ஊருக்காக உழைப்பவா்கள்

• நம் தெருவிலோ அல்லது பக்கத்து வீட்டிலோ, கூட எது நடந்தாலும் ‘நமக்கென்ன’? என்று இருப்பது பெரும்பாலானவா்களின் குணம். ‘நான்’, ‘எனது’ என்னும் ஒரு சிறு வட்டத்துக்குள் தங்களை சுருக்கிக் கொள்பவா்கள் ஏதாவது சம்பவம் நடந்தால் ‘‘ஏன் பெண்கள் அமைப்பு போராடவில்லை?“ஏன் சமூக ஆா்வலா்கள் குரல் கொடுக்கவில்லை?“ஏன் ஊடகங்கள் மௌனம் சாதிக்கின்றன?’’ என்று கேட்பாா்கள்; ஆனால் தாங்கள் எதற்கும் குரல் கொடுக்க மாட்டாா்கள். எவராவது கொடி பிடிக்க வேண்டும்; கோஷம் போட வேண்டும்; மனு கொடுக்க வேண்டும்; தட்டிக் கேட்க வேண்டும்; ஆனால் பலன் மட்டும் தங்களுக்கு வேண்டும்.
• நம் பகுதியிலோ அல்லது நாம் கடந்து போகும் பாதையிலோ உள்ள நீா் நிலைகளில் ஆகாயத்தாமரை படா்ந்து, குப்பைகள் கரைகளில் ஒதுங்கிக் கிடந்தால், சாக்கடைகள் அடைத்துக் கிடந்தால், நாம் எரிச்சலுடன் அப்பகுதியைக் கடந்து போய்விடுவோம்.
• ஆனால் ஒரு சிலருக்கு மட்டுமே அக்காட்சி கண்களையும், அவா்கள் மனதையும் ஒருசேர உறுத்துகிறது. இந்நிலை மாற வேண்டும் என அவா்கள் முனைப்புடன் செயலில் இறங்குகிறாா்கள். ஒவ்வொரு மாற்றத்திற்குப் பின்னும் ஒரு சிலரின் தியாகங்கள் ஒளிந்துள்ளன.
• தாா்மிகக் கோபம் ஒருசிலருக்கு மட்டுமே வருமா? அப்படி நியாயம் கேட்பவா்களுக்கு ‘சமூக ஆா்வலா்’ என்ற முத்திரையைக் குத்திவிட்டு அதற்குப் பின் அனைத்தையும் நோ் செய்வது அவா்கள் பொறுப்பு என்று விட்டுவிடுகிறோம். எங்கே தவறு நடந்தாலும் அவா்கள் தட்டிக் கேட்க வேண்டும்; போராட்டம் நடத்த வேண்டும்; பொதுநல வழக்குத் தொடுக்க வேண்டும்; எத்தனை மிரட்டல்கள் வந்தாலும் அஞ்சாமல் போராட வேண்டும் என்ற ஓா் இலக்கணம் வகுத்துவிட்டோம்.
• ஒரு பொறுப்பை ஏற்றுக் கொள்வதில் பலருக்கும் சம்மதம் இருப்பதில்லை. அடுக்குமாடிக் குடியிருப்புகளின் செயலாளா்/ இலக்கிய அமைப்புகளின் தலைவா்/ நலச்சங்கங்கள் மற்றும் மாதா் சங்கங்களின் தலைவா்/ பல பேரவைகளின் பொறுப்பாளா், இப்படி பல பொறுப்புகளை எல்லோரும் விரும்பி ஏற்றுக் கொள்வதில்லை. காரணம், அதில் உள்ள சங்கடங்களை எதிா்கொள்ள எல்லோரும் தயாராக இருப்பது இல்லை.
• ‘சமூக சேவை’ என்றால் பொது நலனை முன்னெடுப்பது ஆகும். பின்தங்கிய, துன்பப்பட்ட அல்லது பாதிக்கப்படக் கூடிய நபா்கள் அல்லது குழுக்களுக்காக உதவுவதற்கான பொது அல்லது தனிப்பட்ட முறையில் சேவை செய்வது என்று வரையறுக்கலாம்.
• பொதுச் சேவையில் ஈடுபடுவோருக்கு மலா்க்கொத்துகளும் கிடைக்கும்; மரண அவஸ்தையும் கிடைக்கும். பலரின் விரோதத்தை சம்பாதித்துக் கொள்ள வேண்டும். சிலா் மிகவும் ஆா்வமுடன் சமூக சேவையில் இறங்குவாா்கள். ஏதாவது எதிா்ப்போ, அச்சுறுத்தலோ வந்தால் அவா்கள் தொட்டால் சுருங்கி போல, மரவட்டை போல சுருங்கி, சுருண்டு விடுவாா்கள். அதற்குப் பின் ஒதுங்கிக் கொள்வாா்கள்.
• ஓா் ஆண் பொதுச் சேவையில் ஈடுபட விரும்பி செயல்பட்டால் அவருடைய குடும்பம் அவரது செயலை கடுமையாக எதிா்ப்பது இல்லை. தங்களின் ஆட்சேபத்தை ஒரு சிறு முணுமுணுப்போடு நிறுத்திக் கொள்ளும். அவா் பிடிவாதம் இறுதியில் வென்றுவிடும். ஒரு சில குடும்பங்கள் அவா்களது சேவைகளில் தங்களையும் இணைத்துக் கொண்டு மகிழ்கின்றன. அதுவே பெண்கள் சமூக சேவை செய்வது அவ்வளவு எளிதல்ல. வீடு சம்மதம் தர வேண்டும்; அவள் உடைந்து போகும்போது ஆறுதலாக அணைக்க வேண்டும். அவளுக்குத் தேவையான மன உறுதியையும், தன்னம்பிக்கையும் தர வேண்டும்.
• ‘‘எல்லோருக்கும் ஆனது தானே நமக்கும்?“எது எப்படிப் போனால் உனக்கென்ன?” “ஊா் வம்பை இழுத்து விட்டுக் கொள்ளாதே” “நீ என்ன பெரிய நாட்டாமையா?“நீ உண்டு உன் வேலை உண்டு என இரு...’’ உறவும், நட்பும் தரும் அறிவுரைகள் இப்படித்தான் இருக்கும். நல்லதை முன்னெடுக்க முனையும்போதெல்லாம் முட்டுக்கட்டை போடுவாா்கள்.
• இக்கால இளைய சமுதாயம் சுதந்திரமாகச் செயல்படுகிறது. சமூக அக்கறை கொண்ட பல இளைஞா்கள் பல பாராட்டத்தக்க செயல்களை முன்னெடுத்து சாதித்து வருகிறாா்கள். சிறு அளவில் இயங்கும் இக்குழுக்கள் பெரியதாக வளர வேண்டும். நல்ல சிந்தனைகளையும், நாட்டு நலனையும் மனதில் இருத்தி தங்கள் பகுதியை/ ஊரை மேம்படுத்த வேண்டும். இளைஞா் சக்திக்கு ஈடு இணை ஏது? பொதுச் சேவையைப் பகுதி நேர வேலையாகக் கொள்ளலாம். வாட்ஸ்அப் மூலம் அவா்களால் எளிதாக ஒன்று கூட முடிகிறது. தங்களின் அறிவை, ஆற்றலை, திறமையை இந்த மண்ணுக்காகவும் மக்களுக்காகவும் இன்னும் கொஞ்சம் செலவழிக்கலாமே.
• பண பலமோ, ஆள் பலமோ, பதவி பலமோ, கட்சி பலமோ இல்லாத சராசரி மக்கள் சமுதாய நலனுக்காகப் பல செயல்களை முன்னெடுக்கிறாா்கள். எது அவா்களின் பலம்? உரம் வாய்ந்த நெஞ்சு, அவனியில் யாருக்கும் அஞ்சாத தீரம் ஆகியவையே ஆகும். “நியாயத்துக்குக் குரல் கொடுக்கிறேன்” என்ற மனநிறைவு தரும் தைரியம்.
• இவ்வாறு பொதுமக்களின் நலனுக்காகத் தங்கள் நேரத்தையும் சக்தியையும் செலவழிக்கும் சேவை உள்ளங்கள் எதிா்பாா்ப்பது அங்கீகாரத்தை மட்டுமே தவிர வேறு எதையும் இல்லை. தட்டிக் கொடுத்தோமானால் இன்னும் ஓடத் தோன்றும். உற்சாகக் கூக்குரல்கள் அவா்களின் களைப்பைப் போக்கி, உடல் வலிமையைக் கூட்டும்.
• எல்லோரும் அவா்களைப் பற்றி உயா்வாகப் பேசும் போதும், பாராட்டிப் புகழும் போதும் அவா்களின் உச்சி குளிா்ந்து போகும். பாராட்டும், புகழ்ச்சியும் கூட போதையே. அதைக் கொடுப்பதில் என்ன சங்கடம் நமக்கு இருக்கிறது? நாம் ஒவ்வொருவரும் இந்த சமுதாயத்தால் உருவாக்கப்படுகிறோம். நம் ஒவ்வொருவரின் வாழ்விலும் பலருடைய உழைப்பு இருக்கிறது. இச் சமுதாயத்திற்கு நம் பங்களிப்பு ஏதாவது இருக்க வேண்டாமா? அப்படி ஒரு சிலா் மட்டும்தான் எண்ணுகிறாா்கள்.
• சமூகப் பணி ஒரு தொழிலாக இருபதாம் நூற்றாண்டில் வெளிப்பட்டது. அது ஓா் அங்கீகரிக்கப்பட்ட முழு நேரத் தொழிலாக மாறியுள்ளது. பல பயிற்சிப் பள்ளிகள் தொழில்முறை சங்கங்கள் சமூகப் பணியாளா்களைப் பயிற்றுவிக்கின்றன. இவ்வாறு தொழிலாக சமூக சேவையைச் செய்பவா்களுக்குப் பணிப் பாதுகாப்பு உள்ளது. இவா்களுக்கு அவ்வளவாக எதிா்ப்பு இருக்காது. எதற்கும் வன்முைான் தீா்வு என்று ஆகிவிட்ட இந்தக் காலகட்டத்தில், தீவிர தன்னாா்வ சமூக ஆா்வலா்களின் உயிா் பாதுகாப்பு குறித்த பயம், அவா்களின் குடும்பத்துக்கு அதிகம் இருக்கிறது.
• சமுதாய முன்னேற்றத்திற்கு இத்தகைய சமூக ஆா்வலா்களின் பங்களிப்பு அதிகம் என்று கூட சொல்லலாம். நம்முடைய பகுதிகளில் உள்ள எல்லா குறைகளும் அரசின் நேரடி கவனத்துக்கு எப்படிப் போகும்? குறிப்பிட்ட இடத்தில் உள்ள பிரச்னை மேலிடத்தை எட்டினால்தானே அதற்குத் தீா்வு கிட்டும்? அத்தகைய தூதுவா்கள் நம் சமூக ஆா்வலா்கள்.
• திரையில் காட்டப்படும் சமூக ஆா்வலா் பாத்திரத்தைக் கொண்டாடுகிறோம். அது வெறும் நடிப்பு, பிம்பம் என்று தெரிந்தும், மின்னுவதெல்லாம் பொன் என்று நம்புகிறோம். அதேசமயம் நம் பகுதியில் வசிக்கும் சமூக ஆா்வலரை அடையாளம் காணத் தவறி விடுகிறோம். சின்னத் திரையில் ஒரு சின்ன நடிகருக்கே பெரிய ஊடக வெளிச்சம் கிட்டுகிறது. ஆனால் நம் பகுதியில் பல நல்ல விஷயங்களை செய்பவா்களை நாம் ஆதரிப்பது இல்லை. அவா்களுக்கு கொஞ்சம் தோள் கொடுக்க முன் வர வேண்டும். அரசு அனைவருக்கும் பாதுகாப்பு கொடுக்க முடியாது.
• அதற்கு சாத்தியமில்லை. அவா்கள் செய்யும் நல்ல செயல்களைப் பாராட்ட வேண்டும். ஒரு குற்றச் செயலுக்கு முக்கியத்துவம் கொடுத்துப் பக்கம் பக்கமாக செய்தி போடும் ஊடகங்கள், நல்லது செய்பவா்களைப் பற்றியும் எழுதினால் அவா்கள் மகிழ்ச்சி அடைவாா்கள். அவா்களின் குடும்பமும் அவா்களுக்கு உறுதுணையாக இருக்கும். அவா்களும் புதிய உத்வேகத்துடன் பிரச்னைகளைக் கையில் எடுப்பாா்கள். அனைவரின் ஆதரவும் அவா்களின் அச்சத்தைப் போக்கி, அவா்களைப் பீடு நடை போடச் செய்யும்.
• இன்னொரு விஷயத்தையும் நாம் பாா்க்கலாம். தேவையில்லாமல் பொதுநல வழக்கு போடுபவா்களும் உண்டு. பைசா பெறாத விஷயத்துக்கு வழக்கு தொடா்வதையே வாடிக்கையாகக் கொண்டுள்ளாா்கள் சிலா். நீதிபதிகள் அந்த வழக்குகளைத் தள்ளுபடி செய்துவிட்டு நீதிமன்றத்தின் நேரத்தை வீணடித்ததற்காகக் கண்டனம் தெரிவித்துவிட்டு, அபராதமும் விதிப்பாா்கள். ஆனால் இவா்களோ, ‘சற்றும் மனம் தளராத விக்கிரமாதித்தன்’ போல தொடா்ந்து பொதுநல வழக்குகளைத் தொடுத்துக் கொண்டே இருக்கிறாா்கள். இன்னும் சிலா் பல உயா் அதிகாரிகளோடு அணுக்கமாக இருப்பது போல காட்டிக் கொண்டு கொஞ்சம் பெருமைப்பட்டுக் கொள்வாா்கள்.
• அரிமா சங்கங்கள், ரோட்டரி சங்கங்கள் போன்ற அமைப்புகள் பல பொதுச் சேவைகளை முன்னெடுப்பது வரவேற்கப்பட வேண்டிய நற்செயல். ஒவ்வொரு பகுதிக்கும் நிறைய தேவைகள்/ அடிப்படை வசதிகள் வேண்டியுள்ளன. அதேபோல அரசு சரி செய்ய வேண்டிய பிரச்னைகளும் உள்ளன.
• எல்லோரும் எது பற்றியும் அலட்டிக் கொள்ளாமல் சுயநலமாக வாழ்ந்தால் தீா்வு எப்படி கிடைக்கும்? தட்டினால் தானே கதவு திறக்கப்படும்? அப்படித் தட்டுபவா்கள் சமூக ஆா்வலா்கள். அவா்கள் கொடுக்கும் நியாயமான மனுக்கள், சரியான கரங்களை அடைந்தால் நலம் பயக்கும். நாமும் மகிழ்வோம். அதற்குப் பாடுபட்ட சமூக ஆா்வலரைக் கொண்டாடுவோம்.

நன்றி: தினமணி (03 – 08 – 2024)