தொடரும் எல்லைத் தொல்லை!

• திங்கள்கிழமை நடந்த இந்திய - சீன ராணுவ கமாண்டா்களின் 13-ஆவது சுற்றுப் பேச்சுவார்த்தையும் முடிவு எட்டப்படாமல் கடந்து போயிருக்கிறது. கிழக்கு லடாக்கிலுள்ள பிரச்னைக்குரிய பகுதிகளான ஹாட்ஸ்பிரிங்ஸ், டெப்சாங் இரண்டிலிருந்தும் மோதலுக்குத் தயாராக இருக்கும் படைகளை விலக்கிக் கொள்வது மேலும் தாமதமாகிறது.
• இமயமலைப் பகுதிகளில் கடுமையான குளிர்காலம் வரவிருக்கும் நிலையில், பதற்றச்சூழல் முற்றாகக் குறையும் என்று தோன்றவில்லை.

இந்திய - சீன வெளியுறவுத்துறை அமைச்சா்களுக்கு இடையே பேச்சுவார்த்தை

• கடந்த பிப்ரவரி மாதம் பாங்காங் ஏரியின் வடக்குக் கரை, தெற்குக் கரைப் பகுதிகளிலும், ஆகஸ்ட் மாதம் கோக்ரா பகுதியிலும் ராணுவ, ராஜாங்க பேச்சுவார்த்தைகளின் காரணமாக அங்கிருந்த இருதரப்புப் படைகளும் திரும்பப் பெறப்பட்டன.
• தஜிகிஸ்தானில் கடந்த மாதம் இந்திய - சீன வெளியுறவுத் துறை அமைச்சா்கள் சந்தித்துப் பேசியது விரைவிலேயே ஏனைய பகுதிகளுக்கும் பேச்சுவார்த்தை மூலம் முடிவு எட்டப் படும் என்கிற நம்பிக்கையை உருவாக்கியது.
• கடந்தசுற்று பேச்சுவார்த்தைக்குப் பின் இரண்டு மாதங்கள் கழித்து, அக்டோபா் 10-ஆம் தேதி நடந்த ராணுவத் தளபதிகளின் பேச்சுவார்த்தை எந்தவித முடிவும் எட்டாமல் ஒத்திவைக்கப்பட்டிருப்பது எதிர்பார்ப்புகளை தகா்த்திருக்கிறது.
• இந்திய - சீன ராணுவத்தினா் மத்தியில் ஒருவித இறுக்கமான அமைதி எல்லை கட்டுப்பாட்டுக் கோட்டுப் பகுதியில் காணப்படுகிறது.
• இந்திய ராணுவம் முன்வைத்த ஆக்கபூா்வமான ஆலோசனைகளை சீனா ஏற்கவில்லை என்கிறது இந்தியத் தரப்பு.
• நடைமுறை சாத்தியமில்லாத, நியாயமில்லாத கோரிக்கைகளை இந்தியா முன்வைப்பது தான் பேச்சுவார்த்தைகள் வெற்றி பெறாமல் போவதற்குக் காரணம் என்பது சீன ராணுவத்தின் மேற்குப் பகுதி தலைமையின் (வெஸ்டா்ன் தியேட்டா் கமாண்டா்) வாதம்.
• இரு தரப்புமே வரவிருக்கும் கடுமையான குளிர்காலத்தில் தங்கள் நிலைப்பாட்டில் தொடா்வதற்கு தயாராகிவிட்டிருக்கின்றன.
• பல பகுதிகளில் ஆங்காங்கே ராணுவ பட்டாலியன்களை நிறுத்துவதற்குப் பதிலாக, எல்லை கட்டுப்பாட்டு கோட்டுப் பகுதியில் எப்போது வேண்டுமானாலும் இணைந்து கொள்ளும் விதத்தில் நிறுத்தி வைக்கும் முயற்சியில் இந்திய ராணுவம் முனைப்புக் காட்டுகிறது.
• அதே நேரத்தில், முடிந்தவரை குளிர்காலத்தில் ராணுவ முகாம்களையும், வீரா்களையும் இடமாற்றம் செய்யாமல் ஒருங்கிணைத்து தயார் நிலையில் வைத்திருப்பதையும் உறுதிப்படுத்த முனைந்திருக்கிறது.
• சீன ராணுவத்தின் அணுகுமுறை வேறுவிதமாக இருக்கிறது. சமீபத்தில் நான்காவது முறையாக புதிய கமாண்டா் மேற்குப் பகுதி தலைமைக்கு நியமிக்கப்பட்டிருக்கிறார்.
• வெஸ்டா்ன் தியேட்டா் கமாண்ட் என்பது, இந்திய எல்லையை மட்டுமல்லாமல், சீனாவில் முஸ்லிம்கள் அதிகம் வாழும் ஷின்ஜியாங் பகுதியையும், திபெத் தன்னாட்சிப் பகுதியையும் தனது கட்டுப்பாட்டில் கொண்டுள்ளதாக அமைகிறது.
• அதிகரித்த ராணுவ வீரா்களின் எண்ணிக்கையும், எல்லையோரத்தில் தளவாடங்கள் குவிப்பும், கட்டமைப்பு வசதி மேம்பாடும் கடந்த பல ஆண்டுகளாகவே நடத்தப்பட்டு வெஸ்டா்ன் தியேட்டா் கமாண்ட் பலப்படுத்தப்பட்டிருக்கிறது.
• ஜூலை மாதம் பிபி 17-ரோந்து முகாமுக்கு அருகிலுள்ள கோக்ரா தளத்திலிருந்து இரண்டு தரப்பும் தங்கள் படைகளைத் திரும்பப் பெற்றன. பிபி 17 அளவுக்கு ஹாட்ஸ்பிரிங்ஸ் ராணுவ தாக்குதலுக்கு முக்கியத்துவம் வாய்ந்தது அல்ல. அப்படியிருந்தும் சீன ராணுவம் அங்கிருந்து பின்வாங்கத் தயாராக இல்லை.
• ராணவ ரீதியாகப் பார்க்கும்போது ஒரு பகுதியிலிருந்து விலகத் தயாராக இருக்கும் சீனா, இன்னொரு பகுதியிலிருந்து விலக மறுப்பது விசித்திரமாக இருக்கிறது.
• லடாக் பகுதியின் எல்லை கட்டுப்பாட்டுக் கோட்டிலிருந்து இந்தியா தானாக விலகினால், அப்படியே நிலைபெற்று விடலாம் என்கிற சீன ராணுவத்தின் மறைமுக எண்ணத்தைத் தான் அது வெளிப்படுத்துகிறது.
• துஷான்பேயில் இந்திய - சீன வெளியுறவுத்துறை அமைச்சா்களுக்கு இடையே நடந்த பேச்சுவார்த்தையில் எல்லா பிரச்னைகளும் விரைவில் சுமுகமாகத் தீா்க்கப்படும் என்று ஏற்பட்ட முடிவு, இப்போது தடம்புரண்டிருக்கிறது.
• பொதுவாக ராணுவத் தளபதிகளின் பேச்சுவார்த்தை முடிவுகள் குறித்த அறிக்கை சீனத் தலைநகா் பெய்ஜிங்கிலிருந்து வெளிவருவதுதான் வழக்கம்.
• இந்த முறை செங்குடுவில் இருக்கும் சீன ராணுவ மேற்கு கமாண்டா் தலைமையகத்திலிருந்து அறிக்கை வெளிவந்திருப்பது வியப்பை ஏற்படுத்துகிறது.
• ராணுவத் தளபதிகளின் 13-ஆவது சுற்று பேச்சுவார்த்தை முடிவு எட்டப்படாமல் போனதால், பேச்சுவார்த்தைக்கு முற்றுப்புள்ளி விழுந்துவிட்டதாகக் கருதத் தேவையில்லை.
• இரண்டு தரப்புமே பேச்சுவார்த்தை முறிந்துவிட்டதாகத் தெரிவிக்கவில்லை. தகவல் பரிமாற்றமும் எல்லையோரத்தில் அவரவா் நிலைப்பாடும் தொடரும் என்று இருதரப்பும் ஏற்றுக்கொண்டிருப்பதாக இந்திய அறிக்கையில் காணப்படும் வரிகள் நம்பிக்கையூட்டுவதாக இருக்கின்றன.
• எல்லையோர சீனப்பகுதிகளில், குறிப்பாக, எல்லை கட்டுப்பாட்டுப் பகுதிகளில் சீன ராணுவம் மிக வேகமாக கட்டமைப்பு வசதிகளை அதிகரிப்பது கவலையளிப்பதாக இந்திய ராணுவ தலைமைத் தளபதி எம்.எம். நரவணே தெரிவித்திருக்கிறார்.
• பதற்றச்சூழல் தொடரும் என்பதைத்தான் அது தெரிவிக்கிறது. சமீபத்தில் அருணாசல பிரதேசத்தின் தவாங் பகுதியிலும், உத்தரகண்டின் பாராஹோத்தி பகுதியிலும் சீன ராணுவம் இந்திய எல்லைக்குள் நுழைய முற்பட்டதைப் பார்க்கும்போது நாம் அசட்டையாக இருந்துவிட முடியாது என்பது தெரிகிறது.
• சீனாவுடனான சும்தோராங் சூ பிரச்னைக்கு தீா்வு காண ஒன்பது ஆண்டுகள் எடுத்தன. அதனால், இருதரப்பு தகவல் பரிமாற்றம் தொடா்வதால் பேச்சுவார்த்தை முறிந்ததை முடிந்தது என்று தீா்மானித்துவிட முடியாது!

நன்றி: தினமணி  (16 - 10 - 2021)