ஏழை எளிய மாணவர்களின் உயர் கல்விக் கனவு என்னவாகும்?

ஏழை எளிய மாணவர்களின் உயர் கல்விக் கனவு என்னவாகும்?

• தமிழ்​நாட்டில் கடந்த 50 ஆண்டு​களில் உயர் கல்வி பரவலாகக் கிடைப்​ப​தற்கான வாய்ப்புகள் உருவாக்​கப்​பட்​டுள்ளன. அரசுக் கல்வி நிறுவனங்​களும் அரசு உதவிபெறும் தனியார் கல்வி நிறுவனங்​களும் உயர் கல்விப் பரவலாக்​கத்தில் முக்கியப் பங்கு வகிக்​கின்றன. இந்நிலை​யில், சென்னை துரைப்​பாக்​கத்தில் செயல்​படும் டிபி ஜெயின் கல்லூரி, அதன் உதவிபெறும் பாடப்​பிரிவை மூடுவதற்​காக சென்னை உயர் நீதிமன்​றத்தில் வழக்கு தொடுத்​திருந்தது.
• அவ்வழக்கில் உதவிபெறும் பிரிவை மூடுவதற்கான விண்ணப்​பத்தை அரசுக்கு உடனடி​யாகச் சமர்ப்​பிக்​கு​மாறும் கல்லூரி நிர்வாகத்​துக்கு உத்தர​விட்​டிருக்கும் நீதிமன்றம், அதை அரசு இரண்டு வாரங்​களுக்குள் ஏற்றுக்​கொள்​ளு​மாறும் தீர்ப்​பளித்​திருக்​கிறது. இந்தத் தீர்ப்பை அரசு ஏற்றுக்​கொண்​டால், அது தமிழக உயர் கல்வியில் மிகப் பெரிய பாதிப்பை உண்டாக்கு​வதுடன் ‘சமூகநீதி’ வரலாற்றில் பெரும் பின்னடைவை ஏற்படுத்​தி​விடும்.

சுயநிதிக் கல்லூரி​களின் வளர்ச்சி:

• தமிழ்​நாட்டில் அரசுக் கல்லூரி​களுடன் அரசு உதவிபெறும் தனியார் கல்லூரிகளும் ஆங்கிலேயர் ஆட்சிக் காலத்​திலிருந்தே செயல்​படு​கின்றன. அவற்றில் பெரும்​பான்​மை​யானவை கலை - அறிவியல் கல்லூரிகளே. தமிழ்​நாட்டில் 1967ஆம் ஆண்டு ஆட்சிக்கு வந்த திமுக அரசு, உயர் கல்வியைப் பரவலாக்கும் நோக்கத்​துடன் அரசுக் கல்லூரி​களுடன் அரசு உதவிபெறும் கல்லூரி​களின் எண்ணிக்கை​யையும் உயர்த்து​வதற்கு உதவியது.
• திமுக ஆட்சி செய்த அடுத்த 10 ஆண்டு​களில் 87ஆக இருந்த அரசு உதவிபெறும் கல்லூரி​களின் எண்ணிக்கை 143ஆக உயர்ந்தது. இந்தப் பின்னணியில் 1972ஆம் ஆண்டு துரைப்​பாக்கம் அரசு உதவிபெறும் கல்லூரி தொடங்​கப்​பட்டது. கடந்த 50 ஆண்டு​களில் பல ஆயிரம் விளிம்​புநிலை மாணவர்கள் இக்கல்​லூரியின் உதவிபெறும் பிரிவில் பட்டம் பெற்றுள்​ளனர்.

சுயநிதிக் கல்லூரியாக மாற்ற முயற்சி:

• 1980களில் மத்திய அரசு கல்விக்கு ஒதுக்கும் நிதியைக் குறைத்து, உயர் கல்வியில் தனியார்​ம​யத்தை ஊக்கு​வித்தது. இதனால் சுயநிதிக் கல்லூரிகள் மற்றும் அரசு உதவிபெறும் கல்லூரி​களில் சுயநிதிப் பிரிவுகள் தொடங்​கிக்​கொள்ளவும் தமிழக அரசு அனுமதி அளித்தது. சுயநிதிப் பிரிவில் மாணவர்​களிடம் இருந்து அதிகக் கட்டணம் வசூலிக்க முடியும், அரசின் கட்டுப்​பாடு​களும் குறைவு என்பதால், அரசு உதவிபெறும் பிரிவை மூடிவிட்டு, முழுமை​யாகச் சுயநிதிக் கல்லூரியாக மாற்றும் முயற்சி​களில் இறங்கியது இக்கல்லூரி நிர்வாகம்.
• அரசு உதவிபெறும் பிரிவில் பணி ஓய்வு​பெறும் ஆசிரியர்​களின் காலிப் பணியிடங்களை நிரப்பு​வதற்கு அரசிடம் இருந்து அனுமதி பெறுவதில் சிரமம் இருப்​ப​தாகக் கூறி, பல ஆண்டு​களுக்கு முன்பே பணி நியமனங்களை நிறுத்​தி​விட்டது. 2017ஆம் ஆண்டு 33 பணியிடங்களை நிரப்பு​வதற்குத் தமிழக அரசே முன்வந்து அனுமதி அளித்த​போதும், கல்லூரி நிர்வாகம் பணியிடங்களை நிரப்​ப​வில்லை என அரசுத் தரப்பில் குற்றம்​சாட்​டப்​படு​கிறது. இது ஒருபுறம் இருக்க, கல்லூரி நிர்வாகம் பல்கலைக்கழக மானியக் குழுவின் நிதியாக ரூ1,65,64,984 பெற்று 2009-2010ஆம் ஆண்டு​களில் பெண்கள் விடுதி மற்றும் உள் விளையாட்டு அரங்க வசதிகளை ஏற்படுத்​திக்​கொண்டது.
• இந்நிலையில், 2019ஆம் ஆண்டு ஒரு துறையில்கூட அரசு உதவிபெறும் ஆசிரியர்கள் இல்லை என்பதைக் காரணம் காட்டி, உதவிபெறும் பிரிவை மூடிவிட அரசிடம் அனுமதி கோரியுள்ளது. இதற்கு அரசுத் தரப்பிடம் இருந்து அனுமதி கிடைக்கவில்லை என்பதால், நீதிமன்​றத்தை அணுகியது. இது ஒருபுறம் இருக்க, கரோனா பொதுமுடக்கச் சூழலைத் தனக்குச் சாதகமாகப் பயன்படுத்​திக்​கொண்டு, 2020-21ஆம் கல்வி​யாண்டில் அரசு உதவிபெறும் பாடப்​பிரிவில் மாணவர் சேர்க்கையை நிறுத்​தி​விட்டது.

தனி அலுவலர் நியமனம்:

• கல்லூரி நிர்வாகத்தின் இத்தகைய செயல்​பாடுகளை எதிர்த்து இடதுசாரிக் கட்சிகளும் அதன் மாணவர் அமைப்பு​களும் தொடர் போராட்​டங்​களில் ஈடுபட்டன. இத்தகைய அழுத்​தங்​களின் விளைவாகத் தமிழக அரசு 12.08.2022 அன்று தனியார் கல்லூரி ஒழுங்​காற்றுச் சட்டம் 1976 விதிகளின்படி, தனிஅலுவலரை நியமித்துக் கல்லூரியை அரசின் கட்டுப்​பாட்டில் கொண்டு​வந்தது. எனவே, 2022-23ஆம் கல்வி​யாண்டில் அரசு உதவிபெறும் பிரிவில் மாணவர் சேர்க்கைப் பணிகள் தொடங்கின.
• அரசின் இந்த முயற்சியை எதிர்த்துத் தொடரப்பட்ட வழக்கில் உதவிபெறும் பிரிவில் மாணவர் சேர்க்கையைத் தொடர வேண்டும் எனக் கூறிய நீதிமன்றம், தனிஅலுவலர் அதில் தலையிடக் கூடாது என இடைக்கால உத்தரவு பிறப்​பித்தது. நீதிமன்ற வழிகாட்டுதல் இருந்தும் 2022-23ஆம் ஆண்டு மட்டுமின்றி அதற்கு அடுத்​தடுத்த கல்வி ஆண்டு​களிலும் அரசு உதவிபெறும் பிரிவில் மாணவர் சேர்க்கையை நடத்தவில்லை. 2022-23ஆம் கல்வி​யாண்டில் கல்லூரி நிர்வாகத்தால் உதவிபெறும் பிரிவில் சேர்வதற்கு விண்ணப்​பங்கள் வழங்கப்​படாததை எதிர்த்து இந்திய மாணவர் சங்கம் உயர் கல்வித் துறையின் இணை இயக்குநரிடம் முறையிட்டது.

கல்வி​யாளர்​களின் கருத்து:

• சமீபத்தில் வழங்கப்பட்ட தீர்ப்​பின்​போது, நிர்வாகத் தரப்பில் பிரதானமாக அரசு உதவிபெறும் பிரிவில் ஆசிரியர்கள் இல்லை​ என்றும் மாணவர்கள் சேரவில்லை எனவும் குறிப்​பிடப்​பட்​டுள்ளது. மனுவில் கூறப்​பட்​டுள்ள தகவல்கள் தவறானவை என்பதை மறுப்​ப​தற்கு அரசிடம் போதுமான ஆதாரங்கள் உள்ளன. அரசுத் தரப்பில் அவை நீதிமன்​றத்தில் சமர்ப்​பிக்​கப்​பட்​டிருந்​தால், இத்தகைய தீர்ப்பு வழங்கப்பட்டிருக்க வாய்ப்​பில்லை என்பது கல்வி​யாளர்கள் முன்வைக்கும் குற்றச்​சாட்​டாகும்.
• ஆண்டுக்கு 1,000 ரூபாய் மட்டுமே கட்டணமாக வசூலிக்​கப்​படும் அரசு உதவிபெறும் பிரிவில் மாணவர்கள் சேரவில்லை எனவும் சுயநிதிப் பிரிவில் பல ஆயிரம் செலுத்தி மாணவர்கள் சேர்ந்​தார்கள் எனவும் நிர்வாகம் கூறுவது ஏற்றுக்​கொள்ளும் வகையில் இல்லை. மேலும், பல ஆண்டு​களாகவே காலிப் பணியிடங்களை நிரப்​பாமல் தன்னுடைய பொறுப்பைத் தட்டிக்​கழித்த நிர்வாகத்​தின்மீது முன்பே தமிழக அரசு உரிய நடவடிக்கை எடுத்​திருக்க வேண்டும். காலம் தாழ்த்தி எடுக்​கப்பட்ட முடிவுதான் என்றாலும் தனிஅலுவலரை நியமித்தது சரியான முடிவாகும்.

ஏழை மாணவர்​களின் கல்வி வாய்ப்பு பறிக்​கப்​படும்:

• தனியார் கல்லூரி​களில் அரசு உதவிபெறும் பிரிவுகள் செயல்​படு​வதால் அரசின் கட்டுப்​பாடுகள் உள்ளன. இதனால் முழுமையாக வணிக நோக்கத்​துடன் கல்லூரியை நடத்த முடியாத நிலை உள்ளது. ஏற்கெனவே, அரசு உதவிபெறும் பிரிவில் பணி நியமனங்​களில் சிக்கல்கள் உள்ளதைப் பலரும் சுட்டிக்​காட்டு​கின்​றனர். இதுபோன்ற காரணங்​களால் அரசு உதவிபெறும் கல்லூரிகள் அரசின் கட்டுப்​பாட்​டிலிருந்து விடுபடு​வதற்கு மாற்று வழிகளைச் சிந்தித்​துக்​கொண்​டுள்ளன.
• இத்தகைய சூழலில், ஒரு கல்லூரியில் அரசு உதவிபெறும் பிரிவை மூட அனுமதித்தால், மற்ற அரசு உதவிபெறும் கல்லூரி​களும் அதனைப் பின்பற்றி சுயநிதிக் கல்லூரிகளாக மாற்று​வதற்கான வாய்ப்பை அரசே ஏற்படுத்திக் கொடுத்ததாக அமைந்​து​விடும். இதனால், அக்கல்​லூரிகளை நம்பி​யுள்ள பல ஆயிரம் ஏழை எளிய மாணவர்​களின் உயர் கல்வி வாய்ப்பு பறிபோகும்.
• அரசின் பல்வேறு சலுகைகளைப் பெற்று உள்கட்​டமைப்பு வசதிகளை மேம்படுத்​திக்​கொண்​டதுடன், நிறுவனத்தின் நற்பெயரையும் உயர்த்திக்​கொண்ட தனியார் கல்வி நிறுவனங்​களின் சேவை ஏழை மாணவர்​களுக்குப் பயன்படாமல் தனியார் நிறுவனங்​களின் லாப நோக்கத்​துக்குப் பயன்பட அனுமதிப்பது சமூகநீ​திக்கு எதிரான ஆபத்தான போக்காகும்.

இனி என்ன?

• வளர்ச்​சியின் பெயரால் சென்னையின் மையப் பகுதி​களி​லிருந்து வெளியேற்​றப்​பட்டு கண்ணகி நகர், செம்மஞ்​சேரி, எழில் நகர் போன்ற பகுதி​களில் வசிக்கும் விளிம்​புநிலை மக்களுக்கு உயர் கல்வி வழங்கு​வதில் துரைப்​பாக்கம் கல்லூரியின் பங்கு முக்கிய​மானது. இடப்பெயர்வால் வாழ்வா​தா​ரத்தை இழந்து தவிக்கும் இப்பகுதி இளம் தலைமுறை​யினருக்குக் கல்வி ஒன்றுதான் எதிர்​காலத்​துக்கான ஒரே நம்பிக்கை.
• எனவே, அவர்களின் கல்வி வாய்ப்பை உறுதிப்​படுத்த சமீபத்திய உயர் நீதிமன்றத் தீர்ப்​புக்கு எதிராகத் தமிழ்நாடு அரசு மேல்முறையீடு செய்ய வேண்டும். கல்லூரியை அரசின் கட்டுப்​பாட்டில் கொண்டு​வருவதன் மூலமாக மட்டுமே அரசு உதவிபெறும் பிரிவில் மாணவர் சேர்க்கையை நடத்த முடியும் எனக் கல்வியாளர்கள் மன்றாடுகின்​றனர். என்ன செய்யப்​போகிறது தமிழக அரசு?

நன்றி: இந்து தமிழ் திசை (07 – 11 – 2024)