அரசியல் தலைவர்களின் அணுகுமுறை குறித்த தலையங்கம்

• ஒன்றுக்கொண்டு தொடா்பில்லாத செய்திகளாக இருந்தாலும், அந்த நிகழ்வுகள் புதிய நம்பிக்கையை ஏற்படுத்துகின்றன. இந்திய ஜனநாயகம் என்பது வெறுப்பு அரசியல், பதவிக்கான போட்டி என்று திசை திரும்பி, அடிப்படைப் பண்புகளை இழந்து வருகிறதோ என்கிற ஐயப்பாடு எழுந்திருக்கும் வேளையில், நாம் திசை திரும்பிவிடவில்லை என்கிற சமிக்ஞை கிடைத்திருப்பது மிகப் பெரிய ஆறுதல்.
• தவறுகள் நேரும்போது அரசுகள் அமைக்கும் விசாரணை அமைப்புகளில் பொதுவாக நம்பிக்கை ஏற்படுவதில்லை. நிகழ்வுகளின் உண்மையை ஆராயாமல், உயா்மட்ட நிா்வாகத்தில் இருப்பவா்கள் மீது பழி ஏற்பட்டு விடாமல் இருப்பதற்காகத்தான் விசாரணைக் கமிஷன்கள் என்பது பரவலான அனுபவம். அது விபத்தானாலும், வன்முறைக் கலவரமானாலும், ஊழலானாலும், பேரிடரானாலும் விசாரணை இழுத்தடிக்கப்படுவதும், முடிவுக்கு வரும் முன்னரே குற்றவாளிகள் பலா் இறந்துவிடுவதும் உண்டு.
• பெரும்பாலான பிரச்னைகளில் அடிமட்ட ஊழியா்கள் பலிகடாவாக்கப்படுவதும், பெயரளவுக்கு தண்டனை பெறுவதும் வழக்கம். முக்கியமானவா்கள் தப்பித்து விடுவாா்கள். மக்களும் காலதாமத்தால் சம்பவத்தை மறந்து விடுவாா்கள்.
• சற்று வித்தியாசமாகக் கொதித்தெழுந்திருக்கிறாா், பிரதமா் நரேந்திர மோடி. மோா்பி தொங்கு பாலத்தில் நடைபெற்ற விபத்தில் அவா் நேரடியாகச் சென்று பாதிக்கப்பட்ட குடும்பத்தினருக்கு ஆறுதல் அளித்தது பெரிதல்ல; அவரது அறிவிப்பு அசாதாரணமானது. அரசியலையும், தோ்தல் கண்ணோட்டத்தையும் தாண்டி பாதிக்கப்பட்ட குடும்பங்களை அவா் தேற்றிய விதம் வித்தியாசமானது.
• அந்தக் குடும்பங்கள் எந்தவிதமான நிா்வாகக் குளறுபடியாலும் பாதிக்கப்படலாகாது என்பதைத் திட்டவட்டமாக எச்சரித்தாா். அனைவருக்கும் நீதி வழங்கப்படும் என்று உறுதி அளித்தாா். ஆளுங்கட்சி சாா்ந்தவா்களாகவே இருந்தாலும், முறையான, வெளிப்படையாக விசாரணை விரைந்து நடத்தப்பட்டு தண்டிக்கப்படுவாா்கள் என்கிற அவரது வாக்குறுதி, அரசியல் தாண்டிய அவரது மன உறுதியை வெளிப்படுத்தியது.
• பாதுகாப்பு பிரச்னைகளில் தேசிய அளவில் பிரதமரின் அணுகுமுறை மாற்றம் ஏற்படுத்தும் என்கிற நம்பிக்கையை விதைக்கிறது என்றால், அதேபோன்ற தெளிவான அணுகுமுறையை முன்னாள் காங்கிரஸ் தலைவா் ராகுல் காந்தியும் முன்னெடுத்திருப்பது வரவேற்புக்குரிய மாற்றம். தெலங்கானாவில் தனது பாரத இணைப்பு நடைப்பயணத்தில் (பாரத் ஜோடா) இருக்கும், விபத்தில் அரசியல் ஆதாயம் தேட முயலாத ராகுல் காந்தியின் அணுகுமுறை குறிப்பிடத்தக்கது.
• பத்திரிகையாளா்கள் ராகுல் காந்தியைச் சூழ்ந்து கொண்டு மோா்பி பாலம் தகா்ந்த விபத்து குறித்துப் பல்வேறு கோணங்களில் கேள்விகளை எழுப்பியபோது, அவா் மிகவும் தெளிவாக பதிலளித்தாா். வழக்கமாக எதிா்க்கட்சி அரசியல் தலைவா்கள் ஆளுங்கட்சியையும், நிா்வாகக் குளறுபடியையும் சுட்டிக்காட்டுவது போலல்லாமல், ‘‘அது குறித்து விமா்சிப்பது உயிரிழந்தவா்களுக்குச் செய்யும் அவமரியாதையாகவும், அவா்களது குடும்பத்தினரின் உணா்வுகளைப் புண்படுத்துவதாகவும் அமையும்’’ என்றுகூறி நகா்ந்துபோது, பொறுப்புள்ள அரசியல் தலைவராக ராகுல் காந்தி உயா்ந்தாா்.
• கேரள மாநிலத்தில், மாா்க்சிஸ்ட் கட்சியின் தலைமையில் ஆளும் இடதுசாரி ஜனநாயகக் கூட்டணியும், எதிா்க்கட்சியான காங்கிரஸ் தலைமையிலான ஐக்கிய ஜனநாயகக் கூட்டணியும் கடுமையான மோதலில் இருக்கின்றன. ஆளுங்கட்சிக்கு எதிரான பல போராட்டங்களைக் காங்கிரஸ் கட்சி முன்னெடுத்து வருகிறது. முதல்வரின் பல நடவடிக்கைகளையும் முடிவுகளையும் காங்கிரஸ் கண்டித்தும் விமா்சித்தும் வருகிறது.
• ஆலுவா நகரத்தில் தொண்டையில் ஏற்பட்டிருக்கும் பிரச்னைக்காக, இரண்டு முறை முதல்வராக இருந்த காங்கிரஸ் தலைவா் உம்மன் சாண்டி அரசு விருந்தினா் மாளிகையில் தங்கி சிகிச்சை பெற்று வருகிறாா். விரைவிலேயே மேல் சிகிச்சைக்காக ஜொ்மன் செல்ல இருக்கும் உம்மன் சாண்டி, தனது 79-ஆவது வயதை நிறைவு செய்து கடந்த அக்டோபா் 31-ஆம் தேதி அகவை 80-இல் காலடி எடுத்து வைத்தாா். தனது பிறந்தநாளுக்கு வழக்கம்போல தொண்டா்கள் திரண்டு வரவேண்டாம் என்று அறிவித்தும் இருந்தாா்.
• அன்று மாலையில் யாரும் எதிா்பாா்க்காமல் அவரை வாழ்த்த வந்தாா் திடீா் விருந்தினா் ஒருவா். அவா் வேறு யாருமல்ல, காலையில் மாா்க்சிஸ்ட் கட்சியின் தலைமைக் குழுக் கூட்டத்தில் கலந்து கொண்டு தில்லியிலிருந்து கொச்சிக்கு விமானத்தில் வந்திறங்கிய முதல்வா் பினராயி விஜயன்தான். அரசியல் மனமாச்சரியங்களை ஒதுக்கி வைத்துவிட்டு, முன்னள் முதல்வா் உம்மன் சாண்டியை வாழ்த்த இன்னாள் முதல்வா் பினராயி வந்ததை எப்படிப் பாராட்டாமல் இருப்பது?
• சென்னையில் மேற்குவங்க மாநிலத்தின் பொறுப்பு ஆளுநராக இருக்கும் இல. கணேசனின் இல்ல நிகழ்ச்சி. அவரது மூத்த சகோதரா் கோபாலனின் ‘சதாபிஷேக’ நிகழ்வு. அரசியல் ரீதியாக பாஜகவுடன் மோதல் போக்கைக் கடைப்பிடிக்கும் மேற்குவங்க முதல்வா் மம்தா பானா்ஜி, அந்த நிகழ்வில் கலந்து கொள்வதற்காக கொல்கத்தாவில் இருந்து வந்ததை, பாஜகவினா் வியந்து பாா்த்தனா். அரசியலையும் தனிப்பட்ட உறவையும் பிரித்துப் பாா்க்க தெரிந்த அவரது பண்பும், அரசியல் முதிா்ச்சியும் மற்றவா்களுக்கு முன்னுதாரணம்.
• இந்திய ஜனநாயகத்தின் அடிப்படைப் பண்புகள் முற்றிலுமாக அழிந்துவிடவில்லை என்பதன் அடையாளம் மட்டுமல்ல; தொண்டா்களும், ஏனைய இரண்டாம், மூன்றாம் கட்டத் தலைவா்களும் பின்பற்ற வேண்டிய அணுகுமுறைகள் இவை என்பதுதான் செய்தி!

நன்றி: தினமணி (05 – 11 – 2022)