயற்சி செய்ய, தக்க சமயத்தில் காப்பாற்றப்படுகிறார். பிடிபட்ட நாஜி குற்றவாளிகளில் அவரும் ஒருவராகக் குற்றவாளிக் கூண்டில் ஏற்றப்பட்டார். மறதி நோயில் அவதிப்படுவதாகவும், நடந்தது எதுவும் தனக்கு ஞாபகத்தில் இல்லையெனவும் சாதித்தார். அவருடைய முன்னாள் நண்பர்கள் பலருக்கும் மரணத் தண்டனை விதிக்கப்பட்ட போதும், இவர் சுலபமாகத் தப்ப முடிந்தது. எனினும், நீதிபதிகள் அவருக்கு ஆயுள்தண்டனை விதித்துத் தீர்ப்பெழுதினார்கள்.

பெர்லின் சிறைவாசம்:

• மரண தண்டனை விதிக்கப்பட்டவர்களைத் தவிர்த்து மற்றவர்கள், பெர்லினுக்கு அருகிலுள்ள ஸ்பாண்டௌ சிறையில் அடைக்கப்பட்டனர். 1947ஆம் ஆண்டு அவர்களின் எண்ணிக்கை 9ஆக இருந்தது. ஒருவர் பின் ஒருவராக அனைவரும் விடுதலை பெற்றனர். மீதி இருந்தவர் ஹெஸ் மட்டுமே. அவர் மிகவும் நேசித்த மனைவியையும் மகனையும்கூடப் பார்க்க மறுத்தார். “அவர்களைச் சந்திக்க நேர்ந்தால் உடைந்து போவேன். நான் ஓர் அசாதாரண பிறவி. எனவே, பார்க்க விருப்பமில்லை” என்று காரணம் சொன்னார்.

கல்லறை இடிப்பு:

• சிறையில் அடைக்கப்பட்டு 30 ஆண்டுகள் கழித்து, 1987ஆம் ஆண்டு ஆகஸ்டு மாதம் 17ஆம் தேதி தற்கொலை செய்துகொண்டார் ருடால்ஃப் ஹெஸ். இறக்கும்போது அவருக்கு வயது 93. இரண்டாம் உலகப்போரை நிறுத்துவதற்காகத் தனி நபராக யுத்த விமானத்தில் இங்கிலாந்திற்குச் சென்ற ருடால்ஃப் ஹெஸ், தன் முயற்சியில் வெற்றியடையாமல் சிறையிலேயே அனாதையாக இறந்துபோனார்.
• ஜெர்மனியின் தெற்கு மாநிலமான பவாரியாவில் உள்ள ஷன்செடல் கிறிஸ்தவ ஆலயக் கல்லறையில் அவரது உடல் புதைக்கப்பட்டது. அவர் இறந்து 24 ஆண்டுகள் கழித்து, மீண்டும் ஒரு பிரச்சினை கிளம்பியது. ருடால்ஃப் ஹெஸ் புதைக்கப்பட கல்லறை இடத்தின் குத்தகைக் காலம் முடிந்துவிட்டதால், குத்தகையை மீண்டும் புதுப்பிக்க ருடால்ஃப் ஹெஸ் குடும்பத்தினர் விரும்பினர். ஆனால், ஷன்செடல் கிறிஸ்தவ ஆலய நிர்வாகம், ருடால்ஃப் ஹெஸ்ஸின் கல்லறை இடக் குத்தகையை நீட்டிக்க விரும்பாமல், கல்லறையை இடித்துவிட முடிவு செய்தது.
• கல்லறையை இடிக்க, ஹெஸ் குடும்பத்தினர் முதலில் எதிர்ப்புத் தெரிவித்தனர். பிறகு, கல்லறையை இடிக்க ஒப்புக்கொண்டனர். ஹெஸ் புதைக்கப்பட்ட 24 ஆண்டுகளுக்கு பின்னர், அவரது கல்லறை இடிக்கப்பட்டு, அவரது உடல் எரிக்கப்பட்டு, சாம்பல் கடலில் கரைக்கப்பட்டது.

தற்கொலையா, கொலையா?:

• அவரது இறப்பு தற்கொலையெனச் சொல்லப்பட்டாலும், அவருடைய மகன் Wolf Rudiger Hess இதனை ஒரு திட்டமிட்ட கொலை என்றார். “பிரிட்டிஷ் ராணுவத்தைச் சேர்ந்த SAS (Special Air Service) அல்லது அமெரிக்காவின் சிஐஏ ஆகியோரால்தான் என் தந்தையின் உயிருக்கு ஆபத்து ஏற்பட்டது” என்று அவரது மகன் குற்றம் சாட்டினார்.
• ஹெஸ் சிறையிலிருந்தபோது 1984ஆம் ஆண்டிலிருந்து 1987 வரை அவருடைய மருத்துவப் பராமரிப்புகளைக் கவனித்துவந்த அப்துல்லா மெலவி என்கிற துனீசியர் எழுதிய ‘I looked into the Murderer’s Eyes’ என்கிற நூலில், ‘ஹெஸ்ஸின் மரணத்துக்கு பிரிட்டிஷ் அரசாங்கத்தின் M16 என்கிற உளவுப்படைதான் காரணம்’ என்றார்.
• The Murder of Rudolf Hess (1979) என்கிற நூலை எழுதிய Dr. Hugh Thomas, ஹெஸ் என்கிற பெயரில் சிறையில் தண்டனை அனுபவித்து இறந்துபோன நபர் போலியானவர் என்றும் அசலான மனிதரை எப்போதோ கொன்றுவிட்டார்களென்றும் சத்தியம் செய்கிறார்.
• இந்தச் சமாதான முயற்சியின் பின்னால் ஹிட்லர் இருந்தாரா இல்லையா? ஹெஸ் எனக் கூறப்பட்டு நூரெம்பர்க் சிறையில் அடைக்கப்பட்டவர் அசலா போலியா? அவர் இறப்பு தற்கொலையா? கொலையா? எல்லாமே மர்மமாக இருக்கின்றன.
• இரண்டாம் உலகப்போரின் போது புதைக்கப்பட்ட அடையாளம் தெரியாத ஏராளமானவர்களைப் போல இந்த உண்மைகளும் புதைக்கப்பட்டுவிட்டன.

நன்றி: இந்து தமிழ் திசை (29 – 01 – 2025)