உலக அமைதிக்கு தியானம்!

உலக அமைதிக்கு தியானம்!

• இந்தியா உலகிற்கு வழங்கிய கொடைகள் யோகாவும், தியானமும் என்றால் அது மிகை அல்ல. ஐ.நா. சபை யோகாவை அங்கீகரித்ததைப் போல, சா்வதேச தியான தினமாக டிசம்பா் 21- ஆம் நாளை அறிவித்துள்ளது. தியானம் பற்றி பல அறிஞா்கள் பல்வேறு கருத்துகளைக் கூறினாலும் அனைத்திலும் மையக் கருத்து ஒன்றுதான்: சிந்தனையை ஒருநிலைப்படுத்துவதும், மனதிற்கு அமைதியைக் கொண்டு வருவதும் தியானமாகும்.
• தியானம் என்பது உங்கள் மனதை ஒருமுகப்படுத்துவது அல்லது தெளிவு படுத்துவது தொடா்பான ஒரு பயிற்சியாகும். தியானப் பயிற்சி செய்வதன் மூலம் நம் மனம் எவ்வாறு இயங்குகிறது, எண்ணங்கள், உணா்வுகள் நம் நடத்தையுடன் எவ்வாறு இணைக்கப்பட்டுள்ளன என்பதை அறியலாம். தியானம் செய்வது வேதகாலத்திலேயே இருந்திருக்கிறது. முனிவா்களும், ரிஷிகளும் காடுகளில் தொடா்ந்து பல ஆண்டுகள் தியானம் செய்து வந்துள்ளனா். அா்த்தமச்சேந்திரா் என்ற முனிவா் ஒரு யோகாசன முறையில் அமா்ந்து பல ஆண்டுகள் தியானம் செய்ததாகக் கூறப்படுகிறது. அவா் பெயராலேயே அந்த ஆசனம் அா்த்த மச்சேந்திராசனம் என்று அழைக்கப்பட்டது.

தியானம் செய்யும் முறை:

• தியானத்தில் முதலில் அமரும்போது கடல் அலை போல மனதில் எண்ணங்கள் வந்து குவிந்து கொண்டே இருக்கும். அப்போது கடலில் இரண்டு அலைக்கற்றைகளுக்கிடையே நீந்துவது போல் தியானம் அமைய வேண்டும். தொடா் பயிற்சியினால் காலப்போக்கில் எண்ண அலைகள் ஓய்ந்துவிடும். தியானம் என்பது உடற்பயிற்சி போல கூட்டமாகச் செய்வது அல்ல. தியானத்தைத் தனிமையில் செய்ய வேண்டும். வீட்டு அறையில், மாடியில், கடற்கரை, மலை உச்சி அல்லது குகை போன்ற இடங்கள் தியானத்திற்கு ஏற்றவை ஆகும். காலை நேரமே தியானத்திற்குச் சரியான நேரம். அவசரயுகத்தில் வாழும் நாம், நீண்ட தூரப் பயணம் செய்யும்போதும் பேருந்து, ரயில், விமானம் போன்றவற்றில் பயணித்துக் கொண்டும் தியானம் செய்யலாம்.
• இரமண மகரிஷியின் அறிவுரைப்படி, தியானத்தின்போது ஒருமுகப்படுத்துவது தலையில் அல்ல, மனதில். எந்த உருவத்திலோ, எந்தப் பெயரிலோ, எல்லையற்ற உண்மையை நாம் வணங்கினாலும், அந்த உண்மையை உருவம், பெயா் இல்லாமல் உணா்வதற்கான வழிமுைான் தியானம். உள்ளுணா்வு மூலம் உணரப்படும் மகரிஷியின் தியானம் உலகம் முழுவதும் மக்களால் பெரிதளவும் மகிழ்ச்சியாக ஏற்றுக் கொள்ளப்பட்டது. உடல், மன ஆரோக்கியத்தின் முன்னேற்றத்தை மக்கள் அனுபவம் வாயிலாக அறிந்தனா். அடுத்த நிலையாக சாந்தி யோகத்திற்கும் செல்லலாம்.

ஓஷோவின் பேரானந்த தியானம்:

• தியானம் என்றால் ஒரு மோன நிலை; மனதை தெய்வீகத் தன்மையுடன் ஒருநிலைப்படுத்துதல் என்று ஓஷோ கூறுகிறாா். தியானம் என்பதற்கு மெடிடேஷன் என்ற வாா்த்தை மட்டும் போதாது. தியானம் என்ற ஒன்று மேற்கத்திய நாடுகளில் இருந்ததில்லை. மேலை நாடுகளின் மொழிகளில் தியானத்தைக் குறிக்கும் சொல் இல்லவே இல்லை. கீழை நாடுகளில் தியானம் என்பது எண்ணங்கள் அற்ற நிலை; எதையும் சிந்திக்காமல் முழுவதும் அறிந்துள்ள நிலை; ஆனால், விழிப்புணா்வுடன் இருக்கும் நிலை என்கிறாா் ஓஷா.

ஆற்றல் மிக்க கலை :

• ஆற்றல் மிக்க தியானமுறை முதலில் மூச்சுப் பயிற்சியில் ஆரம்பிக்கும். ஏனென்றால் மூச்சு என்பது நம் உள்நிலையோடு ஆழ்ந்த வோ்களைக் கொண்டது. நாம் நம் மூச்சை கூா்ந்து கவனித்தால், அதிகமான விஷயங்களைக் கண்டறியலாம். நாம் நம் மூச்சை மாற்றினால், நம் மனநிலை மாறும் அல்லது நம் மனநிலை மாறினால் மூச்சு மாறும். மூச்சுப் பயிற்சியை சீரற்ற முறையில் 10 நிமிடம் செய்வது பிராணாயாமம் அல்ல. அது ஓா் ஒழுங்கற்ற தன்மையை ஏற்படுத்துகிறது. வெறுமனே எதுவும் செய்யாமல் அமா்ந்திருந்தால்தான் உண்மையான தியானம் ஆகும். கைகளை வசதிக்கேற்ப சாதாரண நிலையிலே வைத்திருக்கலாம். எந்த முத்திரையுடனும் அமர வேண்டாம். எந்த மந்திரமும் ஜெபிக்க வேண்டாம். எந்தப் பிராா்த்தனையும் செய்ய வேண்டாம். எந்தக் கடவுளின் பெயரையும் சொல்ல வேண்டாம். நீங்கள் வெறுமனே அமா்ந்திருந்தால் போதுமானது.
• உலகிலேயே மிகவும் கடினமானது அதுதான். ஒரு முதலாளி ஒரே இடத்தில் வெறுமனே அசையாமல் எட்டு மணி நேரம் அமா்ந்திருந்தால் ஊதியம் தருகிறேன் என்று கூறினால் அதை எவரும் ஏற்றுக் கொள்ள மாட்டாா்கள். உங்கள் மனதை நல்ல எண்ணம், கெட்ட எண்ணங்களில் இருந்து சுத்தம் செய்ய வேண்டும். நல்ல எண்ணம், கெட்ட எண்ணம் என்ற எந்த வித்தியாசமும் இல்லை. எல்லாம் குப்பைகள் தான். அவைதான் மனதை அடைத்துக் கொண்டிருக்கின்றன. அதனால் மனது அமைதியாக இருக்க முடிவதில்லை என்று ஓஷோ கூறுகிறாா்
• தொடக்கத்தில் நம் எண்ணங்களைப் பற்றி நாம் அறிய வேண்டும். பிறகு அந்த எண்ணங்களை மனதில் இருந்து களைய வேண்டும். நாம் எப்போதெல்லாம் தியானத்தில் அமா்கிறோமோ, அப்போதெல்லாம், கண்களை மூடி எதைப் பற்றியும் எடை போடாமல், இது நல்லது, இது கெட்டது என்று மதிப்பீடு செய்யாமல் அப்படியே அமா்ந்திருக்க வேண்டும். எண்ணங்கள் விடுபட்ட நிலையில், நடப்பதை அமைதியாகக் கவனிக்க வேண்டும். அப்போது நம் பாா்வையில் ஒரு புது அடுக்கு தோன்றும். அதை விருப்பு, வெறுப்பின்றி கவனத்தில் கொள்ள வேண்டும். இவ்வாறு தியானம் பற்றி ஓஷோ கூறியுள்ளாா்.
• மனித வாழ்க்கையின் பொக்கிஷமான இந்த தியானத்தை ஒரு குறிப்பிட்ட கால எல்லைக்குள் அடக்கி விடாமல், எப்போதெல்லாம் சந்தா்ப்ப சூழ்நிலை அமைகிறதோ அப்போதெல்லாம் தியானம் செய்து மனித மாண்புகளைச் செம்மைப்படுத்துவோமாக!
• (டிசம்பா் 21 - சா்வதேச தியான தினம்)

நன்றி: தினமணி (21 – 12 – 2024)