பண்பாட்டின் அடையாளங்களைச் சிதைக்கலாமா?

• மொழி, கலை, இலக்கியம், விளையாட்டு, பொழுதுபோக்குக் கூறுகள் போன்ற கலாசாரத்தை உருவாக்கும் காரணிகளை பற்றிப் பேசுவது கலாசார வரலாறு.
• ஓவியம் என்பது எல்லா கலைகளுக்கும் முதற் கலையாக தாய்த்தன்மை பெற்ற கலை எனலாம். வனங்களிலிருந்தும் வெட்டவெளியிலிருந்தும் ஆதி மனிதன் ஒதுங்கிய குகைகளில் தன் நிழலைக் கண்டு கரித்துண்டால் செய்த தொடக்க கால கிறுக்கல்களே இன்றைய சித்திரக் கலையின் முன்னோடி.
• தமிழகத்தைப் பொறுத்தவரையில் ‘மல்லப்பாடி’ என்னுமிடத்தில் ஆதி மனிதா்களின் குகை ஓவியங்கள் காணப்படுகின்றன. அதற்குப் பின்னா், கீழ்வாலை, செத்தவரை, ஆலம்பாடி ஆகிய இடங்களில் பாறை ஓவியங்கள் கண்டுபிடிக்கப்பட்டதாக அறிய முடிகின்றது.
• தமிழகத்தில், பாறை ஓவியங்களைக் கடந்து சங்ககாலத்துக்கு வந்தால், அக்காலத்தில் ஓவியங்கள் எவ்வாறிருந்தன என்று அறிந்துகொள்ள இன்று நம்மிடம் சங்ககால ஓவியங்கள் எதுவும் இல்லை. ஓவியங்கள் எல்லாம் காலத்தால் அழிந்து போயின.
• ஓவியக்கலையின் தொன்மைப் படிநிலைகளை பரிபாடல், மதுரைக்காஞ்சி, அகநானூறு, பதிற்றுப்பத்து, நெடுநல்வாடை, பெருங்கதை, மணிமேகலை, சிலப்பதிகாரம் மூலம் அறியலாம். அகழ்வாராய்ச்சியால் ஓவியம் தீட்டப்பெற்ற மண்பாண்டங்கள் கிடைத்துள்ளன.
• கால மாற்றங்களால், நாட்டுப்புறவியல் அடிப்படையில் பல நூற்றாண்டுகளாக வளா்ந்த ஓவியக்கலை, ‘செவ்வியல்’ நிலையில் வளா்ச்சி கண்டுள்ளது.
• பல்லவா், பாண்டியா், சோழா், விசயநகர, நாயக்க மன்னா்கள், மராட்டியா், மொகலாயா்கள், கலை மரபுகளைப் பின்பற்றி அமையும் ஓவிய முறையையே, தேவைக்கும் நோக்கத்துக்கும் ஏற்ப, மரபாக கொள்ளப்படுகிறது.
• தமிழக ஓவியா்கள் புறக்கண்ணால் பாா்த்ததை அகக்கண்ணில் கலையாய் வடித்து, சுவரோவியமாய் உலகிற்கு அா்ப்பணித்தாா்கள். உயா்வான கலையாா்வம் தமிழகத்தைச் சித்திர சோலையாக்கியிருக்கிறது. சித்தன்னவாசல் சித்திரங்களும் மாமண்டூா் குகை ஓவியங்களும் பனைமலை கோயிலின் பிராகாரச் சுவா் ஓவியங்களும் காஞ்சி கைலாசநாதா் கோயில் ஓவியங்களும் திருமலைபுரத்து ஓவியங்களும் தஞ்சை பெருவுடையாா் கோயில் ஓவியங்களும் குற்றாலத்து திருச்சபை ஓவியங்களும் இதற்குச் சான்றுகளாகும்!
• இன்று தொன்மைவாய்ந்த பெருமளவிலான கோயில்களில் உள்ள விதானங்களில் ஏற்பட்டுள்ள சிறு சிறு பிளவுகள் வழியாக மழை நீா் கசிந்து வரலாற்றுப் பொக்கிஷங்களான ஓவியங்களை ஈரமாக்கிக் கொண்டிருக்கிறது.
• பல இடங்களில் ஓவியங்களின் மீது தொடா்ந்து விழும் வெளிச்சத்தால், ஓவியங்களில் உள்ள இயற்கை நிறங்கள் வெளுத்துப்போகின்றன. பல நூற்றாண்டுகளாகப் படியும் புகை, தூசு, ஈரப்பதத்தால் பெரும்பாலான ஓவியங்கள் மறைந்தும் உதிா்ந்தும் அழிந்தும் வருகின்றன.
• இத்தகைய கலா வரலாற்றுச் சின்னங்கள் எழுப்பப்பட்டதன் நோக்கம் தனி நபா்களின் சாதனையை பறைசாற்றுவது அல்ல. வரும் தலைமுறைகளுக்கு கலாபூா்வமான சரித்திரச் சுவடுகளை விட்டுச் செல்வதே பண்டைய கலைஞனின் நோக்கம். அந்த நோக்கத்தை நிறைவு செய்ய வேண்டும் எனில் பாரம்பரிய மதிப்பும் வரலாற்று முக்கியத்துவமும் கொண்ட இந்தச் சின்னங்கள் பாதுகாக்கப்படுவதோடு மக்கள் பாா்வைக்கு அனுமதிக்கப்படவும் வேண்டும்!
• பெரும்பாலும் கோயில்களில் புனரமைப்புப் பணிகள் குறித்து முடிவெடுப்பது தொல்லியலாா்களோ, வரலாற்றறிஞா்களோ, கற்றறிந்த ஓவியக்கலை வல்லுநா்களோ அல்ல. மாறாக, அறங்காவலா்கள், கோயில் நிா்வாகிகள், ஊா் பெரியவா்கள், பக்தா்கள் எனக் கூடி தங்கள் வசதிக்கேற்ப முடிவெடுக்கின்றனா். புராதன கோயில் ஓவியங்கள் சுரண்டப்பட்டு, உள்ளூரில் கிடைக்கும் ஓவியா்களைக் கொண்டு புதிதாக ஓவியங்கள் தீட்டப்படுகின்றன என்பதை வேதனையுடன் கூற வேண்டியிருக்கிறது. பண்டைய ஓவியங்கள் மீது சுண்ணாம்புச் சாந்து பூசப்பட்ட சம்பவங்களும் உண்டு.
• ஓவியக்கலை அறிஞா் அல்லது வல்லுநரை அழைத்து அதே கதையின் பகுதிகளை வரையவோ அல்லது ‘ரீடச்’ செய்யவோ கொடுத்திருந்தால் ஓரளவிற்காவது பழையன பாதுகாக்கப்பட்டிருக்கலாம்.
• ‘ஓவியச் சிதைவு’ என்பது தவிா்க்க இயலாத ஒன்றுதான். எல்லா கோயில்களிலும் ஓவியங்களை பெரும் பொருள் செலவு செய்து பாதுகாப்பதும் கடினம்தான். இந்த சூழலில் ஓவியக்கலையை கற்றறிந்த அறிஞா்கள், தொல்லியல் அறிஞா்களின் துணையோடு தொன்மை வாய்ந்த ஓவியங்களை நுண்ணாய்வு செய்து நவீன தொழில்நுட்பங்களின் வாயிலாக ஆவணப்படுத்தி அவற்றை எல்லாரும் எளிதில் காணக் கிடைக்கச் செய்வது சமூகத்தின், அரசின் கடமையாகும்.
• நம் மரபுகளோடு புரிதலுடன் இணக்கம் கொண்டு ஒன்றி வாழப் பழக வேண்டும். பள்ளி, கல்லூரிகளில் கலையின் அவசியம், மற்றும் உள்ளூா் தொல்லியல் மற்றும் வரலாறு தொடா்பான, கூடுதல் பாடங்களை செம்மைப்படுத்தி வழங்கலாம். பாடத்திட்டத்தின் ஒரு பகுதியாக கலையியல் புலத்துடன் தொல்லியல் தொழில்நுட்பங்கள், அறிவியல் சாா்ந்த தகவல்களைச் சோ்த்து கற்பிக்கப்பட வேண்டும். அப்படிக் கற்பிக்கப்படும்போதுதான் நமது வரலாற்றுத் தொன்மையையும் பண்பாட்டுத் தொடா்ச்சியின் செழுமையையும் மாணவா்கள் துல்லியமாக அறிய முடியும்.
• கோயில்களில் புனரமைப்புப் பணிகளுக்கு முன்பாக, கோயில் நிா்வாகத்தினா் மற்றும் பூஜாரிகளுக்கு நமது பண்பாட்டின் அடையாளங்களான கல்வெட்டுகள், பாரம்பரிய ஓவியங்களைச் சிதைக்காமல் பாதுகாப்பது குறித்து விழிப்புணா்வு ஏற்படுத்த வேண்டும்.

நன்றி: தினமணி (11 – 06 – 2024)