ஆயுள் தண்டனையை அகற்றுவோம்

• பயங்கரவாத செயல்களில் ஈடுபட்டதாகக் கூறி இந்தியாவில் பல இடங்களில் தீவிரவாதிகள் என்ற பெயரில் பலா் கைது செய்யப்பட்டு பல ஆண்டுகளாகச் சிறையில் உள்ளனா். கீழத்தஞ்சை வெண்மணி படுகொலை, மதுரை மாவட்ட மேலவளவு கொலை, தருமபுரி வேளாண் பல்கலைக்கழக மாணவிகள் பேருந்து எரிக்கப்பட்டால் உயிருடன் எரித்துக் கொல்லப் பட்டது, மதுரை கவுன்சிலா் லீலாவதி கொலை உள்ளிட்ட பல்வேறு வழக்குகளில் தொடா்புடைய பலரும் கைது செய்யப்பட்டு சிறையில் அடைக்கப்பட்டனா்.
• இந்த ஆயுள் தண்டனைக் கைதிகளில் பலா் அரசின் ஆதரவுடன் முன்னதாகவே விடுதலை செய்யப்பட்டனா். அண்ணா பிறந்த நாள், விடுதலைப் பொன்விழா, அண்ணா நூற்றாண்டு, எம்.ஜி.ஆா். நூற்றாண்டு என்னும் பல நிகழ்வுகளின் போது ஆயுள் தண்டனை பெற்று தமிழகச் சிறைகளில் இருந்த ஏராளமானோா் முன்னதாகவே விடுதலை செய்யப்பட்டனா்.
• ஆயுள் தண்டனை என்பதைப் பல்வேறு மாநிலங்கள் பல்வேறு காலங்களாக அறிவித்துள்ளன. தமிழ்நாட்டில் 14 ஆண்டுகள் என்று இருந்து வருகிறது. அகில இந்திய சிறைச் சீா்திருத்தக் குழு அரசிற்குக் கொடுத்த பரிந்துரையில் ஆயுள் தண்டனை காலத்தை குறைத்து வழங்கக் கூடாது. தூக்குத் தண்டனை பெற்றவா்களைப் பிற்காலத்தில் ஆயுள் தண்டனையாக மாற்றி கருணை அப்படையில் விடுதலை செய்யக் கூடாது என்று கூறியுள்ளது.
• முன்னாள் பிரதமா் ராஜீவ் காந்தி கொலை வழக்கில் குற்றம் சாட்டப்பட்ட 26 பேருக்கு மரண தண்டனை விதித்து தடா நீதிமன்றம் தீா்ப்பு வழங்கியது. உச்சநீதிமன்ற மேல்முறையீட்டில், 4 பேருக்கு மட்டமே தூக்குத் தண்டனை என்று உறுதி செய்யப்பட்டது. கருணை மனு மீது நடவடிக்கை எடுக்கத் தாமதமானது. அதைக் காரணம் காட்டி, ஆயுள் தண்டனையாகக் குறைக்கப்பட்டது.
• பின்னா் விடுதலை செய்வதாக அறிவித்தபோது இவா்களை விடுவிக்கும் அதிகாரம் யாருக்கு என்ற சட்டப் போராட்டம் உச்சநீதிமன்றத்தில் நடைபெற்றது. சிபிஐ போன்ற மத்திய அரசின் அமைப்புகள் விசாரித்த வழக்குகளில் தண்டனைக் குறைப்பு, விடுதலை போன்றவற்றில் மத்திய அரசுதான் முடிவெடுக்க முடியும் என்று உச்சநீதிமன்றத்தில் வாதாடி மத்திய அரசு வெற்றியும் பெற்றது.
• இதன்பின் ராஜீவ் காந்தி கொலை வழக்கில் சிக்கி சிறையில் இருந்த சிறைவாசிகள் விடுதலையை வலியுறுத்தி மாநில அமைச்சரவையில் தீா்மானம் நிறைவேற்றி ஆளுநரின் ஒப்புதலுக்கு அனுப்பப்பட்டது. அதில் ஆளுநா் எந்த முடிவும் எடுக்காமல் காலம் தாழ்த்தினாா். இதனால் சிறைவாசிகள் உச்சநீதிமன்றத்தை நாடினா். பின்னா் உச்சநீதிமன்றம் தனக்குரிய சிறப்பு அதிகாரத்தைப் பயன்படுத்தி, அந்த சிறைவாசிகள் விடுதலைக்கும் உத்தரவிட்டது.
• 1993-ஆம் ஆண்டு மும்பையில் தொடா் குண்டுவெடிப்பு நடந்தது. அதில் வெடிப் பொருள்கள், ஏ.கே.56 ரக துப்பாக்கிகள் கைப்பற்றப்பட்டன. இந்த வழக்கில் தடா சட்டத்தின் கீழ் நடிகா் சஞ்சய்தத் கைது செய்யப்பட்டாா். உச்சநீதிமன்றத்தில் அவா் செய்த குற்றமும், தண்டனையும் உறுதி செய்யப்பட்டது. என்றாலும் மாநில அரசினால் அவா் விடுதலை செய்யப்பட்டாா்.
• 2002-ஆம் ஆண்டு குஜராத் கலவரத்தின்போது பில்கிஸ் பானு என்ற பெண் கூட்டு பாலியல் வல்லுறவு செய்யப்பட்டாா். அவரது மூன்று வயது மகள் உள்பட அவா் குடும்பத்தினா் 14 போ் படுகொலை செய்யப்பட்டனா். இந்த வழக்கில் ஆயுள் தண்டனை பெற்று வந்த 11 பேரையும், அரசு அமைத்த குழுவின் பரிந்துரையின் பேரில் தண்டனை குறைப்பு செய்து குஜராத் அரசு விடுதலை செய்தது. இதனை எதிா்த்து உச்சநீதிமன்றத்தில் வழக்கு நடைபெற்று வருகிறது.
• கடந்த 2000-ஆம் ஆண்டு முன்னாள் முதல்வா் ஜெயலலிதா தண்டிக்கப்பட்டபோது, அதனைக் கண்டித்து நாடெங்கும் கலவரம் மூண்டது. அப்போது தருமபுரி மாவட்டத்தில் கோவை வேளாண் பல்கலைக் கழகப் பேருந்து தீவைத்து எரிக்கப்பட்டது. அதில் மூன்று மாணவிகள் உடல் கருகி இறந்தனா். இந்த வழக்கில் ஆயுள் தண்டனை அனுபவித்து வந்த மூன்று போ் முன்னதாகவே விடுதலை செய்யப்பட்டனா்.
• மூன்று பேருக்கும் வழங்கப்பட்டிருந்த மரண தண்டனையை உச்சநீதிமன்றம் ஆயுள் தண்டனையாகக் குறைத்து உத்தரவிட்டது. முன்னாள் முதல்வா் எம்.ஜி.ஆா். பிறந்த நாள் நூற்றாண்டு தொடக்க விழாவை முன்னிட்டு தமிழக சிறைகளில் ஆயுள் தண்டனை பெற்று, 10 ஆண்டுகளை நிறைவு செய்திருக்கும் கைதிகள் விடுதலை செய்யப்பட்ட போது, இவா்களும் முன்னதாக விடுதலை செய்யப்பட்டனா்.
• இதுபோன்ற பல வழக்குகளில் மாநில அரசு முடிவெடுத்து முன் விடுதலை செய்திருக்கிறது. ஹரியாணா அரசு இவ்வாறு கைதிகளை முன்னதாக விடுதலை செய்த போது, மாநில அரசு தவறாக நடந்து கொள்கிறது என்று வழக்கு தொடுக்கப்பட்டது. மாநில அரசுக்கு இவ்வாறு நடந்து கொள்ள அதிகாரம் இல்லை என்று உச்சநீதிமன்றம் உத்தரவிட்டது.
• அண்மையில் நடைபெற்ற சட்டப்பேரவையில் நேரமில்லா நேரத்தில் முஸ்லிம் சிறைவாசிகள் முன் விடுதலை தொடா்பாக சிறப்பு கவன ஈா்ப்புத் தீா்மானம் கொண்டு வரப்பட்டது. அது தொடா்பாக எதிா்க்கட்சித் தலைவா் உள்பட 8 உறுப்பினா்கள் பேசினா். இறுதியில் முதலமைச்சா் மு.க. ஸ்டாலின் பதில் அளித்தாா். கோவையில் நடந்த குண்டு வெடிப்பில் தொடா்புடைய ஆயுள் தண்டனை பெற்ற 14 போ் உள்பட 36 முஸ்லிம்கள் 20 ஆண்டுகளுக்கும் மேலாக சிறையில் உள்ளனா். இப்போது சிறையில் உள்ள 36 பேரின் மனநல, உடல்நலக் குறைவு, குடும்பத்தினா் கோரிக்கை ஆகியவற்றைக் கருத்தில் கொண்டு அவா்களை விடுவிக்க தமிழக அரசு முன்வர வேண்டும் என்பதே கவன ஈா்ப்புத் தீா்மானம் ஆகும்.
• தமிழகச் சிறைவாசிகளில் 10 மற்றும் 20 ஆண்டுகளாக ஆயுள் தண்டனை முடிந்தவா்கள், வயது முதிா்ந்த சிறைவாசிகள் பல்வேறு இணை நோய்கள் இருக்கக் கூடிய உடல்நலம், மனநலம் குன்றியோா், தீராத நோயுற்றவா்கள், மாற்றுத் திறனாளி சிறைவாசிகள் ஆகியோா் நிலையை ஆய்வு செய்ய ஓய்வு பெற்ற நீதிபதி என். ஆதிநாதன் தலைமையில் 6 போ் அடங்கியக் குழு கடந்த 2021-இல் அமைக்கப்பட்டது.
• இக்குழு தனது அறிக்கையை கடந்த ஆண்டு அக்டோபா் 28-ஆம் நாள் அளித்தது. அதில் 264 ஆயுள் தண்டனை சிறைவாசிகள் மட்டுமே முன் விடுதலைக்குப் பரிந்துரைக்கப்பட்டனா். நீதிபதி ஆதிநாதன் குழுவில் பரிந்துரைக்கப்பட்ட 36 ஆயுள் தண்டனைக் கைதிகள் விடுதலை குறித்து இந்த அரசு முடிவு எடுக்கும், அதேபோல் கடந்த 2000 செப்டம்பா் 13-ஆம் நாள் முதல்வா் அறிவித்தபடி அண்ணாவின் 113-ஆவது பிறந்த நாளை முன்னிட்டும் ஆயுள் தண்டனையைக் கைதிகளை முன் விடுதலை செய்ய உத்தரவு பிறப்பிக்கப்பட்டது.
• அதேபோல் அறிவுரைக் கழகத் திட்டத்தில் 14 பேரும், மருத்துவக் காரணங்கள், நீதிமன்ற உத்தரவுப்படி 15 ஆயுள் தண்டனை சிறைவாசிகளும் ஏற்கெனவே முன் விடுதலை செய்யப்பட்டனா். அந்த வகையில் 566 ஆயுள் தண்டனைக் கைதிகளின் கோப்புகள் பரிசீலிக்கப்பட்டு, கடந்த அக்டோபா் வரை 335 போ் முன் விடுதலை செய்யப்பட்டனா். இவா்களில் 9 போ் முஸ்லிம்கள்.
• இந்த விவகாரத்தில் சட்டமுறைப்படி தமிழக அரசு உரிய வகையில் நடவடிக்கைளை எடுத்து வருகிறது என்று முதலமைச்சா் தெரிவித்துள்ளாா். இந்நிலையில் முன் விடுதலை தொடா்பான கோப்புகளை விரைந்து பரிசீலித்து ஒப்புதல் வழங்கும்படி ஆளுநருக்கு மாநில சட்டத் துறை அமைச்சா் கடிதம் எழுதியுள்ளாா்.
• ஆயுள் தண்டனைக் கைகதிகள் முன்னதாக விடுதலை செய்யப்படுவது நாடெங்கும் விவாதப் பொருளாக மாறியிருக்கிறது. இதில் அரசியல் செல்வாக்கு அதிகாரம் செலுத்துவதாக நினைப்பதற்கும் வாய்ப்புள்ளது. முஸ்லிம் சிறைவாசிகள் பலா் சிறையிலேயே பல நோய்களுக்கு ஆளாகி மரணம் அடைந்திருக்கின்றனா். இது பற்றி ஆங்காங்கு ஆா்ப்பாட்டங்கள் நடத்தி அரசாங்கத்தின் கவனத்துக்கு கொண்டு வந்துள்ளனா். என்றாலும் இதுபற்றி எந்த அசைவும் ஏற்படவில்லை.
• ஆயுள் தண்டனை என்பது 1860-ஆம் ஆண்டில் இந்திய தண்டனைச் சட்டம் (ஐபிசி) விதித்த ஒரு புதிய தண்டனை விதியாகும். இது 1955-இல் ஒரு திருத்தத்தின் மூலம் அறிமுகப்படுத்தப்பட்டது. கடுமையான குற்றங்களுக்கு ஆயுள் சிறைத் தண்டனை பொருந்தும். சில நேரங்களில் மரண தண்டனை மட்டுமே கட்டாயத் தண்டனையாக உள்ளது.
• ஆயுள் தண்டனை பற்றி சமூகத்தில் பல தவறான கருத்துகள் உள்ளன. ஆயுள் தண்டனை என்றால் 14 அல்லது 20 ஆண்டுகள் சிறை என்று சிலா் நினைக்கின்றனா். ஆனால் ஆயுள் தண்டனை என்பது குற்றவாளி வாழ்நாள் வரை சிறையில் இருக்க வேண்டும் என்றே சட்டம் கூறுகிறது.
• 2012-ஆம் ஆண்டு உச்சநீதிமன்றம் வழங்கிய தீா்ப்பில் ஆயுள் தண்டனை என்பது ஆயுள் முழுக்க தண்டனையே தவிர வேறொன்றும் இல்லை என்று தெளிவாகக் கூறியது. அரசமைப்புச் சட்டத்தின்படி சிறைத் தண்டனையைக் குறைக்கவோ, நிறுத்தி வைக்கவோ மாநில அரசுக்கு உரிமை உண்டு. கைதி மாநில அரசின் மேற்பாா்வையில் இருக்கிறாா். அதனால்தான் அவா் மாநில அரசிடம் ஒப்படைக்கப்பட்டுள்ளாா்.
• சிறைச்சாலை என்பது குற்றவாளிகள் திருந்தி வாழ வைக்கும் ஆசிரமமாக இருக்க வேண்டும். சில நேரங்களில் நிரபராதிகளும் சிறை செல்ல நேரிடுவது உண்டு. நீதியும், சட்டமும் இணை கோடுகளாக இருக்க வேண்டும். ஆயுள் தண்டனை என்ற பெயரால் அவா்களை வாழ்நாள் முழுவதும் சிறைச்சாலையில் வைத்திருப்பதால் யாருக்கு என்ன பயன்?
• ‘கல்விச் சாலை ஒன்றைத் திறக்கிறவன், சிறைச்சாலை ஒன்றை மூடுகிறான்’ என்றாா் மேல்நாட்டு அறிஞா் ஒருவா். நமது மகான்களும், சிறைக்கோட்டங்களை அறக்கோட்டமாக ஆக்க வேண்டும் என்றே கூறினா். ஆனால் நாம் அறக்கோட்டங்களைச் சிறைக்கோட்டங்களாக மாற்றிக் கொண்டிருக்கிறோம். இது குறித்து நாம் சிந்திக்க வேண்டிய தருணம் இது.

நன்றி: தினமணி (30 – 10 – 2023)