கடினமான காலம்தான் நம்பிக்கையோடு கடப்போம்

• மிகவும் கடினமான காலத்தை நாம் கடந்து கொண்டிருக்கிறோம். நாள்தோறும் கரோனா தீநுண்மியால் பாதிக்கப்பட்டோர் பற்றிய செய்திகள் வந்து கொண்டே இருக்கின்றன.
• நம்மைச் சார்ந்தவா்களே கூட பாதிக்கப்பட்டிருக்கிறார்கள். இரண்டாவது அலையின் வேகம் மனித இனத்தையே கதிகலங்க வைத்திருக்கிறது. உறவுகளை இழந்தோரின் துயரம் சொல்லி மாளாது.
• மன்னா் காலத்தில் போர்க்களங்களில் படைவீரா்கள் கொத்து கொத்தாய் மடிந்தார்கள் எனப் படித்திருக்கிறோம். இன்று கரோனாவினால் அப்படி மடிவதைக் கண்முன் பார்க்கிறோம். இது மிக நெருக்கடியான காலம்.
• எதிர்காலத்தை நினைத்தால் அச்சமாக இருக்கிறது என்று என் தோழி கூறினாள். உண்மையில் நிகழ்காலத்திற்கும் எதிர்காலத்திற்கும் இடையில்தான் நம் எண்ணங்கள் அலைமோதிக் கொண்டிருக்கின்றன. பெற்ற பாடங்களை கொண்டு அடுத்த கட்ட நகா்வுக்குச் சென்றாக வேண்டிய கட்டாயத்தில் இருக்கிறோம்.
• ஆயினும், நம்மால் முடிந்தவரை சகமனிதா்களுக்கு எப்படியெல்லாம் உதவ முடியுமோ அப்படியெல்லாம் உதவிகளைச் செய்வோம்.
• நாமும் பாதுகாப்பாக இருப்போம். உதவுவதற்கு பணம்தான் தேவை என்பது இல்லை. நல்ல மனமும் நம்பிக்கை வார்த்தைகளும் இருந்தால் போதும்
• கரோனா கட்டுப்பாட்டு நெறிமுறைகளை அலட்சியப்படுத்தியதன் விளைவுகளைத்தான் இன்று அறுவடை செய்து கொண்டிருக்கிறோம்.
• போனது போகட்டும், எப்பொழுதும் அவநம்பிக்கை தரும் செய்திகளை தொடா்ந்து கேட்டுக் கொண்டிருந்தால் வாழ்வு மீதான நம்பிக்கை தொலைந்து போய்விடும். எப்போதும் மனதில் கவலையே குடி கொண்டிருந்தால் நம்மை நாமே இழந்து விடுவோம்.
• சென்ற வாரம் கரோனா பரவல் பற்றிய செய்தி ஒன்றை வார இதழ் ஒன்றில் படித்தேன். அது நம்பிக்கை அளிக்கும்படி இருந்ததால் மனம் இலகுவானது.
• பின்பு தொலைகாட்சியில் அரை மனி நேரம் செய்தியைப் பார்க்க நோ்ந்தது. அதற்கு முன் ஏற்பட்ட ஆறுதலும் தைரியமும் தொலைந்து போய் என்னைக் கிலி பிடித்துக் கொண்டது. அந்த நிமிடம் முதல் மனம் பலவீனமடைவதாய் உணா்ந்தேன்.
• லட்சக்கணக்கானோரில் யாரோ ஒரு சிலருக்கு ஏற்பட்ட பாதிப்பு ஏதோ எனக்கே ஏற்பட்டது போல் ஒரு பரிதவிப்பு மேலோங்கியது. வாழ்வு மீதான பிடிப்பு அற்றுப் போய் விட்டது.
• கண்ணால் காணும் காட்சிகளுக்கு அவ்வளவு தாக்கம் உண்டு. இத்தகு நிகழ்வுகளை கண்ணுற்றால் அவை நம் மனதுக்குள் புகாமல் கதவடைக்க கற்க வேண்டும். அதற்கு நாம் நம் மனத்தைத் தயார்படுத்திக் கொள்ள வேண்டும்.
• நிகழ்வதை தடுக்கவோ, நிகழப்போவதை நிறுத்தவோ முடியாது. ஆனால் துணிவுடன் கடக்க முடியும். நம் மனம் ஒன்றே நம்மை வீழ்த்தக் கூடிய ஒரே ஆயுதம். அது தெளிவாக இருக்கும் வரையில் நாம் ஒருவராலும் வீழ்த்தப்படுவதில்லை.

எண்ணங்களுக்கு சக்தி உண்டு

• மனநல மருத்துவா் ஒருவா் ஊடக நண்பா்களுக்கு எழுதிய மூன்று பக்க மடல் ஒன்று, சென்ற வாரம் சமூக வலைதளங்களில் பகிரப்பட்டது.
• அதில் அவா், ‘வீட்டை விட்டு வெளியே செல்ல முடியாததாலும், வேலைவாய்ப்பை இழந்ததாலும் வருமானம் பாதிக்கப்பட்டு மனஅழுத்தங்களுக்கு உள்ளாகி இருக்கும் மக்கள் வேறு வழியின்றி தொலைக்காட்சியைத்தான் பார்க்கின்றனா்.
• வடமாநிலங்களில் பிணங்களை எரியூட்டும் நிகழ்வுகளை மீண்டும் மீண்டும் ஒளிபரப்புவதால் மக்கள் மனத்தில் பீதி ஏற்படுகிறது. இது கரோனா தீநுண்மித் தாக்குதலுக்கு ஆளானவா்களை மிகவும் பாதிக்கிறது.
• மக்கள் மனத்தில் உள்ள நம்பிக்கை கை நழுவி போய் தேவயற்ற பீதி குடி கொள்கிறது. அறிகுறி ஏதுமற்ற சாதாரண நிலை தொற்றாளா்கள் கூட நாம் பிழைப்போமா என்று கவலை கொள்ளும்படி இருக்கின்றது.
• அதற்கு மாறாக, தொற்றால் பாதிக்கப்பட்டவா்கள் உடல் நலம் தேறி மீண்டு செல்லும் காட்சிகளை பலமுறை ஒளிபரப்புங்கள்.
• மக்களின் மனங்களை சவால்களை எதிகொள்ளும் திறன் பெறச் செய்ய வேண்டுமேயன்றி நிலை குலையச் செய்துவிடக்கூடாது.
• மாறாக, எப்பொழுது ஒருவருக்கு மருந்துகள் தேவைப்படும், எந்த நிலையில் அவா்களுக்கு பிராணவாயு தேவைப்படும், எதில் கவனம் கொள்ள வேண்டும், அவசர தேவைக்கு யாரை தொடா்பு கொள்ள வேண்டும் போன்ற தகவல்களைத் தொடா்ச்சியாக ஒளிபரப்பலாம்.
• பல மணி நேரம் தொலைக்காட்சி முன் பழியாய் கிடந்தாலும், மக்களுக்கு பேருதவி புரியும் இது போன்ற தகவல்கள் தொலைக்காட்சிகளில் வருவதே இல்லை.
• இன்றைய கரோனா சூழலில் ஊடக நண்பா்களும் முன்களப்பணியாளராக இருக்கிறார்கள்.
• அனைவரும் பொறுப்பு உணா்ந்து தேவையான ஆக்கபூா்வமான முன்னெடுப்புகளை மேற்கொள்ள கைகோக்க வேண்டும் என மன்றாடி கேட்டுக் கொள்கிறேன்’ என்று கூறியுள்ளார்.
• அவா் கூறுவது உண்மை மட்டுமல்ல, இந்த நேரத்திற்குத் தேவையானதும் கூட. ஒரு வார்த்தை வெல்லும், ஒரு வார்த்தை கொல்லும் என்பார்கள். வார்த்தைகளுக்கும் அதை எதிர்கொள்ளும் எண்ணங்களுக்கும் அதிக சக்தி உண்டு. யார் எந்த சொல்லால் ஈா்க்கப்படுவார் என்பது யாருக்கு தெரியும்?

எண்ணம் மாறியதால் பிழைத்தேன்

• வயது முதிர்ந்த பெண்மணி ஒருவா் தன் வாழ்வில் எதிர்கொண்ட திருப்பம் ஒன்றைப் பார்க்கலாம்.
• கடுமையான நிலநடுக்கம் ஏற்பட்டு, தனது குடும்பம் முழுதும் அதற்கு பலி கொடுத்து விடுகிறார் அந்த பெண்மணி. இடிபாடுகளிடையே சிக்கிக் கொண்டவரிடம் மீட்புக்குழு நெருங்க முடியாத சூழல். பசியும் தாகமும் வாட்டி எடுக்க இரவு கடுங்குளிரும் சோ்த்து உடலை சில்லிட வைத்தது.
• அவருக்கு கண்கள் இருளத் தொடங்கின. இனி பிழைப்பது சாத்தியமில்லை எனும் நிலைக்கு வந்த அந்தப் பெண்மணி இது தான் தன்னுடைய இறுதி இரவு என்று முடிவு செய்துவிட்டாள்.
• பனியில் தன் ரத்த நாளங்கள் மெல்ல மெல்ல உறைய தொடங்குவதை உணா்ந்தாள். இன்னும் சில நிமிடங்களில் பனி தன்னை உறைய வைத்து சடலமாக்கிவிடும் என அவருக்குப் புரிந்தது.
• நெருக்கடியான அந்த இரவு நேரத்தில், அருகில் குழந்தை அழும் சத்தம் கேட்டது. தன் தலையை மெல்ல திருப்பிப் பார்த்தவருக்கு அதிர்ச்சி. சற்றுத் தொலைவில் இடிபாடுகளின் குவியல்களுக்கு அப்பால் ஒரு குழந்தை கை கால்களை உதைத்தபடி அழுது கொண்டிருந்தது.
• பதறிப்போன அப்பெண்மணி, தான் எப்படி அந்த இடிபாடுகளில் இருந்து வெளியே வருவது என தீவிரமாக யோசிக்கத் தொடங்கினாள்.
• அந்த குழந்தையை காக்க மனம் துடித்தது. பின் தன் பலம் அனைத்தையும் ஒன்று திரட்டி முட்டி மோதி இடிபாடுகளிலிருந்து வெளியே வந்தாள். குழந்தையிடம் விரைந்தாள்.
• பசிக்கு அழும் குழந்தைக்கு என்ன தருவது என பரிதவித்தாள். அப்போது குழந்தை அவரைப் பார்த்துச் சிரித்தது. அக்குழந்தையைக் காக்க வேண்டிய மிகப்பெரிய பொறுப்பு தன்னிடம் வந்து சோ்ந்ததாகக் கருதினார்.
• இரவு முழுவதும் குழந்தையின் உள்ளங்கைகளையும் கால்களையும் தன் கைகளால் தேய்த்தபடியே இருந்தார்.
• மறுநாள் விடிந்தபோது அவரைப்போல் இடிபாடுகளிடையே போராடிக் கொண்டிருந்த பலா் இறந்து போயிருந்தனா். தானும் மண்ணோடு மன்ணாகப் போகிறோம் என நினைத்திருந்த அவரும் அவரால் காப்பாற்றப்பட்ட குழந்தையும் உயிர் பிழைத்திருந்தனா். உயிர் பிழைத்த அந்தப் பெண்மணி சொன்ன சங்கதிதான் முக்கியமானது.
• ‘இரவில் கொட்டிய அந்த கொடும்பனி எப்படியும் என்னைக் கொன்றுவிடும் என்ற பயம் துரத்த என்னை நான் முற்றிலும் தொலைத்திருந்தேன்.
• குழந்தையின் அழுகுரலும் அது இதழ்களில் புன்னகை தவழ என்னை பார்த்த பார்வையுமே எப்படியாவது குழந்தையை உயிர் பிழைக்கச் செய்ய வேண்டும் என்ற எண்ணத்தை எனக்குள் விதைத்தது.
• ஒவ்வொரு நிமிடமும் அதை நோக்கியே என் சிந்தனை முழுதும் இருந்தது. என் எண்ணம் மாறியதால்தான், நான் இன்று பிழைத்தேன்’ என்றார்.
• எனவே, ஆபத்து விலகிவிடவில்லை. அதை எதிர்கொள்வது நம் கைகளில்தான் இருக்கிறது. எப்படிப்பட்ட கடுமையான சூழ்நிலையிலும் நம் மனம் நம்பிக்கை கொடுக்கும் வழிகளையே ஆராய வேண்டும் என்பதை இந்த உண்மை சம்பவம் நமக்கு உரக்கச் சொல்கிறது.
• அதனால் நம்பிக்கை ஏற்படுத்தும் சொற்களையே பிறரிடம் பகிருங்கள். நம்பிக்கை வார்த்தைகள் எத்தனையோ மனிதா்களின் வாழ்க்கையை சிறப்பானதாக மாற்றியிருக்கிறது.

முன்னெச்சரிக்கையோடு இருப்போம்

• இந்த இரண்டாம் அலையைத் தாண்டி தாக்கப் போகும் மூன்றாம் அலையில் சிறார்கள் அதிகம் பாதிக்கப்படுவா் என்றும், அதனால் அதிக கவனமாக நாம் இருக்க வேண்டும் என்றும் அறிவுறுத்துகிறார்கள்.
• மக்கள் தொகை அதிகம் கொண்ட நம் நாட்டில் இது போன்ற நீண்ட பொதுமுடக்கம் சாத்தியமில்லாத ஒன்று. நம்மை நாம் தற்காத்துக் கொள்வது மிக மிக அவசியம்.
• கடந்த ஒரு வருட காலத்துக்கும் மேலாக மருத்துவப் பணியாளா்கள், காவல்துறையினா், குடிமைப் பரணி நிர்வாகத் துறையினா் ஆகியோர் கொண்ட முன்னணிப் படையினா் இந்த இடரைத் திறம்பட சமாளித்தனா்.
• இப்பொழுதும் அவா்கள் நம்மை காக்கும் பணியில் அயராது ஈடுபட்டு வருகின்றனா். அவா்களின் சேவைக்கு நாம் அனைவரும் தோள் கொடுப்போம். அரசு நமக்காக சொல்லும் முன்னெச்சரிக்கை நடவடிக்கைகளை சரிவர கடைப்பிடிப்போம்.

நன்றி: தினமணி  (11 – 05 - 2021)