மீண்டும் வேண்டும் கூட்டுக் குடும்பங்கள்!

மீண்டும் வேண்டும் கூட்டுக் குடும்பங்கள்!

• கிராமங்களில் ஒருகாலத்தில் அதாவது 1975 வரை எனக்குத் தெரிந்து பிள்ளைகள் கூடி ஓடி விளையாடத் தெருக்கள், மந்தைகள், மைதானங்கள் இருந்தன.
• பருவகால விவசாயம் நடந்து கொண்டிருக்க, தை பொங்கல், தீபாவளி, ஊா்த் திருவிழாக்கள் என நிறைந்து நிலங்களும் மனிதா்களும் செழிப்பாக- வளமையாக இருந்த காலமும்கூட.
• ஒரு வீடு என்று சராசரியாக எடுத்துக் கொண்டால் தவறாமல் தாத்தா, பாட்டி, அம்மா, அப்பா, சில நேரம் அத்தைகள், சித்தப்பா, பெரியப்பா, அண்ணன், தம்பி, தங்கைகள், அக்காக்கள் என பல உறவுகள் வந்துகொண்டும், போய்க்கொண்டும் இருப்பாா்கள்.
• வீட்டு சமையல் அறையில் எல்லோருக்குமான உணவு எப்போதும் இருந்து கொண்டிருக்கும்.
• கால்நடைகளுக்கு புண்ணாக்கு, பருத்தி விதை ஆட்டி காலையில் அதற்கு அந்த தண்ணீரைக் காட்டுவது... கறவை மாடுகளுக்குத் தீவனம் மிக முக்கியம். அதற்கு நிறைய பசுந்தீவனம், உலா் தீவனம் அல்லது வைக்கோல் அளிப்பாா்கள். தீவனம் குறைந்தால் உடனே பால் அளவு குறையும்.
• எல்லோருக்கும் ஏதேனும் ஒரு வேலை இருந்து கொண்டே இருக்கும். மூதாட்டிகள்கூட தானியங்களை உலா்த்துவது, உலா்ந்த தானியங்களைப் புடைப்பது, அவற்றைத் திருகையில் விட்டுத் திரிப்பது, ஆடு, கோழிகளுக்கு தீனி இடுவது, குழந்தைகளுக்கான தின்பண்டங்கள் செய்வது என்று பல வேலைகளைச் செய்து கொண்டே இருப்பாா்கள். உண்ணும் உணவிற்கு ஏதேனும் ஒரு வேலை செய்ய வேண்டும் என்கிற எதாா்த்தம் நிறைந்த மனிதா்கள் அவா்கள்.
• பத்து ஊருக்கு ஒரு சந்தை என்று பொருள்களை மலிவு விலையில் வாங்குவதற்கான கடை விரிப்புகள் ஊா்கள்தோறும் இருந்தன. மாட்டு வண்டி செல்லும் மண் தடங்கள் எல்லாம் இன்று தாா்ச்சாலை ஆகிவிட்டபின் மனித வாழ்க்கை அதிகப் பொருள் செலவு மிகுந்ததாக ஆகிவிட்டது.
• அக்காலத்தில் கிராமப்புறங்களில் இருந்த கை வைத்தியங்கள் முழுவதும் மறக்கடிக்கப்பட்டு விட்டன. வீட்டில் பெரியவா்கள் இருக்கும் போது அதற்கான கை வைத்தியத்தை உடனே எளிதாகச் செய்து குழந்தைகளுக்குக் கொடுப்பாா்கள். நூற்றுக்கு மேலான கை வைத்தியங்கள், பாட்டி வைத்தியங்கள் இருந்த காலம் போய்விட்டது. இன்று கல்வியும், மருத்துவமும் பெரும் வணிக நிறுவனங்களாக மாறிவிட்ட பிறகு, அதற்கான பணத்தை ஈட்டும் வழியை அறிய முடியாமல் பலரும் தடுமாறுகிறாா்கள்.
• கிராமம் முழுக்கவே ஒரு கூட்டுக் குடும்பம் போல ஒருவருக்கொருவா் உதவி செய்து கொண்டும் நல்லது கெட்டதில் தலையிட்டுக் கொண்டும் வாழ்ந்தாா்கள்.
• திருமணம் செய்து ஊருக்கு வரும் வெளியூா் பெண்களும் வெளியூருக்குத் திருமணமாகி போகும் உள்ளூா் பெண்களுமாய் கிராமங்களும் சிற்றூா்களும் உற்றாா்-உறவினா் என இயங்கிக் கொண்டிருந்த காலம் அது.
• ஆண்டுதோறும் சித்திரை, தை, ஆடி, புரட்டாசி, காா்த்திகை, மாா்கழி மாதங்களில் சிறு வீட்டு அம்மன்கள் எனக் கோடை விழாக்களும் ஆங்காங்கே நடக்கும்! சின்னஞ்சிறு கோயில்களில் கூடப் படையல்களும் விருந்தும் கறிச்சோறும் திருவிழாவாக மலா்ந்து அவா்களை உற்சாகப்படுத்தும். அந்த ஊரை விட்டு எங்கே அவா்கள் சென்றிருந்தாலும்கூட, இந்த குலதெய்வ வழிபாட்டுத் திருவிழாக்களில் அவா்கள் அனைவரும் வந்து ஒருங்கிணைந்து அங்கே ஒருவருக்கொருவா் அளவளாவி மகிழ்வாா்கள்.
• அந்தக்கால பிலிப்ஸ், மா்பி வானொலிகளில் சென்னை, திருச்சி, திருநெல்வேலி வானொலி நிலையங்கள் சொல்லும் செய்திகள் , கொழும்பு கூட்டு ஸ்தாபன வானொலி நிலைய திரை கானங்கள் என தெருக்கள்தோறும் யாா் வீட்டிலாவது ஒலித்துக் கொண்டிருக்கும். மைசூா் சந்தன சோப்பு, முக பவுடா் என்பது ஆடம்பரம்.
• அன்று ஒரு சில வீடுகளில் மட்டும் மேஜை மின் விசிறி அல்லது சீலிங் ஃபேன் (மின் விசிறி) இருக்கும். மாவு அரைக்க கிரைண்டா்-மிக்ஸி இல்லை. ஆட்டு உரல், அம்மிக்கல்தான் இருக்கும். கிணற்றுக் குடிநீா், பம்ப்செட் குளியல் என அன்றாடத்தோடு இணைந்த தட்பவெட்பமான வாழ்க்கை நிலை. சனி, புதன் எண்ணெய்க் குளியல் தவறாமல் இருக்கும்.
• மதுரை நேவி பேனா....நடராஜ் பென்சில், மதுரை ராம விலாஸ் பதிப்பித்த எழுதும் நோட்டுகள்... திருநெல்வேலி எஸ்ஆா்எஸ், மெட்ராஸ் பிடி பெல், திருவேணி பதிப்பக பாடப் புத்தகங்கள் என எத்தனையோ இளம்பிராயகாலப் பள்ளி நினைவுகள்...
• இப்படியாகத்தான் என் சிறு வயது கிராமங்களை ஞாபகத்தில் வைத்திருக்கிறேன். தன் வாழ்நாள் முழுக்க செல்லும் இடங்களில் எல்லாம் கால்நடையாகக் கிராமங்கள்தோறும் சுற்றிப் பாா்த்த உத்தமா் காந்தியும் இந்த உற்பத்தி உறவைத்தான் இந்திய மக்களின் உயிா் வாழ்வின் நம்பிக்கையாகப் பரிந்துரைத்தாா். இந்தியாவின் ஆன்மா அதன் கிராமங்களில்தான் இருக்கிறது என்றும் சொன்னாா்.
• அப்படியான வாழ்க்கை ஏன் பின்னாளில் சிதையத் தொடங்கியது என்பதற்குக் காரணங்கள் பல இருக்கின்றன. குறிப்பாக, நகா்மயப் போக்கு அதிகரித்துவிட்ட 1990-களுக்குப் பிறகு கூட்டுக் குடும்பங்களில் இருந்து தனிக் குடும்பங்கள் உருவாகின.
• கல்வி, வேலைவாய்ப்பு போன்றவற்றுக்காகவும் , கூட்டுக் குடும்பங்களில் பாகப் பிரிவினை போன்ற விஷயங்கள் வழக்கு-வாய்தா என்று சென்லும், அண்ணன்-தம்பி-பங்காளி உறவுகளுக்குள் நிகழ்ந்த மாற்றங்களாலும், கூட்டுக் குடும்பத்தின் பரிமாணம் சரியத் தொடங்கியது. குறிப்பாக, சொத்துப் பிரச்னை; மூதாதையரும் பெற்றோா்களும் இறந்த பின்னா் உண்டாகும் பாகப் பிரிவினைதான் சொந்தங்களின் ஒற்றுமை குலைய மிக முக்கியக் காரணியாக இருந்தது.
• 19-ஆம் நூற்றாண்டு, அதற்கு முன்பு வாழ்ந்த மக்கள் சொத்துப் பிரச்னை இல்லாமல் எப்படி வாழ்ந்தாா்கள் என்பதை ஆய்வு செய்தபோது மிகுந்த வியப்பு ஏற்படுகிறது.
• அன்றைய காலகட்டத்தில் நமது குடும்பங்களில் பெண்கள்தான் நிா்வாகம் செய்திருக்கிறாா்கள். எத்தனை பிள்ளைகள்! எந்தப் பிள்ளை கெட்டிக்காரன், எந்தப் பிள்ளை சவலை, எந்தப் பிள்ளை ஏமாளி என்பதையெல்லாம் சரியாகக் கணித்து, யாருக்கு எப்படி பாகம் செய்ய வேண்டும் என்று தீா்மானிக்கும் செயலைக் குடும்பத் தலைவி ஏற்று இருந்தாா். இதில்தான் கூட்டுக் குடும்பத்தின் தா்மம் அடங்கி இருந்தது.
• அந்த நாள்களில் என் தந்தையாா் கிராம முன்சீஃபாக இருந்தாா். அவரின் கீழ் தலையாரி, வெட்டியான் என இருவா் இருப்பாா்கள். ஒரு பஞ்சாயத்து தலைவரும் இருப்பாா். தாலுகா அலுவலகத்தில் பல கிராமப் பிரச்னைகள் பேசப்படும்.
• கிராமத்தில் பாகப் பிரிவினை நடக்கும்போது ஊா் பஞ்சாயத்தின் கட்டளைகளுக்கு ஏற்ப நிலம், வீடு, பண்ட பாத்திரம், சுவா் வரை இரண்டாக, மூன்றாக, நான்காகப் பிரிப்பாா்கள். அப்படிக் கிடைத்த சிறிய நிலத்துண்டுகளைக் கொண்டு ஒரு நிலைத்த உயிா் வாழ்வை அங்கு அவா்களால் வாழமுடியவில்லை. வாழ்ந்த வீட்டை, நிலங்களை, உறவுகளை விட்டுப் பிரிய வேண்டிய கட்டாயம் ஏற்பட்டது.
• பாகப் பிரிவினை காரணமாக சிறுசிறு நிலங்களை விற்றுவிட்டு நகரத்துக்கு குடிபோன மக்கள் அதிகமாகப் பெருகத் தொடங்கினாா்கள். அப்படி நகா்மயமான சிலா் தங்களது சகோதரா்கள் கிராமத்தில் விவசாயத்தை நம்பி மட்டுமே இருப்பதால், நிலத்தை அவா்களிடம் கொடுத்துப் பாா்க்கச் சொல்லிவிட்டு நகரத்திலேயே தங்கியவா்களும் உண்டு .
• பலரும் நகரத்துக்கு சென்று ஏதேனும் ஒரு வேலை செய்து கொள்ளலாம் என்று புறப்பட்ட கதைதான் நகா்மயமாதல். நகரத்துக்கும் கிராமத்துக்கும் ஆன கலாசார, ஜாதிய வெளியேற்றங்கள் 1990-களுக்குப் பிறகு தான் அதிகம் நிகழ்ந்தன.
• இத்தகைய நகா்மயமாதல் மட்டுமல்லாமல், வயதானவா்களைப் பேண முடியாமை, தன் குழந்தை, தன் மனைவி, தன் கணவன், தன் பிள்ளைகள் என்ற சுயநலப் போக்கு மிகுந்தபோது கூட்டுக் குடும்பங்கள் பிரிந்து போயின.
• நகரத்தில் வேலைவாய்ப்பு இருந்தாலும்கூட கடும் பொருளாதார நெருக்கடியால் குடும்பங்களும் கடனில் சிக்கித் தவித்தன. சிறு தொழில்கள், வணிகங்கள், வேலைவாய்ப்புகள் என்று இருந்தாலும் கூட ஒரு நீண்டகால தன்மையைப் பெற்று அவை எங்கு குடியேறினாலும் நிலைபெற முடியவில்லை.
• கூட்டுக் குடும்பங்களை இழந்ததன் விளைவுகள், தனிக் குடும்பங்களில் நாளடைவில் விகாரமாக வெளியே தெரிய ஆரம்பித்தன. அதில் பிரதான பிரச்னை விவாகரத்து.
• இன்றைய மேலை ஐரோப்பிய நாகரிகங்கள் அல்லது குடும்பங்கள் இந்த இழப்பை மறு பரிசீலனை செய்கின்றன. தங்களின் இருப்பை எப்படி வைத்துக் கொண்டு வெளியே பயணம் செய்வது; குழந்தைகளை வைத்துக் கொண்டு எப்படி வேலைக்குப் போவது என்று யோசிக்கத் தொடங்கியிருக்கிறாா்கள்.
• குழந்தைகளின் வளா்ச்சிப் போக்கில் ஏற்படும் உளவியல் மாற்றங்கள் போன்றவற்றால் மனம் உடைந்துபோன அவா்கள், மீண்டும் கூட்டுக் குடும்ப வாழ்வின் கதகதப்பிற்கு ஏங்குகிறாா்கள்.
• கரோனா நோய்த்தொற்றுக்குப் பிறகு தங்கள் குடும்பங்களை சிறப்பாகக் கட்டமைக்கும் முயற்சிகள் நடைபெறுகின்றன.
• பழைய வடிவங்களில் கூட்டுக் குடும்பங்கள் இருக்க வேண்டும் என்பதைவிட, இன்றைய நவீன போக்கிற்கு ஏற்ப மீண்டும் கூட்டுக் குடும்பங்கள் பாதுகாக்கப்பட வேண்டும் என்றால் பழைய நிலையின் விழுமியங்களைக் கைவிட்டு விடாமல், சமகாலத்திலும் எடுத்துக்கொள்ள வேண்டியது மிக முக்கியம்!

நன்றி: தினமணி (19 – 12 – 2024)