கள ஆய்வுப் படைப்பாளி

கள ஆய்வுப் படைப்பாளி

• மறைந்த எழுத்​தாளர் ராஜம் கிருஷ்ணனின் நூற்றாண்டு இன்று தொடங்​கு​கிறது. தமிழில் சுமார் 50 ஆண்டு​களுக்கும் மேலாகத் தொடர்ந்து எழுதிவந்த ராஜம் கிருஷ்ணன், நாவல்கள், சிறுகதைகள், கட்டுரைகள் என்று 70-க்கும் மேற்பட்ட படைப்பு​களைத் தந்தவர். சாகித்ய அகாடமி விருது, சோவியத் லேண்ட் நேரு விருது, சாஷ்வதி நஞ்சங்கோடு திருமலாம்பாள் விருது, பாரதிய பாஷா பரிஷத் விருது, திரு.​வி.க. விருது போன்ற பல முக்கிய விருதுகளைப் பெற்றவர்.

மகத்தான படைப்புகள்:

• தமிழ்ப் பத்திரிகை உலகம் ஆரம்பம் முதலே இவரது எழுத்​துக்​களைப் பரிசளித்துக் கௌரவித்தது. தொடராகப் பதிப்​பித்தது. மற்ற பெண் எழுத்​தாளர்​களைப் போல் குடும்ப அமைப்​புக்குள் கிடைத்த அனுபவங்களை மட்டுமே எழுதுவது இவருக்கு உடன்பாடாக இல்லை. பெண் என்றால் குடும்பம் மட்டும்​தானா? அதைத் தாண்டி சமூகம், பொருளா​தாரம், அரசியல் என்று பல தளங்களில் அவள் சிந்திக்கக் கூடாதா? ஒரு புதிய எழுச்​சி​யுடன் தனக்கான களங்களை நோக்கி அவர் பயணித்​தார்.
• மின்பொறி​யாளரான கணவர் கிருஷ்ணனுக்கு குந்தா அணைக்​கட்டில் வேலை கிடைத்​த​தால், ஊட்டியில் வசிக்கத் தொடங்​கினார் ராஜம் கிருஷ்ணன். அங்கிருந்த படுகர் இனத்தவரைப் பற்றித் தகவல்​களைத் திரட்டி அவர் எழுதிய நாவல் ‘குறிஞ்​சித்தேன்’ (1960). அந்த மண்ணுக்கே உரிய பயிர்​களைத் தவிர்த்துப் பணப்ப​யிர்களை நாடிச் செல்லும் புதிய பொருளா​தாரத் தேடல் எப்படி அவர்களின் இயல்பு வாழ்க்கையைப் பாதித்தது என்பதை இந்த நாவலில் விவரித்துள்ளார்.
• குந்தா அணைத் திட்டத்தைத் தொடங்கி​வைத்த பிரதமர் நேரு, “இது போன்ற திட்டங்களே இனி நம்முடைய கோயில்கள், மசூதிகள், சர்ச்​சுகள், குருத்​வாராக்கள்” என்று முழங்​கினார். அவருடைய வார்த்​தைகளால் உந்தப்பட்ட ராஜம் கிருஷ்ணன், ‘அமுதமாகி வருக’ (1965) நாவலில், ஒரு அணைத் திட்டத்தை வெற்றிகரமாக உருவாக்கி, மின்சா​ரத்தைக் கொண்டு​வந்து ஒளியூட்டும் பணிகளை அதன் பல்வேறு பரிமாணங்​களுடன் விவரித்​திருக்​கிறார்.
• கோவாவில் வசிக்க நேர்ந்தபோது அந்த ஊரும் சூழலும் அதன் தனித்​தன்​மையும் ராஜம் கிருஷ்ணனை மிகவும் கவர்ந்தன. போர்த்​துக்​கீசி​யரிட​மிருந்து கோவா விடுதலை பெற்ற வரலாற்றுப் பின்னணி​யுடன் ஒரு நீண்ட நாவலை எழுதினார். அகோதா கோட்டையின் தனிமைச் சிறையில் சூரியனையே பார்க்​காமல் பல மாதங்​களைக் கழித்த போராட்ட வீரர்​களைப் பற்றி நெகிழ்ச்​சி​யுடன் விவரித்த அந்த நாவல் ‘வளைக்​கரம்’ (1967).
• மகாத்மா காந்தியின் நூற்றாண்டு விழாவையொட்டி (1968) காந்தி​யத்தின் தாக்கம் இந்த மண்ணில் எப்படி இருக்​கிறது என்கிற கேள்வி​யுடன் அன்றைய யதார்த்​தத்தைப் படம்பிடித்துக் காட்டிய நாவல் ‘வேருக்கு நீர்’ (1972). 1973ஆம் ஆண்டுக்கான சாகித்ய அகாடமி விருது இந்த நாவலுக்கு அளிக்​கப்​பட்டது.
• சுதந்திர இந்தியா​வுக்குப் பெரிய சவாலாக இருந்த சம்பல் கொள்ளையர், ஆச்சார்ய வினோபா பாவே, ஜெயப்​பிரகாஷ் நாராயண் ஆகியோரின் முயற்​சியால் தங்கள் ஆயுதங்களை விட்டு​விட்டுப் புதிய வாழ்வா​தா​ரங்​களைத் தேடத் தொடங்கிய காலம் அது. வன்முறையின் சுவடு முற்றி​லு​மாகத் தீர்ந்​திருக்க​வில்லை.
• ஆபத்து நிறைந்த இந்தச் சூழலில் பல முறை பயணம் செய்து கொள்ளையர் தலைவர்​களைச் சந்தித்துத் தகவல் திரட்​டினார் ராஜம் கிருஷ்ணன். அந்த மக்களின் வாழ்வில் கலந்திருந்த கோபத்​தையும் துரோகத்​தையும் வலியையும் அதன் நடுவில் இழையோடும் கருணை​யையும் ‘முள்ளும் மலர்ந்தது’ என்ற நாவலில் பதிவுசெய்​தார். முதல் பிரதியைப் பெற்றுக்​கொண்டு ஆச்சார்ய வினோபா அதில் கையெழுத்​திட்டுக் கொடுத்து அவரை வாழ்த்​தினார் (1974).

மனிதம் பேசிய எழுத்து:

• தூத்துக்குடி மீனவர் குடியிருப்பில் சில காலம் தங்கி​யிருந்து அந்த மக்களையும் அவர்களுடைய பொருளாதார நெருக்​கடிகளையும் அவர்களைச் சுரண்டும் நிறுவனங்​களையும் ‘அலைவாய்க் கரையில்’ (1978) நாவலில் ராஜம் கிருஷ்ணன் அடையாளம் காட்டி​யுள்​ளார். வட்டார வழக்கும் அழகியலில் தோய்ந்த விவரிப்பு​களும் அந்நாவலின் பலம்.
• தூத்துக்​குடியில் உப்பளத் தொழிலா​ளர்​களின் பிரச்​சினைகள் இவரது கவனத்​துக்கு வந்தது. தினமும் நாம் உணவில் சேர்க்கும் உப்புக்குப் பின்னால் அந்தத் தொழிலா​ளர்​களின் உழைப்பு சுரண்​டப்​படு​கிறது. கண்களைக் கூசவைக்கும் ஓர் உப்புப்​படலத்தின் மீது கொளுத்தும் வெயிலில்தான் அவர்கள் வேலை நடைபெறும்.
• காலுக்குச் செருப்பு அணிய முடியாது. பனையோலையைச் சுற்றிக்​கொள்​வார்கள். சிராய்த்த காலில் உப்புத்துகள் பட்டு எரிச்​சலைக் கொடுக்​கும். உப்பைப் பார்த்​துப்​பார்த்துக் கண்கள் கூசிப்​போகும். 40 வயதிலேயே பார்வையை இழந்து விடு​வார்கள். கூலி உயர்வுக்காக அவர்கள் நடத்தும் போராட்​டம்தான் ‘கரிப்பு மணிகள்’ (1979) நாவலின் மையப்​பொருள்.
• 1980ஆம் ஆண்டு சர்வதேசக் குழந்தைகள் ஆண்டாக அறிவிக்​கப்​பட்டது. அதற்கு இரண்டு ஆண்டுகள் முன்புதான் சிவகாசியில் பட்டாசுத் தொழிற்​சாலையில் வேலைபார்த்த குழந்தைத் தொழிலா​ளர்கள் ஒரு வேனில் பயணிக்​கும்போது ஆற்றோடு அடித்துச் செல்லப்பட்ட செய்தி வெளிவந்தது. ராஜம் கிருஷ்ணன் சிவகாசிக்கும் அதன் சுற்றுப்பு​றங்​களுக்கும் நேரில் சென்று குழந்தைத் தொழிலா​ளர்​களின் நிலையைக் கண்டறிந்து ‘கூட்டுக்​குஞ்​சுகள்’ (1980) நாவலில் பதிவுசெய்​தார்.
• மதுரை மாவட்​டத்தின் உசிலம்​பட்டி உள்ளிட்ட கிராமங்​களில் பெண் சிசுக்கள் பிறந்​தவுடன் கள்ளிப்பால் ஊற்றிக் கொல்லப்​படும் செய்தி அதிர்ச்​சி​யளிப்பதாக இருந்தது. அந்தப் பகுதி​களுக்கு நேரில் சென்று சேகரித்த செய்தி​களைக் கொண்டு ராஜம் கிருஷ்ணன் எழுதிய நாவல் ‘மண்ணகத்துப் பூந்துளிகள்’ (1988).

ஆளுமைகள் குறித்த ஆவணங்கள்:

• டாக்டர் ரங்காச்சாரி (1965), சுப்பிரமணிய பாரதி (1983), மணலூர் மணியம்மாள் (1991) ஆகிய மூன்று ஆளுமை​களைப் பற்றி வாழ்க்கை வரலாற்றுத் தகவல்​களுடன் புதின வடிவத்தில் எழுதி​யிருக்​கிறார் ராஜம் கிருஷ்ணன். மூன்றுமே மகத்தான வாழ்க்கை வரலாற்றுப் படைப்புகள். இதில் மணலூர் மணியம்மாள் என்ற பெண்மணியைப் பற்றி அவர் கள ஆய்வு செய்த​போது, அவருடன் இணைந்​து​கொள்ளும் வாய்ப்பு எனக்குக் கிடைத்தது.
• ஏற்கெனவே, ‘சேற்றில் மனிதர்கள்’ நாவலுக்​காக தஞ்சைப் பகுதியில் விவசா​யிகள் இடையே கள ஆய்வு செய்திருந்தார் ராஜம் கிருஷ்ணன். அப்போது அவர்கள் பாடிய நாட்டுப்புறப் பாடலில் மணியம்மாள் என்ற பெண்ணைப் பற்றிய பாடல் அவரது கவனத்தை ஈர்த்தது. மணியம்மாள் முதலில் காங்கிரஸ் இயக்கத்​திலும் பிறகு கம்யூனிஸ்ட் இயக்கத்​திலும் இருந்தவர் என்றும், விவசாயச் சங்கத்தில் ஈடுபாடு கொண்டவர் என்றும் சில தகவல்கள் கிடைத்தன.
• மேலும் விசாரித்த​போது, மணியம்மாள் ஒரு விதவை என்றும், தன் விதவைக் கோலத்தைத் துறந்​து​விட்டு ஆண் உடை தரித்து சைக்கிளில் பயணித்து ஊரைவிட்டு ஒதுங்கி விவசாயக் கூலிகள் மத்தியில் வாழ்ந்தார் என்றும் தெரிய​வந்தது. இரண்டு கம்யூனிஸ்ட் கட்சி அலுவல​கங்​களுக்கும் சென்று முக்கியத் தலைவர்கள் பட்டியலை ஆராய்ந்த​போது, அதில் மணியம்​மாளின் பெயர் இடம்பெற​வில்லை என்பது ராஜம் கிருஷ்ணனுக்கு அதிர்ச்​சியாக இருந்தது.
• வரலாற்றில் மூடி மறைக்​கப்பட்ட மணியம்​மாளின் வாழ்க்கையை வெளிச்​சமிட்டுக் காட்டு​வதற்​காகக் கள ஆய்வு மேற்கொண்டார் ராஜம் கிருஷ்ணன். வாலாம்பாள் என்ற இயற்பெயர் கொண்ட மணியம்மாள் ஒரு வழக்கறிஞரின் மனைவி. விதவையான பிறகு ஒடுக்​கு​முறைக்கு ஆளானார்.
• மொட்டையடிக்​கப்​பட்டு, நார்மடி உடுத்தி வாழ்ந்​தார். எந்த அமைப்பு தன்னை ஒடுக்கி​யிருக்​கிறதோ, அதே அமைப்புதான் ஏழை எளிய மக்களையும் சாதியின் பெயரால் ஒடுக்​கி​வைத்து அவர்களின் உழைப்பைச் சுரண்​டு​கிறது என்பதை உணர்ந்​து​கொண்​டார். வீட்டை​விட்டு வெளியேறினார்.
• தன் படிப்​பறிவை விவசாயக் கூலிகளின் உரிமையை நிலைநாட்டப் பயன்படுத்த உறுதி​கொண்​டார். கிராப் வெட்டிக்​கொண்​டார். வேட்டியும் தொளதொளத்த அங்கியும் அணிந்​து​கொண்​டார். பல இடங்களுக்குப் பயணிக்க வேண்டி​யிருந்​ததால் சைக்கிள் ஓட்டப் பழகிக்​கொண்​டார்.
• தங்கள் இனத்தைச் சேர்ந்த ஒரு பெண் தங்களுக்கு எதிராகச் செயல்​படு​வதைச் சகிக்க முடியாத பண்ணை​யார்கள் மணியம்மாளை மிரட்டிப் பார்த்​தார்கள். ஆள் வைத்து அடித்​தார்கள். மணியம்மாள் தற்காப்புக் கலையான சிலம்பம் கற்றுக்​கொண்​டார். அந்தக் காலத்தில் திருவாரூரிலும் அதைச் சுற்றி​யிருக்கும் கிராமங்​களி​லும், விவசா​யிகளுக்கும் பீடித் தொழிலா​ளர்​களுக்கும் சில உரிமைகளை மீட்டுக் கொடுத்​திருக்​கிறார். மணியம்மாள் என்ற வீரப் பெண்மணியின் மகத்தான வரலாறு ராஜம் கிருஷ்ணனால் ‘பாதையில் பதிந்த அடிகள்’ (1991) நாவல் மூலம் மீட்கப்​பட்டது.
• இலக்கியவாதி என்ற அடையாளத்​துக்குள் சமூக அக்கறை கொண்ட ஆய்வாளராக இயங்கியவர் ராஜம் கிருஷ்ணன். இதுவே அவரது தனித்​தன்மை. அவரது படைப்புகள் சமகால சமூக அரசியல் வரலாற்றைப் படம்பிடித்துக் காட்டும் ஆவணங்​கள்​.

நன்றி: இந்து தமிழ் திசை (05 – 11 – 2024)