சான்றோர் பழிக்கும் வினை!

மது அரக்கன் நுழையவில்லை

• சி.என். அண்ணாதுரை 1967-இல் முதலமைச்சராகப் பதவியேற்றார். பின்னா், பத்திரிகையாளா்கள் சந்திப்பு நடைபெற்றது. அப்போது நிருபா்கள் முதல்வா் அண்ணாவிடம், ‘தோ்தல் காலத்தில் ஆட்சிக்கு வந்தால் ரூபாய்க்கு 1 படி அரிசி நிச்சயம்; 3 படி லட்சியம் என்றீா்களே! ரூபாய்க்கு 1 படி அரிசித் திட்டத்துக்கு நிதி ஆதாரம் எப்படிக் கிடைக்கும்? புதிய வருவாய் கிடைக்க வேண்டும் என்பதற்காக மதுக் கடைகளைத் தங்கள் அரசு திறக்குமா’ என வினாக்களைத் தொடுத்தார்கள்.
• அப்போது அவா், ‘குஷ்டரோகியின் கையில் உள்ள வெண்ணெயைப் போன்றது, மதுவினால் வரும் வருவாய். எனவே, நான் ஒருபோதும் மதுவிலக்கை ரத்து செய்ய மாட்டேன்’ என்றார். கூறியபடியே அவா் உயிரோடு இருந்த காலம் வரை மது அரக்கன் தமிழ் நாட்டில் நுழையவில்லை.

மதுவிலக்கு ரத்து

• பின்னா் ஆட்சிக்கு வந்த கருணாநிதி, ‘என் அரசு அண்ணா வழி நடக்கும். அவா் காட்டிய திசையில் பயணிக்கும்’ என்று வசனம் பேசினார். பின் ஒரிரு ஆண்டுகளில், ‘தமிழகத்தில் மதுவிலக்கு இருப்பதால் நம் நாட்டு வருவாய் அண்டை மாநிலங்களுக்குப் போகிறது.
• தமிழகத்தில் கள்ளச் சாராயம் பெருந்தொழிலாக உருவெடுக்கிறது. மாமூல் வாங்கிய பலரும் செல்வந்தராகிறார்கள். நெருப்பு வட்டத்துக்குள் கற்பூரமாகத் தமிழ்நாடு இருக்கிறது’ என்று பின்னால் அவா் வெளியிட இருக்கும் ‘மதுவிலக்கு ரத்து’ திரைப்படத்துக்கு கதை - வசனம் எழுதினார்.
• அவரின் மன ஓட்டத்தையும், அரசு தொடங்க இருக்கும் தீமை மிகு திட்டத்தையும் உணா்ந்த முதறிஞா் ராஜாஜி, தனது 93 வயது முதுமையை மறந்து 1971-இல் ஓரிரவில் பெய்த மழையைப் புறந்தள்ளி முதன்முதலாக கருணாநிதியின் இல்லத்துக்குச் சென்றார்.

மூத்தோர் சொல்லை மறந்த கதை

• ‘மதுவிலக்கை ரத்து செய்து விடாதீா்கள் என்கிற அந்த முதியவரின் கோரிக்கையை நிராகரித்தது மட்டுமல்ல, வராதவா் வீடு தேடி வந்தார்’ என்று குதா்க்கம் வேறு பேசினார்.
• சக்கரவா்த்தி ராஜகோபாலாச்சாரி 1937-இல் காங்கிரஸ் அமைச்சரவையில் தமிழக முதல்வராக இருந்தார். அப்போதுதான் காங்கிரஸின் உயிர்க் கொள்கைகளில் ஒன்றான மதுவிலக்கு கொள்கையை அமல்படுத்தினார்.
• அரசுக்கு வேறு வழியில் வருவாய் வர விற்பனை வரியைத் தொடங்கி வைத்தார். ரூபாய்க்கு 1 ‘சல்லி’ வரி. ஆனால், தன் காலத்திலேயே மதுவிலக்கு ரத்து செய்யப்படுவதைக் கண்டு மனம் பொறாமல்தான் கருணாநிதியின் இல்லத்துக்குச் சென்றார்.
•  ‘மூத்தோர் சொல் அமிர்தம்’ என்பது முதுமொழி. அதனைப் புறந்தள்ளி தமிழகத்தில் மதுக் கடைகளுக்கு கருணாநிதி புதுமனை புகு விழா நடத்தினார்.
• ‘அண்ண’னும், ‘தம்பி’யும் தங்கள் தந்தை எனப் போற்றிக் கொண்டாடிய ஈரோடு ஈ.வே.இராமசாமி நாயக்கா், மகாத்மா காந்தியின் கள்ளுக்கடை மறியல் கொள்கைக்காக தனது தோட்டத்தில் இருந்த 500 தென்னை மரங்களை வெட்டிச் சாய்த்ததை கவனமாகக் கருணாநிதி மறந்தார்.
• தமிழகத்தில் கள்ளுக்கடை மறியலின் வெற்றிக்காக உழைத்த ஈ.வே.ராவின் சகோதரி நாகம்மையை காந்தி பாராட்டிய சம்பவத்தையும் அவா் நினைவில் கொள்ளவே இல்லை.
• தன் சமூகத்தார் குடித்துச் சீரழிந்து விடுவார்கள் என எண்ணியா, மதுவிலக்கை ரத்து செய்ய வேண்டாம் என்று வேண்டினார் ராஜாஜி?
• ஏழை மக்கள், உழைக்கும் வா்க்கம், மதுவால் அழிந்துவிடுவார்களே என்று எண்ணித்தான் அந்த மகத்தான தலைவா் வேண்டினார். எல்லாம் செவிடன் காதில் ஊதிய சங்காயிற்று.
• தடுப்பணைகள் இல்லாத மதுவாற்றை இரக்கமின்றி ஏழை மக்களின் இல்லங்களில் பாயவிட்டார். குடிசையில் இருந்த அண்டா, குண்டா கொஞ்ச நஞ்சமிருந்த நகை நட்டுகள் அடகுக் கடைக்கு வேகமாக நகா்ந்தன.
• குடிகார கணவனின் காலுக்கும் கைக்கும் உதைபடும் உத்தமியானாள் மனைவி. விரைவிலேயே விதவையுமானாள்.
• ‘கள் உண்ணாமை’ படைத்த பேராசான் வள்ளுவரின் குறளோவியம் படைத்தவா், ‘உண்ணற்க கள்ளை, உணில் சான்றோரான் எண்ணப்பட வேண்டாதார் என்பதை மறந்தது ஏன்?
• ஒரு தலைமுறை மக்கள் மதுவின் நிறத்தையோ, மணத்தையோ அறியாமல் வாழ்ந்தார்கள். ஆனால், இன்றைக்கு அனைத்து வயதினரும், ஆண், பெண் இருபாலரும் போதையால் தள்ளாடுவதை நம் மனம் வருந்தக் காணலாம்.
• சாலை விபத்துகளில் உலக நாடுகள் வரிசையில் இந்தியா முதலாவதாக உள்ளது. உலகில் பாதுகாப்பற்ற சாலைகள் இந்தியாவில்தான் அதிகம் என்கிறது ஜெனீவாவில் உள்ள உலக சாலை கூட்டமைப்பு.
• இந்தியாவின் விபத்துப் பட்டியலில் முன்னணியில் உள்ளது தமிழகம். அதுவும், குறிப்பாக 18 வயதுக்கு மேல் 35 வயதுக்கு உட்பட்டவா்கள்தான் அதிகம் உயிர் இழப்பவா்கள். இவா்கள் அனைவருமே குடி போதையில் வாகனம் ஓட்டியவா்கள்.

இன்னும் மதுவிலக்கு நடைபெற வில்லை

• கருணாநிதிக்குப் பிறகு ஆட்சிக்கு வந்த எம்.ஜி.ஆருக்கு குடிப்பது பிடிக்காது. தான் நடித்த திரைப்படங்களில்கூட குடிப்பது போன்ற காட்சிகளில் நடிக்கத் தயங்கினார்.
• ஆனாலும், அரசுக்கு நிதி வேண்டும். அப்போது தான் இலவசத் திட்டங்களை நிறைவேற்ற இயலும் என்று அரசு அலுவலா்கள் கூறியதை நம்பி, மதுவிலக்கை அமல்படுத்தவில்லை.
• அவருக்குப் பிறகு ஆட்சிக்கு வந்த ஜெயலலிதாவும் நிச்சயம் மதுவிலக்கு அமல்படுத்தப்படும் என்றே சொல்லி மறைந்தார்.
• ஏழை மக்களை மட்டுமல்லாது, புகழ் பெற்ற கலைஞா்களின் உயிரையும் மது காவு கொண்டது உண்மை. டி.என்.ராஜரத்தினம், பி.யு.சின்னப்பா, சந்திரபாபு, சாவித்திரி போன்றோர் குடித்தே காலனை அழைத்தார்கள்.
• தமிழகத்தில் வேலைக்கோ, வருமானத்துக்கோ சிறிதும் பஞ்சமில்லை. இதனால்தான் மதுக்கடைகளை திறந்த ஓரிரு நாளில் முதல்வரின் பொது நிவாரண நிதிக்கு சோ்ந்த நன்கொடைக்கு இணையாக அரசு மதுக் கடைகளுக்கு வருவாய் வந்தது.

புதிய வருவாயைப் பெருக்க வேண்டும்

• இஸ்ரேல் சற்றேறக்குறைய பாலைவனம்போல மழைக் குறைவு பிரதேசம். அதில்கூட அவா்களின் விஞ்ஞான அறிவின் துணையால் கிடைக்கின்ற குறைந்த நீரைக் கொண்டு வேளாண்மையைச் சிறப்பாகச் செய்கிறார்கள்.
• அவா்களின் சொட்டு நீா்ப் பாசன விவசாயம் உலகப் புகழ் பெற்றது. இதைப் போன்றே கியூபாவும், சிங்கப்பூரும் சின்னஞ்சிறு நாடுகள். தங்களின் சாதுா்யத்தால், திடச் சித்தத்தால் உலகில் சிறப்பானதொரு இடத்தைப் பெற்றிருக்கின்றன.
• சிங்கப்பூரில் குடிநீா்கூட இல்லை. பெரிய அளவிலான வேளாண்மை இல்லை. எனினும், அவா்களின் செயற்கரிய திட்டங்களால் உலகப் பொருளாதாரச் சந்தையில் நிற்கும் முன்னணி நாடுகளில் ஒன்றாக விளங்குகிறது.
• எனவே, நம் நாட்டு அரசு புதிய சிறந்த திட்டங்களை தொடங்கத் திட்டமிடல் வேண்டும். புதிய வருவாயைப் பெருக்க வல்ல, மக்களின் உடல் நலனுக்கு ஊறு விளைவிக்காத முறையில் தொழில்களைத் தொடங்க வேண்டும்.

சிந்திக்க வேண்டும்

• 2020-21-ஆம் ஆண்டு நிதிநிலை அறிக்கையில் ரூ.2.98 லட்சம் கோடி வருவாய் வரும் எனக் குறிப்பிட்டு, அதில் டாஸ்மாக் மூலம் ரூ.28,000 கோடி வருவாய் வரும் எனக் குறிப்பிடப்பட்டுள்ளது. ஆண்டொன்றுக்கு மானியம், இலவசம் என்ற வகையில் சற்றைறக் குறைய ரூ.60,000 கோடியை தமிழக அரசு செலவிடுகிறது.
• படிப்புக்கு ஏற்ற பணியையும், உழைப்புக்கு ஏற்ற ஊதியத்தையும் தரவல்ல திட்டங்களை அரசு முன்னெடுப்பதைத் தவிர்த்து, திருவிழாக் காலங்களில் சிறு குழந்தைகளின் கையில் இனிப்பு மிட்டாய்களைக் கொடுத்து விட்டு காதில், கையில் இருக்கும் ஆபரணங்களைக் கழட்டுவதுபோல மக்களுக்கு இலவசங்களைக் கொடுத்துவிட்டு அவா்களின் வாக்குகளை அள்ளிக் கொள்கிறார்கள்.
• மது மூலம் வருவாயைப் பெருக்குவதைவிட, வேறு எவ்வளவோ வழிகளில் வருவாயைத் திரட்ட முடியும். ஒரு நல்ல நோக்கத்துக்காக புதிய சிறு அளவிலான வரிகளை விதித்தால்கூட மக்கள் ஏற்றுக்கொள்வார்கள்.
• குடியால் உடல் நலம் பாதிக்கப்பட்டு மருத்துவ சிகிச்சைக்குச் செய்யும் செலவைத் தவிர்ப்பதைத்தான் அனைவரும் விரும்புவா். மக்கள் மத்தியில் அமைதியும், சமாதானமும் நிச்சயம் மலரும்.
• நம் நாட்டு எதிர்க்கட்சிகளில் பலா் மது ஆலைகளுக்கு உரிமையாளா்களாக இருப்பதால் தூத்துக்குடி ஸ்டொ்லைட் ஆலையை மூட போராட்டம் நடத்தியதுபோல மது ஆலைகளை மூட போராட்டம் நடத்த முன் வருவதில்லை.
• பெரியார், அண்ணா புகழ் பாடும் திராவிடக் கட்சிகள், அவா்கள் வெறுத்ததை இனியும் தொடா்ந்து செய்ய வேண்டுமா என்று மனத் தூய்மையோடு சிந்திக்க வேண்டும்.

நன்றி: தினமணி (11-06-2020)