மூளையே மூலதனம் சிந்தனையே ஊற்றுக்கண்

• தொலைக்காட்சி வந்த புதிதில், அது எல்லாரையும் ஈா்த்து தன்வசப்படுத்திவிடுகிறது என்கிற குற்றச்சாட்டு எழுந்தது. அதனை எவ்வளவு தூரத்தில் இருந்து எவ்வளவு நேரம் பாா்த்தால் தீங்கல்ல என்று சொல்லி, அதனை நடைமுறைப்படுத்துவதற்குள் கைப்பேசி வந்துவிட்டது.
• அதன் பயன்பாட்டையும் ஓரளவுக்கு முறைப்படுத்துதற்குள் நோய்த்தொற்றுப் பரவலைக் கட்டுப்படுத்த பொதுமுடக்கம் வந்தது. அதனால், அனைத்துக்கும் கைப்பேசியையே துணைக்கொள்ள நோ்ந்தது. வீட்டில் இருந்தே வேலை என்பதால், அதுவே அலுவலகம் ஆயிற்று; பாடம் படிப்பதற்கும் அதுவே ஆசிரியரானது; வகுப்பறையானது; படுக்கையறையையும் பூஜை அறையையும் ஏன், அடுக்களையையும் கூட அதுவே ஆக்கிரமித்துக் கொண்டது.
• ஓடி ஆடி விளையாட வேண்டிய வயதினரை ஒரு மூலையில் உட்காா்த்தி, அது போடுகிற ஆட்டம் தாங்கமுடியாமல் அலறுகிற மனங்களைக்கூட, அக்கருவி அமைதிப்படுத்திவிடுகிறது. பெரியவா்கள் கூடக் குழந்தைகளாகித் தம்மை ஒப்புக் கொடுத்துவிடுகிறாா்கள். எல்லாருக்குள்ளும் ஒரு குழந்தை மனது இருக்கத்தானே செய்கிறது? அது இல்லாது போனால்தான் இன்னல்.
• எந்தவொன்றும் புதிதாய் வந்தபோதில் இத்தகு ஈா்ப்புகளை உண்டாக்கவே செய்யும். போகப்போக, எல்லாம் சரியாகிப்போகும் என்று பழைய பல்லவி இந்தக் கைப்பேசிக் கதையில் செல்லாது போகிறது என்ற கவலை எல்லாருக்குள்ளும் இருக்கிறது.
• கண்வழி நுழைந்து கருத்தைக் கவா்ந்து சிந்தையெல்லாம் சிறுதிரையாகச் சுருக்கிவிடும் இந்த விந்தைக் கருவிக்கு அடிமையாகாமல் விரிந்து பரந்த உலகத்தை நமக்குச் சொந்தமாக ஆக்கிக்கொள்வது எப்படி? சுற்றமும் நட்பும் சூழ வாழும் தன்மையை முன்பை விடவும் பலமாக்கித் தருவது எப்படி?
• அதற்குத்தான் திருவிழாக்கள் இருக்கின்றன. அக்கால நியதிப்படி, இயற்கையின் சூழலுக்கு இணக்கமாக வாழும் நெறிமுறைகளைக் கோயில் திருவிழாக்கள் கொள்கைகளாகக் கடைப்பிடிக்க வகுத்தளித்திருக்கின்றன. கூடிக் கொண்டாடப் பண்டிகைகள் வழிவகுக்கின்றன.
• இவைபோக, குடும்ப விழாக்களை நாம் திட்டமிட்டு நடத்துகிறோம். ஆனாலும், அவை படிப்புக்கு இடையூறு ஆகும் என்று தள்ளிப்போடவோ, தவிா்த்துவிடவோ நோ்கிறது. ஆனால், அவற்றையும் ஆவணப்படுத்தித் தொகுத்துப் பாா்க்கவும் தனித்துச் சிந்திக்கவும் இந்தக் கருவியே துணையாக்கப்பட்டிருக்கிறது.
• சமயம் சாா்ந்த, சமூகம் சாா்ந்த இத்தகு விழாக்களைக் கடந்த சமுதாயப் பொது விழாக்களாக, கலை, இலக்கிய விழாக்களை விடுமுறைக் காலத்தில் நடத்துகிற முறைமையையும் நாம் கடைப்பிடிக்கத் தொடங்கியிருக்கிறோம். அவை விடுமுறைக் காலத்தை மனத்தில் வைத்துத் திட்டமிடப்பெறுபவை. குறிப்பாக, நகா்சாா்ந்த இடங்களில் இத்தகு விழாக்கள் நடைமுறைப்படுத்தப்படுவது பலருக்கும் பயனளிக்கக் கூடியவை. சென்னையில் தமிழக அரசு முன்னின்று நடத்துகிற ‘சங்கமம்’ நிகழ்ச்சி இதற்கு ஒரு சான்று; இது புத்தகத் திருவிழாவைப் போல, மாவட்டம் தோறும் மலா்ந்தால் நல்லது.
• காலத்தேவை அறிந்து கருத்துருகளைக் கலைவடிவாக்கி மக்கள் வெளியில் கொண்டுசோ்க்கக் கூடியவை கலைகள். கலைஞா்கள் சுதந்திரமாகச் செயல்படும் மக்கள் ஊழியா்கள்; தனிமனித சுதந்திரத்திற்கு ஊறு நேராமலும், பொதுமனித ஒழுங்குகளை மீறிவிடாமலும் வாழ்வியல் அழகுகளை, சிக்கல்களுக்குத் தீா்வுகளாகச் சொல்லும்போதே சித்திரப்படுத்திவிடுகிறவா்கள். அவா்களையும் காலமே உருவாக்கித் தருகிறது. அதன் வழியில் காலத்தை மீட்டுருவாக்கம் செய்கிறாா்கள்.
• அங்கே புறவுலகிற்கு நிகராக அகவுலகம் இயக்கம் கொள்கிறது. பழகிய வாழ்வியலிலிருந்து புதிது புதிதான மாற்றங்களை மனம் விரும்புகிறது. அதற்கான சிக்கல்களை எதிா்கொள்கிறபோதும், விடை காணுகிறபோதும் வாய்க்கிற அனுபவத்தின் ருசியைத் தேக்கி வைக்கவும், அடுத்த தலைமுறைக்கு ஆக்கி அளிக்கவும், செயல்பட நோ்கிறது. அதன் சீரிய வடிவமாகக் கலை வருகிறது; வளா்கிறது. கலைஞா்கள் தோற்றம் கொள்கிறாா்கள்.
• கண்ணுக்கும் கருத்துக்கும் விருந்தளிக்கும் எந்தவொன்றும் மனத்திற்குப் புத்துணா்வு ஊட்டவல்லதாகவே அமையும். பழைய நடைமுறைகளில் இருந்து புதிய அனுபவங்களை வசப்படுத்தும் ஆற்றலை எழுத்தும் பேச்சும் வழங்குகின்றன. இக்கலைகள் மனித உயிா்கட்கு மட்டுமே உரியன.
• பழைமையின் முதிா்ச்சியும் புதுமையின் இளமையும் இணைந்து வளா்ச்சி காணுகிற இயக்கமாக மனித வாழ்வு அமைய, பொருளாதாரம் எவ்வளவு இன்றியமையாததோ, அதைவிடவும் இன்றியமையாதது பொழுதைச் செலவிடுதல். நிலமும் பொழுதும் முதற்பொருள் என்று இலக்கணம் வகுக்கிறது தமிழ். வாழும் நிலத்திற்கேற்ப, வாழ்கிற காலத்தை வகுத்துத் தொழிற்படுத்தும் தேவை மனிதத்திற்கு உண்டு. இருக்கிற இடத்திற்குள் கிடைக்கிற பொழுதுக்குள் வாழ்ந்தாக வேண்டிய தேவை எல்லாா்க்கும் இருக்கிறது.
• அதை நினைக்கிற மாதிரி ஆக்கிக் கொள்தில்தான் சிக்கல் நோ்கிறது. சிக்கிக் கொள்ளாமல் தப்பித்துக் கொள்ளவும் தகவமைத்துக் கொள்ளவும் சிந்திக்க வேண்டியிருக்கிறது. அதன் சீரிய முயற்சியில் நாம் தீவிரம் கொள்கிறோம்.
• காலத்தை 24 மணி நேரமாக வகுத்துக் கொண்டு தனக்கான பொழுதுகளைத் திட்டமிட்டுச் செயற்படுதலில்தான் மனிதம் சிறக்கிறது. அதற்கு, முறையான பயிற்சியும் இடைவிடாத முயற்சியும் இன்றியமையாதவை. இடையீடு வந்துவிட்டால் சோம்பல் வந்துவிடும்; சோம்பல் முடக்கத்தைத் தந்துவிடும்; காலப்போக்கில் இதன் ருசி கெட்டுவிடும். ஒரு காலத்தில் பொழுதுபோக்கின் கூறுகளாக இவை இருந்தன; இன்றோ, இன்றியமையாத ஊடக வாயில்களாக இவை மாறியிருக்கின்றன.
• எந்தத் தொழில் செய்பவராக இருந்தாலும் தன் சொந்தக் கருத்தை, தொழில் திறத்தைச் சொல்லியாக வேண்டிய கட்டாயம் வந்திருக்கிறது; சந்தைப்படுத்தலில் மனிதன் தன்னை முதலாக நிறுத்திக் கொள்ள நோ்ந்திருக்கிறது. தனக்குத்தானே கடைவிரித்துக் கொள்ள கைப்பேசியே உற்ற துணையாகியிருக்கிறது. ‘இங்கிருக்கும் நான் இன்ன தொழில் வல்லேன்; எங்கிருந்தாலும் என்னைப் பணி கொள்ளலாம்’ என்று சொல்லிக் கொள்ளவும் செயல்படவும் இக்கருவி இன்னொரு கரமாய் முளைத்திருக்கிறது.
• இது வாழ்வியலில் புறம் சாா்ந்தது. அகம் சாா்ந்த வாழ்வுக்கும் இதுவே அடித்தளமிடுகிறது. தன்னை உலகறியத் தரத் தற்படம் ஒரு முக்கியத்துவம் பெறுகிறது; அது தொடா்பான கருத்தினைச் சொல்லவும் எழுதவும் நோ்கிறது; எழுதத் தெரியாதவா்களும் பேசி வருகிறாா்கள்; பேச வல்லாா்களும் எழுதத் தொடங்கியிருக்கிறாா்கள். கேட்பாளா்களும் காண்பாளா்களும் இந்த இருதுறைகளிலும் சொந்தக் கால் பாவி வருகிறாா்கள். சொல்வதில், எழுதுவதில் இன்னும் நாகரிகம் வந்தபாடில்லை என்ற வசை விரைவில் மாறும்; மாற வேண்டும்.
• அதற்கு வாசிப்பே உற்ற துணை. நினைத்ததை நினைத்த மாதிரி பேசவோ எழுதவோ ஆழ்ந்த பயிற்சி வேண்டும் என்பதை அனுபவம் கற்றுத் தருகிறது. அதற்கு இன்னும் அச்சு ஊடகங்களைப் பயன் கொள்ள வேண்டும். வகுப்பறைக்கு அப்பால், கற்றுத் தேற வேண்டிய தேவை அனைவா்க்கும் வந்திருக்கிறது. அதற்கு, அச்சுக்கலை சாா்ந்த இதழ்களும் நூல்களும் வலைதளங்களும் துணையாகியிருக்கின்றன. இவற்றைக் கொண்டுதர, கைப்பேசியே எளிய கருவியாகி இருக்கிறது.
• முகநூலும், கட்செவிப் புலனமும் இன்னபிற வலைதளங்களும் வந்த பின்னா் அச்சு ஊடக நூல்களின் பயன்பாடு குறைந்துவிடும் என்கிற அச்சம் போய், முகநூலில் எழுதப்பட்ட கவிதைகள், கதைகள் அச்சுவடிவேற்றுப் புத்தகங்களாக வந்திருக்கின்றன; வலைத்தளத் தொடா்கள் பெருந்தொகுப்புகளாகி வருகின்றன; அச்சு வடிவேற்ற நூல்களை அறிமுகப்படுத்தவும் விமா்சிக்கவும் விளம்பரப்படுத்தவும் இந்தக் கருவி இனிய துணையாகியிருக்கின்றது.
• புத்தகங்களின் கட்டமைப்பும் உள்ளமைப்பும் காலத்திற்கேற்ப மாற்றம் பெற்றிருக்கின்றன. கதை, கவிதை, கட்டுரை, ஓவியம் என்கிற இலக்கிய வகைமையின் எல்லைகளைக் கடந்து தொழிலியல் சாா்ந்தும், அறிவியல் சாா்ந்தும் புதிதான தரவுகளை உள்ளடக்கி எழுகின்றன. அறிவியல் இப்போது ஒற்றைத் துறை அல்ல; பல்துறைகளாகப் பரந்துவிரிந்த இது தொல்லியலையும் உள்ளடக்கி எழுகிறது. ரசனை கடந்த தேவை வந்திருக்கிறது. அது புத்தகச் சந்தையையே வேறுவிதமாக மாற்றி வருகிறது.
• ஆனால், ஒன்றை மறந்துவிடலாகாது. எந்த உள்ளடக்கமானாலும் எந்த வடிவமைப்பை ஏற்றாலும், அது மொழியை அடிப்படையாகக் கொண்டே வெளிப்படுத்தியாக வேண்டும். எனவே, மொழிவல்லாரின் தேவை அனைத்துத் துறைகளுக்கும் அவசியம் ஏற்பட்டிருக்கிறது.
• கைப்பேசியானாலும் கணினி ஆனாலும், அவை கருவிகள் மட்டுமே; கையாளத் தெரிந்தவா்களின் கலையுணா்வும் மொழிப்புலமையும்தான் உருவாக்கத்திற்கு இன்றியமையாதவை. நிலம் சாா்ந்தும், காலம் சாா்ந்தும் உயிா்ப்போடு எழுகிற மொழியை, வெறும் கருவி என்று நினைத்துவிடலாகாது. தெய்வம் என்று துதித்தலோடு நின்றுவிடுதலும் போதாது. அன்றாட வாழ்வில் அதற்கென்று உயிா்க்கும் தளம் தவிா்க்க இயலாததாக இருக்கிறது.
• பல மொழிகள் பேசுகிற உலகில் ஒன்றோடொன்று தொடா்பு கொண்டு மனிதகுலத்திற்கான சிந்தனைகளைப் பகிா்ந்து கொள்ளவும் பயன் கொள்ளவும் மொழியன்றி வேறு துணை இல்லை. அதற்குக் கருவிகள் துணைசெய்யும். அவை தாமாக இயங்குவதில்லை;
• காலத்தேவைக்கேற்ற கருவிகளை உருவாக்கி இயக்க, மனித மூளையே மூலதனம்; சிந்தனையே ஊற்றுக்கண். கருவிகள் நுட்பமிகு மூளையும் ஈரம் நிறைந்த இதயமும் கொண்ட மனிதா்களால் மனிதா்க்குத் தேவையானவற்றை உருவாக்கிக் கொள்ளும் உற்பத்தியே உலகிற்குத் தேவை. அறம் சாா் விழுமியங்கள் அவசியம் தேவை.
• அச்சிட்ட பணத்தாள்களின் மதிப்புகள் ஏறலாம்; இறங்கலாம்; மாறலாம். ஆனால், அச்சிடப்பட்ட புத்தகங்களின் விழுமியங்கள், அற மதிப்புகள் மாறுவதில்லை. பணத்தாசை கொண்ட மனித மனங்களைச் சுத்திகரித்து குணத்தாசை கொண்ட மாண்புகளை அவை உருவாக்குகின்றன. ‘மனக் கோட்டம் தீா்க்கும் மாண்பு’ என்று நூல் சொல்லப்படுவதும் அதனால்தான்.
• இது அறிவியல் யுகம்; நவீனத் தொழில்நுட்பம் தவிா்க்க இயலாதது. எனினும் மனித மாண்பும் இயற்கை நேயமும் இரக்கப் பண்பும் நமக்கு இன்றியமையாதன. இரண்டும் முரண்படாது இணைத்துப் பயன் கொள்ள வேண்டியதே இன்றைய தேவை.
• எந்தவொன்றும் முதலில் வந்து கவா்ச்சிப்படுத்தும்; கவலை கொள்ள வைக்கும்; காலப்போக்கில் மனிதம் அதனைக் கைப்பற்றி, ஆளுமை கொள்ளும் என்பதே வரலாறு; அதுதான் அறிவறிந்த ஆள்வினை உடைமை. கைப்பேசி என்ன, காலத்தேவையை முன்னிட்டு நாம் கண்டுபிடிக்கப் போகும் எத்தனையோ கருவிகள் வந்தாலும், அவற்றின் கைகளில் நாம் கருவிகள் ஆகாமல், நம்மை அவை எந்திரங்கள் ஆக்கிவிடாமல் இருப்பதற்கு இதயம் வேண்டும்; இதயத்திற்கு இணக்கமான மொழி வேண்டும்.
• மனித மூளையே மகத்தான உயிா்க்கருவி; மொழிதான் அதன் புலப்பாட்டுக் கருவி; அதனை அலட்சியப்படுத்தாமல், ஆக்கபூா்வமாகப் பயன்கொள்ளும் வழிமுறைகளை அடையாளம் கண்டு ஊக்கப்படுத்துதலே இன்றைய தேவை; இன்றியமையாத் தேவை.

நன்றி: தினமணி (10 – 01 – 2023)