மரண வியாபாரிகள்!

• இந்தியாவில் கடந்த 31 ஆண்டுகளாக செயல்படும் சந்தைப் பொருளாதாரக் கொள்கை, நுகா்வோா் குறித்த அக்கறை இல்லாமல் அரங்கேற்றப்படுகிறது. அதற்கு மிகச்சிறந்த எடுத்துக்காட்டு, குழந்தைகளுக்கான ஆரோக்கிய பானங்களும், புரதச் சத்து மிக்க நொறுக்குத் தீனிகளும் சந்தைப்படுத்தும் விதம். இந்தியாவில் வலிமையான நுகா்வோா் அமைப்புகளும், நுகா்வோா் பாதுகாப்புச் சட்டங்களும் இல்லாத நிலையில் பெருநிறுவனங்கள் தரமில்லாத பொருள்களை விளம்பரப்படுத்திக் கொள்ளை லாபம் ஈட்டி வருகின்றன.
• மத்திய அரசு திடீரென்று விழித்துக்கொண்டு, கடந்த மாதம் போா்ன்விட்டா, ஹாா்லிக்ஸ் உள்ளிட்டவை ‘ஆரோக்கிய பானங்கள்’ என்கிற பெயரில் சந்தைப்படுத்தப்படுவது குறித்துக் கேள்வி எழுப்பி இருக்கிறது. இணைய வணிகத் தளங்கள், ‘ஆரோக்கிய பானங்கள்’ என்கிற பெயரில் விற்பனை செய்வதை உணவுப் பாதுகாப்பு மற்றும் தர நிா்ணய ஆணையம் தடை செய்திருக்கிறது. 2006 உணவுப் பொருள்கள் தர நிா்ணயச் சட்டத்தின்படி, எந்த பானமும் ‘ஆரோக்கிய பானம்’ என்று தெரிவிக்க முடியாது என்று தெளிவுபடுத்தி இருக்கிறது.
• கடந்த சில தலைமுறைகளாகவே, ‘ஆரோக்கிய பானங்கள்’ என்பவை இந்தியாவில் சந்தைப்படுத்தப்பட்டு, மிகப்பெரிய வரவேற்பும் பெற்றிருக்கின்றன. ஹாா்லிக்ஸ், போா்ன்விட்டா, பூஸ்ட் உள்ளிட்ட பானங்கள், இந்தியாவின் சுமாா் ரூ.1,400 கோடி மதிப்புள்ள சந்தையில் 70% பங்கு வகிக்கின்றன. அவை பெரும்பாலும் குழந்தைகளாலும், முதியவா்களாலும்தான் பருகப்படுகின்றன.
• இந்தியக் குழந்தைகள், அனுமதிக்கப்படுவதைவிட மூன்று மடங்கு அதிக சா்க்கரையை உட்கொள்வதாக ஆய்வுகள் தெரிவிக்கின்றன. குழந்தைகள் பருமனாக இருப்பதற்கும், சிறு வயதிலேயே சா்க்கரை நோயாளிகளாக மாறுவதற்கும் அவை காரணமாவதாக எல்லா ஆய்வுகளும் உறுதிப்படுத்தி இருக்கின்றன. ஏற்கெனவே, இந்தியாவின் மக்கள்தொகையில் 11% போ் சா்க்கரை நோயாளிகள். 15% போ் சா்க்கரை நோயாளிகளாக மாறும் சாத்தியம் உள்ளவா்கள். நகா்ப்புற இந்தியாவில் 16%, கிராமப்புறங்களில் 9% போ் சா்க்கரை நோயாளிகள் காணப்படுவதாகத் தரவுகள் உறுதிப்படுத்துகின்றன.
• இந்தப் பின்னணியில்தான், குழந்தைகளுக்கான ‘ஆரோக்கிய பானம்’ சந்தைப்படுத்தும் நிறுவனங்களின் செயல்பாடுகளை நாம் கண்காணிக்க வேண்டும். ‘ஆரோக்கிய பானம்’, புரதச் சத்து மிகுந்த பிஸ்கட் அல்லது வறுவல் என்று விளம்பரப்படுத்தும் அந்த நிறுவனங்கள், புத்திசாலித்தனமாக புட்டியிலோ, பாக்கெட்டிலோ அப்படி எதுவும் தெரிவிப்பதில்லை.
• விளம்பரங்களின் அடிப்படையில்தான் பெரும்பாலான நுகா்வோா் தங்களது குழந்தைகளுக்கு ஆரோக்கிய பானங்கள், பிஸ்கட்டுகள் போன்றவற்றை வாங்குகிறாா்களே தவிர, அதில் என்னென்ன சோ்க்கப்பட்டிருக்கின்றன என்பது குறித்துச் சிந்திப்பதில்லை. வெறும் ஐந்து ரூபாய்க்கு பிஸ்கட், நூடுல்ஸ், பானம் என்பதுடன் அவா்களது தோ்வு முடிந்து விடுகிறது.
• ‘நெஸ்லே’ நிறுவனத்தையே எடுத்துக் கொள்வோம். அவா்கள் ஐரோப்பா, பிரிட்டன், அமெரிக்காவில் குழந்தைகளுக்கான பால் பொருள்களில் சோ்க்கும் சா்க்கரையின் அளவு, இந்தியா போன்ற நாடுகளில் சோ்க்கப்படுவதில் மிகக் குறைந்த விழுக்காடு. அதற்குக் காரணம் இந்தியாவில், உணவுப் பொருள்கள் பாதுகாப்புச் சட்டத்தில் கடுமையான கட்டுப்பாடுகள் இல்லாமல் இருப்பதுதான்.
• இப்போதைய பிரச்னைக்குரிய ‘போா்ன்விட்டா’ விளம்பரம் உள்பட, எல்லா புகாா்களின்போதும், ‘கவனத்தில் கொள்ளப்பட்டது’ என்று தெரிவிக்கும் உணவுப் பொருள்கள் பாதுகாப்பு ஆணையம், என்ன நடவடிக்கை எடுக்கப்பட்டது என்று தெரிவிப்பதில்லை. அதன் ஆண்டறிக்கையில், மாநில ரீதியாகப் பதிவான வழக்குகள், தண்டனைகள், வசூலான அபராதத் தொகை காணப்படுகிறதே தவிர, யாா் யாா் தண்டிக்கப்பட்டிருக்கிறாா்கள், குற்றச்சாட்டு என்ன என்பது போன்ற விவரம் தரப்படுவதில்லை.
• நடவடிக்கைகள் குறித்து வெளிப்படைத்தன்மை இல்லாமல் இருப்பதால், ஆணையத்தின் கட்டுப்பாடுகளை அந்த நிறுவனங்கள் சட்டை செய்வதில்லை. குற்றச்சாட்டு, தண்டனை போன்றவற்றால் அவா்களது நிறுவனத்தின் பெயருக்கு எந்தவித களங்கமும் ஏற்படாது என்கிற பாதுகாப்பை, அரசின் விதிமுறைகள் உறுதிப்படுத்துகின்றன. அதிக அளவிலான சா்க்கரை, சோடியம், ரசாயனங்கள், உலோகங்கள், ஏன் பூச்சி மருந்துகள் உள்பட பல தடை செய்யப்பட்ட பொருள்கள் ஆரோக்கிய உணவில் அடைக்கலம் பெறுகின்றன.
• இரண்டு வயதுக்கு உள்பட்ட குழந்தைகளுக்கான உணவுகள் குறித்த விளம்பரங்கள் தடை செய்யப்பட்டிருக்கின்றன. அதன் மூலம் குழந்தைகளுக்கு தாய்ப்பால் கொடுப்பது ஊக்குவிக்கப்படுகிறது. சில நிறுவனங்கள் சமூக ஊடகங்கள் மூலமாக, அதுபோன்ற பொருள்களை மறைமுகமாக விளம்பரம் செய்கின்றன. அவை கண்காணிக்கப்பட்டு தடுக்கப்படுவது இல்லை.
• விளையாட்டு வீரா்களின் உதவியுடன் இதுபோன்ற பானங்களும், உணவுப் பொருள்களும் விளம்பரப்படுத்தப்படுவதால், ஏழை மக்களும்கூட அதிக விலை கொடுத்து வாங்கி அந்த நிறுவனங்கள் லாபம் ஈட்ட உதவுகின்றனா். இந்தியாவில் 2019 நுகா்வோா் பாதுகாப்புச் சட்டம் இருந்தென்ன பயன்? நுகா்வோா் அமைப்புகளும், நுகா்வோா் மத்தியில் விழிப்புணா்வும் வலுப்படும் வரையில் சந்தைப் பொருளாதாரச் சுரண்டல் தொடரும்...

நன்றி: தினமணி (08 – 05 – 2024)